(vovworld)- ແຕ່ວັນທີ 5/10/2014, ກະຊວງອຸດສາຫະກຳ ແລະ ການຄ້າຫວຽດນາມ ໄດ້ນຳໃຊ້ມາດຕະການຕ້ານການຂາຍບຸບລາຄາສຳລັບຜະລິດຕະພັນເຫລັກກ້າບໍ່ເຂົົ້າໝ້ຽງຈຳນວນຫນຶ່ງທີ່ຫວຽດນາມນຳເຂົົ້າຈາກ ຈີນ, ມາເລເຊຍ, ອິນໂດເນເຊຍ ແລະ ໄຕ້ຫວັນປະເທດຈີນ ຢ່າງເປັນທາງການ. ອັດຕາພາສີຕ່ຳສຸດແມ່ນ 3,07% ແລະ ສູງສຸດແມ່ນ 37,29%. ນີ້ເປັນຄັັ້ງທຳອິດນັບແຕ່ເມື່ອເປີດປະຕູເຊື່ອມໂຍງເຂົ້າກັບຕະຫລາດໂລກ, ຫວຽດນາມ ໄດ້ນຳໃຊ້ມາດຕະການປ້ອງກັນ ດ້ວຍການຈັດວາງພາສີຕ້ານການຂາຍບຸບລາຄາ.
ເຫລັກກ້າບໍ່ເຂົ້າໝ້ຽງ ແມ່ນເຫລັກກ້າປະເພດໄດ້ນຳໃຊ້ໃນຂະແຫນງອຸດສາຫະກຳຜະລິດເຄື່ອງໃຊ້ໃນເຮືອນ, ເຄື່ອງອາໄລ່ຂອງລົດໂອໂຕ, ວັດສະດຸກໍ່ສ້າງ, ….. ປີ 2013, ບໍລິສັດ Posco VST ແລະ ຮ່ວາບີງ Inox ສະເຫນີກົມຄຸ້ມຄອງແກ້ງແຍ້ງ(ກະຊວງອຸດສາຫະກຳ ແລະ ການຄ້າຫວຽດນາມ) ສືບສວນສອບສວນກໍລະນີຂາຍບຸບລາຄາປະເພດເຫລັກກ້າບໍ່ເຂົ້າໝ້ຽງທີ່ນຳເຂົ້າຈາກ ຈີນ, ມາເລເຊຍ, ອິນໂດເຊຍ ແລະ ໄຕ້ຫວັນ ເມື່ອຂາຍອອກດ້ວຍລາຄາຕ່ຳສຸດ, ກໍ່ຄວາມເສຍຫາຍໃຫ້ແກ່ບັນດາວິສາຫະກິດຫວຽດນາມ. ພາຍຫລັງ 1 ປີແຫ່ງການສືບສວນສອບສວນ ແລະ ສົມທົບກັບປະເທດທີ 3 ເພື່ອປຽບທຽບລາຄາ, ກົມຄຸ້ມຄອງແກ້ງແຍ້ງ ໄດ້ສະຫລຸບວ່າ ບັນດາວິສາຫະກິດຂຶ້ນກັບ 4 ປະເທດ ແລະ ເຂດແຄ້ວນດັ່ງກ່າວ ໄດ້ຂາຍຜະລິດຕະພັນດ້ວຍລາຄາຕ່ຳສຸດ, ແກ້ງແຍ້ງຢ່າງບໍ່ຍຸຕິທຳເມື່ອທຽບໃສ່ບັນດາວິສາຫະຫິດຜະລິດພາຍໃນປະເທດ.
ພາບປະກອບ: internet
|
ຂໍ້ຕົກລົງນຳໃຊ້ອັດຕາພາສີຕ້ານການຂາຍບຸບລາຄາຂອງຫວຽດນາມ ແມ່ນສອດຄອ່ງກັບມາດຖານສາກົນ
ກວມເອົາ 80% ອັດຕາສ່ວນຂອງຕະຫລາດເຫລັກກ້າບໍ່ເຂົ້າໝ້ຽງທີ່ຜະລິດພາຍໃນປະເທດ, ມາຮອດປະຈຸບັນ ຍອດກຳລັງການຜະລິດຂອງບໍລິສັດ Posco VST ຮ່ວາບີງ Inox ໄດ້ຂຶ້ນເຖິງ 37.000 ໂຕນ. ເມື່ອທຽບກັບກຳລັງການຜະລິດພາຍໃນປະເທດ 400.000 ໂຕນ, ການຜະລິດເຫລັກກ້າບໍ່ເຂົ້າໝ້ຽງພາຍໃນປະເທດສາມາດຕອບສະຫນອງຄວາມຕ້ອງການນຳໃຊ້. ເຖິງຢ່າງໃດກໍຕາມ, ຄວາມຈິງ ການຜະລິດຢູ່ບັນດາວິສາຫະກິດ ມາຮອດປະຈຸບັນ ບໍ່ທັນບັນລຸສະມັດຕະພາບຕາມການອອກແບບ ຍ້ອນຕ້ອງແກ້ງແຍ້ງກັບປະລິມານເຫລັກກ້ານຳເຂົ້າຈາກບັນດາປະເທດດັ່ງກ່າວ. ສະນັ້ນ ກະຊວງອຸດສາຫະກຳ ແລະ ການຄ້າ ໄດ້ນຳໃຊ້ອັດຕາພາສີຕ້ານການຂາຍບຸບລາຄາ ແມ່ນການປະຕິບັດຕາມກົດໝາຍຂອງອົງການການຄ້າໂລກ ເພື່ອປົກປ້ອງຜົນປະໂຫຍດອັນຊອບທຳຂອງບັນດາບໍລິສັດຜະລິດຢູ່ປະເທດນັ້ນ. ໂດຍແມ່ນປະເທດເຂົ້າເປັນສະມາຊິກອົງການການຄ້າໂລກ ເມື່ອປີ 2007, ມາຮອດປະຈຸບັນ ຫວຽດນາມ ຖືກສືບສວນສອບສວນເກືອບ 100 ຄັັ້ງກ່ຽວກັບການຕ້ານການຂາຍບຸບລາຄາຈາກໂລກ, ແຕ່ນີ້ເປັນຄັ້ງທຳອິດ ຫວຽດນາມ ນຳໃຊ້ອັດຕາພາສີຕ້ານການຂາຍບຸບລາຄາສຳລັບປະເພດສິນຄ້ານຳເຂົ້າຈາກຕ່າງປະເທດ. ທ່ານ ໂຮ່ເຫງ໋ຍຢູງ, ປະທານສະຫະສະມາຄົມເຫລັກກ້າຫວຍດນາມ, ຖືວ່າ ຂໍ້ຕົກລົງຂອງກະຊວງອຸດສາຫະກຳ ແລະ ການຄ້າ ແມ່ນຊັດເຈນ ແລະ ລະມັດລະວັງ, ສອດຄ່ອງກັບມາດຖານສາກົນ.
“ ຕາມທັດສະນະຂອງສະຫະສະມາຄົມ, ນີ້ແມນ່ວຽກງານທີ່ຈຳເປັນຕາມທຳນຽມ ສາກົນເພື່ອປົກປ້ອງການຜະລິດຢູ່ພາຍໃນປະເທດ, ປົກປ້ອງສິນຄ້າປະເພດເຫຼັກກ້າຢູ່ພາຍໃນປະເທດທີ່ສາມາດຜະລິດໄດ້. ຄວນມີນະໂຍບາຍພາສີອາກອນທີ່ ເໝາະສົມເພື່ອໃຫ້ນັກລົງທຶນທັງຢູ່ພາຍໃນ ແລະ ຕ່າງປະເທດລົງທຶນເຂົ້າຫວຽດນາມ. ຖ້າຫາກນຳເຂົ້າດ້ວຍລາຄາທີ່ເໝາະສົມນັ້ນ, ກໍແມ່ນການແກ່ງແຍ້ງທີ່ສົດໃສໂດຍຈຳເປັນ, ແຕ່ຖ້າຫາກນຳເຂົ້າດ້ວຍລາຄາຖືກ ແລະ ບຸບລາຄານັ້ນ, ແມ່ນບໍ່ໄດ້, ຕ້ອງຖືກປັບໄໝລົງໂທດ.
ນຳໃຊ້ອັດຕາພາສີອາກອນຕ້ານການຂາຍບຸບລາຄາເພື່ອສ້າງສະພາບ ແວວລ້ອມແກ່ງແຍ້ງທີ່ຍຸດຕິທຳ.
ເມື່ອທຽບໃສ່ໜ້າພຽງລວມຂອງໂລກ, ອັດຕາພາສີອາກອນຕ້ານການຂາຍບຸບລາຄາໂດຍກະຊວງອຸດສາຫະກຳການຄ້າຍົກອອກມາ ແມ່ນບໍ່ສູງເກີນໄປ. ໃນບັນດາກໍລະນີຕ້ານການຂາຍບຸບລາຄາສຳລັບສິນຄ້າປະເພດເຫຼັກກ້າໃນໂລກເມື່ອມໍ່ມານີ້, ທຳມະດາແລ້ວແມ່ນແຕ່ 20 ຫາ 30%, ຫຼືມີກໍລະນີຂຶ້ນເຖິງ 100%. ທ່ານນາງ ຝ້າມເຈົາຢາງ, ຜູ້ຕາງໜ້າກົມຄຸ້ມຄອງການແກ່ງແຍ້ງ- ກະຊວງອຸດສາຫະກຳການຄ້າ ຢືນຢັນວ່າ ຈຸດປະສົງຂອງການ ນຳໃຊ້ອັດຕາພາສີອາກອນຕ້ານການຂາຍບຸບລາຄາ ແມ່ນບໍ່ພຽງແຕ່ເພື່ອປົກປ້ອງການຜະລິດຢູ່ພາຍໃນປະເທດເທົ່ານັ້ນ, ຫາກສຳຄັນກວ່ານັ້ນ, ແມ່ນສ້າງການແກ່ງແຍ້ງຢ່າງຍຸດຕິທຳລະຫວ່າງສິນຄ້ານຳເຂົ້າຫວຽດນາມພວມຖືກຂາຍບຸບລາຄາ ກັບສິນຄ້າຜະລິດຢູ່ພາຍໃນປະເທດ. ທ່ານນາງ ຝ້າມເຈົາຢາງ, ຜູ້ຕາງໜ້າກົມຄຸ້ມຄອງການແກ່ງແຍ້ງ- ກະຊວງອຸດສາຫະກຳການຄ້າກ່າວວ່າ:
“ ການກະທຳຂາຍບຸບລາຄາ ແມ່ນເມື່ອຕ່າງປະເທດຕັ້ງໃຈແນໃສ່ຈຸດໝາຍສົ່ງອອກຂາຍໃຫ້ຫວຽດນາມດ້ວຍລາຄາຕ່ຳ. ເພາະສະນັ້ນ, ອົງການສືບສວນບັນດາປະເທດຈັດວາງອັດຕາພາສີອາກອນຕ້ານການຂາຍບຸບລາຄາເພື່ອມີການແກ່ງແຍ້ງຢ່າງຍຸດຕິທຳ. ປະຈຸບັນ, ມີຫຼາຍປະເທດສົ່ງເຫຼັກກ້າມາຂາຍໃຫ້ຫວຽດນາມ, ແຕ່ໃນກໍລະນີນີ້ ມີພຽງ 4 ປະເທດ ແລະ ເຂດແຄ້ວນຖືກຈັດວາງອັດຕາພາສີອາກອນຕ້ານການຂາຍບຸບລາຄາ, ດັ່ງນັ້ນວິສາຫະກິດຢູ່ພາຍໃນປະເທດທີ່ບໍ່ຢາກຊຶ້ສິນຄ້າຂອງບັນດານັກຜະລິດພາຍໃນປະເທດ, ກໍອາດຈະນຳເຂົ້າຈາກແຫຼ່ງອື່ນໆ ໂດຍບໍ່ຖືກເສຍພາສີອາກອນຕ້ານການຂາຍບຸບລາຄາ”
ໄລຮອດຈຸດເວລານີ້, ເຫຼັກກ້າບໍ່ເຂົ້າໝ້ຽງແມ່ນຜະລິດຕະພັນນຳເຂົ້າຫວຽດນາມປະເພດທີ 3 ຖືກຟ້ອງຮ້ອງ, ແຕ່ນີ້ແມ່ນສິນຄ້າປະເພດທຳອິດຖືກນຳໃຊ້ອັດຕາພາສີອາກອນຕ້ານການຂາຍບຸບລາຄາຢູ່ຫວຽດນາມ. ໃນສະພາບຫວຽດນາມພວມເພີ່ມທະວີການເປີດປະຕູຕະຫຼາດຜ່ານບັນດາສັນຍາການຄ້າເສລີນັ້ນ, ການຟ້ອງຮ້ອງຂາຍບຸບລາຄາໄດ້ຮັບການຕີລາຄາວ່າແມ່ນໜຶ່ງໃນສາມເຄື່ອງມືທີ່ຖືກຕ້ອງຕາມກົດໝາຍ ແລະ ມີຜົນປະໂຫຍດຊຶ່ງວິສາຫະກິດສາມາດນຳໃຊ້ເພື່ອປົກປ້ອງຕະຫຼາດພາຍໃນຂອງຕົນ.