ກອງປະຊຸມບັນດານັກອຸປະຖຳສາກົນໄດ້ຖືກຈັດຂຶ້ນຢູ່ນະຄອນຫຼວງ ກາຍໂຣປະເທດອີຢິບເມື່ອວັນທີ 12/10 ໄດ້ແຜ່ບໍລິຈາກເງິນເປັນຈຳນວນ 5,4 ຕື້ USD ໃຫ້ແກ່ກິດຈະການສ້າງສາເຂດກາຊາຄືນໃໝ່. ບັນດານັກອຸປະຖຳຍັງໃຫ້ຄຳໝັ້ນສັນຍາວ່າ ຈະປ່ອຍບັນດາບ້ວງເງິນຊ່ວຍເຫຼືອໂດຍໄວ. ນີ້ອາດຈະຮັບຖືວ່າ ແມ່ນຜົນສຳເລັດກ່ຽວກັບການລະດົມແຫຼ່ງທຶນເພື່ອຊ່ວຍຊາວ ປາແລັດສະຕິນຢູ່ເຂດ ກາຊາ ຟື້ນຟູການດຳລົງຊີວິດ ແລະ ເສດຖະກິດ, ແຕ່ສັງເກດລວມແລ້ວ, ຫາງສຽງຍັງຄົງວິຕົກກັງວົນກ່ຽວກັບປະສິດທິຜົນແທ້ຈິງຂອງ ກິດຈະການສ້າງສາເຂດກາຊາຄືນໃໝ່ນີ້ ຂະນະທີ່ຍັງປະສົບກັບສິ່ງທ້າທາຍນາໆປະການ.
ຊາກຫັກພັງຢູ່ເຂດກາຊາ ພາຍຫຼັງຖືກບຸກໂຈມຕີທາງອາກາດ |
ເຂດກາຊາ ຖືກທຳລາຍຢ່າງໜັກໜ່ວງພາຍຫຼັງບັ້ນບຸກໂຈມຕີຂອງອິດສະຣາແອນທີ່ດຳເນີນເປັນເວລາ 50 ວັນໂດຍໃສ່ຊື່ວ່າ “ ປົກປັກຮັກສາຊາຍແດນ ”ເມື່ອເດືອນ 7 ແລະ ເດືອນ 8 ທີ່ຜ່ານມາ. ມີຜູ້ເສຍຊີວິດກວ່າ 2 ພັນຄົນ ແລະ ກວ່າ 1 ແສນຄົນຖືກສູນເສຍເຮືອນຢູ່. ຈຳນວນຜູ້ວ່າງງານໄດ້ເພີ່ມຂຶ້ນຢ່າງກະໂດດຂັ້ນ. ໄພອຶດຫິວໄດ້ເກີດຂຶ້ນຢູ່ທົ່ວທຸກແຫ່ງຍ້ອນການຜະລິດອຶດອາດຊັກຊ້າ ໃນຂະນະທີ່ແຫຼ່ງສະໜອງທັນຍາຫານ, ອາຫານ ແມ່ນບໍ່ເປັນປົກກະຕິ
ໃນຈຳນວນເງິນຊ່ວຍເຫຼືອ 5,4 ຕື້ USD, ກາຕາໄດ້ໝັ້ນໝາຍປະກອບສ່ວນ 1 ຕື້ USD . ສະຫະພາບເອີລົບປະກາດຈາຍເງິນ 568 ລ້ານ USD . UAE ແລະ ຄູເວດຊ່ວຍເຫຼືອ ປະເທດລະ 200 ລ້ານ USD . ອາເມລິກາຕົກລົງຊ່ວຍເຫຼືອ 212 ລ້ານ USD .
ດຳເນີນບັນດາການເຄື່ອນໄຫວສ້າງສາຄືນໃໝ່
ພາຍຫຼັງດຳເນີນກອງປະຊຸມເປັນເວລາ 2 ວັນ, ວັນທີ 14/10, ທ່ານເລຂາທິ ການໃຫຍ່ ສ.ປ.ຊ Ban Ki – moon ໄດ້ໄປຮອດ ເຂດກາຊາເພື່ອດຳເນີນບັນດາການເຄື່ອນໄຫວສ້າງສາເຂດນີ້ຄືນໃໝ່ ໂດຍພາຍໃຕ້ການຕິດຕາມກວດກາຂອງ ສ.ປ.ຊ. ທ່ານເລຂາທິການໃຫຍ່ ສ.ປ.ຊ Ban Ki – moon ເນັ້ນໜັກວ່າ ສ.ປ.ຊ ສະໜັບສະໜູນຊາວ ປາແລັດສະຕິນໃນກິດຈະການພັດທະນາເສດຖະກິດ ແລະ ມຸ່ງໄປສູ່ອະນາຄົດທີ່ດີງາມກວ່າ, ພ້ອມກັນນັ້ນ, ກຳປັ່ນຖ້ຽວທຳອິດບັນທຸກວັດສະດຸກໍ່ສ້າງ ຫາກໍໄດ້ຮັບອະນຸຍາດເຂົ້າເຂດກາຊາ. ໃນໄລຍະຢູ່ຢ້ຽມຢາມເຂດກາຊາ, ທ່ານເລຂາທິການໃຫຍ່ ສ.ປ.ຊ Ban Ki – moon ກໍໄດ້ພົບປະກັບບັນດາສະມາຊິກໃນຄະນະລັດຖະບານ ປາແລັດສະຕິນ ແລະ ຄາດວ່າຈະປະກາດວິວັດການສ້າງສາເຂດກາຊາຄືນໃໝ່.
ກ່ອນໜ້ານັ້ນ, ລັດຖະມົນຕີການຕ່າງປະເທດນອກແວ Borge Brende ໄດ້ເປັນປະທານຮ່ວມກອງປະຊຸມ ສ້າງສາເຂດກາຊາຄືນໃໝ່ ກັບອີຢິບ, ປະກາດເງິນຊ່ວຍເຫຼືອຈຳນວນເຄິ່ງໜຶ່ງ ແມ່ນນຳໃຊ້ໃຫ້ແກ່ ສ້າງສາເຂດດິນແຄມທະເລຄືນໃໝ່. ເງິນຈຳນວນທີ່ຍັງເຫຼືອ ແມ່ນອາດຈະຖືກໃຊ້ເພື່ອໜູນຊ່ວຍງົບປະມານ, ຊຸກຍູ້ການເຄື່ອນໄຫວເສດຖະກິດ, ຊ່ວຍບັນເທົາທຸກດ່ວນ ….
ໄລຍະຫ່າງວລະຫວ່າງກິດຈະການສ້າງສາຄືນໃໝ່ ແລະ ສະພາບຕົວຈິງ.
ໃນຂະນະທີ່ບັນດາປະເທດໝັ້ນໝາຍຊ່ວຍເຫຼືອ ເພື່ອຊ່ວຍກໍ່ສ້າງເຮືອນຊານ ແລະ ບັນເທົາຄວາມທຸກຍາກໃຫ້ແກ່ປະຊາຊົນຢູ່ ເຂດກາຊານັ້ນ, ມາດຕະການແກ້ໄຂດ້ານການເມືອງຢ່າງໝັ້ນຄົງໃຫ້ແກ່ການປະທະກັນເປັນປະຈຳລະຫວ່າງ ຮ່າມາດ ແລະ ອິດສະຣາແອນ ຍັງຄົງບໍ່ບັນລຸໄດ້. ນີ້ຖືກຖືວ່າ ແມ່ນສິ່ງທ້າທາຍອັນໃຫຍ່ຫຼວງທີ່ສຸດສຳລັບວິວັດການ ສ້າງສາເຂດກາຊາຄືນໃໝ່. ບັນດານັກອຸປະຖຳທັງໝົດໄດ້ຍອມຮັບວ່າ ບັນດາຄວາມມານະພະຍາຍາມຂອງເຂົາເຈົ້າຈະແມ່ນໄຮ້ຜົນປະໂຫຍດ ຖ້າຫາກວ່າບໍ່ມີພື້ນຖານສັນຕິພາບຍາວນານລະຫວ່າງ ປາແລັດສະຕິນ ແລະ ອິດສະຣາແອນ. ດັ່ງນັ້ນ ພ້ອມກັບຄຳໝັ້ນສັນຍາດ້ານການເງິນໃຫ້ແກ່ກິດຈະການ ສ້າງສາເຂດກາຊາຄືນໃໝ່, ກອງປະຊຸມຍັງເນັ້ນໜັກເຖິງຄວາມຈຳເປັນຕ້ອງຊຸກຍູ້ວິວັດທະນາການເຈລະຈາລະຫວ່າງ ປາແລັດສະຕິນ ແລະ ອິດສະຣາແອນ ແນໃສ່ກ້າວໄປສູ່ສັນຍາສັນຕິພາບຍາວນານໃຫ້ແກ່ການປະທະກັນ. ໂດຍມີຄວາມເປັນຫ່ວງກັງວົນເຊັ່ນກັນ, ດັ່ງນັ້ນພາຍຫຼັງດຳເນີນກອງປະຊຸມເປັນເວລາ 1 ວັນ, ວັນທີ 13/10, ທ່ານເລຂາທິການໃຫຍ່ ສ.ປ.ຊ Ban Ki – moon ໄດ້ຮຽກຮ້ອງປາແລັດສະຕິນ ແລະ ອິດສະຣາແອນ ຟື້ນຟູວິວັດທະນາການເຈລະຈາລະຫວ່າງ 2 ຝ່າຍຊຶ່ງພວມອຶດອາດຊັກຊ້າໃນເວລາທີ່ຜ່ານມາ, ພ້ອມທັງກ່າວເຕືອນສະພາບການໃຊ້ຄວາມຮຸນແຮງທີ່ອາດຈະເກີດຂຶ້ນຄືນໃໝ່ ຖ້າຫາກ 2 ຝ່າຍບໍ່ບັນລຸໄດ້ຂໍ້ຕົກລົງກ່ຽວກັບບັນຫານີ້ .
ປະຈຸບັນ, ຫາງສຽງຍັງສະແດງຄວາມວິຕົກກັງວົນກ່ຽວກັບກໍລະນີບໍ່ຮັບການຊ່ວຍເຫຼືອດ້ານການເງິນຢ່າງຄົບຖ້ວນ, ເພາະໃນຕົວຈິງ ນີ້ບໍ່ແມ່ນກອງປະຊຸມ ສ້າງສາເຂດກາຊາຄືນໃໝ່ຄັ້ງທຳອິດ. ດັ່ງນັ້ນໃນກອງປະຊຸມພິເສດຂອງສະມັດຊາໃຫຍ່ ສ.ປ.ຊ ເມື່ອວັນທີ 6/8ທີ່ຜ່ານມາ, ທ່ານເລຂາທິການໃຫຍ່ ສ.ປ.ຊ Ban Ki – moon ໄດ້ຖະແຫຼງວ່າ ສ.ປ.ຊ ພ້ອມແລ້ວຊ່ວຍ ສ້າງສາເຂດກາຊາຄືນໃໝ່, ແຕ່ຄັ້ງນີ້ແມ່ນຄັ້ງສຸດທ້າຍ. ທ່ານເລຂາທິການໃຫຍ່ ສ.ປ.ຊ Ban Ki – moon ຍັງກ່າວເຕືອນຄວາມມານະອົດທົນຂອງໂລກທີ່ມີຕໍ່ທັງ ອິດສະຣາແອນ ແລະ ປາແລັດສະຕິນ ກໍພວມຖືກທ້າທາຍ ແລະ ຮຽກຮ້ອງໃຫ້ທຸກຝ່າຍຈົ່ງມຸ່ງໄປສູ່ສັນຕິພາບຍາວນານ.
ກິດຈະການ ສ້າງສາເຂດກາຊາຄືນໃໝ່ຍັງປະສົບກັບສິ່ງກີດຂວາງຂະນະທີ່ ທຸກໆຄວາມມານະພະຍາຍາມໃດໆກໍຖືກຈຳກັດຍ້ອນຄຳສັ່ງປິດລ້ອມຂອງ ອິດສະຣາແອນ, ຊຶ່ງເຄີຍໄດ້ຈັດວາງນັບຕັ້ງແຕ່ກຸ່ມຮາມາດ ກຳອຳນາດເມື່ອປີ ຶ2007. ອິດສະຣາແອນ ໄດ້ຈຳກັດຢ່າງເຄັ່ງຄັດສຳລັບການໄປມາ ແລະ ຈໍລະຈອນຂອງຄົນ ແລະ ສິນຄ້າຢູ່ຊາຍແດນກາຊາ, ພິເສດແມ່ນການນຳເຂົ້າຊີມັງ ແລະ ວັດສະດຸກໍ່ສ້າງເພາະມີຄວາມຢ້ານກົວວ່າ ບັນດາມືປືນຈະນຳໃຊ້ເຂົ້າໃນການກໍ່ສ້າງຖານຍິງລູກສອນໄຟ ແລະ ລະບົບທາງອຸໂມງຂ້າມຊາຍແດນ. ຕໍ່ໜ້າຄວາມຫຍຸ້ງຍາກນີ້, ຄະນະກຳມະການເສດຖະກິດປາແລັດສະຕິນ ກ່ຽວກັບການຄົ້ນຄ້ວາ ແລະ ພັດທະນາ ປະເມີນວ່າ ກິດຈະການສ້າງສາເຂດກາຊາຄືນໃໝ່ ຕ້ອງໃຊ້ເວລາເຖິງ 5 ປີຈຶ່ງສຳເລັດ ຖ້າຫາກ ອິດສະຣາແອນຍົກເລີກຄຳສ່ັງປິດລ້ອມເຂດກາຊາທັງໝົດ.
ບ້ວງເງິນຊ່ວຍເຫຼືອຂອງສາກົນ ແມ່ນສາມາດຊ່ວຍປະຊາຊົນຢູ່ເຂດກາຊາຜ່ານຜ່າຄວາມຫຍຸ້ງຍາກໄດ້ສ່ວນໃດສ່ວນໜຶ່ງປະຈຸບັນ, ແຕ່ມັນບໍ່ອາດນຳມາເຊິ່ງການດຳລົງຊີວິດທີ່ສະຫງົບສຸກ ແລະ ມີສະຖຽນລະພາບໄດ້, ຂະນະທີ່ສັນຍາຢຸດຍິງຖາວອນ, ການຢຸດຕິການປິດລ້ອມລະຫວ່າງ ອິດສະຣາແອນ ແລະ ປາແລັດ ສະຕິນ ຍັງບໍ່ທັນບັນລຸໄດ້. ຄາດວ່າ ການເຈລະຈາຮອບໃໝ່ລະຫວ່າງ ອິດສະຣາແອນ ແລະ ປາແລັດສະຕິນກ່ຽວກັບການຊອກຫາສັນຕິພາບຍາວນານໃຫ້ແກ່ເຂດກາຊາ ຈະຖືກດຳເນີນໃນທ້າຍເດືອນ 10 ຢູ່ ກາຍໂຣ. ແຕ່ການບັນລຸໄດ້ບາດກ້າວໃໝ່ທີ່ ການເຈລະຈາຮອບນີ້ ເບິ່ງຄືວ່າ ຈະບໍ່ປະຕິບັດໄດ້ຢ່າງງາຍດາຍ ຂະນະທີ່ທັງ 2 ຝ່າຍຍັງມີຄວາມບໍ່ລົງລອຍກັນຫຼາຍຢ່າງ.