ເນື່ອງໃນໂອກາດຕົ້ນລະດູບານໃໝ່ປີ 2012, ທ່ານນາຍົກລັດຖະມົນຕີ ຫງວຽນເຕິນຢຸງ ໄດ້ມີບົດຂຽນທີ່ມີຫົວຂໍ້ວ່າ: “ສ້າງສຳເລັດລະບອບເສດຖະກິດການຕະຫຼາດຕາມການກຳນົດທິດສັງຄົມນິຍົມ, ຊຸກຍູ້ການສ້າງໂຄງປະກອບພື້ນຖານເສດຖະກິດຄືນໃໝ່, ຫັນປ່ຽນຮູບແບບການເຕີບໂຕ“.
ຂື້ນຕົ້ນບົດຂຽນ, ທ່ານນາຍົກລັດຖະມົນຕີ ໄດ້ຊີ້ແຈ້ງວ່າ, ເອກະສານຂອງກອງປະຊຸມໃຫຍ່ຄັ້ງທີ XI ຂອງພັກ ໄດ້ກຳນົດຢ່າງຈະແຈ້ງວ່າ, ການສ້າງໂຄງປະກອບພື້ນຖານເສດຖະກິດຄືນໃໝ່, ຫັນປ່ຽນຮູບແບບການເຕີບໂຕເພື່ອຮັບປະກັນການພັດທະນາຢ່າງວ່ອງໄວ ແລະ ໝັ້ນຄົງ. ປະຖົມປັດໃຈເພື່ອປະຕິບັດໜ້າທີ່ດັ່ງກ່າວໃຫ້ສຳເລັດຜົນ ແມ່ນຕ້ອງຜັນຂະຫຍາຍ 3 ຍຸດທະສາດບຸກທະລຸ, ໃນນັ້ນການສ້າງສຳເລັດລະບອບເສດຖະກິດການຕະຫຼາດໃຫ້ສຳເລັດ ທັງແມ່ນຂອດບຸກທະລຸທີ່ເປັນກຸນແຈ, ທັງມີການກະທົບໂດຍກົງເຖິງວິວັດການສ້າງໂຄງປະກອບພື້ນຖານເສດຖະກິດຄືນໃໝ່ ແລະ ຫັນປ່ຽນຮູບແບບການເຕີບໂຕ.
ພາຍຫຼັງ 20 ປີ ແຫ່ງການປະຕິບັດແນວທາງແຫ່ງການປ່ຽນແປງໃໝ່, ເຖິງວ່າຫວຽດນາມສາມາດບັນລຸໄດ້ຜົນງານສຳຄັນຫຼາຍຢ່າງໃນການສ້າງ ລະບອບເສດຖະກິດການຕະຫຼາດຕາມການກຳນົດທິດສັງຄົມນິຍົມກໍ່ຕາມ, ແຕ່ລະບອບນັ້ນຍັງບໍ່ທັນຄົບຊຸດເທື່ອ, ບັນດາປັດໃຈຂອງເສດຖະກິດການຕະຫຼາດຍັງບໍ່ທັນເປັນຮູບປະທຳຢ່າງຄົບຖ້ວນ. ຈາກພຶດຕິກຳຕົວຈິງນີ້, ໃນປີ 2012, ຕ້ອງສຸມກຳລັງແຮງເພື່ອສ້າງສຳເລັດລະບອບເສດຖະກິດການຕະຫຼາດຕາມທັດສະນະ ເຊິ່ງກອງປະຊຸມໃຫຍ່ຄັ້ງທີ XI ຂອງພັກໄດ້ກຳນົດ. ທ່ານນາຍົກລັດຖະມົນຕີ ຖືວ່າ, ອີງໃສ່ຈຸດພິເສດຂອງລະບອບເສດຖະກິດການຕະຫຼາດທີ່ທັນສະໄໝ ເພື່ອເປັນມາດຖານໃຫ້ແກ່ວິວັດການສ້າງລະບອບເສດຖະກິດການຕະຫຼາດໃຫ້ສຳເລັດ. ບັນດາຈຸດພິເສດທີ່ເປັນພື້ນຖານຂອງລະ ບອບເສດຖະກິດການຕະຫຼາດທີ່ທັນສະໄໝລວມມີ. ທີ 1 ແມ່ນ, ບັນດາຕະຫຼາດພັດທະນາຢ່າງຄົບຊຸດ, ບັນດາປັດໃຈຂອງເສດຖະກິດການຕະຫຼາດຄົບຊຸດ, ມີການເຄື່ອນໄຫວຢ່າງສະໝ່ຳສະເໝີ, ແລະ ໜູນຊ່ວຍເຊິ່ງກັນ ແລະ ກັນ. ທີ2 ແມ່ນ, ລະບອບເສດຖະກິດການຕະຫຼາດທີ່ທັນສະໄໝ ຮຽກຮ້ອງຕ້ອງສ້າງຕະຫຼາດທີ່ມີການແກ່ງແຍ້ງຢ່າງສະເໝີພາບລະຫວ່າງບັນດາພື້ນຖານເສດຖະກິດທີ່ເຂົ້າຮ່ວມທຳການເຄື່ອນໄຫວໃນທ້ອງຕະຫຼາດ. ທີ 3 ແມ່ນ, ປະຕິບັດຢ່າງເປີດເຜີຍ, ກະຈ່າງແຈ້ງ ແລະ ມີຄວາມຮັບຜິດຊອບໃນການອະພິປາຍກ່ຽວກັບບັນດານະໂຍບາຍຄຸ້ມຄອງ, ບັນດາໂຄງການພັດທະນາ ກໍ່ຄືໃນການເຄື່ອນໄຫວຂອງບັນດາບໍລິສັດດຳເນີນທຸລະກິດ. ທີ 4 ແມ່ນ, ລະບອບເສດຖະກິດການຕະຫຼາດທີ່ທັນສະໄໝໃນເງື່ອນໄຂໂລກາພິວັດ ແລະ ເຊື່ອມໂຍງເຂົ້າກັບເສດຖະກິດສາກົນທີ່ນັບມື້ນັບເລິກເຊິ່ງ ແລະ ກວ້າງຂວາງ ຮຽກຮ້ອງໃຫ້ກຳນົດຄືນສາຍພົວພັນລະຫວ່າງລັດກັບຕະຫຼາດ. ແລະ ສຸດທ້າຍແມ່ນ ພື້ນຖານເສດຖະກິດການຕະຫຼາດທີ່ທັນສະໄໝຕ້ອງມຸ້ງໄປສູ່ຜູ້ຊົມໃຊ້, ຖືຜູ້ຊົມໃຊ້ເປັນເປົ້າໝາຍໃນການພັດທະນາ. ຕ້ອງປັບປຸງບັນດາລະບຽບກົດໝາຍວ່າດ້ວຍການປົກປ້ອງສິດຜົນປະໂຫຍດຂອງຜູ້ຊົມໃຊ້ຢ່າງບໍ່ຢຸດຢັ້ງ, ພັດທະນາບັນດາສູນປົກປ້ອງສິດຂອງຜູ້ຊົມໃຊ້. ລະບອບເສດຖະກິດການຕະຫຼາດທີ່ທັນສະໄໝ ດ້ວຍບັນດາຈຸດພິເສດດັ່ງກ່າວ ຈະສ້າງເງື່ອນໄຂ ເພື່ອໃຫ້ປະເທດໝູນໃຊ້ກາລະໂອກາດ, ຜ່ານຜ່າການທ້າທາຍໃນສະພາບໂລກາພິວັດທີ່ນັບມື້ນັບເລິກເຊິ່ງ ກວ້າງຂວາງ ແລະມີການແກ່ງແຍ້ງຢ່າງຂ້ຽວຂາດ.ທ່ານນາຍົກລັດຖະມົນຕີ ຫງວຽນເຕິນຢຸງ ຖືວ່າ, ບົນພື້ນຖານບັນດາຈຸດພິເສດຂອງລະບອບເສດຖະກິດການຕະຫຼາດທີ່ທັນສະໄໝນັ້ນ. ຫວຽດນາມກໍ່ສ້າງບັນດາຂອດບຸກທະລຸຍຸດທະສາດ, ປະຖົມປັດໃຈຂອງການສ້າງໂຄງປະກອບພື້ນຖານເສດຖະກິດຄືນໃໝ່, ຫັນປ່ຽນຮູບແບບເຕີບໂຕ. ບົນພື້ນຖານວິໄສທັດຂອງຍຸດທະສາດພັດທະນາເສດຖະກິດ - ສັງຄົມ 2011 – 2020, ກອງປະຊຸມຄັ້ງທີ 3 ຄະນະບໍລິຫານງານສູນກາງຊຸດທີ XI ໄດ້ຮຽກຮ້ອງໃຫ້ປະຕິບັດການສ້າງໂຄງປະກອບພື້ນຖານເສດຖະກິດຄືນໃໝ່, ຫັນປ່ຽນຮູບແບບເຕີບໂຕໃນໄລຍະ 2011-2015. ຈຸດໝາຍຂອງການສ້າງໂຄງປະກອບພື້ນຖານເສດຖະກິດຄືນໃໝ່, ຫັນປ່ຽນຮູບແບບເຕີບໂຕ ແມ່ນຊຸກຍູ້ການຫັນປ່ຽນໂຄງປະກອບເສດຖະກິດ ແລະໂຄງປະກອບບັນດາຂະແໜງຜະລິດ, ການບໍລິການຕາມຄວາມຮຽກຮ້ອງຕ້ອງການຍົກສູງສະມັດຕະພາບ, ຄຸນນະພາບ , ປະສິດທິຜົນ ແລະ ກຳລັງແກ່ງແຍ້ງຢູ່ຕະຫຼາດພາຍໃນ ແລະ ສາກົນ ເພື່ອສາມາດເຂົ້າຮ່ວມບັນດາຂັ້ນຕອນທີ່ມີມູນຄ່າສູງໃນເຄືອຂ່າຍການຜະລິດ ແລະສະໜອງຂອງພາກພື້ນ ແລະ ທົ່ວໂລກ. ວິວັດການສ້າງໂຄງປະກອບເສດຖະກິດຄືນໃໝ່ ຈະໄດ້ຮັບການປະຕິບັດຢ່າງຄົບຊຸດໃນ 3 ເນື້ອໃນ. ນັ້ນແມ່ນສ້າງໂຄງປະກອບບັນດາຂະແໜງຜະລິດ ແລະ ການບໍລິການຄືນໃໝ່, ສ້າງໂຄງປະກອບວິສາຫະກິດຄືນໃໝ່ ແລະ ດັດແກ້ຍຸດທະສາດການຕະຫຼາດ. ໄປຄຽງຄູ່ກັບການສ້າງໂຄງປະກອບບັນດາຂົງເຂດດັ່ງກ່າວຄືນໃໝ່ແລ້ວ ແມ່ນຕ້ອງສ້າງໂຄງປະກອບການລົງທຶນພັດທະນາອົງປະກອບພື້ນຖານໂຄງລ່າງເສດຖະກິດສັງຄົງຕາມແຜນກຳນົດ ແລະ ລະບົບແບ່ງຂັ້ນຕາມວິໄສທັດໄລຍະຍາວ ແລະ ຈີນຕະນາການລະຫວ່າງເຂດ. ຄຽງຂ້າງນັ້ນ, ບັນດາເນື້ອໃນສ້າງໂຄງປະກອບພື້ນຖານເສດຖະກິດຄືນໃໝ່ຕ້ອງໄດ້ຮັບການປະຕິບັດໃນຕະຫຼອດວິວັດການຫັນເປັນອຸດສາຫະກຳ, ແຕ່ຕ້ອງເລີ່ມຕົ້ນນັບແຕ່ບັນດາຂົງເຂດທີ່ມີລັກສະນະຮີບດ່ວນທີ່ສຸດ, ນັ້ນແມ່ນການສ້າງໂຄງປະກອບການລົງທຶນຄືນໃໝ່, ການສ້າງໂຄງປະກອບຕະຫຼາດການເງິນຄືນໃໝ່, ການສ້າງໂຄງປະກອບລັດວິສາຫະກິດຄືນໃໝ່..
ໃນບົດຂຽນ, ທ່ານນາຍົກລັດຖະມົນຕີໄດ້ຢືນຢັນວ່າ ເພື່ອຊຸກຍູ້ວິວັດການຫັນປ່ຽນຮູບແບບເຕີບໂຕ, ໃນປີ 2012, ພ້ອມກັບເລື່ອງອະນຸມັດຜ່ານແຜນຮ່າງພັດທະນາຕະຫຼາດເຕັກໂນໂລຢີຢ່າງວ່ອງໄວນັ້ນ, ລັດຖະບານຈະປະກາດໃຊ້ບັນດານະໂຍບາຍສົ່ງເສີມການປ່ຽນໃໝ່ເຕັກໂນໂລຢີໃນວິສາຫະກິດຕ່າງໆ, ກຳນົດມາດຖານເຕັກໂນໂລຢີໃນກົດໝາຍວ່າດ້ວຍການລົງທຶນແຫ່ງລັດ ແລະບັນດາໂຄງການປະມູນ. ພ້ອມກັບການສ້າງໂຄງປະກອບພື້ນຖານເສດຖະກິດຄືນໃໝ່, ຫັນປ່ຽນຮູບແບບເຕີບໂຕແລ້ວ, ປີ 2012 ຕ້ອງສືບຕໍ່ຊາບຊືມທັດສະນະຊີ້ນຳຂອງກົມການເມືອງ, ມະຕິເລກ 11 ຂອງລັດຖະບານ, ເພີ່ມທະວີການຮັກສາເສດຖະກິດມະຫາພາກໃຫ້ເປັນປົກກະຕິ, ຄວບຄຸມໄພເງິນເຟີ້ ແລະ ຮັກສາລະດັບເຕີບໂຕຢູ່ໃນລະດັບເໝາະສົມ, ຮັບປະກັນຊີວິດສັງຄົມ. ນີ້ແມ່ນບັນດາໜ້າທີ່ອັນໜັກໜ່ວງແລະ ຫຍຸ້ງຍາກທີ່ສຸດ , ພິເສດແມ່ນໃນສະພາບການເສດຖະກິດໂລກພວມມີການຜັນແປຢ່າງສັບສົນ.
ມ້ວນທ້າຍບົດຂຽນ, ທ່ານນາຍົກລັດຖະມົນຕີຖືວ່າ ຫວຽດນາມມີຄວາມສະດວກໃນຂັ້ນພື້ນຖານເພື່ອສ້າງຄວາມເຫັນດີເປັນເອກະພາບສູງກ່ຽວກັບຄວາມຮັບຮູ້ໃນທົ່ວລະບົບການເມືອງ, ມີຄວາມຕັດສິນໃຈສູງໃນບນດາອົງການຄຸ້ມຄອງລັດ ຈາກຂັ້ນສູນກາງລົງຮອດທ້ອງຖີ່ນ ແລະ ປະຊາຄົມວິສາຫະກິດ. ນີ້ແມ່ນປັດໃຈພື້ນຖານເພື່ອຫັນຄວາມຕັດສິນໃຈເປັນການກະທຳຕົວຈິງ, ນຳວິວັດການພັດທະນາຂອງປະເທດເຂົ້າໃນວົງໂຄຈອນໃໝ່ - ເຊິ່ງແມ່ນວົງໂຄຈອນແຫ່ງການພັດທະນາແບບຍືນໂຍງ.