(vovworld)- ເວທີປາໄສເຄື່ອງໝາຍການຄ້າທະເລ ຫວຽດນາມ ຄັ້ງທີ 4 ພາຍໃຕ້ຫົວຂໍ້ວ່າ: “ຄວາມສາມາດບົ່ມຊ້ອນເສດຖະກິດ ແລະ ຊີວະພາບຢູ່ບັນດາໝູ່ເກາະ ຂອງ ຫວຽດນາມ ” ໃນຂອບເຂດສັບປະດາທະເລ ແລະ ໝູ່ເກາະ ພວມດຳເນີນຢູ່ແຂວງ ບ່າເຣ້ຍ ຫວູງເຕົາ ແມ່ນເຫດການມີຄວາມໝາຍ ສືບຕໍ່ບັນດາຄວາມມານະພະຍາຍາມສຸມໃສ່ສ້າງເຄື່ອງໝາຍການຄ້າທະເລ ແລະ ພັດທະນາເສດຖະກິດທະເລ ແລະ ໝູ່ເກາະຂອງທຸກຂະແຫນງການ, ທຸກຂັ້ນ ແລະ ທ້ອງຖິ່ນຕ່າງໆຂອງ ຫວຽດນາມ.
ທ່າກຳປັ່ນສາກົນ ຢູ່ ແຂວງ ບ່າເຣ້ຍ ຫວູງເຕົາ
ພາບປະກອບ:internet
|
ດ້ວຍເນື້ອທ່ີເຂດທະເລ ແລະ ໄຫລ່ທະວີບກວ້າງກວ່າ 1 ລ້ານຕາລາງກິໂລແມດ, ມີຝັ່ງທະເລຍາວກວ່າ 3.260 ກິໂລແມດ ດ້ວຍເກາະໃຫຍ່, ນ້ອຍປະມານ 4000 ແຫ່ງ ຕັ້ງຢູ່ບໍລິເວນຕ່າງໆທີ່ຂຶ້ນກັບບັນດາແຂວງແຄມທະເລ ຈາກພາກເຫນືອຕະຫລອດຮອດພາກໃຕ້ ແລະ ຫວຽດນາມ ມີຄວາມສາມາດບົ່ມຊ້ອນທາງດ້ານເສດຖະກິດທະເລທີ່ອຸດົມສົມບູນ. ເລີ່ມມາຈາກເງື່ອນໄຂດັ່ງກ່າວ, ລັດຖະບານ ຫວຽດນາມ ໄດ້ປະກາດໃຊ້ມະຕິກ່ຽວກັບຍຸດທະສາດທະເລຮອດປີ 2020, ໃນນັ້ນກຳນົດເສດຖະກິດທະເລ, ໝູ່ເກາະ ແມ່ນຫນຶ່ງໃນຈຳນວນ 5 ຂົງເຂດບຸກທະລຸກ່ຽວກັບການເຕີບໂຕ, ສົມທົບຢ່າງແຫນ້ນແຟ້ນລະຫວ່າງການພັດທະນາເຂດທະເລ, ແຄມທະເລ, ໝູ່ເກາະ ແລະ ການພັດທະນາເສດຖະກິດພາຍໃນປະເທດຕາມທິດຫັນເປັນອຸດສາຫະກຳ ແລະ ທັນສະໄຫມ. ຈຸດໝາຍຮອດປີ 2020, ເສດຖະກິດທະເລ ຫວຽດນາມ ຕ້ອງບັນລຸກວ່າ 53% - 55% GDP ແລະ ປະກອບສ່ວນກວ່າ 60% ເຂົ້າໃນວົງເງິນສົ່ງອອກຂອງທົ່ວປະເທດ. ທ່ານ Nguyen Chu Hoi ຮອງຫົວຫນ້າກົມໃຫຍ່ທະເລ ແລະ ໝູ່ເກາະ ຫວຽດນາມ ໄດ້ຢືນຢັນວ່າ: ກົມໃຫຍ່ທະເລ ແລະ ໝູ່ເກາະ ຫວຽດນາມ ໄດ້ກຳນົດທິດຢ່າງຈະແຈ້ງກ່ຽວກັບບັນຫາດັ່ງກ່າວ ແລະ ພວມປະຕິບັດບັນດາວຽກງານທີ່ຈຳເປັນເພື່ອສ້າງເຄື່ອງໝາຍການຄ້າທະເລ ຫວຽດນາມ.
“ເຄື່ອງໝາຍທະເລ ແມ່ນເຄື່ອງໝາຍຂອງພື້ນຖານເສດຖະກິດ, ເຄື່ອງໝາຍບັນດາວິສາຫະກິດ, ເຄື່ອງໝາຍປະເພດສິນຄ້າຕ່າງໆຜະລິດຈາກທະເລ. ເພື່ອປະຕິບັດເຄື່ອງໝາຍທະເລເປັນຢ່າງດີ, ພວກຂ້າພະເຈົ້າໄດ້ສ້າງ logo ໃຫ້ແກ່ເຄື່ອງໝາຍການຄ້າທະເລລວມ ແລະ ສ້າງໃບຢັ້ງຢືນຂຽວໃຫ້ແກ່ບັນດາເຂດທະເລ, ໃຫ້ແກ່ບັນດາວິສາຫະກິດ ແລະ ຂະແຫນງເຄື່ອນໄຫວຢູ່ທະເລ ແລະ ໝູ່ເກາະ ຮັບປະກັນບັນຫາຊັບພະຍາກອນສິ່ງແວດລ້ອມ ຫລື ເວົ້າແນວອື່ນ ແມ່ນຕາມທິດພັດທະນາແບບຍືນຍົງ. ອີກບັນຫາຫນຶ່ງ ພວກເຮົາຕ້ອງປະຕິບັດການກວດກາ, ປະຕິບັດຢ່າງມີປະສິດທິຜົນ. ຈຸດປະສົງສຸດທ້າຍແມ່ນເຮັດໃຫ້ຊັບພະຍາກອນທະເລກາຍເປັນຊັບສິນ.”
ຂຸດຄົ້ນນ້ຳມັນອາຍແກສ ສ້າງບຸກທະລຸໃຫ້ແກ່ເສດຖະກິດທະເລ
ພາບ:tinkinhte.com
|
ພ້ອມກັບບັນດາຄວາມານະພະຍາຍາມຂອງກົມໃຫຍ່ທະເລ ແລະ ໝູ່ເກາະ ຫວຽດນາມ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ກໍໄດ້ຍື່ນສະເຫນີຕໍ່ລັດຖະບານເພື່ອປະກາດໃຊ້ຂໍ້ກຳນົດກ່ຽວກັບການຂຸດຄົ້ນ, ປົກປັກຮັກສາຜົນປະໂຫຍດຂອງສິນໃນນ້ຳ. ເຄື່ອງໝາຍການຄ້າທະເລສຳລັບຜະລິດຕະພັນສິນໃນນ້ຳຂອງ ຫວຽດນາມ ພວມໄດ້ຮັບການສ້າງຈາກບັນດາອົງການທີ່ມີຫນ້າທີ່ຮັບຜິດຊອບ, ໃນນັ້ນ ປັດໄຈກ່ຽວກັບຄຸນນະພາບແມ່ນບັນຫາຕົ້ນຕໍ.
ເພື່ອບັນລຸໄດ້ບັນດາຈຸດໝາຍໃນຍຸດທະສາດເສດຖະກິດທະເລ, ໄປຄຽງຄູ່ກັບຄວາມມານະພະຍາຍາມສ້າງເຄື່ອງໝາຍການຄ້າທະເລທີ່ຈຳເປັນແລ້ວ ຕ້ອງສ້າງແຜນກຳນົດສັງລວມເພື່ອພັດທະນາເສດຖະກິດທະເລ ແລະ ໝູ່ເກາະ. ເມື່ອເວົ້າເຖິງບັນຫານີ້, ທ່ານ Nguyen Chu Hoi ຮອງຫົວຫນ້າກົມໃຫຍ່ທະເລ ແລະ ໝູ່ເກາະ ຫວຽດນາມ ຖືວ່າ:
“ພວກເຮົາຕ້ອງກຳນົດຢ່າງຖືກຕ້ອງເຂດເສດຖະກິດເປັນກຳລັງຫນູນເພືອ່ພັດທະນາເສດຖະກິດທະເລ. ກົມໃຫຍ່ທະເລ ແລະ ໝູ່ເກາະ ພວມປະຕິບັດການວາງແຜນກຳນົດນຳໃຊ້ເຂດທະເລ ຫລືເອີ້ນຫຍໍ້ວ່າ: ການວາງແຜນກຳນົດນຳໃຊ້ທະເລ ແລະ ໝູ່ເກາະ ຄ້າຍຄືການວາງແຜນກຳນົດທີ່ດິນເພື່ອເປັນບ່ອນອີງໃຫ້ແກ່ບັນດາຂະແຫນງເສດຖະກິດທະເລ.”
ຄຽງຄູ່ກັນນັ້ນ ຍ້ອນມີຄວາມສະດວກກ່ຽວກັບທີ່ຕັ້ງພູມີປະເທດ, ຄວາມອຸດົມສົມບູນບັນດາແຫລ່ງຊັບພະຍາກອນທຳມະຊາດຢູ່ໝູ່ເກາະ ແລະ ເຂດທະເລ, ປະຈຸບັນ ຂະແຫນງເສດຖະກິດຄື: ອາຊີບຫາປາ, ການທ່ອງທ່ຽວ, ບໍລິການທະເລ ພວມພັດທະນາຢ່າງແຮງ ແລະ ກາຍເປັນແຫລ່ງລາຍຮັບຕົ້ນຕໍຂອງປະຊາຊົນທ້ອງຖິ່ນຢູ່ເຂດແຄມທະເລ. ໃນເງື່ອນໄຂແຫລ່ງກຳລັງການເງິນຖືກຈຳກັດ, ໃນພາຍພາກຫນ້າ, ລັດຖະບານສຸມໃສ່ກໍ່ສ້າງເກາະບາງແຫ່ງທີ່ມີເງື່ອນໄຂເພື່ອສ້າງບາດກ້າວບຸກທະລຸ, ສ້າງບັນດາຜະລິດຕະພັນປາຍແຫລມຢ່າງວ່ອງໄວໃຫ້ເໝາະສົມກັບທ່າໄດ້ປຽບຄື: ການທ່ອງທ່ຽວ, ບໍລິການທະເລ, ຂຸດຄົ້ນ ແລະ ລ້ຽງປູກສິນນ້ຳ ເພື່ອຍົກສູງການປະກອບສ່ວນຂອງເສດຖະກິດທະເລ, ໝູ່ເກາະເຂົ້າໃນໂຄງປະກອບເສດຖະກິດເວົ້າລວມ.
ຍຸດທະສາດທະເລຮອດປີ 2020 ແມ່ນການກຳນົດທິດສຳຄັນໃນການພັດທະນາເສດຖະກິດທະເລຂອງ ຫວຽດນາມ. ບັນດາການເຄື່ອນໄຫວຂອງທຸກຂະແຫນງການ, ທຸກຂັ້ນໃນໄລຍະຜ່ານມາສະແດງໃຫ້ເຫັນວ່າ ຍຸດທະສາດນີ້ໄດ້ຮັບການຜັນຂະຫຍາຍ ດ້ວຍຄວາມມານະພະຍາຍາມສ້າງເຄື່ອງໝາຍການຄ້າທະເລ ແລະ ຍົກສູງການປະກອບສ່ວນຂອງເສດຖະກິດທະເລ, ໝູ່ເກາະ ເຂົ້າໃນໂຄງປະກອບເສດຖະກິດເວົ້າລວມ. ເລື່ອງສືບຕໍ່ສ້າງ ແລະ ຂຸດຄົ້ນຄຸນຄ່າຂອງເຄື່ອງໝາຍການຄ້າທະເລ ຫວຽດນາມ ເປັນຢ່າງດີ ຈະປະກອບສ່ວນຊຸກຍູ້ການເຕີບໂຕແບບຍືນຍົງ ແລະ ເສີມຂະຫຍາຍທ່າແຮງຂອງເສດຖະກິດທະເລ ຫວຽດນາມ ໃນອະນາຄົດ.