ປະທານາທິບໍດີອາເມລິກາ Barack Obama ປາດຖະໜາລົບລ້າງຄວາມ ອາຄາດບາດໝາງໃນສາຍພົວພັນອາເມລິກາ - ອີຣານ
(ພາບ:teenspeakeronline)
|
ວັນທີ 21/3, ອີຣານໄດ້ກ້າວເຂົ້າສູ່ມື້ທຳອິດຂອງປີໃໝ່ຕາມປະຕິທິນເປີເຊຍ. ສຳລັບປະຊາຊົນຢູ່ປະເທດນີ້, ຄວາມຫວັງແມ່ນມີຫຼາຍຢ່່າງ, ແຕ່ກ່ອນອື່ນໝົດ ຍັງຄົງແມ່ນຄວາມມຸ່ງຫວັງມີພື້ນຖານສັນຕິພາບ, ສະຖຽນລະພາບຢ່າງແທ້ຈິງ. ແຕ່ກ່ອນທີ່ກ້າວເຂົ້າສູ່ລະດູບານໃໝ່ນີ້, ແມ່ນບໍ່ມີສັນຍານທີ່ດີ, ຫາກກົງກັນຂ້າມ ແມ່ນບັນດາຖະແຫຼງການທີ່ແຂງກະດ້າງ ແນໃສ່ເຮັ່ງຮັດ ປິດລ້ອມອີຣານຊຶ່ງແມ່ນປະເທດພວມເກີດວິກິດການນິວເຄຼຍຫຼາຍກ່ວາອີກ.
ໃນການເດີນທາງຢ້ຽມຢາມຕາເວັນອອກກາງເປັນຄັ້ງທຳອິດ ໃນຖານະເປັນປະທານາທິບໍດີນັບແຕ່ປີ 2009 ເປັນຕົ້ນມາ, ວັນທີ 20/3, ທີ່ການປະຊຸມຂ່າວຮ່ວມກັບນາຍົກລັດຖະມົນຕີ Israel Benjamin Netayahu, ປະທານາທິບໍດີອາເມລິກາ Barack Obama ໄດ້ຢືນຢັນຄືນຄຳໝັ້ນສັນຍາຂອງອາເມລິກາຢາກເພີ່ມທະວີການຮ່ວມມືກັບລັດຊາວຢິວ ແນໃສ່ສະກັດກັ້ນອີຣານ ຜະລິດອາວຸດນິວເຄຼຍ. ຊ້ຳບໍໜຳ, ຜູ້ນຳທ່ານນີ້ຍັງຖະແຫຼງວ່າ ສາຍພົວພັນ ວໍຊິງຕັນ-ແທນອາວິບ ແມ່ນຖາວອນ. ໃນຂະນັ້ນ, ທ່ານນາຍົກລັດຖະມົນຕີ Israel Benjamin Netayahu ຍັງໃຫ້ຮູ້ວ່າ ແທນອາວິບ ອາດຈະຕ້ອງນຳໃຊ້ກຳລັງອາວຸດໃນກໍລະນີ ຈຳເປັນ ເພື່ອບັງຄັບໃຫ້ອີຣານຕ້ອງປະລະໂຄງການນິວເຄຼຍ.
ໃນຕົວຈິງ, ຖະແຫຼງການນີ້ຂອງ ວໍຊິງຕັນ ແລະ ແທນອາວິບ ບໍ່ນອນນອກເໜືອຈາກຂໍ້ມູນຂອງບັນດານັກສັງເກດການ. ຍ້ອນວ່າ ກ່ອນໜ້ານັ້ນ, ອຳນາດການປົກຄອງ Israel ໄດ້ສົ່ງສັນຍານຢ່າງຕໍ່ເນື່ອງເພື່ອກ່າວເຕືອນ ອີຣານ. ຜູ້ຄົນທັງຫຼາຍຍັງຈືດີວ່າ ໃນກາງເດືອນມີນາປີ 2013, ຈາກ Jerusalem, ທ່ານນາຍົກລັດຖະມົນຕີ Israel Benjamin Netayahu ໄດ້ສົ່ງສານສະບັບໜຶ່ງທີ່ຈະແຈ້ງວ່າ ພຽງແຕ່ການລົງໂທດເທົ່ານັ້ນແມ່ນບໍ່ພຽງພໍເພື່ອສະກັດກັ້ນຄວາມມັກໃຫຍ່ໄຝ່ສູງດ້ານນິວເຄຼຍຂອງອີຣານ. ດັ່ງນັ້ນ Israel ຍາມໃດກໍກຽມພ້ອມສູ້ຮົບ ດ້ວຍແຜນການບຸກໂຈມຕີທາງອາກາດທີ່ແນໃສ່ບັນດາຮາກຖານນິວເຄຼຍ ຂອງອີຣານ. ສ່ວນທ່ານລັດຖະມົນຕີກະຊວງປ້ອງກັນປະເທດ Israel Ehud Barack ໄດ້ຢືນຢັນວ່າ ໂຄງການນິວເຄຼຍຂອງອີຣານແມ່ນສິ່ງທ້າທາຍຢ່າງໃຫຍ່ຫຼວງທີ່ສຸດທີ່ມີຕໍ່ Israel. ໃນຂະນະນັ້ນ, ກ່ອນການເດີນທາງຢ້ຽມຢາມຕາເວັນອອກກາງຂອງປະທານາທິບໍດີອາເມລິກາ Barack Obama ເມື່ອຕົ້ນເດືອນ 3 ນີ້, ທັງຮອງປະທານາທິບໍດີອາເມລິກາ Joe Biden ແລະ ລັດຖະມົນຕີການຕ່າງປະເທດ John Kerry ກໍລ້ວນແຕ່ກ່າວເຕືອນອີຣານອີກເທື່ອໜຶ່ງກ່ຽວກັບກຳນົດເວລາໃຫ້ແກ່ບັນດາວິທີການແກ້ໄຂທາງດ້ານການທູດທີ່ມີຕໍ່ບັນຫານິວເຄຼຍທີ່ກໍ່ຄວາມໂຕ້ຖຽງກັນຂອງປະເທດນີ້. ທັດສະນະຂອງວໍຊິງຕັນແມ່ນເລື່ອງສະກັດກັ້ນອີຣານຜະລິດລູກລະເບີດນິວເຄຼຍນັ້ນ ນອນໃນຜົນປະໂຫຍດທາງດ້ານຄວາມໝັ້ນຄົງຂອງອາເມລິກາ ແລະ ທົວ່ໂລກ, ຖ້າບໍ່ດັ່ງນັ້ນ, ເລື່ອງດັ່ງກ່າວຈະພາໄປເຖິງການຊ່ວງເສັງປະກອບອາວຸດທີ່ເປັນອັນຕະລາຍ.
ຄຳກ່າວເຕືອນຂອງວົງການເຈົ້າໜ້າທີ່ອາເມລິກາໄດ້ຖືກຍົກອອກມາໃນຈຸດເວລາດຳເນີນການເຈລະຈາຂັ້ນນັກວິຊາການລະຫວ່າງອີຣານ ແລະ ກຸ່ມ P5+1 ກ່ຽວກັບໂຄງການນິວເຄຼຍທີ່ກໍ່ຄວາມໂຕ້ຖຽງກັນຂອງອີຣານ, ວັນທີ 18/3 ຢູ່ Istanbul ປະເທດຕວກກີ, ເປັນທີ່ຈະແຈ້ງແລ້ວວ່າ ໄດ້ກໍ່ກຳລັງດັນໃນທຸກດ້ານຕໍ່ວິວັດທະນາການເຈລະຈາ. ເຖິງວ່າການປະຊຸມລັບໄດ້ບັນລຸຄວາມຄືບໜ້າໃດໜຶ່ງ ດ້ວຍການຮຽກຮ້ອງອີຣານໂຈະໂຄງການເສີມທາດຢູເຣນຽມໃນລະດັບ 20% ໄວ້ຊົ່ວຄາວ, ແທນທີ່ການສະເໜີຢຸດຕິ ໂຄງການນິວເຄຼຍທັງໝົດຄືກ່ອນນີ້, ພ້ອມກັບການຍອມຮັບຂອງ IAEA ວ່າ ໂຄງການນິວເຄຼຍຂອງເຕເຮຣານ ພຽງແຕ່ເພື່ອຈຸດປະສົງສັນຕິພາບນັ້ນ, ແຕ່ສິ່ງດັ່ງກ່າວຍັງຄົງບໍ່ສາມາດຕອບສະໜອງຕາມຄວາມຮຽກຮ້ອງຕ້ອງການຂອງອາເມລິກາເທື່ອ. ວໍຊິງຕັນ ຍັງຖືວ່າ ໂຄງການນິວເຄຼຍຂອງອີຣານ ໄດ້ໄປຮອດ“ເສັ້ນແດງ” ແລ້ວ, ແລະ ຖ້າຫາກປະເທດອິດສະລາມນີ້ບໍ່ຜ່ອນສັ້ນຜ່ອນຍາວ, ແມ່ນຈະຕ້ອງຮັບການລົງໂທດທີ່ຮ້າຍແຮງກ່ວາອີກ. ກ່ອນໜ້ານັ້ນ, EU ຍັງເຮັ່ງຮັດການລົງໂທດອີຣານ ຂະນະທີ່ໄດ້ຈັດລາຍຊື່ເຈົ້າໜ້າທີ່ຂອງປະເທດນີ້ຕື່ມອີກ 9 ທ່ານເຂົ້າໃນ“ບັນຊີລາຍຊື່ດຳ” ຊຶ່ງແມ່ນບັນດາຜູ້ຖືກຫ້າມອອກວີຊາ ແລະ ປິດລ້ອມຊັບສົມບັດ. ເປັນອັນວ່າ ປະຈຸບັນມີທັງໝົດ 490 ບໍລິສັດ ແລະ 105 ສ່ວນບຸກຄົນຂອງອີຣານ ຖືກຈັດເຂົ້າ ບັນຊີລາຍຊື່ດຳ, ຖືກຫ້າມອອກວີຊາ ແລະ ປິດລ້ອມຊັບສົມບັດ, ຖືກຈຳກັດການຄ້າຂາຍ, ພົວພັນແລກປ່ຽນດ້ານການເງິນ ແລະ ຖືກຂວ້ຳບາດດ້ານນ້ຳມັນ.
ເປັນທີ່ຈະແຈ້ງແລ້ວວ່າ ໃນຫຼາຍດ້ານ ຈາກການທູດ, ເສດຖະກິດຕະຫຼອດຮອດການທະຫານ, ອີຣານພວມຖືກຕົກຢູ່ໂດດດຽວ, ເຖິງວ່າ ແຕ່ດົນນານມາແລ້ວ, ໃນການເຈລະຈາຄັ້ງຕ່າງໆ ກໍຄືໃນການສະແດງທັດສະນະກ່ຽວກັບ ໂຄງການນິວເຄຼຍຂອງຕົນ, ເຕເຮຣານໄດ້ຢືນຢັນຫຼາຍຄັ້ງແລ້ວວ່າ ພ້ອມແລ້ວຈະຊ່ວຍບັນເທົ່າຄວາມວິຕົກກັງວົນຂອງ IAEA ພາຍຫຼັງບັນລຸໄດ້ຂໍ້ຕົກລົງສະບັບໜຶ່ງ, ແຕ່ສິ່ງດັ່ງກ່າວຍັງບໍ່ທັນເຮັດໃຫ້ອາເມລິກາ ແລະ ຝ່າຍຕາເວັນຕົກພໍໃຈ.
ປີໃໝ່ໄດ້ວຽນມາສູ່ຊາວອີຣານ ພ້ອມກັບການຄາດຄະເນທີ່ບໍ່ສະຫວ່າງສະໄຫວ. ພື້ນຖານເສດຖະກິດຂອງອີຣານພວມປະສົບກັບຄວາມຫຍຸ້ງຍາກຫຼາຍຢ່າງ. ເງິນເຟີ້ບັນລຸກ່ວາ 20%, ລະບົບທະນາຄານສ່ວນຫຼາຍຖືກຢຸດສະງັກຍ້ອນຄຳສັ່ງຂວ້ຳບາດ, ອັດຕາການວ່າງງານສູງ. ການສົ່ງອອກນ້ຳມັນດິບ, ຄາດຄະເນວ່າ ໄດ້ຫຼຸດລົງຕ່ຳກ່ວາ 1 ລ້ານຖັງ/ວັນ ເມື່ອທຽບໃສ່ 2,2 ລ້ານຖັງ/ວັນຄືກ່ອນນີ້ ແລະ ໄລ່ສະເພາະປີ 2012, ອີຣານຖືກເສຍຫາຍເງິນກ່ວາ 40 ຕື້ USD . ສະພາບການນີ້ ພ້ອມກັບສານທີ່ແຂງກະດ້າງຂອງອາເມລິກາ, ຝ່າຍຕາເວັນຕົກ ແລະ Israel ນັ້ນ , ບໍ່ສາມາດເຮັດໃຫ້ປະຊາຊົນຂອງປະເທດນີ້ມີຄວາມເຊື່ອໝັ້ນຕໍ່ສິ່ງທີ່ດີ ຊຶ່ງຈະປະກົດຂຶ້ນໃນອະນາຄົດອັນໃກ້ໆນີ້.