(vovworld)-ວັນບຸນມະຫາສາມັກຄີ ໄດ້ ແລະ ພວມຖືກຈັດຕັ້ງຂຶ້ນຢູ່ຫລາຍແຫ່ງໃນທົ່ວປະເທດ ເນື່ອງໃນໂອກາດສະເຫລີມສະຫລອງ 83 ປີແຫ່ງວັນສ້າງຕັ້ງແນວໂຮມເອກະພາບແຫ່ງຊາດ (18/11/1930-18/11/2013). ເລື່ອງຈັດຕັ້ງວັນບຸນມະຫາສາມັກຄີແມ່ນວຽກງານທີ່ແທດຈິງ ເພື່ອທະວີຄູນນຳ້ໃຈສາມັກຄີ, ປັດໄຈເຊ່ືອມຕໍ່, ສ້າງກຳລັງແຮງທົ່ວປວງຊົນທັງຊາດໃນພາລະກິດສ້າງສາ ແລະ ປົກປັກຮັກສາປະເທດຊາດ. ໃນຊຸມມື້ຜ່ານມາ, ວັນບຸນມະຫາສາມັກຄີທົ່ວປວງຊົນທັງຊາດ ດຳເນີນໄປຢູ່ ແຂວງ, ນອນຕ່າງໆຄື: ຮືງອຽນ, ຮ່າໂນ້ຍ, ທາຍບີ່ງ, ນະຄອນ ໂຮ່ຈິມີນ ແລະ ທ້ອງຖິ່ນອ່ືນໃນທົ່ວປະເທດ. ໃນມື້ດຳເນີນວັນບຸນ, ປະຊາຊົນໃນທົ່ວປະເທດ ໄດ້ຈັດຕັ້ງລາຍການສະແດງສິລະປະມະຫາຊົນ, ສະຫລຸບບັນດາຂະບວນການແຂ່ງຂັນຮັກຊາດ, ແລກປ່ຽນບົດຮຽນເສີມຂະຫຍາຍປະຊາທິປະໄຕຢູ່ຂັ້ນຮາກຖານ, ຍ້ອງຍໍແບບຢ່າງດີເດັ່ນໃນຂະບວນການ“ທົ່ວປວງຊົນສາມັກຄີສ້າງຊີວິດທາງດ້ານວັດທະນະທຳ, ດ້ານຈິດໃຈຢູ່ເຂດຊຸມຊົນ”. ບໍ່ພຽງແຕ່ມີປະຊາຊົນຢູ່ບໍລິເວນເຂົ້າຮ່ວມ ເທົ່ານັ້ນ ຫາກບັນດາສະມາຊິກແນວໂຮມປະເທດຊາດທຸກຂັ້ນ, ບັນດາການນຳພັກ, ລັດ, ສະພາແຫ່ງຊາດ ແລະ ລັດຖະບານ ກໍເຂົ້າຮ່ວມວັນບຸນພ້ອມກັບປະຊາຊົນອີກດ້ວຍ.
ທ່ານປະທານສະພາແຫ່ງຊາດ ຫງວຽນຊີງຮຸ່ງເຂົ້າຮ່ວມວັນບຸນ ມະຫາສາມັກຄີທົ່ວປວງຊົນທັງຊາດ
|
ມະຫາສາມັກຄີແມ່ນມູນເຊື້ອອັນລຳ້ຄ່າຂອງຊາດ
ມະຫາສາມັກຄີທົ່ວປວງຊົນທັງຊາດແມ່ນປັດໄຈຫລັກແຫລ່ງແກ່ນສານເພື່ອເຕົ້າໂຮມກຳລັງແຮງຂອງປະຊາຊົນທຸກຊັ້ນວັນນະ, ສ້າງກຳລັງແຮງທົ່ວປວງຊົນທັງຊາດ ແລະ ນຳປະເທດຫວຽດນາມຍາດໄດ້ໄຊຊະນະນີ້ໄປສູ່ໄຊຊະນະນອື່ນ. ນັ້ນແມ່ນຄຳຢືນຢັນຂອງທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ເມື່ອເຂົ້າຮ່ວມວັນບຸນ ມະຫາສາມັກຄີທົ່ວປວງຊົນທັງຊາດ ກັບປະຊາຊົນນະຄອນຮ່າໂນ້ຍ. ເມື່ອເຂົ້າຮ່ວມວັນບຸນດັ່ງກ່າວຢູ່ແຂວງ ທາຍບີ່ງ, ທ່ານປະທານສະພາແຫ່ງຊາດ ຫງວຽນຊີງຮຸ່ງ ສືບຕໍ່ຢືນຢັນວ່າ: ນຳ້ໃຈສາມັກຄີຈະສ້າງກຳລັງແຮງທົ່ວປວງຊົນທັງຊາດ.
“ມະຫາສາມັກຄີບໍ່ພຽງແຕ່ສະເພາະໃນຄອບຄົວຫນຶ່ງ, ບ້ານຫນຶ່ງ ຫາກໃນທົ່ວປະເທດ, ທົ່ວປວງຊົນທັງຊາດ. ພວກເຮົາພາກພູມໃຈສູ້ຊົນເພື່ອມີຈິດໃຈນັ້ນ, ສືບທອດປະຫວັດສາດ, ເພື່ອສ້າງຈິດໃຈນັ້ນ. ຈຸດປະສົງສຸດທ້າຍກໍແມ່ນເພື່ອສ້າງຊີວິດຂອງປະຊາຊົນໃຫ້ມີຄວາມອີ່ມໜຳສຳລານ ແລະ ພັດທະນາ.”
ຮູບພາບມະຫາສາມັກຄີໃນຊຸມປີແຫ່ງການປ່ຽນແປງໃຫມ່
ແນວໂຮມປະເທດຊາດຫວຽດນາມ ແມ່ນອົງການທີ່ຕິດພັນ, ສືບທອດ ແລະ ສ້າງນຳ້ໃຈມະຫາສາມັກຄີທົ່ວປວງຊົນທັງຊາດ ຜ່ານການໂຄສະນາ, ລະດົມກຳລັງໃຈປະຊາຊົນເສີມຂະຫຍາຍສິດເປັນເຈົ້າ, ປະຕິບັດແນວທາງ, ແຜນນະໂຍບາຍຂອງພັກ, ນະໂຍບາຍ, ກົດໝາຍຂອງລັດ ແລະ ປະຕິບັດບັນດາຂະບວນການແຂ່ງຂັນຮັກຊາດ, ບັນດາການຂົນຂວາຍສັງຄົມອັນກວ້າງໃຫຍ່. ໃນໄລຍະປ່ຽນແປງໃຫມ່ຂອງປະເທດຊາດ, ແນວໂຮມປະເທດຊາດຫວຽດນາມ ໄດ້ຈັດຕັ້ງບັນດາບັ້ນຂົນຂວາຍໃນຂອບຂະຫນາດທົ່ວປະເທດກ່ຽວກັບຄວາມສາມັກຄີຊ່ວຍເຫລືອກັນພັດທະນາເສດຖະກິດ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ຕອບບຸນແທນຄຸນ, ອຸ້ມຊູຊ່ວຍເຫລືອເຊິ່ງກັນ ແລະ ກັນ… ມີຜົນປະໂຫຍດຢ່າງແທດຈິງ, ສ້າງຄວາມສະຫນິດຕິດພັນໃນວົງຄະນາຍາດ, ຮັບໃຊ້ພາລະກິດສ້າງສາ ແລະ ປົກປັກຮັກສາປະເທດຊາດ. ແນວໂຮມປະເທດຊາດຫວຽດນາມ ທຸກຂັ້ນ ຍັງພ້ອມກັບຄະນະພັກ, ອຳນາດການປົກຄອງຂັ້ນຕ່າງໆ ຜັນຂະຫຍາຍການປະຕິບັດບັ້ນຂົນຂວາຍ “ຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດຂອງປະທານໂຮ່ຈິມີນຢ່າງເລິກເຊິ່ງ, ໃນນັ້ນ ເອົາໃຈໃສ່ເປັນພິເສດເຖິງການຂົນຂວາຍໝູ່ປະຊາຊົນຮຳ່ຮຽນ ແລະ ປະຕິບັດຕາມແນວຄິດມະຫາສາມັກຄີທົ່ວປວງຊົນທັງຊາດຂອງເພີ່ນ, ສ້າງກຳລັງຫນູນຊຸກຍູ້ການສ້າງ ແລະ ເສີມຂະຫຍາຍກຸ່ມກ້ອນມະຫາສາມັກຄີຢູ່ຮາກຖານ ແລະ ເຂດຊຸມຊົນ. ແນວໂຮມປະເທດຊາດຫວຽດນາມ ກໍຜັນຂະຫຍາຍບັນດາການເຄື່ອນໄຫວຢ່າງແຂງແຮງເພື່ອປະກອບຄຳເຫັນໃສ່ຮ່າງລັດຖະທຳມະນູນປີ 1991 ສະບັບປັບປຸງ, ເຂົ້າຮ່ວມບັນດາບັ້ນດຳເນີນຊີວິດການເມືອງຢ່າງກວ້າງຂວາງຄື: ການເລືອກຕັ້ງສະພາແຫ່ງຊາດ, ປະຕິບັດມະຕິສູນກາງພັກຄັ້ງທີ 4 ກ່ຽວກັບບັນດາມາດຕະການຮີບດ່ວນໃນການກໍ່ສ້າງພັກ.
ມະຫາສາມັກຄີຕິດພັນກັບການເສີມຂະຫຍາຍປະຊາທິປະໄຕຢູ່ຂັ້ນຮາກຖານ
ຈາກບັນດາຜົນສຳເລັດໃນວຽກງານສ້າງກຸ່ມກ້ອນມະຫາສາມັກຄີທົ່ວປວງຊົນໃນຊຸມປີຜ່ານມາ, ທ່ານ ຫງວຽນວັນບາ, ຮອງປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຖືວ່າ: ປັດໄຈ ນີ້ໄດ້ສ້າງຜົນສຳເລັດຂອງແຕ່ລະຂະບວນການມະຫາສາມັກຄີຈາກຮາກຖານ ໂດຍແມ່ນ ຄະນະພັກ ແລະ ອຳນາດການປົກຄອງທຸກຂັ້ນ, ພະນັກງານ, ສະມາຊິກພັກ ໄດ້ປະຕິບັດຂໍ້ກຳນົດກົດລະບຽບປະຊາທິປະໄຕຢູ່ຂັ້ນຮາກຖານ. ນັ້ນແມ່ນ ເຊີດຊູບົດບາດເປັນເຈົ້າການ, ຕັ້ງຫນ້າຂອງປະຊາຊົນ, ປະຊາຊົນມີສິດປຶກສາຫາລື, ຕິດຕາມກວດກາ ແລະ ຕັດສິນຊີ້ຂາດທຸກບັນຫາຂອງເຂດຊຸມຊົນ. ທ່ານ ຫງວຽວັນຟາ ເນັ້ນຫນັກວ່າ:
“ປັດໄຈສຳຄັນທີ່ສຸດນັ້ນແມ່ນການຊີ້ນຳຢ່າງແຫນ້ນແຟ້ນ, ໃກ້ຊິດຈຂອງຄະນະພັກທຸກຂັ້ນ, ການປະສານສົມທົບເປັນປະຈຳ, ມີຄວາມຮັບຜິດຊອບຂອງອຳນາດການປົກຄອງທຸກຂັ້ນ. ສຳລັບບັນດາບັນຫາທີ່ປະຊາຊົນສະເຫນີແມ່ນຕ້ອງແກ້ໄຂຢ່າງເໝາະສົມ,ທັນການ ເພື່ອບໍ່ໃຫ້ກາຍເປັນບັນຫາໃຫຍ່ ເມື່ອເຮັດໄດ້ຄືແນວນັ້ນ ແນ່ນອນວ່າ ປະຊາທິປະໄຕຈະໄດ້ຮັບການເສີມຂະຫຍາຍເປັນຢ່າງດີ ກວ່າ.”
ຄວາມຈິງໃຫ້ເຫັນວ່າ: ການສ້າງ ແລະ ປັບປຸງກຸ່ມກ້ອນມະຫາສາມັກຄີທົ່ວປວງຊົນ ຕ້ອງເລີ່ມມາຈາກວົງຄະນາຍາດຊຸມຊົມ. ແຕ່ລະຂະບວນການໄດ້ດີຈາກຮາກຖານ ແມ່ນກຳລັງຫນູນສຳຄັນໃນການຜັນຂະຫຍາຍຈາກບັນດາຂະບວນການແຂ່ງຂັນຮັກຊາດຂອງທົ່ວປະເທດຢ່າງມີໄຊ. ໃນວັນບຸນມະຫາສາມັກຄີປີນີ້, ທ່ານປະທານສະພາແຫ່ງຊາດ ຫງວຽນຊີງຮຸ່ງ ໄດ້ຊີ້ແຈງວ່າ: ການສ້າງ, ປັບປຸງກຸ່ມກ້ອນມະຫາສາມັກຄີທົ່ວປວງຊົນໃນວົງຄະນາຍາດເຂດຊຸມຊົນແມ່ນສຳຄັນທີ່ສຸດ. ໃນແຕ່ລະວົງຄະນາຍາດມີຫລາຍຄອບຄົວໄດ້ດີ ເຂດຊຸມຊົນນັ້ນກໍໄດ້ດີ. ມີເຂດຊຸມຊົນຫລາຍແຫ່ງໄດ້ດີ ກຸ່ມກ້ອນມະຫາສາມັກຄີທົ່ວປວງຊົນທັງຊາດໄດ້ຮັບການປັບປຸງ ແລະ ທຸກຫນ້າທີ່ພັດທະນາເສດຖະກິດສັງຄົມຂອງຫວຽດນາມຈະສຳເລັດຜົນຢ່າງແນ່ນອນ.