(vovworld)-ສິດທິມະນຸດໄດ້ຮັບຖືວ່າ ແມ່ນຈຸດເດັ່ນໃນລັດຖະທຳມະນູນປີ 2013, ລັດຖະທຳມະນູນສະບັບນີ້ຜົນສັກສິດນັບແຕ່ວັນທີ 1/1/2014 ເປັນຕົ້ນໄປ. ສະນັ້ນ ນີ້ກໍແມ່ນຫນຶ່ງໃນບັນດາເນື້ອໃນພວມໄດ້ຮັບການຜັນຂະຫຍາຍຢ່າງຕັ້ງຫນ້າຈາກບັນດາອົງການທີ່ມີຫນ້າທີ່ຮັບຜິດຊອບເພື່ອໃຫ້ບັນດາຂໍ້ກຳນົດກ່ຽວກັບສິດທິມະນຸດເຂົ້າສູ່ຊີວິດຕົວຈິງໂດຍໄວ.
ຈຸດເດັ່ນຂອງ ລັດຖະທຳມະນູນປີ 2013 ຖືກສະແດງໃຫ້ເຫັນໃນ ພາກທີ 2, ຊື່ງແມ່ນພາກກຳນົດກ່ຽວກັບສິດທິມະນຸດ. ຢູ່ໃນພາກທີ 2 ນີ້ໄດ້ລວບລວມສິດທິມະນຸດກ່ຽວກັບພົນລະເຮືອນ, ການເມືອງ, ວັດທະນະທຳ .. ຢ່າງຄົບຖ້ວນຢູ່ໃນບັນດາສົນທິສັນຍາສາກົນກ່ຽວກັບສິດທິມະນຸດ. ໃນນັ້ນ ເອົາໃຈໃສ່ເຖິງບັນດາສິດຂອງຄົນພິການ,ຜູ້ເຖົ້າຜູ້ແກ່, ເດັກນ້ອຍ, ແມ່ຍິງ… ສະແດງໃຫ້ເຫັນທິດພັດທະນາ ແລະ ຄວາມສົມບູນແບບຂອງລັດຖະທຳມະນູນ. ດ້ວຍການກຳນົດໃນພາກທີ 2 ນັ້ນ, ລັດຖະທຳມະນູນ ແມ່ນເໝາະສົມກັບກົດໝາຍສາກົນ ກ່ຽວກັບສິດທິມະນຸດ, ເໝາະສົມກັບທັດສະນະການເມືອງຂອງປະຊາຄົມໂລກ.
ສິດທິມະນຸດ,ສິດແລະພັນທະຂອງພົນລະເມືອງມີຜົນສັກສິດ ໂດຍກົງຕ້ອງປະຕິບັດ.
ຕາມທ່ານ ເລມີງທົງ, ຮອງຫົວຫນ້າກຳມາທິການກົດໝາຍຂອງສະພາແຫ່ງຊາດແລ້ວ, ກ່ຽວກັບດ້ານຫລັກການ, ສິດທິມະນຸດ, ສິດ ແລະ ພັນທະຂອງພົນລະເມືອງ ຖືກລະບຸໄວ້ໃນລັດຖະທຳມະນູນ ທີ່ມີຜົນສັກສິດໂດຍກົງຕ້ອງປະຕິບັດ. ສິ່ງສຳຄັນ ນັ້ນແມ່ນການກຳນົດຕາມຂັ້ນຕອນ, ລະບຽບການ, ເພື່ອສ້າງຄວາມສະດວກໃຫ້ແກ່ປະຊາຊົນໃນການປະຕິບັດບັນດາສິດທິມະນຸດ.
ລັດຖະທຳມະນູນປີ 2013 ກຳນົດສິດທິມະນຸດຢ່າງຄົບຖ້ວນ, ສິດ ແລະ ພັນທະພື້ນຖານຂອງພົນລະເມືອງ, ສະແດງໃຫ້ເຫັນຄວາມຮັບຜິດຊອບຂອງລັດ ແລະ ສັງຄົມ ໃນການຮັບຮູ້, ເຄົາລົບ, ປົກປ້ອງ ແລະ ຮັບປະກັນສິດທິມະນຸດ. ສິດທິມະນຸດ ໄດ້ສະແດງທັງໝົດໃນສົນທິສັນຍາສາກົນ, ແລະ ກໍຖືກສະແດງໃຫ້ເຫັນໃນ ລັດຖະທຳມະນູນປີ 2013. ລັດຖະທຳມະນູນປີ 2013 ເປັນຄັ້ງທຳອິດ ກຳນົດສິດມີຊີວິດ, ສິດຊົມໃຊ້ບັນດາຄຸນຄ່າວັດທະນະທຳ, ມີຄວາມເສລີໃນການເລືອກເຟັ້ນພາສາປາກເວົ້າ, ສິດມີຊີວິດໃນສະພາບແວດລ້ອມທີ່ປອດໃສ… ນອກນັ້ນ, ລັດຖະທຳມະນູນສະບັບນີ້ ບໍ່ພຽງແຕ່ກຳນົດເຖິງສິດພົນລະເມືອງຂອງປະເທດນັ້ນ, ຫາກແມ່ນສິດທິມະນຸດຂອງ ປະເທດຫວຽດນາມສັງຄົມນິຍົມ. ນີ້ກໍແມ່ນຈຸດເດັ່ນທີ່ສຳຄັນ ຢັ້ງຢືນການສືບທອດ, ພັດທະນາເນື້ອໃນຫລາຍຢ່າງກ່ຽວກັບສິດທິມະນຸດຈາກ ລັດຖະທຳມະນູນສະບັບກ່ອນ, ພ້ອມກັນນັ້ນ ຕ້ອງເຮັດໃຫ້ບັນດາເນື້ອໃນດັ່ງກ່າວ, ເນື້ອໃນຈິດໃຈຂອງສົນທິສັນຍາສາກົນເປັນສະເຫມີຕົ້ນສະເຫມີປາຍ ຊື່ງຫວຽດນາມ ໄດ້ເຂົ້າຮ່ວມກ່ຽວກັບສິດທິມະນຸດ. ທ່ານ ຫງວຽນຮ່ວາບີງ, ຫົວຫນ້າອົງການໄອຍະການປະຊາຊົນສູງສຸດ ຕີລາຄາວ່າ:
“ເນື້ອໃນຈິດໃຈຂອງລັດຖະທຳມະນູນ ແມ່ນເຄົາລົບ ແລະ ປົກປ້ອງສິດທິມະນຸດ. ເນື້ອໃນຈິດໃຈປະຊາທິປະໄຕຂອງ ລັດຖະທຳມະນູນ, ຈິດໃຈເຄົາລົບ ແລະ ປົກປ້ອງສິດທິມະນຸດ ໄດ້ຮັບຮູ້ຢ່າງຈະແຈ້ງໃນ ລັດຖະທຳມະນູນ. ຈາກນັ້ນຈະເປັນການກວດກາການເຄື່ອນໄຫວຂອງອົງການຕຸລາການ, ໃນນັ້ນ ມີອົງການໄອຍະການ. ຄຽງຄູ່ກັບການຢັ້ງຢືນບັນດາສິດພື້ນຖານຂອງມະນຸດ, ລັດຖະທຳມະນູນ ກໍວາງອອກບັນດາເນື້ອໃນກວດກາຢ່າງແຫນ້ນແຟ້ນກວ່າບັນດາການເຄື່ອນໄຫວຈຳກັດສິດທິມະນຸດ .”
ທ່ານ ຫງວຽນຮ່ວາບີງ, ຫົວຫນ້າອົງການໄອຍະການປະຊາຊົນສູງສຸດ
photo:doisongphapluat.vn
|
ຕັ້ງຫນ້າປັບປຸງ, ກວດກາຮ່າງກົດໝາຍກວ່າ 10 ສະບັບທີ່ກ່ຽວຂ້ອງເຖິງສິດທິມະນຸດ
ໃນແຜນການຂອງລັດຖະບານກ່ຽວກັບການຜັນຂະຫຍາຍການປະຕິບັດ ລັດຖະທຳມະນູນ ໄດ້ເຕື້ອງເຖິງການປັບປຸງກວດກາຄືນຮ່າງກົດໝາຍ 82 ສະບັບ, ໃນນັ້ນ ມີຮ່າງກົດໝາຍກວ່າ 10 ສະບັບມີຂໍ້ມາດຕາທີ່ກ່ຽວຂ້ອງເຖິງການປົກປ້ອງສິດທິມະນຸດ. ບັນດາຮ່າງກົດໝາຍດັ່ງກ່າວນັ້ນແມ່ນ: ກົດໝາຍວ່າດ້ວຍອາຍາ, ກົດໝາຍແພ່ງ, ກົດໝາຍການສົມລົດ ແລະ ຄອບຄົວ, ກົດໝາຍແຮງງານ, ກົດໝາຍວຽກເຮັດງານທຳ…. ຕາມການຳກະຊວງຍຸຕິທຳແລ້ວ, ໃນການກຳນົດທິດ 5 ປະການກ່ຽວກັບການ ປັບປຸງປະມວນກົດໝາຍອາຍາ, ການກຳນົດທຳອິດແມ່ນຮັບປະກັນສິດທິມະນຸດ. ກົດໝາຍແພ່ງກ່ຽວຂ້ອງເຖິງຍາດຕິພີ່ນ້ອງ, ສະນັ້ນ ເມື່ອປັບປຸງຈະກຳນົດເງື່ອນໄຂສະດວກເພື່ອໃຫ້ປະຊາຊົນມີຄວາມສະດວກໃນການປະຕິບັດບັນດາສິດຍາດຕິພີ່ນ້ອງ. ກົດໝາຍວ່າດ້ວຍການສົມລົດ ແລະ ຄອບຄົວ ຈະກຳນົດສິດທິມະນຸດຫລາຍຢ່າງຄື: ສິດການສົມລົດ, ຢ່າຮ້າງ. ນອກນັ້ນ ບັນດາກົດໝາຍກ່ຽວກັບອົງການສານ, ອົງການໄອຍະການ, ກົດໝາຍການລົງປະຊາປະຕິ ລ້ວນແຕ່ມີບັນດາຂໍ້ມາດຕາທີ່ກ່ຽວຂ້ອງເຖິງສິດທິມະນຸດ. ສະນັ້ນ ໃນວິວັດການປັບປຸງບັນດາກົດໝາຍດັ່ງກ່າວ ພວມໄດ້ຮັບການຍູ້ແຮງ ດ້ວຍການເຂົ້າຮ່ວມຂອງບັນດາຜູ້ຊ່ຽວຊານດ້ານກົດໝາຍເປັນຈຳນວນຫລວງຫລາຍ. ສາດສະດາຈານ, ດຣ ທາຍຫວີງທັງ, ມະຫາວິທະຍາໄລສັງກັດກົດໝາຍຮ່າໂນ້ຍ ໃຫ້ຮູ້ວ່າ:
“ບັນດາຜູ້ຊ່ຽວຊານໃນມະຫາວິທະຍາໄລ ໄດ້ຕັ້ງຫນ້າເຂົ້າຮ່ວມການປະກອບຄຳເຫັນໃສ່ບັນດາກົດໝາຍ ເພື່ອຫັນ ລັດຖະທຳມະນູນເປັນລະອຽດ. ໃນປີ 2014, ພວກຂ້າພະເຈົ້າຈະເຂົ້າຮ່ວມການປະກອບຄຳເຫັນໃສ່ກົດໝາຍຈັດຕັ້ງສະພາແຫ່ງຊາດ, ກົດໝາຍຈັດຕັ້ງລັດຖະບານ, ກົດໝາຍຈັດຕັ້ງສານ, ກົດໝາຍຈັດຕັ້ງໄອຍະການ ແລະ ປີ 2015 ຈະປະກອບຄຳເຫັນໃສ່ກົດໝາຍຈັດຕັ້ງອຳນາດການປົກຄອງທ້ອງຖິ່ນ. ຍິ່ງກວ່ານັ້ນ ໃນ ລັດຖະທຳມະນູນສະບັບໃຫມ່ ມີມາດຕາກ່ຽວກັບການລົງປະຊາມະຕິ ສະນັ້ນ ພວກຂ້າພະເຈົ້າຈະປະກອບສ່ວນຢ່າງຕັ້ງຫນ້າໃຫ້ແກ່ຮ່າງກົດໝາຍວ່າດ້ວຍລົງປະຊາມະຕິ. ໃນປີ 2014, ມະຫາວິທະຍາໄລ ຈະສ້າງຫລັກສູດກ່ຽວກັບ ລັດຖະທຳມະນູນ ຫວຽດນາມຄືນໃຫມ່, ໃນນັ້ນ ມີເນື້ອໃນກ່ຽວກັບສິດທິມະນຸດ ແລະ ປັບປຸງບັນດາຫລັກສູດທີ່ມີສ່ວນກ່ຽວຂ້ອງ.”
ເປັນຄັ້ງທຳອິດ ສິດທິມະນຸດໄດ້ຮັບການຢັ້ງຢືນກ່ຽວກັບດ້ານເນື້ອໃນ ແລະ ເຕັກນິກນິຕິບັນຍັດໃນ ລັດຖະທຳມະນູນ ຂອງຫວຽດນາມ ຢ່າງຄົບຖ້ວນ. ເລື່ອງຫັນບັນດາເນື້ອໃນກ່ຽວກັບສິດທິມະນຸດໃນລັດຖະທຳມະນຸນປະກົດຜົນເປັນຈິງ ຈະປະກອບສ່ວນເຮັດໃຫ້ສິດທິມະນຸດໄດ້ຮັບປະກັນການປະຕິບັດຕົວຈິງ.