(vovworld)- ນິຕິບັນຍັດ ແມ່ນຫນຶ່ງໃນບັນດາພາລະບົດບາດສຳຄັນທີ່ສຸດຂອງສະພາແຫ່ງຊາດ. ປີ 2014, ຊື່ງແມ່ນປີທຳອິດແຫ່ງການຜັນຂະຫຍາຍປະຕິບັດລັດຖະທຳມະນູນປີ 2013, ສະພາແຫ່ງຊາດບຸລິມະສິດສູງສຸດໃຫ້ວຽກງານນິຕິບັນຍັດ ດ້ວຍເລື່ອງຮັບຮອງເອົາກົດໝາຍ 29 ສະບັບ, ໃຫ້ຄຳເຫັນເປັນຄັ້ງທຳອິດໃສ່ ຮ່າງກົດໝາຍອື່ນ 28 ສະບັບ. ໝາກຜົນນີ້ ປະກອບສ່ວນນຳບັນດາຂໍ້ກຳນົດຂອງລັດຖະທຳມະນູນ ເຂົ້າສູ່ຊີວິດ, ສ້າງລະບົບກົດໝາຍໃຫ້ສົມບູນແບບ, ຕອບສະຫນອງຄວາມຮຽກຮ້ອງຕ້ອງການນັບມື້ນັບສູງຂອງການຄຸ້ມຄອງປະເທດ, ຄຸ້ມຄອງສັງຄົມ, ສ້າງລັດແຫ່ງອຳນາດນິຕິບັນຍັດສັງຄົມນິຍົມ.
ເບິ່ງລວມແລ້ວ, ປີ 2014, ເລື່ອງສ້າງກົດໝາຍ, ລັດຖະບັນຍັດຂອງສະພາແຫ່ງຊາດ ໄດ້ຮັບການຜັນຂະຫຍາຍຢ່າງແຮງ, ສຸມໃສ່ຮ່າງກົດໝາຍສຳຄັນຫລາຍສະບັບໃນບາງຂົງເຂດຕົ້ນຕໍຄື: ບັນດາກົດໝາຍວ່າດ້ວຍການຈັດຕັ້ງກົງຈັກລັດ, ບັນດາຮ່າງກົດໝາຍກຳນົດກ່ຽວກັບເສດຖະກິດການຕະຫລາດຕາມການກຳນົດທິດສັງຄົມນິຍົມ, ສິດທິມະນຸດ, ສິດ ແລະ ພັນທະພື້ນຖານຂອງພົນລະເມືອງ.
ຫນ້າທີ່ຈຸດສຸມຂອງກອງປະຊຸມສະໄຫມສາມັນ 2 ເທື່ອຂອງສະພາແຫ່ງຊາດໃນປີ2014
ປີ 2014, ສະພາແຫ່ງຊາດຊຸດທີ 13 ກຳນົດຫນ້າທີ່ຈຸດສຸມຂອງກອງປະຊຸມສະໄຫມສາມັນ 2 ເທື່ອໃນປີ ແມ່ນວຽກງານນິຕິບັນຍັດ. ເວລາສະຫງວນໃຫ້ແກ່ວຽກງານນີ້ກວມ 2/3 ເວລາດຳເນີນກອງປະຊຸມທັງໝົດຂອງສະພາແຫ່ງຊາດ. ມີຜູ້ຊ່ຽວຊານຫລາຍທ່ານຕີລາຄາວ່າ: ບໍ່ທັນມີເວລາໃດທີ່ສະພາແຫ່ງຊາດ ສະພາແຫ່ງຊາດດຳເນີນກອງປະຊຸມດ້ວຍເນື້ອໃນນິຕິບັນຍັດທີ່ກ້ວາງໃຫຍ່ຄືແນວນັ້ນ. ນີ້ແມ່ນການເຄື່ອນໄຫວເພື່ອຫັນລັດຖະທຳມະນູນປີ 2013 ເປັນລະບອບກົດໝາຍ, ຮັບມືກັບບັນດາເງື່ອນໄຂພັດທະນາຂອງສັງຄົມ. ທ່ານ ຟານວັນກູຍ, ສະມາຊິກສະພາແຫ່ງຊາດ ແຂວງເງ້ອານ ຕີລາຕາວ່າ:
“ທີ່ສະໄຫມປະຊຸມກ່ອນນີ້ ແລະ ສະໄຫມປະຊຸມເທື່ອນີ້, ສະພາແຫ່ງຊາດໄດ້ຮັບຮອງເອົາ ແລະ ສືບຕໍ່ຮັບຮອງເອົາຮ່າງກົດໝາຍຫລາຍສະບັບ. ລັດຖະບານໄດ້ປະກາດໃຊ້ບັນດາເອກະສານແນະນຳການປະຕິບັດກົດໝາຍຢ່າງທັນການ, ເພື່ອສືບປັບປຸງລະບອບນະໂຍບາຍໃຫ້ສົມບູນ ຕອບສະຫນອງຄວາມຮຽກຮ້ອງຕ້ອງການຂອງພື້ນຖານເສດຖະກິດ, ສ້າງຄວາມດຶງດູດການລົງທຶນໃນຂົງເຂດຈຳນວນຫນຶ່ງຄື: ລົງທຶນເຂົ້າພື້ນຖານໂຄງລ່າງ, ລົງທຶນເຂົ້າອຸດສາຫະກຳຫນູນຊ່ວຍ ຊື່ງພື້ນຖານເສດຖະກິດພວມຕ້ອງການ.”
ກວມລວມຫລາຍຂົງເຂດຂອງຊີວິດ
ສະພາແຫ່ງຊາດໄດ້ສະຫງວນຄວາມເອົາໃຈໃສ່ຫລາຍສຸດໃຫ້ແກ່ເລື່ອງຫັນລັດຖະທຳມະນູນປີ 2013 ເປັນລະອຽດ ນັບທັງລະບອບການເມືອງ, ເສດຖະກິດການຕະຫລາດ ແລະ ເປີດກວ້າງປະຊາທິປະໄຕ ແລະ ສິດທິມະນຸດ.
ໃນປີທຳອິດແຫ່ງການຜັນຂະຫຍາຍປະຕິບັດລັດຖະທຳມະນູນປີ 2013, ສະພາແຫ່ງຊາດຫວຽດນາມ ໄດ້ປະກາດໃຊ້ ກົດໝາຍ 3 ສະບັບ ກ່ຽບກັບການຈັດຕັ້ງ, ກົງຈັກລັດ. ສະພາແຫ່ງຊາດ ກໍໃຫ້ຄຳເຫັນເປັນຄັ້ງທຳອິດໃສ່ຮ່າງກົດໝາຍວ່າ ລັດຖະບານ(ສະບັບປັບປຸງ), ອົງການບໍລິຫານລັດສູງສຸດ; ຮ່າງກົດໝາຍວ່າດ້ວຍການຈັດຕັ້ງອຳນາດການປົກຄອງທ້ອງຖິ່ນ. ເລື່ອງຮັບຮອງເອົາກົດໝາຍ 3 ສະບັບ ແລະ ໃຫ້ຄຳເຫັນໃສ່ ຮ່າງກົດໝາຍ 2 ສະບັບກ່ຽວກັບການຈັດຕັ້ງກົງຈັກລັດໃນປີ 2014 ແມ່ນຄວາມມານະພະຍາຍາມອັນໃຫຍ່ຫລວງຂອງສະພາແຫ່ງຊາດ ເພື່ອຮັບປະກັນພື້ນຖານດ້ານກົດໝາຍໃຫ້ແກ່ບັນດາອົງການໃນກົງຈັກລັດເຄື່ອນໄຫວຢ່າງເປັນລະບົບ, ມີປະສິດທິຜົນ, ຖືກກັບເນື້ອໃນຈິດໃຈຂອງລັດຖະທຳມະນູນປີ 2013.
ກ່ຽວກັບການປັບປຸງລະບອບເສດຖະກິດໃຫ້ສົມບູນແບບ, ປີ 2014, ສະພາແຫ່ງຊາດໄດ້ຮັບຮອງເອົາຮ່າງກົດໝາຍກຳນົດກ່ຽວກັບເສດຖະກິດການຕະຫລາດຕາມການກຳນົດທິດສັງຄົມນິຍົມຫລາຍສະບັບ. ກົດໝາຍວ່າດ້ວຍເຮືອນຢູ່ (ສະບັບປັບປຸງ) ແມ່ນສະແດງໃຫ້ເຫັນທັດສະນະ, ແຜນນະໂຍບາຍຂອງລັດກ່ຽວກັບການພັດທະນາພື້ນຖານເສດຖະກິດການຕະຫລາດຕາມການກຳນົດທິດສັງຄົມນິຍົມໃນຂົງເຂດພັດທະນາເຮືອນຢູ່. ດ້ານຫນຶ່ງແມ່ນສ້າງສະພາບແວດລ້ອມສະດວກເພື່ອພັດທະນາເຮືອນຢູ່ ເພື່ອຕອບສະຫນອງຄວາມຕ້ອງການກ່ຽວກັບເຮືອນຢູ່ຂອງປະຊາຊົນມີລາຍຮັບຕ່ຳ, ພ້ອມທັງເອົາໃຈໃສ່ການພັດທະນາເຮືອນຢູ່ສັງຄົມ ເພື່ອຮັບໃຊ້ບັນດາເປົ້າໝາຍນະໂຍບາຍ, ຜູ້ທຸກຍາກ, ຜູ້ມີລາຍຮັບຕ່ຳ. ກົດໝາຍວ່າດ້ວຍການລົງທຶນ(ສະບັບປັບປຸງ)ໄດ້ຮັບການປະກາດໃຊ້ ນັ້ນໄດ້ສ້າງບາດກ້າວຫັນປ່ຽນກ່ຽວກັບລະບຽບບໍລິຫານໃນການປະຕິບັດການເຄື່ອນໄຫວລົງທຶນຕິດພັນກັບການປ່ຽນໃຫມ່, ຍົກສູງປະສິດທິຜົນວຽກງານຄຸ້ມຄອງລັດສຳລັບການເຄື່ອນໄຫວລົງທຶນ. ກົດໝາຍວ່າດ້ວຍວິສາຫະກິດ (ສະບັບປັບປຸງ) ຊ່ວຍລະດົມບັນດາແຫລ່ງກຳລັງເຂົ້າໃນການຜະລິດ, ດຳເນີນທຸລະກິດ.
ບັນດາກົດໝາຍໂດຍສະພາແຫ່ງຊາດປະກາດໃຊ້ໃນປີ 2014 ກໍຢືນຢັນຢ່າງຈະແຈ້ງການຮັບປະກັນສິດທິມະນຸດ ແລະ ສິດພົນລະເມືອງ ຕາມການກຳນົດຂອງລັດຖະທຳມະນູນ. ສະພາແຫ່ງຊາດຮັບຮອງເອົາກົດໝາຍສະບັບປັບປຸງ, ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍປະກັນສຸຂະພາບ, ກົດໝາຍວ່າດ້ວຍປະກັນສັງຄົມ(ສະບັບປັບປຸງ). ບັນດາກົດໝາຍນີ້ ແມ່ນການກຳນົດທິດສຳຄັນກ່ຽວກັບການເປີດກວ້າງເປົ້າໝາຍຊື້ບັດປະກັນສັງຄົມ, ມູ່ງໄປເຖິງທົ່ວປວງຊົນນຳໃຊ້ປະກັນສັງຄົມກໍຄືສ້າງກົນໄກດ້ານກົດໝາຍ ຮັບປະກັນສິດຜົນປະໂຫຍດຂອງຜູ້ເຂົ້າຮ່ວມປະກັນສຸຂະພາບ. ແລະ ກໍໃນປີ 2014, ສະພາແຫ່ງຊາດ ປືກສາຫາລືປະມວນກົດໝາຍພົນລະເຮືອນ(ສະບັບປັບປຸງ) ເພື່ອຮັບເອົາຄຳເຫັນປະກອບຂອງປະຊາຊົນໃນ 3 ເດືອນຕົ້ນປີ 2015.
ເມື່ອຕີລາຄາໂດຍສັງເຂບກ່ຽວກັບການສ້າງກົດໝາຍ, ທ່ານ ດີງຊວນຖາວ, ສະມາຊິກສະພາແຫ່ງຊາດ ນະຄອນ ຮ່າໂນ້ຍ ຖືວ່າ:
“ເລື່ອງສ້າງກົດໝາຍມີການຫັນປ່ຽນຢ່າງຕັ້ງຫນ້າ, ບັນດາມາດຕາລ້ວນແຕ່ສຸມໃສ່ສິດຂອງປະຊາຊົນ, ຂອງອົງການຈັດຕັ້ງ. ບັນດາສະມາຊິກສະພາແຫ່ງຊາດ ເສີມຂະຫຍາຍບົດບາດ ແລະ ຄວາມຮັບຜິດຊອບຕໍ່ຜູ້ມີສິດເລືອກຕັ້ງເປັນຢ່າງດີ, ເປັນຕົ້ນແມ່ນການປຶກສາຫາລືກ່ຽວກັບບັນດາຮ່າງກົດໝາຍ. ເບິ່ງລວມແລ້ວ, ຄຸນນະພາບໃນການສ້າງກົດໝາຍ ແລະ ວາງອອກບັນດາມະຕິທີ່ສະໄຫມປະຊຸມແມ່ນມີບາດກ້າວໃຫມ່.”
ລັດຖະທຳມະນູນປີ 2013 ສ້າງພື້ນຖານດ້ານການເມືອງ, ດ້ານກົດໝາຍໃຫ້ແກ່ໄລຍະພັດທະນາໃຫມ່ຂອງປະເທດຊາດ. ເລື່ອງຈັດຕັ້ງຜັນຂະຫຍາຍປະຕິບັດລັດຖະທຳມະນູນ ບໍ່ພຽງແຕ່ດຳເນີນໃນປີ 2014, 2015 ເທົ່ານັ້ນ ຫາກຕ້ອງປະຕິບັດໃນຊຸມປີຈະມາເຖິງ, ມູ່ງໄປເຖິງຈຸດໝາຍສ້າງລັດແຫ່ງອຳນາດນິຕິບັນຍັດສັງຄົມນິຍົມ. ເມື່ອເຕື້ອງເຖິງເນື້ອໃນດັ່ງກ່າວ, ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ຢືນຢັນວ່າ:
“ສະພາແຫ່ງຊາດມອບໃຫ້ຄະນະປະຈຳສະພາແຫ່ງຊາດ, ບັນດາອົງການຂອງສະພາແຫ່ງຊາດ, ລັດຖະບານ ແລະ ບັນດາອົງການຈັດຕັ້ງກ່ຽວຂ້ອງ ຮັບປະກັນການປະຕິບັດ່ບັນດາກົດໝາຍ, ມະຕິ ຊື່ງສະພາແຫ່ງຊາດຮັບຮອງເອົາຢ່າງທັນການ, ມີປະສິດທິຜົນ, ພ້ອມທັງສືບຕໍ່ກວດກາຄືນ ລະບົບກົດໝາຍທັງໝົດ ເພື່ອປັບປຸງ, ເພີ່ມເຕີມ, ຍົກເລີກ ຫລືປະກາດໃຊ້ໃຫມ່ໃຫ້ເໝາະສົມກັບລັດຖະທຳມະນູນຢ່າງທັນການ. ຍູ້ແຮງວຽກງານໂຄສະນາ, ເຜີຍແຜ່, ສຶກສາດ້ານກົດໝາຍ, ປະກອບສ່ວນນຳລັດຖະທຳມະນູນ ແລະ ກົດໝາຍເຂົ້າສູ່ຊີວິດ.”
ລັດຖະທຳມະນູນປີ 2013 ໄດ້ຮັບການຈັດຕັ້ງປະຕິບັດໄດ້ດີຫລືບໍ່ ແມ່ນອີງໃສ່ວຽກງານສ້າງກົດໝາຍ ແລະ ຜັນຂະຫຍາຍປະຕິບັດກົດໝາຍ. ບັນດາຄວາມມານະພະຍາຍາມຫັນລັດຖະທຳມະນູນເປັນລະບອບກົດໝາຍຂອງສະພາແຫ່ງຊາດຫວຽດນາມໃນປີ 2014 ປະກອບສ່ວນສຳຄັນເພື່ອໃຫ້ລັດຖະທຳມະນູນເຂົ້າສູ່ຊີວິດ, ສ້າງທ່າເພື່ອປັບປຸງພື້ນຖານດ້ານກົດໝາຍສັງຄົມນິຍົມ , ປ່ຽນໃຫມ່ພັດທະນາປະເທດຊາດ.