(vovworld)-ພາຍຫລັງບັນດາການບຸກໂຈມຕີ ແລະ ປາບປາມຜູ້ແຫ່ຂະບວນປະທ້ວງທີ່ສະຫນັບສະຫນູນປະທານາທິບໍດີອີຢີບ Mohamed Morsi ຜູ້ຖືກໂຄ່ນລົ້ມ, ອາເມລິກາ ໄດ້ຢຸດຕິບ້ວງເງິນຊ່ວຍເຫລືອດ້ານການທະຫານ ແລະ ເສດຖະກິດໃຫ້ແກ່ປະເທດພັນທະມິດຈຳນວນຫນຶ່ງຢ່າງເປັນທາງການໃນກາງອາທິດນີ້. ບໍ່ແນ່ວ່າ ນີ້ແມ່ນຄຳຕັດສິນຂອງອຳນາດການປົກຄອງອາເມລິກາໃນຂະນະທີ່ປະເທດອີບຢີບເຊິ່ງແມ່ນພັນທະມິດສຳຄັນຂອງອາເມລິກາຢູ່ພາກພື້ນ ຕາເວັນອອກກາງ ພວມຕ້ອງປະເຊີນຫນ້າກັບບັນດາສິ່ງທ້າທາຍຈາກດ້ານເສດຖະກິດຕະຫລອດຮອດຄວາມໝັ້ນຄົງ.
ຄວາມເຄັງຕືງສືບຕໍ່ເກີດຂຶ້ນຢູ່ອີຢີບ
ພາບ:internet
|
ສັນຍານບໍ່ດີກ່ຽວກັບດ້ານການເງິນ, ການທະຫານ.
ບ້ວງເງິນຊ່ວຍເຫລືອດ້ານການເງິນ ຊື່ງວໍຊິງຕັນ ຢຸດຕິການສະຫນອງໃຫ້ແກ່ອີຢີບແມ່ນ 260 ລ້ານ USD, ພ້ອມກັນນັ້ນ ແມ່ນເລື່ອງ ອາເມລິກາ ຈະຢຸດຕິການມອບໂອນບັນດາອາວຸດສຳຄັນ, ໃນນັ້ນ ມີເຮືອບິນເອລີກອບແຕ Apache 10 ລຳ, ເຮືອບິນສູ້ຮົບ F 16, ລົດຖັງ M1A1 Abrams ແລະ ລູກສອນໄຟ Harpoon. ກ່ອນຫນ້ານັ້ນ ອາເມລິກາ ກໍໄດ້ຍົກເລີກການຊ້ອມຮົບຮ່ວມກັບ ອີຢີບ ແລະ ໂຈະການມອບໂອນເຮືອບິນສູ້ຮົບ E 16 4 ລຳ ພ້ອມກັບອາວຸດທີ່ມີລາຄາສູງໃຫ້ແກ່ປະເທດນີ້.
ຜ່ານຂໍ້ຕົກລົງຢຸດຕິການຫນູນຊ່ວຍໃຫ້ແກ່ອີຢີບ, ປະທານາທິບໍດີ ອາເມລິກາ Brack Obama ຢາກສ້າງກຳລັງດັນຮຽກຮ້ອງໃຫ້ອຳນາດການປົກຄອງຊົ່ວຄາວອີ ຢີບ ຫລຸດຜ່ອນບັນດາການປາບປາມຜູ້ສະຫນັບສະຫນູນທ່ານ Morsi ແລະ ຕັ້ງຫນ້າກວ່າໃນວິວັດການມອບໂອນການເມືອງຢູ່ອີຢີບ.
ເລື່ອງຢຸດຕິບ້ວງເງິນຊ່ວຍເຫລືອດັ່ງກ່າວບໍ່ແມ່ນເລື່ອງບັງເອີນ ເມື່ອກ່ອນນັ້ນ ຫາງສຽງກໍໄດ້ເຕື້ອງເຖິງເລື່ອງອາເມລິກາອາດຈະຄິດໄລ່ຊັ່ງຊາຄືນບ້ວງເງິນຊ່ວຍເຫລືອໃຫ້ແກ່ອີຢີບ ນັບແຕ່ເມື່ອເກີດການລັດຖະປະຫານປະທານາທິບໍດີ Morsi ເມື່ອເດືອນ 7 ແລະ ບັນດາບັ້ນປາບປາມທີ່ນອງເລືອດໃສ່ບັນດາສະມາຊິກອົງການອ້າຍນ້ອງ ມຸດສະລີມ (MB)ຫລັງຈາກນັ້ນ.
ຫລຸດຜ່ອນຄວາມຜົນສະທ້ອນດ້ວຍຕົນເອງ
ເມື່ອ ອາເມລິກາ ປະກາດຫລຸດຜ່ອນການຊ່ວຍເຫລືອຢ່າງເປັນທາງການ, ລັດຖະບານຊົ່ວຄາວ ອີຢີບໄດ້ປະຕິເສດຢ່າງແຂງແຮງ. ໂຄສົກກະຊວງການຕ່າງປະເທດອີຢີບ Badr Abdelatty ເນັ້ນຫນັກ ຂໍ້ຕົກລົງຂອງອາມເລິກາແມ່ນສິ່ງທີ່ຜິດພາດທີ່ສຸດ ແລະ ບໍ່ຖືກກັບຈຸດເວລາ ຂະນະທີ່ອີຢີບພວມປະເຊີນຫນ້າກັບບັນດາສິ່ງທ້າທາຍອັນຕະລາຍທີ່ກ່ຽວຂ້ອງເຖິງການກໍ່ການຮ້າຍ. ຕາມ ທ່ານ Badr Abdelatty ແລ້ວ, ຂໍ້ຕົກລົງດັ່ງກ່າວເຮັດໃຫ້ວົງການການເມືອງ Cairo ເກີດຄວາມສົງໃສກ່ຽວກັບການສະຫນັບສະຫນູນທີ່ມີລັກສະນະຍຸດທະສາດຂອງ ວໍຊິງຕັນ ສຳລັບບັນດາໂຄງການປ້ອງກັນຄວາມສະຫງົບຂອງ ອີຢີບ. ໂຄສົກກະຊວງການຕ່າງປະເທດອີຢີບ Badr Abdelatty ກໍຢືນຢັນ: ຄະນະການນຳປະເທດນີ້ຈະບໍ່ປ່ຽນແປງບັນດານະໂຍບາຍປະຈຸບັນຂອງຕົນ.
ນາຍົກລັດຖະມົນຕີ ຊົ່ວຄາວ ອີຢີບ Hazem El Beblawi ກ່າວເຕືອນວ່າ ໃນອະດີດຕະການ, ອີຢີບ ເຄີຍຊື້ອາວຸດຂອງລັດເຊຍ ແລະ ຈະຊອກວິທີການໃຫ້ແກ່ອະນາຄົດ ໂດຍບໍ່ຕ້ອງການເຖິງການຊ່ວຍເຫລືອຈາກ ອາເມລິກາ. ທ່ານກໍເປີດເຜີຍວ່າ: ຊາອຸດີ ອາຣັບບີ, ຢູໄນເຕບ ອາຣັບ ເອມີເຣດ ແລະ ຄູເວດ ໄດ້ໝັ້ນໝາຍຊ່ວຍເຫລືອລັດຖະບານໃຫມ່ຂອງອີຢີບ ນັບຕື້ USD, ບັນດາບ້ວງຊ່ວຍເຫລືອດັ່ງກ່າວຈະຊ່ວຍໃຫ້ກອງທັບສາມາດຄົງຕົວໄດ້ ແຕ່ບໍ່ຖືກຜົນສະທ້ອນຍ້ອນຂາດການຊ່ວຍເຫລືອດ້ານການທະຫານຂອງ ອາເມລິກາ. ຜູ້ບັນຊາການທະຫານອີຢີບ Abdel Fattah Sisi ກ່າວເຕືອນວ່າ ອີຢີບ ຈະອະໄພຕໍ່ຫນ້າບໍ່ວ່າກຳລັງດັນໃດ ເຖິງວ່າຜ່ານການກະທຳຫລືພຽງແຕ່ແມ່ນການໃສ່ຮ້າຍປາຍສີ.
ຂໍ້ຕົກລົງຂອງອາເມລິກາ ບໍ່ພຽງແຕ່ເຮັດໃຫ້ການພົວພັນກັບພັນທະມິດມີຄວາມເຄັ່ງຕືງເທົ່ານັ້ນ ຫາກຍັງຄາດຄະເນຈະກໍ່ຜົນຮ້າຍຢ່ອນຫລັງຢ່າງຫນັກຫນ່ວງສຳລັບເສດຖະກິດ ອີຢີບ ພາຍຫລັງກວ່າ 2 ປີ ທີ່ປະເທດນີ້ຕົກເຂົ້າສູ່ສະພາບຂາດຄວາມສະຖຽນລະພາບ. ຂະແຫນງທອ່ງທ່ຽວຫລຸດລົງ, ວິກິດການເສດຖະກິດຜັນແປໄປຢ່າງສັບສົນ.
ລະດົມກຳລັງໃຈປະເທດພັນທະມິດ
ເຖິງວ່າຫລຸດຜ່ອນການຊ່ວຍເຫລືອດ້ານການທະຫານ ແລະ ເສດຖະກິດກໍຕາມ ແຕ່ ທ່ານລັດຖະມົນຕີການຕ່າງປະເທດ ອາເມລິກາ John Kerry ຖະແຫລງວ່າ: ອາເມລິກາ ຍັງຄົງຮັກສາບ້ວງເງິນຊ່ວຍເຫລືອໃຫ້ແກ່ສາທາລະນະສຸກ, ການສຶກສາ, ຕ້ານການກໍ່ການຮ້າຍ ແລະ ຮັບປະກັນຄວາມສະຫງົບປອດໄພຢູ່ເຂດຊາຍແດນຂອງອີຢີບ. ຂໍ້ຕົກລົງຢຸດຕິການຊ່ວຍເຫລືອໃຫ້ແກ່ ອີຢີບ ບໍ່ໝາຍຄວາມວ່າ ວໍຊິງຕັນ ຢາກເຮັດໃຫ້ການພົວພັນລະຫວ່າງສອງປະເທດຊົ່ວຮ້າຍລົງ. ອາເມລິກາ ບໍ່ມີເຈດຈຳນົງຢຸດຕິການພົວພັນນີ້ ຫລືໄປຝືນກັບບັນດາຄຳໝັ້ນສັນຍາຫນູນຊ່ວຍຢ່າງເຂັ້ມງວດ. ທ່ານ John Kerry ກໍ່ເວົ້າວ່າ: ອຳນາດການປົກຄອງປະທານາທິບໍດີ Barack Obama ຈະເຊື່ອມຕໍ່ການຊ່ວຍເຫລືອ, ອີງໃສ່ບາດກ້າວຕໍ່ໄປຂອງອຳນາດການປົກຄອງຊົ່ວຄາວ ເພື່ອມຸ່ງໄປເຖິງການມອບໂອນດ້ານການເມືອງຢູ່ອີຢີບ.
ເຖິງຢ່າງໃດກໍຕາມ ການລະດົມກຳລັງໃຈດັ່ງກ່າວບໍ່ທັນພຽງພໍເທື່ອ
ອີຢີບ ເຄີຍແມ່ນປະເທດມີພື້ນຖານເສດຖະກິດພົ້ນເດັ່ນຢູ່ ຕາເວັນອອກກາງ- ອາຟຼິກາເຫນືອ. ນັບແຕ່ປີ 1978, ອີຢີບ ໄດ້ຮັບຖືວ່າແມ່ນປະເທດພັນທະມິດສຳຄັນຂອງອາເມລິກາ ຢູ່ ພາກພື້ນທີ່ເກີດການຜັນແປຫລາຍຢ່າງນີ້. ດ້ວຍບັນດາສິ່ງທີ່ພວມເກີດຂຶ້ນດັ່ງກ່າວເບິ່ງຜົນປະໂຫຍດຂອງອາເມລິກາ ໃນພາກພື້ນ ຍາກທີ່ຈະຮັບປະກັນຄືກ່ອນນີ້ໄດ້ ແລະ ສຽງເວົ້າຂອງອາເມລິກາ ສຳລັບລັດຖະບານຊົ່ວຄາວອີຢີບພວມຄ່ອຍໆບໍ່ມີຄຸນຄ່າອີກ.