(vovworld) - ປີ 2012, ປະຊາຊົນ ຫວຽດນາມ ໄດ້ຜ່ານຜ່າຄວາມຫຍຸ້ງຍາກນາໆປະການ ບັນລຸລະດັບເຕີບໂຕ GDP 5,03% ຊຶ່ງແມ່ນຕົວເລກທີ່ມີຄວາມໝາຍໃນສະພາບພື້ນຖານເສດຖະກິດໂລກພວມຊຸດໂຊມຢູ່ຫລາຍປະເທດ. ໝາກຜົນດັ່ງກ່າວພ້ອມກັບຄວາມມານະພະຍາຍາມຜ່ານຜ່າຄວາມຫຍຸ້ງຍາກໃນປີ, ແລະການກຳນົດທິດພັດທະນາເສດຖະກິດຢ່າງຈະແຈ້ງໃນປີ 2013, ໄດ້ຊີ້ໃຫ້ເຫັນຄວາມເຊື່ອໝັ້ນຕໍ່ການພັດທະນາຂອງຫວຽດນາມຢ່າງໝັ້ນຄົງໃນປີ 2013.” ນີ້ກໍແມ່ນເນື້ອໃນບົດຂຽນຂອງນັກຂ່າວ ທູຮວາ.
ພາບປະກອບ:internet
|
ປີ 2013, ຫວຽດນາມ ຕ້ອງປະເຊີນຫນ້າກັບຄວາມຫຍຸ້ງຍາກໃນການພັດທະນາເສດຖະກິດ. ນັ້ນແມ່ນການຮັກສາລະດັບເຕີບໂຕຍອດຜະລິດຕະພັນພາຍໃນໃຫ້ຢູ່ໃນລະດັບເໝາະສົມ, ພ້ອມທັງຄວບຄຸມໄພເງິນເຟີ້ໃຫ້ໄດ້, ຮັກສາເສດຖະກິດມະຫາພາກເປັນປົກກະຕິ, ຮັບປະກັນຊີວິດສັງຄົມ. ໃນສານຕົ້ນປີ 2013, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ວາງອອກ 6 ຫນ້າທີ່ຈຸດສຸມ ເພື່ອໃຫ້ຫວຽດນາມ ແກ້ໄຂຄວາມຫຍຸ້ງຍາກ. ຫນຶ່ງໃນບັນດາມາດຕະການນັ້ນແມ່ນ: ຄວບຄຸມໄພເງິນເຟີ້ໃຫ້ຢູ່ໃນລະດັບ 8%, ພ້ອມທັງຮັບປະກັນລະດັບເຕີບໂຕເສດຖະກິດປະມານ 5,5%. ຫນ້າທີ່ຫຍຸ້ງຍາກດັ່ງກ່າວຮຽກຮ້ອງໃຫ້ລັດຖະບານຕ້ອງມີນະໂຍບາຍຢ່າງມີໄຫວພິບ, ເປັນຕົ້ນແມ່ນນະໂຍບາຍເງິນຕາ ແລະ ຮັກສາອັດຕາດອກເບ້ຍຢ່າງເໝາະສົມ. ດຣ ຫງວຽນກວາງທາຍ, ຮອງປະທານທັງເປັນເລຂາທິການໃຫຍ່ສະມາຄົມວິທະຍາສາດ ເສດຖະກິດຫວຽດນາມ ຖືວ່າ:
“ພວກເຮົາໄດ້ຄຸມໄພເງິນເຟີ້ຢູ່ໃນລະດັບ 6,8% ໃນປີ 2012, ປະຈຸບັນ ພວກເຮົາຕ້ອງຄວບຄຸມຕໍ່ ແລະ ຮັກສາສາຍພົວພັນລະຫວ່າງໄພເງິນເຟີ້ ແລະ ການເຕີບໂຕ, ເຮັດແນວໃດກະຕຸກຊຸກຍູ້ພື້ນຖານເສດຖະກິດໃຫ້ເຕີບໂຕຢ່າງແຂງແຮງກວ່າ. ນັ້ນແມ່ນບັນດາບັນຫາສຳຄັນທີ່ສຸດ. ນອກນັ້ນ, ການສົມທົບກັນລະຫວ່າງເງິນຕາ ແລະ ງົບປະມານ ຕ້ອງມີມາດຕະການຢ່າງເໝາະສົມ ແລະ ເຂັ້ມງວດ, ຮຽກຮ້ອງໃຫ້ມີການຕິດຕາມກວດກາ ແລະ ຄຸ້ມຄອງຢ່າງແຫນ້ນແຟ້ນລະຫວ່າງລັດ, ລັດຖະບານ ເພື່ອຮັບປະກັນໃຫ້ຄວາມຮຽກຮ້ອງຕ້ອງການສູງກວ່າ.”
ປີ 2013, ລັດຖະບານຈະຍົກສູງຄຸນນະພາບດ້ານກົດໝາຍ ແລະ ຄວາມສາມາດປະຕິບັດກັບນະໂຍບາຍ, ສ້າງຄວາມໄວ້ເນື້ອເຊື່ອໃຈຕໍ່ຕະຫລາດ, ປັດໄຈສ້າງເງື່ອນໄຂສະດວກໃຫ້ແກ່ການລົງທຶນດຳເນີນທຸລະກິດ, ປະກອບສ່ວນຍົກສູງກຳລັງແກ້ງແຍ້ງສັງລວມຂອງພື້ນຖານເສດຖະກິດ, ເພາະສິ່ງດັ່ງກ່າວຈະປະກອບສ່ວນສ້າງພື້ນຖານເສດຖະກິດໃຫ້ສຳເລັດຜົນ, ຫັນປ່ຽນຮູບແບບການເຕີບໂຕໃຫ້ບັນລຸປະສິດທິຜົນ ແລະ ເລື່ອງສ້າງໂຄງປະກອບພື້ນຖານເສດຖະກິດຄືນໃຫມ່ ຈະໄດ້ຮັບການປະຕິບັດຢ່າງຂ້ຽວຂາດກວ່າ, ຕາມທິດສ້າງບັນດາອົງການສິນເຊື່ອຄືນໃຫມ່ ສົມທົບກັບການແກ້ໄຂຫນີ້ເສຍເພື່ອແກ້ໄຂແຫລ່ງທຶນທີ່ຖືກຕິດຂັດໃຫ້ແກ່ພື້ນຖານເສດຖະກິດ. ຄຽງຄູ່ກັນນັ້ນ, ເລື່ອງແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ ແລະ ຫນູນຊ່ວຍຕະຫລາດ ຈະສືບຕໍ່ພັດທະນາຢ່າງແຂງແຮງກວ່າໃນປີ 2013. ຮອງສາສະດາຈານ, ດຣ ຫວໍຈີແທ່ນ, ຮອງຫົວຫນ້າສະຖາບັນຄົ້ນຄ້ວາການບໍລິຫານສູນກາງໃຫ້ຮູ້ວ່າ:
“ເລື່ອງແກ້ໄຂຄວາມຫຍຸ້ງຍາກ ແລະ ຫນູນຊ່ວຍຕະຫລາດຄັ້ງນີ້ມີຈຸດແຕກຕ່າງກັນຫນ້ອຍຫນຶ່ງ ນັ້ນແມ່ນມີຄວາມເອົາໃຈໃສ່ເຖິງຄວາມຕ້ອງການຫລາຍກວ່າ, ສ້າງກຳລັງຊື້ໃຫ້ແກ່ຕະຫລາດ. ທີສອງ ຕ້ອງມີຫລາຍມາດຕະການໃຫມ່ເພື່ອຍູ້ແຮງການລົງທຶນຂອງລັດ.”
ເສດຖະກິດຫວຽດນາມ ຈະພັດທະນາໃນປີ 2013
ພາບ: internet
|
ພ້ອມກັບບັນດາມາດຕະການພັດທະນາເສດຖະກິດ, ໃນປີ 2013 ຫວຽດນາມ ຈະເອົາໃຈໃສ່ເຖິງການຮັບປະກັນຊີວິດສັງຄົມກວ່າ, ຍູ້ແຮງການຫລຸດຜ່ອນຄວາມທຸກຍາກ, ເປັນຕົ້ນແມ່ນຢູ່ເຂດຊົນເຜົ່າສ່ວນຫນ້ອຍ, ຫນູນຊ່ວຍບັນດາເປົ້າໝາຍໃກ້ຈະຖືກຈັດເຂົ້າໃນລະດັບຄອບຄົວທຸກຍາກ ແລະ ບັນດາຄອບຄົວທຸກຍາກບື່ນຕົວຂຶ້ນພັດທະນາແບບຍືນຍົງ. ຫວຽດນາມ ມີຄວາມເອົາໃຈໃສ່ເປັນພິເສດເຖິງການພັດທະນາເສດຖະກິດສັງຄົມຢູ່ ເຂດທຸກຍາກ ແລະ ຖືວ່າ ນີ້ແມ່ນມາດຖານສຳເລັດຜົນຂອງບໍ່ວ່າໂຄງການພັດທະນາເສດຖະກິດໃດ. ຮອງສາສະດາຈານ, ດຣ ໂງຈີລອງ ອະດີດ ຫົວຫນ້າສະຖາບັນຄົ້ນຄ້ວາຕະຫລາດລາຄາ, ສັງກັດກະຊວງການເງິນ ໄດ້ຍົກໃຫ້ເຫັນບັນດາມາດຕະການລະອຽດເພື່ອແກ້ໄຂບັນຫາດັ່ງກ່າວ:
“ນອກຈາກການນຳໃຊ້ແຫລ່ງງົບປະມານແຫ່ງຊາດແລ້ວ ຕ້ອງຈັດຕັ້ງການຂຸດຄົ້ນທຸກແຫລ່ງກຳລັງ ເຮັດແນວໃດ ເພື່ອປັບປຸງການຮັບປະກັນຊີວິດສັງຄົມໃຫ້ດີກວ່າປີ 2012. ບັນຫານີ້ ໄດ້ລະບຸຢ່າງຈະແຈ້ງໃນສານຂອງລັດຖະບານ. ຕາມທັດສະນະຂອງຂ້າພະເຈົ້າ ຕ້ອງເຮັດແນວໃດເພື່ອຜັນຂະຫຍາຍໃຫ້ຖືກກັບຄາດໝາຍທີ່ໄດ້ວາງອອກ ແລະ ໃນວິວັດການຜັນຂະຫຍາຍ, ບັນຫາຕິດຕາມກວດກາມີຄວາມໝາຍສຳຄັນທີ່ສຸດ.”
ປີ 2012 ແມ່ນປີທີ່ມີການຜັນແປ ແລະ ປະສົບກັບຄວາມຫຍຸ້ງຍາກຫລາຍຢ່າງ. ແຕ່ດ້ວຍຄວາມມານະພະຍາຍາມສູ້ຊົນຂອງປະຊາຊົນຫວຽດນາມ ໄດ້ນຳມາເຊິ່ງບັນດາຜົນງານດີພໍສົມຄວນໃນສະພາບເສດຖະກິດທົ່ວໂລກພວມປະສົບກັບຄວາມຫຍຸ້ງຍາກ. ນັ້ນແມ່ນເສດຖະກິດມະຫາພາກໄດ້ຮັບການປັບປຸງ, ໄພເງິນເຟີ້ຖືກຄວບຄຸມຢູ່ໃນລະດັບຕຳ່, ວົງເງິນຂາອອກບັນລຸລະດັບສູງ, ບັນດາຂົງເຂດວັດທະນະທຳສັງຄົມມີຄວາມກ້າວຫນ້າ, ສະຫວັດດີການສັງຄົມ ແລະ ຮັບປະກັນຊີວິດສັງຄົມ. ໝາກຜົນດັ່ງກ່າວແມ່ນປະຖົມປັດໄຈທີ່ດີເພື່ອໃຫ້ ຫວຽດນາມ ປະຕິບັດສຳເລັດແຜນການພັດທະນາເສດຖະກິດສັງຄົມປີ 2013 ຄືດັ່ງຄຳຢືນຢັນຂອງທ່ານນາຍົກລັດຖະມົນຕີ ຫງວຽນເຕີນຢູງ:
“ໃນສະພາບຄວາມຫຍຸ້ງຍາກນັ້ນ, ແຕ່ພວກເຮົາກໍ່ບັນລຸໄດ້ບັນດາຜົນງານດີພໍສົມຄວນ. ພວກເຮົາຕ້ອງສືບຕໍ່ເສີມຂະຫຍາຍ ແລະ ສ້າງເປັນຄວາມສາມາດບົ່ມຊ້ອນ, ທ່າໄດ້ປຽບ ເພື່ອປະຕິບັດບັນດາຄາດໝາຍຫນ້າທີ່ທີ່ໄດ້ວາງອອກໃນປີ 2013 ເປັນຢ່າງດີ.”
ບັນຍາກາດຕ້ອນຮັບປີໃຫມ່ປີມະເສງ 2013 ພວມດຳເນີນໄປໃນທົ່ວປະເທດຫວຽດນາມ. ເຖິງວ່າ ໄລຍະແຫ່ງການພັດທະນາໃນປີ 2013 ຍັງປະສົບກັບຄວາມຫຍຸ້ງຍາກ, ສິ່ງທ້າທາຍຫລາຍຢ່າງກໍຕາມ. ແຕ່ບັນດາຄວາມມານະພະຍາຍາມຜ່ານຜ່າຄວາມຫຍຸ້ງຍາກໃນປີຜ່ານມາ ໄດ້ສ້າງຄວາມໄວ້ເນື້ອເຊື່ອໃຈ, ເລ່ັງລັດຊາວ ຫວຽດນາມ ແຕ່ລະຄົນ ຮ່ວມແຮງຮ່ວມໃຈພັດທະນາພື້ນຖານເສດຖະກິດ ຫວຽດນາມ ໃນປີ 2013 ເພື່ອໃຫ້ປະເທດຫວຽດນາມ ເຊື່ອມໂຍງເຂົ້າກັບໂລກ.