ກອງປະຊຸມຄັ້ງທີ 18 ສົນທິສັນຍາແມ່ ສປຊ ກ່ຽວກັບການປ່ຽນແປງຂອງດິນຟ້າອາກາດ (COP 18) ພວມດຳເນີນໄປຢູ່ນະຄອນຫຼວງໂດຮາ ຂອງກາຕາ ແນໃສ່ປຶກສາຫາລືກອບກົດໝາຍໃໝ່ເພື່ອຫລຸດຜ່ອນມົນລະພິດ ແລະ ການປ່ອຍອາຍພິດເຮືອນແກ້ວ, ໃນນັ້ນມີຈຸດໝາຍຕໍ່ກຳນົດເວລາໃຫ້ອະນຸສັນຍາກຽວໂຕ ກ່ຽວກັບການປ່ຽນແປງຂອງດິນຟ້າອາກາດ ຊື່ງຈະໝົດຜົນສັກສິດໃນປີນີ້. ໂດຍແມ່ນປະເທດເຂົ້າຮ່ວມອະນຸສັນຍາກຽວໂຕ, ຫວຽດນາມ ໄດ້ ແລະ ພວມມຸ້ງໄປເຖິງບັນດາໂຄງການພັດທະນາສະອາດ, ດຶງດູດບັນດານັກລົງທຶນໃນການພັດທະນາກົນໄກສະອາດເຂົ້າໃນບັນດາຂະແໜງມີອາຍພິດເຮືອນແກ້ວຫຼາຍ.
(ພາບປະກອບ:vea.gov.vn)
ຫວຽດນາມ ແມ່ນປະເທດມີຄວາມສາມາດບົ່ມຊ້ອນໃນການພັດທະນາແຫຼ່ງພະລັງງານຜະລິດຄືນໃໝ່, ມີຄວາມສາມາດປ່ຽນແທນແຫຼ່ງນ້ຳມັນ, ຖ່ານຫີນ..ຫລຸດຜ່ອນການກະທົບເຖິງສິ່ງແວດລ້ອມໃນລະດັບຕ່ຳສຸດ. ສິ່ງດັ່ງກ່າວໄດ້ສະແດງໃຫ້ເຫັນຢ່າງຈະແຈ້ງຜ່ານບົດລາຍງານຫວ່າງແລ້ວນີ້ຂອງທະນາຄານໂລກ (WB) ໂດຍໃຫ້ຮູ້ວ່າ: ຫວຽດນາມ ແມ່ນ 1 ໃນຈຳນວນ 14 ປະເທດນຳໜ້າກ່ຽວກັບຄວາມສາມາດບົ່ມຊ້ອນດ້ານໄຟຟ້ານ້ຳຕົກ. ປະຈຸບັນ, ຫວຽດນາມ ມີສະຖານີໄຟຟ້ານ້ຳຕົກ 120.000 ແຫ່ງດ້ວຍຍອດສະມັດຕະພາບປະມານ 300 MW. ນອກຈາກນັ້ນແລ້ວ, ຫວຽດນາມ ຍັງມີຄວາມສາມາດບົ່ມຊ້ອນກ່ຽວກັບພະລັງແຮງລົມຫຼາຍພໍສົມຄວນຊື່ງຄາດວ່າບັນລຸເກືອບ 514.000 MW. ຫວຽດນາມ ກໍ່ຍັງມີທ່າໄດ້ປຽບຫຼາຍກ່ຽວກັບພະລັງງານແສງຕາເວັນ, ນີ້ແມ່ນແຫຼ່ງວັດຖຸດິບທີ່ອຸດົມສົມບູນໃຫ້ແກ່ການປະຕິບັດກົນໄກພັດທະນາຢ່າງສະອາດ (CDM) ນີ້ແມ່ນວິທີການອ່ອນໄຫວ, ສ້າງເງື່ອນໄຂອຳນວຍຄວາມສະດວກໃຫ້ແກ່ການປະຕິບັດອະນຸສັນຍາກຽວໂຕ. ທ່ານນາງດັ້ງທິຮົ່ງແຮ້ງ, ຮອງຜູ້ອຳນວຍການບໍລິສັດຫຸ້ນສ່ວນທີ່ປຶກສາພະລັງງານ ແລະ ສິ່ງແວດລ້ອມ (VNEEC) ຕີລາຄາວ່າ:
“ຂົງເຂດພະລັງງານຜະລິດຄືນໃໝ່ແມ່ນຂົງເຂດທີ່ຫວຽດນາມ ມີຄວາມບົ່ມຊ້ອນທີ່ສຸດ. ຫວຽດນາມ ມີຄວາມສາມາດບົ່ມຊ້ອນທັງດ້ານໄຟຟ້ານ້ຳຕົກ ແລະ ໄຟຟ້າແຮງລົມອີກດ້ວຍ. ປະຈຸບັນ, ບໍລິສັດຫຸ້ນສ່ວນທີ່ປຶກສາພະລັງງານ ແລະ ສິ່ງແວດລ້ອມພວມພັດທະນາໂຄງການໄຟຟ້າແຮງລົມໃຫ່ຍກ່ວາໝູ່ຂອງຫວຽດນາມຢູ່ບາກລຽວ“
ແຜນວາດມົນລະພິດເຮືອນແກ້ວ
(ພາບ:masternewmedia.org)
ພ້ອມກັບການນຳໃຊ້ແຫຼ່ງພະລັງງານທຳມະຊາດ, ມີຫຼາຍໂຄງການຂອງຫວຽດນາມ ທີ່ນຳໃຊ້ຂັ້ນຕອນການພັດທະນາສະອາດໄດ້ ແລະ ພວມໄດ້ຮັບການຜັນຂະຫຍາຍ. ຕາມບົດລາຍງານຫລ້າສຸດຂອງກະຊວງຊັບພະຍາ ກອນ ແລະ ສິ່ງແວດລ້ອມຫວຽດນາມ ແລ້ວ, ພາຍຫຼັງປະຕິບັດກົນໄກພັດທະນາສະອາດເປັນເວລາ 10 ປີ, ຫວຽດນາມ ສາມາດຫລຸດຜ່ອນ CO2 ໄດ້ປະມານ 30 ລ້ານໂຕນ, ແມ່ນ 1 ໃນຈຳນວນ 10 ປະເທດທີ່ຕັ້ງໜ້າໃນການຫລຸດຜ່ອນອາຍ CO2 ໃນໂລກ. ນອກຈາກນັ້ນແລ້ວ, ປະຈຸບັນ, ຫວຽດນາມ ມີກ່ວາ 300 ໂຄງການປະຕິບັດກົນໄກພັດທະນາສະອາດພວມລໍຖ້າ ສປຊ ເຊັນອະນຸມັດ ແລະ ມີເກືອບ 160 ໂຄງການໄດ້ຮັບການຈົດທະບຽນ. ໃນນັ້ນ, ພະລັງງານຜະລິດຄືນໃໝ່, ຂີ້ເຫຍື້ອຜະລິດຄືນໃໝ່, ກຳຈັດຂີ້ສັດລ້ຽງ, ເຟືອງ, ປູກປ່າ...ລ້ວນແຕ່ແມ່ນບັນດາຂະແໜງມີຄວາມສາມາດບົ່ມຊ້ອນຂອງຫວຽດນາມ ຂະນະທີ່ເຂົ້າຮ່ວມກົນໄກພັດທະນາສະອາດ. ປະຈຸບັນ, ຫວຽດນາມ ພວມຕັ້ງໜ້າດຶງດູດການໜູນຊ່ວຍດ້ານການເງິນ, ເຕັກໂນໂລຊີ ແລະ ຊັບພະຍາກອນມະນຸດເພື່ອປະຕິບັດບັນດາໂຄງການບໍ່ປ່ອຍອາຍແກັດເຮືອນແກ້ວຫຼາຍ. ທ່ານຫງວຽນຄັກຮຽວ, ຮອງຫົວໜ້າຄະນະຊີ້ນຳການປະຕິບັດສົນທິສັນຍາ ສປຊ ກ່ຽວກັບການປ່ຽນແປງຂອງດິນຟ້າອາກາດ ແລະ ອະນຸສັນຍາກຽວໂຕ, ກະຊວງຊັບພະຍາກອນ ແລະ ສິ່ງແວດລ້ອມໃຫ້ຮູ້ວ່າ:
“ປະຈຸບັນ, ຖ້າເວົ້າສະເພາະແຕ່ຂົງເຂດປະຕິບັດກົນໄກພັດທະນາສະອາດ, ພວກເຮົາໄດ້ມີການຄົ້ນຄ້ວາ, ຕີລາຄາຄວາມສາມາດບົ່ມຊ້ອນຂອງຫວຽດນາມ ແລ້ວ. ອາດເວົ້າໄດ້ວ່າ, ຖ້າພວກເຮົາລະດົມຄວາມສາມາດບົ່ມຊ້ອນທັງໝົດ, ຈະສາມາດຫລຸດຜ່ອນການປ່ອຍອາຍ CO2 ໄດ້ 250 ລ້ານໂຕນ ແລະ ໃນໄລຍະທີ່ຈະມາເຖິງອາດຈະເພີ່ມຂຶ້ນອີກ“.
ເຖິງວ່າປະຕິບັດກົນໄກພັດທະນາສະອາດໄດ້ພຽງກ່ວາ 10 ປີ ແລະ ການນຳໃຊ້ພະລັງງານຜະລິດຄືນໃໝ່ຍັງຢູ່ໃນລະດັບຈຳກັດກໍ່ຕາມ ແຕ່ຫວຽດນາມ ໄດ້ປະກອບສ່ວນສຳຄັນໃນການປະຕິບັດສົນທິສັນຍາແມ່ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດ, ອະນຸສັນຍາກຽວໂຕ, ກໍ່ຄືປະກອບສ່ວນປະຕິບັດຈຸດໝາຍແຫ່ງຊາດກ່ຽວກັບການຮັບມືກັບການປ່ຽນແປງຂອງດິນຟ້າອາກາດ.