ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ກ່າວຄຳເຫັນທີ່ພິທີເປີດຕົວກອງທັນວັກຊິນກັນໂຄວິດ - 19 (ພາບ:VGP)

ກອງທັນວັກຊິນກັນໂຄວິດ - 19 ໄດ້ປຸກລະດົມໃນວັນທີ 31 ພຶດສະພາ ແລະ ຖືກເປີດຕົວຢ່າງເປັນທາງການໃນຕອນຄ່ຳວັນທີ 5 ມິຖຸນາ, ຢູ່ຮ່າໂນ້ຍ, ເພື່ອແນໃສ່ລະດົມແຫຼ່ງກຳລັງສັງລວມຂອງສັງຄົມປະກອບສ່ວນແບ່ງປັນກັບງົບປະມານແຫ່ງລັດ, ຮັບໃຊ້ໃຫ້ແກ່ການເຄື່ອນໄຫວຊື້, ນຳເຂົ້າວັກຊິນ ແລະ ຄົ້ນຄ້ວາ, ຜະລິດວັກຊິນພາຍໃນປະເທດ.

ຕີລາຄາສູງຂໍ້ລິເລີ່ມຂອງ ຫວຽດນາມ

ເພື່ອບັນລຸໄດ້ຄວາມສາມາດຕ້ານທານຕໍ່ພະຍາດໃນຊຸມຊົນ, ຫວຽດນາມ ຕ້ອງມີວັກຊິນກັນໂຄວິດ - 19 150 ລ້ານໂດສ ເພື່ອສັກໃຫ້ປະຊາຊົນປະມານ 75 ລ້ານຄົນ. ຍອດງົບປະມານໄດ້ຮັບການຄາດຄະເນສູງກ່ວາ 25.000ຕື້ດົ່ງ (ປະມານ 1 ຕື້ USD). ນອກຈາກແຫຼ່ງງົບປະມານໃຫຍ່, ບັນດານັກຊ່ຽວຊານຄາດຄະເນວ່າ ໂລກລະບາດຍັງບໍ່ທັນສິ້ນສຸດໂດຍໄວເທື່ອ, ດັ່ງນັ້ນ ການດຳລົງຊີວິດແບບຢູ່ຮ່ວມກັບໂລກລະບາດ ກາຍເປັນການຮຽກຮ້ອງປະຈຳ, ການສັກວັກຊິນກັນໂຄວິດ - 19 ຕ້ອງດຳເນີນເປັນປະຈຳໄລຍະ. ໃນຂະນະນັ້ນ, ປະເທດຍັງປະສົບກັບຄວາມຫຍຸ້ງຍາກຫຼາຍຢ່າງ, ງົບປະມານຈຳກັດ, ສະນັ້ນການປະກອບສ່ວນເຂົ້າໃນກອງທຶນວັກຊິນກັນໂຄວິດ - 19 ຂອງປະຊາຊົນແຕ່ລະຄົນແມ່ນການປະກອບສ່ວນມຸ່ງໄປເຖິງເປົ້າໝາຍມີຊີວິດການເປັນຢູ່ທີ່ປອດໄພກ່ວາ ໃຫ້ແກ່ຕົນເອງ, ຄອບຄົວ, ປະຊາຄົມ ແລະ ທົ່ວສັງຄົມ.

ຕາມທ່ານ ປ.ອ Kidong Park , ຫົວໜ້າຜູ້ຕາງໜ້າອົງການອະນາໄມ ໂລກ ປະຈຳ ຫວຽດນາມ ແລ້ວ, ເລື່ອງລະດົມບັນດາແຫຼ່ງກຳລັງເພື່ອຍົກສູງຄວາມສາມາດສຳຜັດກັບວັກຊິນກັນໂຄວິດ - 19 ຂອງລັດຖະບານ ຫວຽດນາມ ແມ່ນທັນການທີ່ສຸດ, ເໝາະສົມ ກັບຂໍ້ລິເລີ່ມວັກຊິນທົ່ວໂລກ. ເລື່ອງລັດຖະບານຄຸ້ມຄອງ ແລະ ນຳໃຊ້ແຫຼ່ງກຳລັງຈາກປະຊາຊົນ, ວິສາຫະກິດ ເອກະຊົນຢ່າງສະເໝີພາບ ແລະ ມີປະສິດທິຜົນ ຈະນຳມາເຊິ່ງ ຄຸນຄ່າໃໝ່ໃຫ້ແກ່ຍຸດທະສາດຮັບມືກັບໂລກລະບາດໂຄວິດ - 19. ທ່ານ Kidong Park ຖືວ່າ ຄວາມສາມັກຄີຈະຊ່ວຍໃຫ້ ຫວຽດນາມ ຢຸດຕິໂລກລະບາດໂຄວິດ - 19.

ທ່ານ Kamal Malhotra ຜູ້ປະສານງານຂອງ ສປຊ ປະຈຳ ຫວຽດນາມ ຖືວ່າ ເລື່ອງລັດຖະບານ ຫວຽດນາມ ສ້າງກອງທຶນວັກຊິນກັນໂຄວິດ - 19 ແມ່ນຂໍ້ລິເລີ່ມທີ່ດີ, ແມ່ນສິ່ງທີ່ ສປຊ ໄດ້ສະໜັບສະໜູນໃນຫຼາຍເດືອນທີ່ຜ່ານມາ.

ຊົມເຊີຍ ຫວຽດນາມ ເມື່ອເປີດຕົວກອງທຶນວັນຊິນກັນໂຄວິດ - 19, ທ່ານນາງ Carollyn Turk ຜູ້ອຳນວຍການແຫ່ງຊາດທະນາຄານໂລກ ປະຈຳ ຫວຽດນາມ ສະແດງຄວາມເຊື່ອໝັ້ນວ່າ ລັດຖະບານພວມມີບາດກ້າວທີ່ຖືກຕ້ອງໃນການຍູ້ໄວການສຳຜັດກັບວັກຊິນໃຫ້ແກ່ປະຊາຊົນ.

ສ່ວນທ່ານ Giorgio Aliberti, ຫົວໜ້າຄະນະຜູ້ຕາງໜ້າສະຫະພາບ ເອີລົບ ປະຈຳ ຫວຽດນາມ ຖືວ່າ ເລື່ອງສ້າງຕັ້ງກອງທຶນແມ່ນ ສ່ວນໜຶ່ງທີ່ມີຄວາມສຳຄັນໃນຍຸດທະສາດສັງລວມ ຮັບມືກັບໂລກລະບາດໂຄວິດ - 19 ຂອງ ຫວຽດນາມ. ສິ່ງນີ້ສະແດງໃຫ້ເຫັນວ່າ, ລັດຖະບານກຳໄດ້ຄວາມຕ້ອງການຢ່າງຄົບຖ້ວນ ເພື່ອບັນລຸໄດ້ບັນດາບາດກ້າວໄວກ່ວານີ້. ນີ້ແມ່ນສິ່ງທີ່ຕັ້ງໜ້າທີ່ສຸດ.

ຕາມໜັງສືພິມ Nikkei Asia ແລ້ວ, ການກຳເນີດຂຶ້ນຂອງກອງທຶນວັນຊິນກັນໂຄວິດ - 19 ມີຄວາມໝາຍສຳຄັນໃນຄວາມມານະພະຍາຍາມສັກວັກຊິນກັນໂຄວິດ - 19 ໃຫ້ແກ່ປະຊາຊົນ. ໜັງສືພິມຖືວ່າ ຂໍ້ລິເລີ່ມນີ້ແມ່ນຄວາມມານະພະຍາຍາມຂອງລັດຖະບານ ຫວຽດນາມ ເພື່ອແນໃສ່ຮັກສາແຫຼ່ງສະໜອງວັກຊິນກັນໂຄວິດ - 19 ໃນທ້າຍປີນີ້, ດ້ວຍຈຸດສຸມຍຸດທະສາດແມ່ນ ຫັນຈາກການສະກັດກັ້ນມາເປັນການສົ່ງເສີມປະຊາຊົນສັກວັກຊິນ.

ການຕອບສະໜອງໃນວົງກ້ວາງ

ຕາມຄະນະຄວບຄຸມກອງທຶນວັກຊິນກັນໂຄວິດ - 19, ໄລ່ຮອດຕອນທ່ຽງວັນທີ 8 ມິຖຸນາ (ພາຍຫຼັງການເປີດຕົວມາເປັນເວລາ 4 ວັນ), ກອງທຶນ ໄດ້ຮັບເງິນ ເປັນຈຳນວນ 4.168 ຕື້ດົ່ງ (ປະມານ 182 ລ້ານ USD) ຈາກ ອົງການຈັດຕັ້ງ ແລະ ສ່ວນບຸກຄົນ ກ່ວາ 200.000 ແຫ່ງ. ນອກຈາກນັ້ນ, ມີນັກອຸປະຖຳໃຫ້ຄຳໝັ້ນສັນຍາຈະປະກອບເງິນເປັນຈຳນວນ 3.253 ຕື້ດົ່ງ (ປະມານ 142 ລ້ານ USD).

ສິ່ງທີ່ເປັນໜ້າສົນໃຈນັ້ນແມ່ນ ກອງທຶນວັກຊິນກັນໂຄວິດ - 19 ບໍ່ພຽງແຕ່ດຶງດູດຄວາມສົນໃຈ, ການປະກອບສ່ວນຂອງ ບັນດາອົງການຈັດຕັ້ງ, ວິສາຫະກິດ ແລະ ສ່ວນບຸກຄົນພາຍໃນປະເທດເທົ່ານັ້ນ ຫາກຍັງຂອງຕ່າງປະເທດອີກດ້ວຍ. ທ່ານນາງ Mary Tarnowka ຜູ້ອຳນວຍການຝ່າຍບໍລິຫານຫ້ອງການການຄ້າ ອາເມລິກາ ປະຈຳ ຫວຽດນາມ ໄດ້ຢັ້ງຢືນວ່າ ມີສະມາຊິກຫຼາຍຄົນຂອງຫ້ອງການການຄ້າ ອາເມລິກາ ສະແດງຄວາມພ້ອມທີ່ຈະໜູນຊ່ວຍຄ່າສັກວັກຊິນໃຫ້ແກ່ພະນັກງານ.  ທ່ານ Hong Sun ຮອງປະທານສະຫະພັນວິສາຫະກິດ ສ.ເກົາຫຼີ ປະຈຳ ຫວຽດນາມ(Korcham),  ເວົ້າວ່າ:

ບັນດາວິສາຫະກິດ ສ.ເກົາຫຼີ ຈະສະໜັບສະໜຸນຈົນສຸດຄວາມສາມາດຂອງຕົນ ແລະ ປາດຖະໜາຢາກປະກອບສ່ວນເຂົ້າກອງທຶນວັກຊິນກັນໂຄວິດ -19 ຂອງ ລັດຖະບານ ຫວຽດນາມ. ມີວິສາຫະກິດ ສ.ເກົາຫຼີ ໄດ້ສັກວັກຊິນໃຫ້ແກ່ກຳມະກອນຂອງຕົນ ແລະ ໄດ້ກັບຄືນສູ່ການເຮັດວຽກທີ່ເປັນປົກກະຕິແລ້ວ.

ເລື່ອງລັດຖະບານ ຫວຽດນາມ ເປີດຕົວກອງທຶນວັກຊິນກັນໂຄວິດ - 19 ເພື່ອແນໃສ່ລະດົມແຫຼ່ງກຳລັງສັງລວມແນໃສ່ຮັບໃຊ້ໃຫ້ການເຄື່ອນໄຫວຊື້ວັກຊິນ, ຄົ້ນຄ້ວາ, ຜະລິດວັກຊິນພາຍໃນປະເທດ ແມ່ນບາດກ້າວເດີນຢ່າງເປັນເຈົ້າການ, ຂະຫຍັນຂັນເຄື່ອນ. ນີ້ໄດ້ຮັບຖືວ່າແມ່ນການຕັດສິນການຫັນປ່ຽນຢ່າງທັນການ ເພື່ອໃຫ້ຫວຽດນາມ ມີວັກຊິນກັນໂຄວິດ - 19 ຈຳນວນ 150 ລ້ານໂດສ ເພື່ອສັກໃຫ້ແກ່ປະຊາຊົນ ປະມານ 75 ລ້ານຄົນ, ບັນລຸໄດ້ເປົ້າໝາຍສາມາດຕ້ານທານຕໍ່ພະຍາດໃນຊຸມຊົນໂດຍໄວ.