(vovworld)- ວັນທີ 16/11, ໂດຍຮັບຄຳເຊີນຂອງທ່ານນາຍົກລັດຖະມົນຕີ ກຳປູເຈຍ ສົມເດັດ ເຕໂຊ ຮຸນແຊນ, ທ່ານນາຍົກລັດຖະມົນຕີ ຫວຽດນາມ Nguyen Tan Dung ນຳຫນ້າຄະນະຜູ້ແທນ ຫວຽດນາມ ໄປເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 21 ແລະ ບັນດາກອງປະຊຸມຂັ້ນສູງກ່ຽວຂ້ອງຊຶ່ງໄດ້ຮັບການຈັດຕັ້ງຂຶ້ນຢູ່ ນະຄອນຫລວງ ພະນົມເປັນປະເທດ ກຳປູເຈຍ ແຕ່ວັນທີ 17 -20/11/2012.
ກອງປະຊຸມສຸດຍອດ ອາຊຽນ ຄັ້ງທີ 21 ແມ່ນກອງປະຊຸມສຸດທ້າຍ ແລະ ສຳຄັນທີ່ສຸດໃນປີ 2012 ໂດຍ ກຳປູເຈຍ ຊື່ງແມ່ນປະທານ ອາຊຽນ 2012 ເປັນເຈົ້າພາບ. ນີ້ແມ່ນໂອກາດເພື່ອໃຫ້ການນຳບັນດາປະເທດສະມາຊິກອາຊຽນ ເປັນເອກະພາບ, ຮັບຮອງເອົາບັນດາເນື້ອໃນສຳຄັນຊື່ງໄດ້ຮັບການປຶກສາຫາລືໃນຕະຫລອດປີ ພ້ອມທັງສືບຕໍ່ຢືນຢັນຄວາມຕັດສິນໃຈຂອງ ອາຊຽນ ແມ່ນຍູ້ໄວການຜັນຂະຫຍາຍວິວັດທະນາການສ້າງປະຊາຄົມ ອາຊຽນ ແລະ ເຊື່ອມຈອດ ອາຊຽນ, ເພີ່ມທະວີການພົວພັນກັບບັນດາຄູ່ຮ່ວມມື, ຮັກສາບົດບາດໃຈກາງຂອງ ອາຊຽນ ໃນສະພາບການໂລກທີ່ພວມຜັນແປໄປຢ່າງສັບສົນ.
ທ່ານນາຍົກລັດຖະມົນຕີ ກຳປູເຈຍ ສົມເດັດ ເຕໂຊ ຮຸນແຊນ
ພາບ:internet
|
ດ້ວຍຫົວເລື່ອງໃນຕະຫລອດປີ 2012 ແມ່ນ: “ ອາຊຽນ: ປະຊາຄົມຫນຶ່ງ, ຊາຕະກຳດຽວກັນ”, ກອງປະຊຸມສຸດຍອດ ອາຊຽນ 21 ແລະ ບັນດາກອງປະຊຸມຂັ້ນສູງກ່ຽວຂ້ອງ, ນອກຈາກສຸມໃສ່ຊຸກຍູ້ວິວັດການສ້າງປະຊາຄົມ ອາຊຽນ, ເປັນເຈົ້າການໃນການກຳນົດທິດ ແລະ ຊຸກຍູ້ການສ້າງໂຄງປະກອບພາກພື້ນໃຫ້ເໝາະສົມກັບຜົນປະໂຫຍດຂອງບັນດາປະເທດ ແລະ ຈຸດພິເສດຂອງພາກພື້ນ, ຫນ້າທີ່ຈຸດສຸມຫນຶ່ງອີກຂອງ ອາຊຽນ ນັ້ໜແມ່ນເປີດກວ້າງ, ເພີ່ມທະວີການເຊື່ອມຕໍ່ກັບບັນດາປະເທດຄູ່ຮ່ວມມືທັງລວງກວ້າງ ແລະ ລວງເລິກ, ກຳນົດທິດໃຫ້ແກ່ອະນາຄົດຂອງບັນດາວິວັດທະນາການພາກພື້ນ ອາຊຽນ +1, ອາຊຽນ +3, ກອງປະຊຸມຂັ້ນສູງ ອາຊີຕາເວັນອອກ (EAS). ເພາະສະນັ້ນ, ກອງປະຊຸມສຸດຍອດ ອາຊຽນ 21 ແລະ ບັນດາກອງປະຊຸມກ່ຽວຂ້ອງ ບໍ່ພຽງແຕ່ດຶງດູດການເຂົ້າຮ່ວມຂອງປະມຸກລັດ ອາຊຽນ 10 ທ່ານເທົ່ານັ້ນ ຫາກຍັງມີການເຂົ້າຮ່ວມຂອງປະມຸກລັດບັນດາປະເທດມະຫາອຳນາດຄື: ອາເມລິກາ, ຍີ່ປຸ່ນ, ຈີນ, ອິນເດຍ ອີກດ້ວຍ. ຜ່ານ 45 ປີແຫ່ງການສ້າງຕັ້ງ ແລະ ພັດທະນາ, ດ້ວຍທີ່ຕັ້ງຍຸດທະສາດສຳຄັນໃນພາກພື້ນ, ພ້ອມກັບບັນດານະໂຍບາຍເປີດກວ້າງ, ອາຊຽນ ໄດ້ ແລະ ພວມກາຍເປັນຄູ່ຮ່ວມມືທີ່ຂາດບໍ່ໄດ້ຂອງບັນດາປະເທດໃຫຍ່ໃນໂລກ, ແລະ ໄດ້ຮັບຖືວ່າ ແມ່ນສະຖານທີ່ໄວ້ເນື້ອເຊື່ອໃຈ, ແມ່ນພື້ນຖານ ເພື່ອຕິດພັນ ແລະ ເຮັດໃຫ້ຜົນປະໂຫຍດຂອງບັນດາຝ່າຍມີຄວາມກົມກຽວ ພ້ອມກັນມຸ່ງໄປເຖິງຈຸດໝາຍລວມ ນັ້ນແມ່ນຮັກສາສັນຕິພາບ, ສະຖຽນລະພາບ ແລະ ພ້ອມກັນພັດທະນາໃຫ້ວັດທະນາຖາວອນ.
ທ່ານນາຍົກລັດຖະມົນຕີ ຫວຽດນາມ Nguyen Tan Dung
ພາບ:internet
|
ໃນ 17 ປີ ທີ່ເປັນສະມາຊິກ ອາຊຽນ, ຍາມໃດຫວຽດນາມ ກໍກຳນົດການຮ່ວມມື ອາຊຽນ ແມ່ນພາກສ່ວນສຳຄັນໃນແນວທາງການຕ່າງປະເທດເອກະລາດ, ເປັນເຈົ້າຕົນເອງ, ຫລາຍຮູບຫລາຍແບບ ແລະ ຫລາຍຝ່າຍ, ເປັນເຈົ້າການໃນການເຊື່ອມໂຍງເຂົ້າກັບພາກພື້ນ ແລະ ສາກົນ ຂອງພັກ ແລະ ລັດ ຫວຽດນາມ. ປະຈຸບັນ, ການຮ່ວມມືໃນອາຊຽນ ນັບມື້ນັບມີຄວາມຈຳເປັນເມື່ອງຫວຽດນາມ ພວມເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກວ້າງຂວາງ. ທ່ານຮອງລັດຖະມົນຕີການຕ່າງປະເທດ ຫວຽດນາມ Pham Quang Vinh ຢືນຢັນວ່າ:
“ໃນ 17 ປີແຫ່ງການເຂົ້າເປັນສະມາຊິກ ອາຊຽນ. ກ່ອນອື່ນໝົດ ແຜນນະໂຍບາຍຂອງຫວຽດນາມ ແມ່ນເປັນເຈົ້າການ, ຕັ້ງຫນ້າ ແລະ ມີຄວາມຮັບຜິດຊອບ ພ້ອມທັງຖືວ່າ ອາຊຽນມີຄວາມສາມັກຄີ, ເຂັ້ມແຂງ ແມ່ນຜົນປະໂຫຍດຍຸດທະສາດຂອງ ຫວຽດນາມ. ພື້ນຖານຂອງ ຫວຽດນາມ ແມ່ນນະໂຍບາຍການຕ່າງປະເທດເອກະລາດ ເປັນເຈົ້າຕົນເອງ ເພື່ອສັນຕິພາບ, ຄວາມໝັ້ນຄົງຂອງພາກພື້ນກໍຄືການພັດທະນາຂອງພາກພື້ນ, ຫັນຜົນປະໂຫຍດຂອງປະເທດຊາດເປັນຫລາຍຮູບຫລາຍແບບ ສົມທົບກັບຜົນປະໂຫຍດຂອງພາກພື້ນ ແມ່ນສິ່ງສຳຄັນທີ່ສຸດ. ”
ບົນຈິດໃຈນັ້ນ, ທີ່ກອງປະຊຸມຄັ້ງນີ້ ຫວຽດນາມ ມີແຜນນະໂຍາຍຊຸກຍູ້ການສ້າງ ອາຊຽນໃຫ້ເຂັ້ມແຂງ, ສາມັກຄີ ແລະ ຮ່ວມສຳພັນຢ່າງແຫນ້ນແຟ້ນ, ມີບົດບາດສຳຄັນຢູ່ພາກພື້ນ, ຜ່ານນັ້ນ ເພີ່ມທະວີສະພາບແວດລ້ອມແຫ່ງສັນຕິພາບ, ຄວາມໝັ້ນຄົງ, ສະຖຽນລະພາບ, ການຮ່ວມມືພັດທະນາຢູ່ພາກພື້ນ, ຍາດແຍ່ງໂອກາດໃນບັນດາເວທີປາໄສຂອງອາຊຽນ ເພື່ອຮັບໃຊ້ຈຸດໝາຍສ້າງສາ ແລະ ພັດທະນາປະເທດຊາດ. ຫວຽດນາມ ປະກອບສ່ວນຢ່າງຕັ້ງຫນ້າເຂົ້າໃນບັນດາບັນຫາລວມຂອງ ອາຊຽນ ແລະ ຫວຽດນາມ ກໍໄດ້ຮັບຜົນປະໂຫຍດ, ປະກອບສ່ວນຍົກສູງບົດບາດ ແລະ ທີ່ຕັ້ງຂອງຫວຽດນາມ ໃນເວທີສາກົນ ກໍຄື ຊຸກຍູ້ການພົວພັນສອງຝ່າຍລະຫວ່າງ ຫວຽດນາມ ກັບບັນດາປະເທດຄູ່ເຈລະຈາສຳຄັນ. ທ່ານ Luong Thanh Nghi ໂຄສົກກະຊວງການຕ່າງປະເທດ ຫວຽດນາມ ຢືນຢັນວ່າ:
“ໂດຍແມ່ນປະເທດສະມາຊິກທີ່ຕັ້ງຫນ້າ, ເປັນເຈົ້າການ, ມີຄວາມຮັບຜິດຊອບຂອງ ອາຊຽນ, ຫວຽດນາມ ໄດ້, ພວມ ແລະ ຈະພ້ອມກັບບັນດາປະເທດ ອາຊຽນ ສືບຕໍ່ປັບປຸງ ແລະ ຮັກສາຈິດໃຈ ກໍຄືບັນດາຫລັກການເຄື່ອນໄຫວຂອງ ອາຊຽນ, ສູ້ຊົນເພີ່ມທະວີບົດບາດໃຈກາງຂອງ ອາຊຽນ ໃນບັນດາວິວັດທະນາການຂອງພາກພື້ນ ເພື່ອສັນຕິພາບ, ສະຖຽນລະພາບ, ຄວາມໝັ້ນຄົງ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.”
ຕາມໂຄງການດຳເນີນງານແລ້ວ, ນອກຈາກ ເຂົ້າຮ່ວມບັນດາວາລະໄຂ, ອັດ ແລະ ວາລະປະຊຸມຄົບຄະນະແລ້ວ, ທ່ານນາຍົກລັດຖະມົນຕີ Nguyen Tan Dung ຍັງເຂົ້າຮ່ວມບັນດາກອງປະຊຸມ ແລະ ການເຄື່ອນໄຫວສຳຄັນອື່ນຄື: ກອງປະຊຸມລະຫວ່າງບັນດາການນຳ ອາຊຽນ ກັບສະພາທີ່ປຶກສາດຳເນີນທຸລະກິດ ອາຊຽນ, ກອງປະຊຸມສຸດຍອດ ອາຊຽນ - ຈີນ, ອາຊຽນ - ອາເມລິກາ, ກອງປະຊຸມຂັ້ນສູງ ອາຊີຕາເວັນອອກ ແລະ ການພົບປະສອງຝ່າຍຄັ້ງຕ່າງໆ.
ດ້ວຍນະໂຍບາຍສະເໝີຕົ້ນສະເໝີປາຍ ແລະ ຖືການຮ່ວມມື ອາຊຽນ ແມ່ນ ພາກສ່ວນຫນຶ່ງທີ່ບໍ່ອາດຕັດແຍກອອກຈາກນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ, ຫລາຍຮູບຫລາຍແບບ ແລະ ຫລາຍຝ່າຍ, ເຊື່ອມໂຍງເຂົ້າກັບສາກົນຂອງ ຫວຽດນາມໄດ້, ທ່ານນາຍົກລັດຖະມົນຕີ Nguyen Tan Dung ແລະ ຄະນະຜູ້ແທນຂັ້ນສູງ ຫວຽດນາມ ເຂົ້າຮ່ວມ ກອງປະຊຸມສຸດຍອດ ອາຊຽນ 21 ແລະ ບັນດາກອງປະຊຸມກ່ຽວຂ້ອງຄັ້ງນີ້ ມີການປະກອບສ່ວນຢ່າງແທດຈິງໃຫ້ແກ່ກອງປະຊຸມ, ພ້ອມກັບບັນດາປະເທດ ອາຊຽນ ສູ້ຊົນນຳ ອາຊຽນ ສືບຕໍ່ມີບາດກ້າວພັດທະນາໃຫມ່ ພາຍຫລັງ 45 ປີແຫ່ງການຄົງຕົວ, ກາຍເປັນອົງການຮ່ວມມືພາກພື້ນຢ່າງຮອບດ້ານ, ແມ່ນອົງການການເມືອງ ເສດຖະກິດຂະຫຍັນຂັນເຄື່ອນ, ມີບົດບາດ ແລະ ທີ່ຕັ້ງສຳຄັນຢູ່ພາກພື້ນ ອາຊີ - ປາຊິຟິກ.