(vovworld) – ວັນທີ 28/4, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ເຂົ້າຮ່ວມກອງປະຊຸມສຸດຍອດປະຈຳປີຂອງສະມາຄົມປະຊາຊາດອາຊີ ຕາເວັນອອກສ່ຽງໃຕ້ (ອາຊຽນ) ຄັ້ງທີ 30. ນີ້ແມ່ນກອງປະຊຸມສຳຄັນ, ເປີດສາກໃຫ້ແກ່ບັນດາການເຄື່ອນໄຫວທາງການຂອງປີ ອາຊຽນ 2017, ພ້ອມທັງເປັນຂີດໝາຍທຳອິດ, ແຫ່ງການສະເຫຼີມສະຫຼອງ 50 ປີແຫ່ງວັນສ້າງຕັ້ງ ອາຊຽນ (1967 – 2017). ໂດຍແມ່ນ ສະມາຊິກຕັ້ງໜ້າ ແລະ ມີຄວາມຮັບຜິດຊອບໃນປະຊາຄົມ ອາຊຽນ, ທີ່ກອງປະຊຸມຄັ້ງນີ້, ຫວຽດນາມ ສືບຕໍ່ຢັ້ງຢືນນະໂຍບາຍສະເໝີຕົ້ນສະເໝີປາຍ ຍາມໃດກໍ່ຖື ອາຊຽນ ແມ່ນບຸລິມະສິດຍຸດທະສາດໃນນະໂຍບາຍການຕ່າງປະເທດຂອງຕົນ, ປະກອບສ່ວນຢ່າງຕັ້ງໜ້າໃຫ້ແກ່ໄລຍະທາງແຫ່ງການພັດທະນາຕໍ່ໄປຂອງ ອາຊຽນ.
ພາບປະກອບ
|
ປີ 2017 ເປັນຂີດໝາຍໄລຍະທາງ 50 ປີແຫ່ງການສ້າງຕັ້ງ ແລະ ພັດທະນາຂອງ ອາຊຽນ. ກອງປະຊຸມສຸດຍອດ ອາຊຽນ ຄັ້ງທີ 30 ແມ່ນຂີດໝາຍສຳຄັນເພື່ອໃຫ້ການນຳບັນດາປະເທດສະມາຊິກຢັ້ງຢືນບົດບາດໃຈກາງຂອງ ອາຊຽນ ໃນໂຄງປະກອບພາກພື້ນພວມສ້າງເປັນຮູບປະທຳ, ຮັບມືກັບບັນດາສິ່ງທ້າທາຍທີ່ກະທົບຈາກສະພາບການຂອງພາກພື້ນ ແລະ ໂລກ.
ອາຊຽນ ພາຍຫຼັງ 1 ປີແຫ່ງການສ້າງຕັ້ງປະຊາຄົມ
ໜຶ່ງປີຜ່ານມາ, ເຖິງວ່າສະພາບການໂລກມີບັນດາການຜັນແປຢ່າງສັບສົນກໍ່ຕາມ ແຕ່ອາຊຽນ ໄດ້ກ້າວເຂົ້າສູ່ໄລຍະພັດທະນາໃໝ່ດ້ວຍຄວາມຕັດສິນໃຈສູງ ແລະ ຄວາມມານະພະຍາຍາມຂອງບັນດາປະເທດສະມາຊິກ. ອາຊຽນ ໄດ້ມີການເລີ່ມຕົ້ນທີິ່ສະດວກ, ໄດ້ຮັບບັນດາຜົນງານທີ່ໜ້າສົ່ງເສີມໃນປີທຳອິດແຫ່ງການສ້າງຕັ້ງປະຊາຄົມ ແລະ ປະຕິບັດວິໄສທັດ 2025, ນັບທັງ 3 ເສົາຄ້ຳຄືຄວາມໝັ້ນຄົງ - ການເມືອງ, ເສດຖະກິດ, ວັດທະນະທຳ - ສັງຄົມ. ອາຊຽນສືບຕໍ່ຢັ້ງຢືນບົດບາດເປັນແກ່ນສານຂອງການເຈລະຈາ ແລະ ການຮ່ວມມືເພື່ອສັນຕິພາບ ແລະ ສະຖຽນລະພາບໃນພາກພື້ນບົນພື້ນຖານຄວາມມານະພະຍາຍາມປັບປຸງຄວາມສາມັກຄີ, ເສີມຂະຫຍາຍບົດບາດໃຈກາງໃນໂຄງປະກອບພາກພື້ນທີ່ພວມສ້າງເປັນຮູບປະທຳ ແລະ ໃນການຮັບມືກັບບັນດາສິ່ງທ້າທາຍ, ບັນຫາສັບສົນທີ່ຫາກໍ່ພົ້ນເດັ່ນຂຶ້ນ. ທ່ານ ຫງວຽນກວກຢູ້ງ, ຮອງລັດຖະມົນຕີກະຊວງການຕ່າງປະເທດ ຫວຽດນາມ, ຫົວໜ້າ SOM ອາຊຽນ ຂອງ ຫວຽດນາມ, ຖືວ່າ:
“ໃນສະພາບການໂລກມີການຜັນແປ, ການປ່ຽນແປງສັບສົນຫຼາຍຢ່າງຍາກທີ່ຈະຄາດຄະເນລ່ວງໜ້າໄດ້. ພາກພື້ນ ອາຊີ - ປາຊີຟິກ ຍັງຄົງສືບຕໍ່ແມ່ນສະຖານທີ່ຍຸດທະສາດລະຫວ່າງບັນດາປະເທດໃຫຍ່. ພາຍໃນບັນດາປະເທດ ອາຊຽນ ກໍ່ມີບັນດາການປ່ຽນແປງດ້ານການເມືອງ. ໃນສະພາບການຄືແນວນັ້ນ, ສິ່ງທ້າທາຍໃຫຍ່ສຸດສຳລັບ ອາຊຽນ ແມ່ນ ເຮັດແນວໃດເພື່ອຮັກສາສີສັນ, ຮັກສາເອກະລາດ, ເປັນເຈົ້າຕົນເອງໃນການຕັດສິນນະໂຍບາຍຂອງ ອາຊຽນ, ຮັກສາບົດບາດຫຼັກແຫຼ່ງແກ່ນສານໃນບັນດາກົນໄກຮ່ວມມືພາກພື້ນໃຫ້ໄດ້ ແລະ ອາດສາມາດປະກອບສ່ວນເຂົ້າໃນບັນດາບັນຫາຂອງໂລກ.”
ບັນດາສິ່ງທ້າທາຍນີ້ຮຽກຮ້ອງຕ້ອງມີຄວາມຕັດສິນໃຈຢ່າງໃຫຍ່ຫຼວງຂອງບັນດາປະເທດສະມາຊິກ ອາຊຽນ ເພື່ອແນໃສ່ນຳພາກພື້ນພັດທະນາຖືກກັບຄາດໝາຍເຊິ່ງກຸ່ມໄດ້ວາງອອກ. ທີ່ກອງປະຊຸມ, ບັນດາການນຳ ອາຊຽນ ຈະສຸມໃສ່ປຶກສາຫາລືເຂົ້າບັນດາບັນຫາພັດທະນາລວມຂອງກຸ່ມຢ່າງເລິກເຊິ່ງ. ນັ້ນແມ່ນຊຸກຍູ້ບັນດາຄວາມມານະພະຍາຍາມກ່ຽວກັບການເຊື່ອມຈອດ ແລະ ຮັດແຄບຊ່ອງຫວ່າງການພັດທະນາ, ໃນນັ້ນຜັນຂະຫຍາຍໂຄງການປະຕິບັດໄລຍະ 3 ຂອງຂໍ້ລິເລີ່ມຮ່ວມສຳພັນ ອາຊຽນ ແລະ ແຜນການສັງລວມກ່ຽວກັບການເຊື່ອມຈອດໃນປີ 2025 ຢ່າງມີປະສິດທິຜົນ.
ກອງປະຊຸມຄັ້ງນີ້ ກໍ່ແມ່ນກາລະໂອກາດເພື່ອໃຫ້ ອາຊຽນ ພິຈາລະນາເປີດກ້ວາງບັນດາການພົວພັນຮ່ວມມືກັບບັນດາປະເທດຄູ່ເຈລະຈາ, ນອກຈາກບັນດາຄູ່ຮ່ວມມືທີ່ມີຢູ່ແລ້ວ. ນອກນັ້ນ, ບັນດາການນຳ ອາຊຽນ ກໍ່ຈະປຶກສາຫາລືບັນດາບັນຫາເຊິ່ງພາກພື້ນ ແລະ ສາກົນຕ່າງມີຄວາມສົນໃຈ.
ພາບປະກອບ
|
ຫວຽດນາມ ຕັ້ງໜ້າປະກອບສ່ວນກໍ່ສ້າງປະຊາຄົມ ອາຊຽນ
ເປັນເວລາກ່ວາ 20 ປີທີ່ເຂົ້າເປັນສະມາຊິກ ອາຊຽນ, ຍາມໃດ ຫວຽດນາມ ກໍ່ແມ່ນສະມາຊິກທີ່ຕັ້ງໜ້າ ແລະ ມີຄວາມຮັບຜິດຊອບ, ປະກອບສ່ວນເຂົ້າໃນຄວາມສາມັກຄີ ເປັນເອກະພາບຂອງ ອາຊຽນ, ຊຸກຍູ້ ອາຊຽນ ຮ່ວມສຳພັນຢ່າງແໜ້ນແຟ້ນ ແລະ ເຄື່ອນໄຫວຢ່າງມີປະສິດທິຜົນກ່ວາອີກ. ຜົນສຳເລັດຂອງ ອາຊຽນ ໃນກ່ວາໜຶ່ງປີທີ່ຜ່ານມາມີການປະກອບສ່ວນພໍສົມຄວນຂອງ ຫວຽດນາມ, ເຊິ່ງສະແດງອອກໃນການເຄື່ອນໄຫວຮ່ວມມື ອາຊຽນ ເກືອບທັງໝົດ, ພິເສດແມ່ນປະກອບສ່ວນສຳຄັນເຂົ້າໃນການຜັນຂະຫຍາຍວິໄສທັດປະຊາຄົມ ອາຊຽນ 2025 ໂດຍໄວ. ບັນດາກະຊວງ, ຂະແໜງການທີ່ກ່ຽວຂ້ອງຂອງ ຫວຽດນາມ ລ້ວນແຕ່ສ້າງແຜນຮ່າງ, ໂຄງການ ແລະ ແຜນການຜັນຂະຫຍາຍການປະຕິບັດວິໄສທັດ ແລະ ແຜນການສັງລວມຂອງ 3 ເສົ້າຄ້ຳປະຊາຄົມ. ເປັນໜ້າສົນໃຈນັ້ນແມ່ນ, ຫວຽດນາມ ໄດ້ເປັນເຈົ້າການຍົກອອກຂໍ້ສະເໜີໃໝ່ຫຼາຍຂໍ້ ແລະ ເສີມຂະຫຍາຍບົດບາດໃນ ອາຊຽນ, ໄດ້ຮັບການຊົມເຊີຍ ແລະ ການສະໜັບສະໜູນຈາກບັນດາປະເທດ, ໃນນັ້ນມີເລື່ອງຮັບຮອງເອົາຖະແຫຼງການເວທີປາໄສພາກພື້ນ ອາຊຽນ (ARF) ກ່ຽວກັບການເພີ່ມທະວີການຮ່ວມມືລະຫວ່າງ ບັນດາກຳລັງປະຕິບັດກົດໝາຍບົນທະເລ.
ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ນຳໜ້າຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມສຸດຍອດ ອາຊຽນ 30 ໃນຄັ້ງນີ້ແມ່ນໂອກາດເພື່ອໃຫ້ ຫວຽດນາມ ສືບຕໍ່ຢັ້ງຢືນພາບພົດຂອງສະມາຊິກທີ່ມີອິດທິພົນຊື່ສຽງ, ເປັນເຈົ້າການ, ຂະຫຍັນຂັນເຄື່ອນ ແລະ ມີຄວາມຮັບຜິດຊອບພາຍໃຕ້ຊາຍຄາລວມ. ທ່ານ ຫງວຽນກວກຢູ້ງ, ຮອງລັດຖະມົນຕີກະຊວງການຕ່າງປະເທດ ເນັ້ນໜັກວ່າ:
“ພວກເຮົາມີບັນດານະໂຍບາຍ, ການກະທຳ ແລະ ການປະພຶດບໍ່ພຽງແຕ່ແມ່ນເພື່ອຜົນປະໂຫຍດຂອງ ຫວຽດນາມ ເທົ່ານັ້ນ ຫາກຍັງເພື່ອຜົນປະໂຫຍດລວມຂອງ ອາຊຽນ, ຂອງປະຊາຄົມອີກດ້ວຍ. ພວກເຮົາ, ກໍ່ເອົາໃຈໃສ່ເຖິງບັນດາຜົນປະໂຫຍດຂອງບັນດາປະເທດເພື່ອນມິດເພື່ອເຮັດແນວໃດໃຫ້ພວກເຮົາມີຄວາມກົມກຽວ ແລະ ຈາກນັ້ນມີຄວາມເປັນເອກະພາບລວມຂອງ ອາຊຽນ. ນັ້ນແມ່ນວິທີສຳພັດຂອງ ຫວຽດນາມ. ພວກເຮົາຮັບຮູ້ໄດ້ບັນດາສິ່ງທ້າທາຍທີ່ພວມວາງອອກໃຫ້ ອາຊຽນ ເພື່ອໃຫ້ພວກເຮົາພ້ອມກັບປະເທດອື່ນໆຜ່ານຜ່າບັນດາສິ່ງທ້າທາຍດັ່ງກ່າວ”
ຫວຽດນາມ ສືບຕໍ່ເສີມຂະຫຍາຍບົດບາດຂອງຕົນກ່ວາອີກ, ຍູ້ແຮງບັນດາຂົງເຂດຮ່ວມມືທີ່ແທດຈິງ, ນຳມາເຊິ່ງຜົນປະໂຫຍດລະອຽດໃຫ້ແກ່ປະຊາຊົນແຕ່ລະປະເທດສະມາຊິກ. ພິເສດ, ຫວຽດນາມ ພວມມານະພະຍາຍາມພ້ອມກັບບັນດາປະເທດໃນສະຫະປະຊາຄົມຮັກສາຄວາມສາມັກຄີ, ຄວາມເປັນເອກະພາບ, ບັນດາຫຼັກການຄຸນຄ່າທີ່ໄດ້ສ້າງເປັນສີສັນ ແລະ ຜົນສຳເລັດຂອງ ອາຊຽນ.