(vovworld) - ຫວຽດນາມ ແມ່ນໜຶ່ງໃນບັນດາປະເທດທີ່ບັນລຸຜົນງານສູງ ໃນການປະຕິບັດຄວາມສະເໝີພາບລະຫວ່າງ ຍິງ - ຊາຍ, ຊຶ່ງໄດ້ຮັບການຕີລາຄາຈາກສະຫະປະຊາຊາດ ແມ່ນຈຸດພົ້ນເດັ່ນໃນການປະຕິບັດບັນດາເປົ້າໝາຍສະຫັດສະວັດ. ພ້ອມກັບບັນດານະໂຍບາຍຂອງພັກ, ລັດ ແລະ ການເຂົ້າຮ່ວມຂອງທຸກຂັ້ນ, ທຸກຂະແໜງການ, ວຽດງານສະເໝີພາບລະຫວ່າງ ຍິງ - ຊາຍ ບັນລຸໄດ້ຜົນງານຫລາຍຢ່າງ, ປະກອບສ່ວນຢ່າງຕັ້ງໜ້າ ເຂົ້າໃນວິວັດການພັດທະນາເສດຖະກິດສັງຄົມຂອງປະເທດຊາດ. ບົດຂຽນຂອງບັນນາທິການ ທູຮວາ ທີ່ມີຫົວຂໍ້ວ່າ “ຫວຽດນາມ ປະຕິບັດບັນດາຈຸດໝາຍກ່ຽວກັບຄວາມສະເໝີພາບລະຫວ່າງ ຍິງ - ຊາຍ” ເຊີນທ່ານຕິດຕາມຮັບຟັງ.
ການໂອ້ລົມສົນທະນາກ່ຽວກັບ
ຄວາມສະເໝີພາບລະຫວ່າງ ຍິງ - ຊາຍ 2017
(ພາບ: TTXVN)
ຫວຽດນາມ ແມ່ນໜຶ່ງໃນບັນດາປະເທດມີຜົນງານຫລາຍຢ່າງ ກ່ຽວກັບການປະຕິບັດຄວາມສະເໝີພາບລະຫວ່າງ ຍິງ - ຊາຍ ຊຶ່ງໄດ້ຮັບການຮັບຮູ້ຈາກສາກົນ. ຕາມຕາຕະລາງຈັດອັນດັບຂອງສະຫະປະຊາຊາດກ່ຽວກັບດັດຊະນີຄວາມສະເໝີພາບ ລະຫວ່າງ ຍິງ - ຊາຍ (GII) ປີ 2014, ຫວຽດນາມ ຖືກຈັດອັນດັບທີ 60/154 ປະເທດໃນໂລກ.
ບັນດາຜົນງານ.
ໃນຊຸມປີຜ່ານມາ, ຫວຽດນາມ ປະຕິບັດຫລາຍບາດກ້າວບຸກທະລຸກ່ຽວກັບຄວາມຮັບຮູ້ ແລະ ການກະທຳ, ຈາກແງ່ມູນທາງດ້ານກົດໝາຍ, ນະໂຍບາຍມາ, ຮອດພຶດຕິກຳຕົວຈິງ ແລະ ໄດ້ບັນລຸຜົນງານສຳຄັນຫລາຍຢ່າງກ່ຽວກັບຄວາມສະເໝີພາບລະຫວ່າງ ຍິງ - ຊາຍ. ຈຸດພົ້ນເດັ່ນໃນການຮັບປະກັນສິດຜົນປະໂຫຍດກ່ຽວກັບທາງເພດຢູ່ ຫວຽດນາມ ແມ່ນເລື່ອງສຳເລັດກອບກົດໝາຍ, ນະໂຍບາຍກ່ຽວກັບຄວາມສະເໝີພາບລະຫວ່າງ ຍິງ - ຊາຍ. ຫວຽດນາມ ໄດ້ສ້າງ ແລະ ປະກາດໃຊ້ບັນດາເອກະສານນິຕິກຳທີ່ສະແດງໃຫ້ເຫັນຫຼັກການກ່ຽວກັບຄວາມສະເໝີພາບລະຫວ່າງ ຍິງ - ຊາຍ, ບໍ່ຈຳແນກການປະພຶດຕາມລະບຽບກົດໝາຍວ່າດ້ວຍຄວາມສະເໝີພາບລະຫວ່າງ ຍິງ - ຊາຍ 2006 ແລະ ສົນທິສັນຍາຂອງສະຫະປະຊາຊາດກ່ຽວກັບການລົບລ້າງການຈຳແນກປະພຶດຕ້ານແມ່ຍິງດ້ວຍທຸກຮູບແບບ, ປະສານສົມທົບຄວາມສະເໝີພາບລະຫວ່າງ ຍິງ - ຊາຍ ໃນການກໍ່ສ້າງ ແລະ ປະຕິບັດກົດໝາຍຢູ່ພາຍໃນປະເທດ. ຫວຽດນາມ ກໍ່ປະກາດໃຊ້ຍຸດທະສາດແຫ່ງຊາດກ່ຽວກັບຄວາມສະເໝີພາບລະຫວ່າງ ຍິງ - ຊາຍໄລຍະ 2011 – 2020 ດ້ວຍຈຸດໝາຍຍົກສູງຄວາມຮັບຮູ້, ຮັດແຄບຊ່ອງຫວ່າງກ່ຽວກັບທາງເພດ ແລະ ຍົກສູງທີ່ຕັ້ງບົດບາດ ຫວຽດນາມ ຂອງແມ່ຍິງ; ຕັ້ງໜ້າປະຕິບັດບັນດາຂໍ້ລິເລີ່ມສາກົນ ແລະ ພາກພື້ນ ເພື່ອແນໃສ່ຊຸກຍູ້ການປ້ອງກັນສິດຂອງແມ່ຍິງ ແລະ ຕ້ານການຈຳແນກການປະພຶດສຳລົບແມ່ຍິງ. ເປົ້າໝາຍສະເໝີພາບລະຫວ່າງ ຍິງ - ຊາຍ ແລະ ຍົກສູງທີ່ຕັ້ງໃຫ້ແກ່ແມ່ຍິງ, ໜຶ່ງໃນສາມເປົ້າໝາຍສະຫັດສະວັດ (MDG 2013), ຊຶ່ງ ຫວຽດນາມ ໄດ້ສຳເລັດກ່ອນກຳນົດເວລາໃນປີ 2015, ນຳປະເທດ ຫວຽດນາມ ກາຍເປັນໜຶ່ງໃນບັນດາປະເທດທີ່ລົບລ້າງຊ່ອງຫວ່າງທາງເພດໄວທີ່ສຸດໃນຮອບ 20 ປີຜ່ານມາໃນໂລກ.
ໂດຍກວມກ່ວາ 50% ຈຳນວນປະຊາກອນ ແລະ ເກືອບ 50% ກຳລັງແຮງງານສັງຄົມ, ແມ່ຍິງ ຫວຽດນາມ ນັບມື້ນັບເຂົ້າຮ່ວມໃນທຸກການເຄື່ອນໄຫວຢູ່ປະຊາຄົມຢ່າງເລິກເຊິ່ງ. ອັດຕາແມ່ຍິງເຂົ້າຮ່ວມສະພາແຫ່ງຊາດຊຸດທີ 14 (2016 - 2021) ບັນລຸ 26,8% ນຳປະເທດ ຫວຽດນາມ ນອນໃນບັນດາປະເທດທີ່ມີອັດຕາສະມາຊິກສະພາແຫ່ງຊາດຍິງສູງຢູ່ໃນພາກພື້ນ ແລະ ສາກົນ. ແມ່ຍິງ ໄດ້ດຳລົງໃນຫລາຍຕຳແໜ່ງ ຫຼັກແຫຼ່ງຂອງປະເທດຄື: ກຳມະການກົມການເມືອງ, ປະທານສະພາແຫ່ງຊາດ, ຮອງປະທານສະພາແຫ່ງຊາດ, ຮອງປະທານປະເທດ, ລັດຖະມົນຕີ, ຮອງລັດຖະມົນຕີ. ຢູ່ບັນດາທ້ອງຖິ່ນ, ແມ່ຍິງຫລາຍຄົນໄດ້ຮັກສາບົດບາດຫຼັກແຫຼ່ງຢູ່ທຸກຂັ້ນ, ທຸກຂະແໜງການ, ປະກອບສ່ວນແກ້ໄຂບັນດາບັນຫາສຳຄັນ. ອັດຕານັກທຸລະກິດຍິງເປັນຊາວເຜົ່າສ່ວນໜ້ອຍໄດ້ເພີ່ມຂຶ້ນ, ພິເສດໃນຂົງເຂດການສຶກສາ, ສາທາລະນະສຸກ, ສົ່ງເສີມສຸຂະພາບປະຊາຊົນ. ບົດບາດຂອງແມ່ຍິງຊາວເຜົ່າສ່ວນໜ້ອຍນັບມື້ນັບໄດ້ຮັບການເສີມຂະຫຍາຍ.
ສືບຕໍ່ຜັນຂະຫຍາຍບັນດາເປົ້າໝາຍກ່ຽວກັບຄວາມສະເໝີພາບລະຫວ່າງຍິງ-ຊາຍ
ບົດລາຍງານແຫ່ງຊາດຂອງຫວຽດນາມກ່ຽວກັບການປະຕິບັດສິດທິມະນຸດຕາມກົນໄກສຳຫຼວດກວດກາປະຈຳໄລຍະຂອງສະພາສິດທິມະນຸດແຫ່ງ ສ.ປ.ຊ ຊຶ່ງຫວຽດນາມເປັນສະມາຊິກໃນໄລຍະ 2014-2016 ໄດ້ສະແດງໃຫ້ເຫັນວ່າ ຍຸດທະສາດແຫ່ງຊາດກ່ຽວກັບ ຄວາມສະເໝີພາບລະຫວ່າງຍິງ-ຊາຍ ແລະ ຄວາມກ້າວໜ້າຂອງແມ່ຍິງຫວຽດນາມໄດ້ສຸມໃສ່ຜັນຂະຫຍາຍຢູ່ບັນດາເຂດ ແລະ ຂົງເຂດທີ່ຂາດຄວາມສະເໝີພາບ ແລະ ມີໄພອັນຕະລາຍພາໄປເຖິງຄວາມຂາດສະເໝີພາບຢ່າງສູງ. ສິ່ງນີ້ໄດ້ປະກອບສ່ວນສະກັດກັ້ນ, ຍູ້ຖອຍສະພາບຄ້າຂາຍແມ່ຍິງ ແລະ ການໃຊ້ຄວາມຮຸນແຮງໃນຄອບຄົວ, ສ້າງເງື່ອນໄຂເພື່ອໃຫ້ແມ່ຍິງໄດ້ຮ່ຳຮຽນ, ຍົກສູງລະດັບຄວາມຮູ້, ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານ. ລັດຖະບານກໍຍັງຜັນຂະຫຍາຍບັນດາວິທີການແກ້ໄຂໃນການປະຕິບັດກົດໝາຍກໍຄືການຮ່ວມມືສາກົນ ແນໃສ່ຜ່ານຜ່າບັນດາສິ່ງທ້າທາຍຢ່າງໃຫຍ່ຫຼວງທີ່ກ່ຽວຂ້ອງເຖິງຄວາມຮັບຮູ້ກ່ຽວກັບ ຄວາມສະເໝີພາບລະຫວ່າງຍິງ-ຊາຍ, ລົບລ້າງການໃຊ້ຄວາມຮຸນແຮງລະຫວ່າງຍິງ-ຊາຍ ແລະ ການໃຊ້ຄວາມຮຸນແຮງໃນຄອບຄົວ, ຮັດແຄບຄວາມແຕກໂຕ່ນກັນທາງດ້ານວຽກເຮັດງານທຳ, ລາຍຮັບ, ຖານະບົດບາດໃນສັງຄົມ…ໄດ້ມີຫຼາຍຮູບແບບຊຸກຍູ້ການປະຕິບັດ ຄວາມສະເໝີພາບລະຫວ່າງຍິງ-ຊາຍ ແລະ ຍົກສູງສິດອຳນາດໃຫ້ແກ່ແມ່ຍິງຊຶ່ງໄດ້ຮັບການຜັນຂະຫຍາຍຢ່າງມີປະສິດທິຜົນໃນບັນດາຂະແໜງການ, ຂັ້ນຕ່າງໆໃນໄລຍະທີ່ຜ່ານມາ. ສຳລັບບັນດາມາດຕະການຍົກສູງ ຄວາມສະເໝີພາບລະຫວ່າງຍິງ-ຊາຍນີ້, ຫວຽດນາມສືບຕໍ່ສຸມໃສ່ຜັນຂະຫຍາຍໃນໄລຍະທີ່ຈະມາເຖິງ.
ພ້ອມກັນນັ້ນ, ຫວຽດນາມກໍວາງເປົ້າໝາຍຍົກສູງອັດຕາແມ່ຍິງຊາວເຜົ່າສ່ວນໜ້ອຍເຂົ້າຮ່ວມໃນຄະນະນຳຂັ້ນຕ່າງໆ, ຍົກສູງຄຸນນະພາບການດຳລົງຊີວິດ ແລະ ທັກສະ, ລະດັບຄວາມຮູ້ຂອງ ແມ່ຍິງຊາວເຜົ່າສ່ວນໜ້ອຍ. ລັດຖະບານກໍເອົາໃຈໃສ່ເປັນພິເສດເຖິງການສ້າງໂອກາດໃຫ້ແກ່ແມ່ຍິງມີວຽກເຮັດງານທຳດ້ວຍລາຍຮັບສູງ, ເພີ່ມທະວີຄຸນນະພາບການດຳລົງຊີວິດໃຫ້ແກ່ແມ່ຍິງແຕ່ລະຄົນ, ແຕ່ລະຄອບຄົວ ແລະ ທົ່ວທັງສັງຄົມ. ຫວຽດນາມຍນັງຈະສືບຕໍ່ໂຄສະນາເຜີຍແຜ່ເພື່ອເພີ່ມທະວີຄວາມຮັບຮູ້ກ່ຽວກັບ ຄວາມສະເໝີພາບລະຫວ່າງຍິງ-ຊາຍ, ແນໃສ່ເຮັດໃຫ້ປ່ຽນແປງທ່າທີ ແລະ ແນວຄິດກ່ຽວກັບຍິງ -ຊາຍຊຶ່ງເຄີຍແມ່ນອະຄະຕິໃນສັງຄົມ, ຊຸກຍູ້ການຮ່ວມມືສາກົນໃນການແກ້ໄຂບັນຫາ ຄວາມສະເໝີພາບລະຫວ່າງຍິງ-ຊາຍ, ພິເສດແມ່ນບັນດາກຸ່ມດ້ອຍໂອກາດ ແລະ ໃນບັນດາຂົງເຂດທີ່ມີລັກສະນະຍຸດທະສາດຄື: ການສຶກສາ, ສາທາລະນະສຸກ, ວຽກເຮັດງານທຳ./.