ວັນທີ 1/10, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ເລີ່ມຕົ້ນການຢ້ຽມຢາມ ສ.ເກົາຫຼີຢ່າງເປັນທາງການ ຕາມຄຳເຊີນຂອງປະທານາທິບໍດີ ສ.ເກົາຫຼີ Park Geun- Hye . ການຢ້ຽມຢາມ ສ.ເກົາຫຼີຂອງຜູ້ນຳສູງສຸດຂອງພັກກອມມູນິດຫວຽດນາມຄັ້ງນີ້ ເປັນການສະແດງໃຫ້ເຫັນຄວາມໄວ້ເນື້ອເຊື່ອໃຈຢ່າງສູງກ່ຽວກັບດ້ານການເມືອງ, ໝັ້ນໝາຍຈະເປີດກາລະໂອກາດ ຮ່ວມມືໃໝ່ໃນທຸກໆຂົງເຂດ.
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ
ເລີ່ມຕົ້ນການຢ້ຽມຢາມ ສ.ເກົາຫຼີຢ່າງເປັນທາງການ
|
ພາຍຫຼັງ 22 ປີ ນັບຕັ້ງແຕ່ເວລາສ້າງຕັ້ງສາຍພົວພັນທາງການທູດເມື່ອປີ 1992 ແລະ ພິເສດພາຍຫຼັງ 5 ປີນັບແຕ່ເມື່ອຍົກລະດັບການພົວພັນຂຶ້ນເປັນ “ ການພົວພັນຄູ່ຮ່ວມມືຍຸດທະສາດ ” ໃນປີ 2009, ການພົວພັນ ຫວຽດນາມ - ສ.ເກົາຫຼີໄດ້ພັດທະນາຢ່າງແຂງແຮງ, ຮອບດ້ານ, ແລະ ນັບມື້ນັບເຂົ້າສູ່ລວງເລິກ.
ຄວາມເຫັນດີເຫັນພ້ອມໃນການພົວພັນ ຫວຽດນາມ - ສ.ເກົາຫຼີ
ຕາມທ່ານ ດຣ ດັ້ງດິງກີ້, ຜູ້ອຳນວຍການສະຖາບັນການຕ່າງປະເທດຫວຽດນາມ, ຖ້າຫາກລວງເລິກໃນການພົວພັນສາກົນລະຫວ່າງ 2 ປະເທດໄດ້ຮັບການຕີລາຄາໂດຍອີງບົນ 3 ມາດຖານຕົ້ນຕໍ ແມ່ນລະດັບຄວາມກົມກ່ຽວດ້ານຜົນປະໂຫຍດ, ຈຳນວນ ແລະ ປະສິດທິຜົນຂອງບັນດາກົນໄກຮ່ວມມື ແລະ ລະດັບໄວ້ວາງໃຈຊຶ່ງກັນ ແລະ ກັນ, ໃນນັ້ນມີຄວາມໄວ້ວາງໃຈດ້ານການເມືອງນັ້ນ, ການພົວພັນ ຫວຽດນາມ - ສ.ເກົາຫຼີສາມາດຕອບສະໜອງໄດ້ທຸກຢ່າງ. ທ່ານ ດຣ ດັ້ງດິງກີ້, ຜູ້ອຳນວຍການສະຖາບັນການຕ່າງປະເທດຫວຽດນາມ ກ່າວວ່າ :
“ ທີ່ 1 , ລະດັບຄວາມກົມກ່ຽວລະຫວ່າງ 2 ພື້ນຖານເສດຖະກິດ ແມ່ນໃຫຍ່ຫຼວງພໍສົມຄວນ ແລະ ຮອບດ້ານໃນທຸກໆຂົງເຂດ. ທີ 2, ຫວຽດນາມ ແລະ ສ.ເກົາຫຼີໄດ້ສ້າງຫຼາຍກົນໄກຮ່ວມມືໃນຫຼາຍຂັ້ນ ແລະ ຫຼາຍຂົງເຂດ. ພ້ອມກັບການພົວພັນລະຫວ່າງ 2 ລັດຖະບານ, 2 ສະພາແຫ່ງຊາດຢ່າງເປັນທາງການ, ບັນດາ ກົນໄກຮ່ວມມືລະຫວ່າງບັນດາອົງການຈັດຕັ້ງມິດຕະພາບ, ບັນດາວິສາຫະກິດ, ລະຫວ່າງບັນດາທ້ອງຖິ່ນ, ໄດ້ສ້າງໃຫ້ມີຫຼາຍຂອບເຂດຮ່ວມມືເພື່ອໃຫ້ 2 ຝ່າຍຜັນຂະຫຍາຍບັນດາການເຄື່ອນໄຫວຮ່ວມມືລະອຽດ, ແກ້ໄຂບັນດາບັນຫາທີ່ເກີດຂຶ້ນໃນສາຍພົວພັນຢ່າງທັນການ. ນອກຈາກນັ້ນ, ການພົວພັນຄູ່ຮ່ວມມືຍຸດທະສາດຕ້ອງອີງບົນພື້ນຖານແຫ່ງຄວາມເຊື່ອໝັ້ນ, ນີ້ແມ່ນພື້ນຖານທີ່ສຳຄັນຂອງທຸກໆການພົວພັນໃນສາຍພົວພັນສາກົນ. ສຳລັບການພົວພັນຫວຽດນາມ - ສ.ເກົາຫຼີ, ຊຸມປີທີ່ຜ່ານມາ, ການພົວພັນແລກປ່ຽນລະຫວ່າງການນຳຂັ້ນຕ່າງໆຂອງ 2 ປະເທດ ໄດ້ເປັນການຢັ້ງຢືນໃຫ້ແກ່ຄວາມໄວ້ວາງໃຈຢ່າງສູງລະຫວ່າງ 2 ປະເທດ ແລະ ຄວາມໄວ້ວາງໃຈຢ່າງສູງນັ້ນ, ພວມສືບຕໍ່ໄດ້ຮັບການປັບປຸງໃຫ້ດີຍິ່ງໆຂຶ້ນ ”
ໃນໄລຍະ 22 ປີຜ່ານມາ, ການແລກປ່ຽນດ້ານການຄ້າລະຫວ່າງ 2 ປະເທດໄດ້ເພີ່ມຂຶ້ນທົບ 45 ເທົ່າ, ການລົງທຶນເພີ່ມຂຶ້ນ 250 ເທົ່າ, ການພົວພັນແລກປ່ຽນປະຊາຊົນເພີ່ມຂຶ້ນ 80 ເທົ່າ ແລະ ຫວຽດນາມກໍແມ່ນປະເທດໄດ້ຮັບການຊ່ວຍເຫຼືອຫຼາຍກ່ວາໝູ່ຂອງສ.ເກົາຫຼີ. ໄລ່ຮອດທ້າຍໄຕມາດ 2 ປີນີ້, ສ.ເກົາຫຼີໃນປະຈຸບັນ ແມ່ນນັກລົງທຶນໂດຍກົງຕ່າງປະເທດ (FDI)ໃຫຍ່ກວ່່າໝູ່ກ່ຽວກັບຈຳນວນໂຄງການ ແລະ ຢືນອັນດັບທີ 2 ກ່ຽວກັບທຶນຈົດທະບຽນ. ປະຈຸບັນ,ຊາວຫວຽດນາມ ແລະ ສ.ເກົາຫຼີກວ່າ 100.000 ຄົນພວມຢູ່ອາໄສໃນແຕ່ລະປະເທດຂອງກັນ. ເປັນໜ້າສົນໃຈແມ່ນພົນລະເມືອງ 2 ປະເທດ 50.000 ຄູ່ໄດ້ກາຍເປັນຄູ່ຜົວເມຍ, ອັນໄດ້ເຮັດໃຫ້ສາຍພົວພັນຫວຽດນາມ - ສ.ເກົາຫຼີຍິ້ງພິເສດກວ່າອີກ. ທ່ານ ດຣ ດັ້ງດິງກີ້, ຜູ້ອຳນວຍການສະຖາບັນການຕ່າງປະເທດຫວຽດນາມໃຫ້ຂໍ້ສັງເກດວ່າ :
“ ຕົວເລກເຫຼົ່ານີ້ ໄດ້ສະແດງໃຫ້ເຫັນວ່າ ທີ່ຕັ້ງບົດບາດຂອງແຕ່ລະປະເທດໃນນະໂຍບາຍການຕ່າງປະເທດຂອງກັນ, ຊຶ່ງເປັນການຢັ້ງຢືນການເພີ່ມທະວີລະດັບອາໄສຊຶ່ງກັນ ແລະ ກັນ. ການຜູກຮັດນີ້ກໍປຽບເໝືອກາວຈອດຕິດແໜ້ນລະຫວ່າງ 2 ປະເທດເຂົ້າກັນ ແມ່ນກຳລັງຊຸກຍູ້ເພື່ອສ້າງການພົວພັນຄູ່ຮ່ວມມືຍຸດທະສາດໃນທຸກໆຂົງເຂດ ”
ຫວຽດນາມ - ສ.ເກົາຫຼີ ມຸ່ງໄປສູ່ວິໄສທັດຮ່ວມ, ຄວາມວັດທະນາຖາວອນລວມ
ປະຈຸບັນ, ບັນດາການຜັນແປໃໝ່ໃນພາກພື້ນ ແລະ ໃນໂລກໄດ້ເຮັດໃຫ້ແຕ່ລະປະເທດຢືນຢູ່ຕໍ່ໜ້າຄວາມຮຽກຮ້ອງຕ້ອງການໃໝ່. ສຳລັບ ສ.ເກົາຫຼີ, ໜຶ່ງໃນບັນດາໜ້າທີ່ຕົ້ນຕໍ່ຂອງປະເທດນີ້ ແມ່ນເພີ່ມທະວີການຮ່ວມມືດ້ານເສດຖະກິດ ແລະ ການຄ້າ, ປະຕິບັດແຜນການປະຕິຮູບເສດຖະກິດໄລຍະ 3 ປີ 2014 – 2017 ແນໃສ່ມຸ່ງໄປສູ່ເປົ້າໝາຍສ້າງ“ວິລະກຳແມ່ນ້ຳຮ່ານ” ຄັ້ງທີ 2 . ກ່ຽວກັບຝ່າຍຫວຽດນາມ, ດ້ວຍຈຸດໝາຍຍູ້ແຮງການຫັນປະເທດຊາດເປັນອຸດສາຫະກຳ ແລະ ທັນສະໄໝ, ເປັນເຈົ້າການເຊື່ອມໂຍງເຂົ້າກັບສາກົນ, ຫວຽດນາມມີແຜນນະໂຍບາຍນຳບັນດາການພົວພັນຮ່ວມມືກັບບັນດາປະເທດເຂົ້າສູ່ລວງເລິກ, ມີສະຖຽນລະພາບ, ໝັ້ນຄົງ, ເປັນຕົ້ນແມ່ນບັນດາປະເທດຄູ່ຮ່ວມມືຍຸດທະສາດ, ບັນດາຄູ່ຮ່ວມມືທີ່ມີລະດັບສຳຄັນສຳລັບຄວາມໝັ້ນຄົງຍຸດທະສາດຂອງຫວຽດນາມ, ໃນນັ້ນ, ມີສ.ເກົາຫຼີ. ເພາະສະນັ້ນ, 2 ປະເທດພວມຍາດແຍ່ງທຸກກາລະໂອກາດໃນສະພາບການໃໝ່ເພື່ອຫັນຄວາມສາມາດບົ່ມຊ້ອນພັດທະນາຂອງແຕ່ລະປະເທດໃຫ້ປະກົດຜັນເປັນຈິງ. ທ່ານ ວູ້ຄວານ ອະດີດຮອງນາຍົກລັດຖະມົນຕີຫວຽດນາມໃຫ້ຂໍ້ສັງເກດວ່າ :
“ ຖ້າຫາກວ່າ ກ່ອນນີ້, ການຮ່ວມມື ຫວຽດນາມ - ສ.ເກົາຫຼີພຽງຈຳກັດໃນຂອບເຂດ 2 ປະເທດເທົ່ານັ້ນ, ປະຈຸບັນ ແມ່ນມີສ່ວນກ່ຽວຂ້ອງເຖິງການຜັນແປຂອງທັງພາກພື້ນອາຊີ-ປາຊີຝິກ ແລະ ໂລກອີກດ້ວຍ. ຫຼືເວົ້າແນວອື່ນວ່າ : ພື້ນຖານແບບຕ່າງຝ່າຍຕ່າງມີຜົນປະໂຫຍດ ທີ່ນັບມື້ນັບກ້ວາງຂວາງເລິກເຊິ່ງກ່ວານັ້ນ, ໄດ້ສ້າງກຳລັງຊຸກຍູ້ 2 ປະເທດຮ່ວມສຳພັນນຳກັນຢ່າງແໜ້ນກວ່າ ”
ບົນພື້ນຖານການພົວພັນອັນດີງານນີ້, ການຢ້ຽມຢາມສ.ເກົາຫຼີຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຄັ້ງນີ້ ແມ່ນມີຄວາມໝາຍສຳຄັນທີ່ສຸດ, ບໍ່ພຽງແຕ່ຊຸກຍູ້ ການພົວພັນຄູ່ຮ່ວມມືຍຸດທະສາດເທົ່ານັ້ນ, ການຢ້ຽມຢາມສ.ເກົາຫຼີຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງຍັງເປັນການຢັ້ງຢືນສິ່ງໜຶ່ງວ່າ : 2 ຊາດຫວຽດນາມ - ສ.ເກົາຫຼີ
ໄດ້ກາຍເປັນບັນດາເພື່ອນທີ່ຈິງໃຈຕໍ່ກັນ, ພ້ອມກັນມຸ່ງໄປສູ່ຈຸດໝາຍລວມ ນັ້ນແມ່ນສັນຕິພາບ, ສະຖຽນລະພາບ ແລະ ວັດທະນາຖາວອນ.