ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸ້ງ ແລະທ່ານ
ນາຍົກລັດຖະມົນຕີ ອີນເດຍ Manmohan Singh (ພາບ:internet)
|
ໂດຍຮັບຄຳເຊີນຂອງທ່ານນາຍົກລັດຖະມົນຕີ ອີນເດຍ Manmohan Singh, ວັນທີ 20/12, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸ້ງໄດ້ນຳໜ້າຄະນະຜູ້ແທນຫວຽດນາມໄປຮ່ວມກອງປະຊຸມສຸດຍອດສະເຫຼີມສະຫຼອງ 20 ປີແຫ່ງການພົວພັນຄູ່ເຈລະຈາ ອາຊຽນ - ອີນເດຍ ຊຶ່ງຖືກດຳເນີນແຕ່ວັນທີ 20-21/12/2012 ຢູ່ນິວເດລີປະເທດ ອີນເດຍ. ບໍ່ພຽງແຕ່ພ້ອມກັບບັນດາປະເທດອາຊຽນຕັ້ງໜ້າຊຸກຍູ້ ການພົວພັນຄູ່ເຈລະຈາ ອາຊຽນ - ອີນເດຍໃຫ້ຂຶ້ນສູ່ລະດັບຄູ່ຮ່ວມມືຍຸດທະສາດເທົ່ານັ້ນ, ການຢ້ຽມຢາມອີນເດຍຂອງ ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸ້ງຍັງສະແດງໃຫ້ເຫັນນະໂຍບາຍຢ່າງສະເໝີຕົ້ນສະເໝີປາຍຂອງຫວຽດນາມທີ່ສະຫງວນບຸລິມະສິດຢ່າງສູງໃນການພົວພັນຄູ່ຮ່ວມມືຍຸດທະສາດກັບອີນເດຍ, ຊຸກຍູ້ການຮ່ວມມື 2 ຝ່າຍໃນທຸກຂົງເຂດ ກໍຄືຢູ່ໃນ ບັນດາເວທີ ປາໄສພາກພື້ນ ແລະ ສາກົນ.
ດ້ວຍຫົວຂໍ້ວ່າ “ ຄູ່ຮ່ວມມືອາຊຽນ-ອີນເດຍເພື່ອສັນຕິພາບ ແລະ ວັດທະ ນາຖາວອນລວມ ” , ກອງປະຊຸມສຸດຍອດສະເຫຼີມສະຫຼອງ 20 ປີແຫ່ງການພົວພັນຄູ່ເຈລະຈາ ອາຊຽນ - ອີນເດຍ ໄດ້ສຸມໃສ່ປຶກສາຫາລືການກຳນົດທິດການພົວພັນຄູ່ເຈລະຈາ ອາຊຽນ - ອີນເດຍໃນອະນາຄົດ ແລະ ຮັບຮອງເອົາ ຖະແຫຼງການ ວິໄສທັດດ້ວຍການຍົກການພົວພັນຄູ່ເຈລະຈາ ອາຊຽນ - ອີນເດຍໃຫ້ຂຶ້ນສູ່ລະດັບ ຄູ່ຮ່ວມມືຍຸດທະສາດ.
ໂດຍໄດ້ຮັບການສ້າງຂຶ້ນນັບແຕ່ປີ 1992 ເປັນຕົ້ນມາ, ການພົວພັນຄູ່ເຈລະຈາ ອາຊຽນ - ອີນເດຍໃນຕະຫຼອດ 20 ປີທີ່ຜ່ານມາໄດ້ບັນລຸບັນດາໝາກຜົນອັນຕັ້ງໜ້າໃນຫຼາຍຂົງເຂດ, ຊຶ່ງພົ້ນເດັ່ນຂຶ້ນແມ່ນດ້ານເສດຖະກິດ. 2 ຝ່າຍໄດ້ລົງນາມໃນສັນຍາແມ່ບາງສະບັບກ່ຽວກັບການຮ່ວມມືດ້ານເສດຖະກິດຢ່າງ ຮອບດ້ານສ້າງພື້ນຖານສ້າງຕັ້ງເຂດການຄ້າ ແລະ ລົງທຶນອາຊຽນ - ອີນເດຍ. ປະຈຸບັນ, 2 ຝ່າຍໄດ້ສຳເລັດການເຈລະຈາສັນຍາຄ້າຂາຍສິນຄ້າ, ສັນຍາແກ້ໄຂການພິພາດອາຊຽນ - ອີນເດຍ. ນີ້ແມ່ນບັນດາເງື່ອນໄຂທີ່ສະດວກທີ່ສຸດເພື່ອໃຫ້ອີນເດຍເພີ່ມທະວີການຮ່ວມມືລົງທຶນກັບຕະຫຼາດອາຊຽນທີ່ກ້ວາງໃຫຍ່ດ້ວຍຈຳນວນປະຊາກອນ ກ່ວາ 600 ລ້ານຄົນ ແລະ ກົງກັນຂ້າມ, ອາຊຽນສາມາດຂຸດຄົ້ນຄວາມສາມາດບົ່ມຊ້ອນຢ່າງໃຫຍ່ຫຼວງຈາກພື້ນຖານເສດຖະກິດຢືນອັນດັບ 2 ໃນອາຊີ, ຮັບໃຊ້ຈຸດໝາຍສ້າງຕັ້ງປະຊາຄົມອາຊຽນໃນປີ 2015 . ແຕ່ປີ 2009, ອາຊຽນ ແລະ ອີນເດຍ ໄດ້ເຫັນດີວາງຈຸດໝາຍຍົກວົງເງິນການຄ້າ 2 ຝ່າຍຂຶ້ນເຖິງ 70 ຕື້ USD ໃນປີ 2012. ແຕ່ໃນປີ 2011, ຍອດວົງເງິນການຄ້າ 2 ຝ່າຍໄດ້ບັນລຸເກືອບ 75 ຕື້ USD , ຊຶ່ງໄດ້ລື່ນກາຍຕົວເລກຄາດໝາຍໃນເບື້ອງຕົ້ນ.
ໃນສະພາບການປະຈຸບັນ, ທັງອາຊຽນ ແລະ ອີນເດຍ ຕ່າງກໍພວມມີບາດກ້າວຂະຫຍາຍຕົວຢ່າງແຂງແຮງ, ເພາະສະນັ້ນ, ກອງປະຊຸມຂັ້ນສຸດຍອດສະເຫຼີມສະຫຼອງ 20 ປີແຫ່ງການພົວພັນຄູ່ເຈລະຈາ ອາຊຽນ - ອີນເດຍ ຄັ້ງນີ້ ແມ່ນເຫດການທີ່ສຳຄັນສຳລັບ 2 ຝ່າຍ. ກ່ອນທີ່ດຳເນີນກອງປະຊຸມ, ທ່ານເອກອັກຄະລັດຖະທູດ ອີນເດຍປະຈຳຫວຽດນາມ Ranjit Rae ໄດ້ເນັ້ນໜັກວ່າ :
“ ໃນສະພາບການໃນພາກພື້ນ ແລະ ໂລກ ຊຶ່ງພວກເຮົາພວມຊຸກຍູ້ການພົວພັນຮ່ວມມືກັນ. ຮູບແບບການປ້ອງກັນຄວາມສະຫງົບ ແລະ ເສດຖະກິດໃໝ່ພວມມີຄວາມຄືບໜ້າໃນພາກພື້ນ ແລະ ໃນໂລກ. ພາຍຫຼັງ 2 ທົດສະວັດທີ່ໄດ້ສຸມທຸກຄວາມພະຍາຍາມ, ນະໂຍບາຍມຸ່ງໄປສູ່ທິດຕາເວັນອອກຂອງອີນເດຍໄດ້ສົມບູນແບບແລ້ວ. ແລະ ອີນເດຍໄດ້ກາຍເປັນສ່ວນໜຶ່ງທີ່ບໍ່ອາດຂາດໄດ້ຂອງພາກພື້ນອາຊຽນທີ່ຂະຫຍັນຂັ່ນເຄື່ອນນີ້. ບັນດາການພົວພັນຮ່ວມມືທີ່ແຂງແຮງກັບອາຊຽນຈະຖືກສະແດງອອກຢ່າງຈະແຈ້ງຢູ່ທີ່ ກອງປະຊຸມສຸດຍອດອາຊຽນ - ອີນເດຍທີ່ຈັດຂຶ້ນຢູ່ນິວເດລີໃນວັນທີ 20-21/12 ”
ສຳລັບຫວຽດນາມແລ້ວ, ຍ້ອນມີພື້ນຖານຢ່າງໝັ້ນຄົງໜັກແໜ້ນໃນປະຫວັດສາດແຫ່ງການພົວພັນແລກປ່ຽນວັດທະນະທຳໃນຊຸມປີຕົ້ນ ຄ.ສ , ບວກກັບການນຳລຸ່ນຕ່າງໆ ແລະ ປະຊາຊົນຂອງ 2 ປະເທດໄດ້ເພີ່ມພູນຄຸນສ້າງ ແລະ ປົກປັກຮັກສາ, ດັ່ງນັ້ນ 2 ປະເທດໄດ້ບັນລຸຄວາມຮັບຮູ້ລວມຢ່າງງ່າຍດາຍກ່ຽວກັບຫຼາຍບັນຫາ. ໃນຊຸມປີມໍ່ໆມານີ້, ຫວຽດນາມ ແລະ ອີນເດຍໄດ້ມີການພົວພັນຢ່າງແໜ້ນແຟ້ນ ແລະ ມີປະສິດທິຜົນໃນຂອບເຂດຮ່ວມມື ຊຶ່ງບໍ່ພຽງແຕ່ໃນອາຊຽນເທົ່ານັ້ນ, ຫາກຍັງຢູ່ບັນດາເວທີປາໄສສາກົນອີກດ້ວຍ.ໃນບົດຂຽນຂອງ ສາດສະດາຈານ Patasani ສ.ສ.ຊ ອີເດຍ ຊຶ່ງໄດ້ເນັ້ນໜັກວ່າ ເຖິງວ່າຫວຽດນາມ-ອີນເດຍມີຄວາມແຕກຕ່າງກັນທາງດ້ານພູມີປະເທດກໍຕາມ, ແຕ່ 2 ຝ່າຍລ້ວນແຕ່ຮັບຮູ້ໄດ້ເຖິງຄວາມຈຳເປັນຂອງການຮ່ວມມືໃນບັນດາບັນຫາລະດັບພາກພື້ນ ແລະ ສາກົນ. ບົດຂຽນຍັງເນັ້ນໜັກເຖິງການຢ້ຽມຢາມ ອີນເດຍຂອງທ່ານນາຍົກ ລັດຖະມົນຕີຫວຽດນາມ ຫງວຽນເຕີ້ນຢຸ້ງ ຈະເປັນການຢືນຢັນນະໂຍບາຍສະເໝີຕົ້ນສະເໝີປາຍຂອງຫວຽດນາມທີ່ສະຫງວນ ບຸລິມະສິດຢ່າງສູງໃຫ້ແກ່ການພົວພັນຄູ່ຮ່ວມມືຍຸດທະສາດກັບອີນເດຍ ແລະ ຊຸກຍູ້ການຮ່ວມມື 2 ຝ່າຍໃນທຸກໆຂົງເຂດກໍຄືໃນບັນດາເວທີປາໄສພາກພື້ນ ແລະ ສາກົນ. ໃນນະໂຍບາຍ “ມຸ່ງໄປສູ່ທິດຕາເວັນອອກ ” ຂອງຕົນ, ຍາມໃດອີນເດຍກໍຕີລາຄາສູງບົດບາດຂອງຫວຽດນາມໃນພາກພື້ນອາຊຽນ, ຫວັງຢາກຮ່ວມມືພ້ອມກັບຫວຽດນາມເພື່ອພາກພື້ນອາຊີທີ່ພັດທະນາແບບຂະຫຍັນຂັ່ນເຄື່ອນ, ສັນຕິພາບ ແລະ ສະຖຽນລະພາບ. ທ່ານເອກອັກຄະລັດຖະທູດ ອີນເດຍປະຈຳຫວຽດນາມ Ranjit Rae ກ່ວາອີກວ່າ :
“ ບັນດາການຫັນປ່ຽນໃນສະພາບເສດຖະກິດ, ພູມິສາດ, ການເມືອງໃນທົ່ວໂລກໄດ້ສົ່ງຜົນກະທົບຢ່າງຕັ້ງໜ້າເຖິງການພົວພັນຮອບດ້ານຂອງພວກເຮົາ. ບັນດາໂຄງການປະຕິຮູບເສກຖະກິດຂອງແຕ່ລະປະເທດ ແລະ ວິວັດການ ເຊື່ອມໂຍງເຂົ້າກັບທົ່ວໂລກຂອງ 2 ພື້ນຖານເສດຖະກິດໄດ້ເປີດບັນດາກາລະໂອກາດຮ່ວມມືທີ່ຕ່າງຝ່າຍຕ່າງມີຜົນປະໂຫຍດ. ພວກເຮົາໄດ້ຍົກລະດັບການພົວພັນຂຶ້ນເປັນການພົວພັນຄູ່ຮ່ວມມືຍຸດທະສາດໂດຍອີງໃສ່ຄວາມຄ້າຍຄືກັນທາງດ້ານຜົນປະໂຫຍດ ແລະ ຄວາມຮັບຮູ້ລວມຕໍ່ການພັດທະນາຂອງພາກພື້ນ ແລະ ທົ່ວໂລກ. ທັງ ຫວຽດນາມ ແລະ ອີນເດຍລວ້ນແຕ່ມີວິໄສທັດຮ່ວມກ່ຽວກັບໂຄງສ້າງພາກພື້ນ ແລະ ທົ່ວໂລກເປີດກ້ວາງ, ມີປະຊາທິປະໄຕ ຊຶ່ງແມ່ນແຫ່ງທີ່ທຸກໆປະເທດຕ່າງກໍສາມາດສວມບົດບາດອັນຖືກຕ້ອງຂອງຕົນ. ”
ໃນການຢ້ຽມຢາມອີນເດຍຄັ້ງນີ້, ນອກຈາກການເຂົ້າຮ່ວມບັນດາການເຄື່ອນໄຫວຕົ້ນຕໍຂອງ ກອງປະຊຸມສຸດຍອດສະເຫຼີມສະຫຼອງ 20 ປີແຫ່ງການພົວພັນຄູ່ເຈລະຈາ ອາຊຽນ - ອີນເດຍ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນ ຢຸ້ງຍັງມີການພົບປະ 2 ຝ່າຍກັບການນຳ ອີນເດຍ ແລະ ບັນດາປະເທດອາຊຽນ. ພ້ອມທັງປະກອບສ່ວນຢ່າງຕັ້ງໜ້າເຂົ້າໃນດານຊຸກຍູ້ການພົວພັນອາຊຽນ - ອີນເດຍໃຫ້ພັດທະນາຢ່າງແທ້ຈິງ ແລະ ມີປະສິດທິຜົນ, ພ້ອມທັງປະກອບສ່ວນເພີ່ມທະວີປະສິດທິຜົນການພົວພັນ ຄູ່ຮ່ວມມືຍຸດທະສາດ ແລະ ການຮ່ວມມື 2 ຝ່າຍ ລະຫວ່າງ ຫວຽດນາມ ແລະ ອີນເດຍ.