(vovworld)- ວັນທີ 9/9, ທ່ານນາງປະທານາທິບໍດີ ສເກົາຫລີ Park Geun Hye ເລີ່ມຕົ້ນບັນດາການເຄື່ອນໄຫວໃນການຢ້ຽມຢາມທາງລັດຖະກິດຫວຽດນາມ ຕາມຄຳເຊີນຂອງທ່ານປະທານປະເທດຫວຽດນາມ ເຈືອງເຕີນຊາງ. ນີ້ແມ່ນການຢ້ຽມຢາມຫວຽດນາມ ເປັນຄັ້ງທຳອິດພາຍຫລັງຮັບດຳລົງຕຳແຫນ່ງເມື່ອເດືອນ 2/2013. ການຢ້ຽມຢາມຂອງຜູ້ນຳຫນ້າປະເທດທີ່ມີພື້ນຖານເສດຖະກິດຢືນອັນດັບ 4 ຢູ່ ອາຊີ ແລະ ອັນດັບ 15 ຢູ່ໃນໂລກ ໝັ້ນໝາຍຈະເປີດບັນດາກາລະໂອກາດຮ່ວມມືໃຫມ່ໃນທຸກຂົງເຂດ, ພິເສດແມ່ນເສດຖະກິດ, ການຄ້າ ແລະ ການລົງທຶນ, ສ້າງປະຖົມປັດໄຈເພື່ອຊຸກຍູ້ການພົວພັນຄູ່ຮ່ວມມືຍຸດທະສາດຫວຽດນາມ - ສເກົາຫລີ ໃນໄລຍະຈະມາເຖິງ.
ການເລືອກເຟັ້ນຫວຽດນາມ ແມ່ນປະເທດທຳອິດໃນການຢ້ຽມຢາມບັນດາປະເທດ ອາຊີ ໄດ້ສະແດງໃຫ້ເຫັນວ່າ ຍາມໃດ ສເກົາຫລີ ກໍຖືການພົວພັນກັບຫວຽດນາມເປັນສຳຄັນ ແລະ ຕັດສິນໃຈຈະນຳການພົວພັນຮ່ວມມືນີ້ໃຫ້ພັດທະນາກວ່າອີກ. ໃນການຕອບສຳພາດຕໍ່ນັກຂ່າວຫວຽດນາມ ເມື່ອວັນທີ 8/9, ທ່ານນາງປະທານາທິບໍດີ ສເກົາຫລີ Park Geun Hye ກໍໄດ້ຢືນຢັນສິ່ງດັ່ງກ່າວ. ທ່ານນາງ Park Geun Hye ເນັ້ນຫນັກວ່າ: ການພົວພັນລະຫວ່າງ ຫວຽດນາມ ແລະ ສເກົາຫລີ ໄດ້ມີການພັດທະນາທີ່ເປັນຫນ້າສົນໃຈໃນຕະຫລອດ 20 ປີຜ່ານມາ ແລະ ການຢ້ຽມຢາມແມ່ນໂອກາດເພື່ອໃຫ້ສອງຝ່າຍປຶກສາຫາລື, ກະກຽມໃຫ້ແກ່ອະນາຄົດ 20 ປີຈະມາເຖິງ ແລະ ກ້າວໄປເຖິງນຳການຮ່ວມມືເສດຖະກິດພັດທະນາຢ່າງເລິກເຊິ່ງ ກວ້າງຂວາງຂຶ້ນສູ່ລະດັບສູງໃຫມ່.
ທ່ານນາງ Park Geun Hye
ພາບ: internet
|
ໃນ 20 ປີຜ່ານມາ, ການຢ້ຽມຢາມຂອງການນຳຂັ້ນສູງສອງປະເທດດຳເນີນຢ່າງລຽນຕິດ ໄດ້ສ້າງຄວາມສະຫນິດຕິດພັນ, ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ. ພຽງໃນ 9 ປີ, ແຕ່ປີ 2001-2009, ສອງຝ່າຍໄດ້ຍົກລະດັບການພົວພັນລະຫວ່າງສອງປະເທດເປັນ 2 ຄັ້ງ, ຈາກການພົວພັນຄູ່ຮ່ວມມື ຂຶ້ນເປັນການພົວພັນຄູ່ຮ່ວມມືຮອບດ້ານໃນສັດຕະວັດທີ 21 ຫລັງຈາກນັ້ນກາຍເປັນການພົວພັນຄູ່ຮ່ວມມືຍຸດທະສາດ. ສິ່ງນັ້ນ ໄດ້ສ້າງເງື່ອນໄຂເພື່ອໃຫ້ການພົວພັນລະຫວ່າງສອງປະເທດພັດທະນາຢ່າງແຂງແຮງໃນທຸກຂົງເຂດ. ໃນການຢ້ຽມຢາມ ສເກົາຫລີ ທ້າຍເດືອນ 7/2013 ຜ່ານມາ, ທ່ານປະທານສະພາແຫ່ງຊາດ ຫວຽດນາມ ຫງວຽນຊີງຮຸ່ງ ໄດ້ຢືນຢັນໃນການເຈລະຈາກັບປະທານສະພາແຫ່ງຊາດ ສເກົາຫລີ Kang Chang hi ວ່າ:
“ການຮ່ວມມື ສເກົາຫລີ ແລະ ຫວຽດນາມ ໃນໄລຍະຜ່ານມາແມ່ນດີງາມ, ສົດໃສ. ພຽງໃນ 20 ປີ ສອງປະເທດປະຕິບັດໄດ້ຫລາຍສິ່ງຫລາຍຢ່າງ, ນັບທັງການທູດ, ການຮ່ວມມືດ້ານການເມືອງ, ປ້ອງກັນຊາດ ປ້ອງກັນຄວາມສະຫງົບ ພິເສດແມ່ນເສດຖະກິດ, ວັດທະນະທຳ,ການສຶກສາ, ທ່ອງທ່ຽວ, ພົບປະແລກປ່ຽນລະຫວ່າງປະຊາຊົນ, ລະຫວ່າງ ລັດຖະບານສອງປະເທດ.”
ໃນ 20 ປີຜ່ານມາ, ການແລກປ່ຽນດ້ານການຄ້າລະຫວ່າງສອງປະເທດ ໄດ້ເພີ່ມຂຶ້ນ 44 ເທົ່າ, ການລົງທຶນເພີ່ມຂຶ້ນ 250 ເທົ່າ, ການພົບປະແລກປ່ຽນປະຊາຊົນເພີ່ມຂຶ້ນ 80 ຄັ້ງ ແລະ ຫວຽດນາມ ກໍແມ່ນປະເທດໄດ້ຮັບການຊ່ວຍເຫລືອຫລາຍສຸດຈາກ ສເກົາຫລີ.
ບົນພື້ນຖານການພົວພັນອັນດີງາມນັ້ນ, ໃນໄລຍະໃຫມ່ ຕໍ່ຫນ້າການຜັນແປຂອງພາກພື້ນ ແລະ ໂລກ ທັງມີຄວາມສະດວກ ແລະ ຫຍຸ້ງຍາກ, ສອງປະເທດ ຫວຽດນາມ ແລະ ສເກົາຫລີ ພວມມານະພະຍາຍາມສືບຕໍ່ພັດທະນາການພົວພັນຄູ່ຮ່ວມມືຍຸດທະສາດຊື່ງໄດ້ຮັບການສ້າງຕັ້ງຂຶ້ນເມື່ອປີ 2009, ກຳໄດ້ບັນດາປັດໄຈສຳຄັນເພື່ອບັນລຸຄວາມວັດທະນາຖາວອນລວມໃນປີ 2015. ເຖິງວ່າ ໃນໄລຍະຜ່ານມາ ການແລກປ່ຽນດ້ານການຄ້າບັນລຸການເຕີບໂຕຢ່າງກະໂດດຂັ້ນ ຕາມການຕີລາຄາຂອງຜູ້ຊ່ຽວຊານເສດຖະກິດສອງປະເທດຫລາຍທ່ານແລ້ວ, ການຮ່ວມມືລົງທຶນລະຫວ່າງ ຫວຽດນາມ ແລະ ສເກົາຫລີ ມາຮອດປະຈຸບັນແມ່ນສຸມໃສ່ຂົງເຂດອຸດສາຫະກຳເບົາ. ໃນໄລຍະຈະມາເຖິງ, ເພື່ອນຳການພົວພັນຮ່ວມມືເສດຖະກິດພັດທະນາອີກບາດກ້າວຫນຶ່ງ, ສອງປະເທດຄວນຂະຫຍາຍໄປຍັງຂົງເຂດທີ່ມີຫລາຍຮູບຫລາຍແບບ, ມີມູນຄ່າເພີ່ມສູງກວ່າ. ທີ່ກອງປະຊຸມສຳມະນາຈັດຂຶ້ນຫວ່າງແລ້ວນີ້, ທ່ານ ຫວູຄວານ ອະດີດຮອງນາຍົກລັດຖະມົນຕີ, ອະດີດປະທານຄະນະກຳມະການຮ່ວມມືລະຫວ່າງລັດຖະບານ ຫວຽດນາມ - ສເກົາຫລີ ເນັ້ນຫນັກເຖິງສິ່ງດັ່ງກ່າວ.
“ຕໍ່ຫນ້າການຜັນແປຢ່າງສະດວກທັງຊ້ອນແຝງສິ່ງທ້າທາຍຫລາຍຢ່າງຂອງພາກພື້ນ ອາຊີ ປາຊີຝີກ, ເລື່ອງຍົກການພົວພັນຄູ່ຮ່ວມມືຍຸດທະສາດກ່ຽວກັບດ້ານການເມືອງ, ການປ້ອງກັນຄວາມສະຫງົບ, ເສດຖະກິດລະຫວ່າງສອງປະເທດ ແມ່ນສິ່ງທີ່ຈຳເປັນຍິ່ງກວ່າເວລາໃດໝົດ ເພື່ອປະກອບສ່ວນເຂົ້າໃນພາລະກິດສັນຕິພາບ, ສະຖຽນລະພາບ ແລະ ການຮ່ວມມືຢູ່ພາກພື້ນ.”
ເລື່ອງເປີດກວ້າງຂອບເຂດການຮ່ວມມືຍຸດທະສາດ ແລະ ຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດໄປສູ່ຂົງເຂດມີການເຕີບໂຕໃຫມ່ຄື: ສິ່ງແວດລ້ອມ ແລະ ການປ່ຽນແປງຂອງດິນຟ້າອາກາດ, ວິທະຍາສາດເຕັກໂນໂລຊີ, ການປ້ອງກັນຄວາມສະຫງົບ, ພະລັງງານ, ຖະແຫລງຂ່າວໂທລະຄົມ, ເຕັກໂນໂລຊີຊີວະສາດ ເພື່ອນຳການພົວພັນຄູ່ຮ່ວມມືພັດທະນາແບບຍືນຍົງແລະເລິກເຊິ່ງກວ່າ ແມ່ນຫນຶ່ງໃນບັນດາຈຸດສຸມທີ່ນຳມາປຶກສາຫາລືລະຫວ່າງທ່ານນາງປະທານາທິບໍດີ Park Geun Hye ແລະ ບັນດາການນຳຫວຽດນາມ ໃນການຢ້ຽມຢາມຄັ້ງນີ້. ສອງຝ່າຍກໍປຶກສາຫາລືສ້າງກອບນະໂຍບາຍເພື່ອຮັບຮອງເອົາສັນຍາການຄ້າເສລີ FTA, ສູ້ຊົນບັນລຸຄາດໝາຍຍົກວົງເງິນການຄ້າສອງຝ່າຍບັນລຸ 20 ຕື້ USD ກ່ອນປີ 2015 ແລະ 30 ຕື້ USD ໃນຊຸມປີຕໍ່ໄປ.
ດ້ວຍບັນດາໝາກຜົນທີ່ບັນລຸໄດ້ໃນໄລຍະຜ່ານມາ, ການຢ້ຽມຢາມທາງລັດຖະກິດ ຫວຽດນາມ ຄັ້ງນີ້ຂອງທ່ານນາງປະທານາທິບໍດີ ສເກົາຫລີ Park Geun Hye ມີຄວາມໝາຍສຳຄັນຍິ່ງ. ບໍ່ພຽງແຕ່ຊຸກຍູ້ການພົວພັນຄູ່ຮ່ວມມືຍຸດທະສາດກັບຫວຽດນາມ, ສ້າງການພົວພັນໄວ້ເນື້ອເຊື່ອໃຈ ແລະ ເຂົ້າອົກເຂົ້າໃຈເຊິ່ງກັນ ແລະກັນ ລະຫວ່າງການນຳຂັ້ນສູງສອງປະເທດ, ການຢ້ຽມຢາມຍັງເປີດກາລະໂອກາດເພື່ອໃຫ້ຫວຽດນາມ ແລະ ສເກົາຫລີ ເພີ່ມທະວີການຮ່ວມມືກັນໃນເວທີປາໄສສາກົນ ພ້ອມກັນແກ້ໄຂບັນດາບັນຫາສັນຕິພາບ ແລະ ວັດທະນາຖາວອນ ຢູ່ ອາຊີ ແລະ ປະຊາຄົມໂລກ