ບັນດາບັນຫາທີ່ໄດ້ເປັນເອກະພາບລະຫວ່າງຫວຽດນາມ ແລະ ອາເມລິກາໃນຂອບເຂດການຢ້ຽມຢາມອາເມລິກາຢ່າງເປັນທາງການຂອງທ່ານ ເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແຕ່ວັນທີ 6-10/7/2015, ຈະສ້າງທ່ວງທ່າທີ່ສະດວກໃຫ້ທັງ 2 ຝ່າຍເພື່ອພ້ອມກັບບັນດາຝ່າຍທີ່ກ່ຽວຂ້ອງສຳເລັດການເຈລະຈາສັນຍາຄູ່ຮ່ວມມືການຄ້າຂ້າມປາຊີຟິກ TPP.
ການພົບປະລະຫວ່າງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແລະ ປະທານາທິບໍດີອາເມລິກາ Obama |
ສັນຍາ TPP ໄດ້ເລີ່ມປະຕິບັດແຕ່ເດືອນ 3/2010, ໄດ້ຜ່ານເກືອບ 5 ປີແຫ່ງການເຈລະຈາໂດຍມີການເຂົ້າຮ່ວມຂອງ 12 ພື້ນຖານເສດຖະກິດທີ່ຂະຫຍັນຂັ່ນເຄື່ອນຢູ່ພາກພື້ນອາຊີ-ປາຊີຟິກ. ໄລຮອດທ້າຍປີ 2014, ການເຈລະຈາ ສັນຍາ TPP ໄດ້ຜ່ານກອງປະຊຸມ, ການເຈລະຈາຂັ້ນຫົວໜ້າຄະນະ, ລັດຖະມົນຕີ 19 ຄັ້ງ ແລະ ການພົບປະຂັ້ນສູງບາງຄັ້ງ. ບັນດາເນື້ອໃນຄື: ການຮ່ວມມື ແລະ ການສ້າງກຳລັງຄວາມສາມາດ, ວິສາຫະກິດຂະໜາດກາງ ແລະ ນ້ອຍ, ເພື່ອການພັດທະນາ, ພາສີ, ໂທລະຄົມ, ຫຼັກອະນາໄມ, ຄວາມປອດໄພດ້ານສະບຽງອາຫານ ແລະ ການກວດພະຍາດພືດ ໄດ້ຮັບການແກ້ໄຂຢ່າງຮຽບຮ້ອຍ.
ສຳເລັດການເຈລະຈາສັນຍາ TPP ລະຫວ່າງຫວຽດນາມ ແລະ ອາເມລິກາໂດຍໄວ
ການຢ້ຽມຢາມອາເມລິກາຢ່າງເປັນທາງການຂອງທ່ານ ເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ເພີ່ມກຳລັງໜູນເພື່ອການເຈລະຈາສັນຍາຄູ່ຮ່ວມມືການຄ້າຂ້າມປາຊີຟິກ TPP ອາດຈະສິ້ນສຸດລົງໃນທ້າຍປີນີ້ ຄືດັ່ງຄວາມຫວັງຂອງທັງ 2 ຝ່າຍຫວຽດນາມ ແລະ ອາເມລິກາ
ດັ່ງນັ້ນ, ເນື້ອໃນທີ່ກ່ຽວຂ້ອງເຖິງການເຈລະຈາສັນຍາຄູ່ຮ່ວມມືການຄ້າຂ້າມປາຊີຟິກ TPP ແມ່ນໜຶ່ງໃນບັນດາແຜນນະໂຍບາຍທີ່ໄດ້ເຕື້ອງເຖິງຫຼາຍໃນບັນດາການພົບປະລະຫວ່າງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແລະ ປະທານາທິບໍດີອາເມລິກາ Obama, ການນຳບາງອົງການສຳນັກງານ, ປະຊາຄົມວິສາຫະກິດອາເມລິກາ… ທ່ານລັດຖະມົນຕີວ່າການກະຊວງອຸດສາຫະກຳການຄ້າຫວຽດນາມ ວູ້ຮີຮ່ວາງ, ສະມາຊິກໃນຄະນະຕິດຕາມທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄປຢ້ຽມຢາມອາເມລິກາຢ່າງເປັນທາງການ ໃຫ້ຮູ້ວ່າ ຍ້ອນມີຄວາມໝາຍສຳຄັນຂອງຂອງສັນຍາ, ບົນຈິດໃຈກົງໄປກົງມາ ແລະ ສ້າງສັນ, ເຂົ້າອົກເຂົ້າໃຈຊຶ່ງກັນ ແລະ ກັນ, ຫວຽດນາມ ແລະ ອາເມລິກາ ພ້ອມກັນເປັນເອກະພາບໃນຖະແຫຼງການຮ່ວມ ແມ່ນຈະສົມທົບຢ່າງແໜ້ນແຟ້ນກັບບັນດາຝ່າຍທີ່ກ່ຽວຂ້ອງ, ເພື່ອສຳເລັດການເຈລະຈາສັນຍາ TPP ໂດຍໄວ. 2 ຝ່າຍເປັນເອກະພາບກັນ ພ້ອມກັນປະຕິບັດບັນດາການປະຕິຮູບເພື່ອຕອບສະໜອງຄວາມຮຽກຮ້ອງຕ້ອງການສູງ ແລະ ຮອບດ້ານຂອງສັນຍາ TPP. ບັນດາບັນຫາທີ່ໄດ້ເປັນເອກະພາບໃນຄັ້ງນີ້ ຈະສ້າງທ່ວງທ່າສະດວກໃຫ້ 2 ຝ່າຍ ພ້ອມກັບບັນດາຝ່າຍທີ່ກ່ຽວຂ້ອງສຳເລັດການເຈລະຈາສັນຍາ TPP ໂດຍໄວ, ເປີດກາລະໂອກາດຮ່ວມມືໃໝ່ໃນການພົວພັນຫວຽດນາມ ແລະ ອາເມລິກາ.
ການຮ່ວມມືເສດຖະກິດ, ການຄ້າຫວຽດນາມ ແລະ ອາເມລິກາຈະໄດ້ຮັບການເປີດກວ້າງ .
ຖ້າຫາກຫວຽດນາມ ແລະ ອາເມລິກາສຳເລັດການເຈລະຈາສັນຍາ TPP, ສິ່ງທີ່ເຫັນໄດ້ຢ່າງງ່າຍດາຍ, ນັ້ນແມ່ນການພົວພັນດ້ານການຄ້າລະຫວ່າງຫວຽດນາມ ແລະ ອາເມລິກາຈະມີບາດກ້າວພັດທະນາໃໝ່. ທ່ານລັດຖະມົນຕີວ່າການກະຊວງອຸດສາຫະກຳການຄ້າຫວຽດນາມ ວູ້ຮີຮ່ວາງ ໃຫ້ຮູ້ວ່າ ໃນຈຸດເວລາທ້າຍປີ 2014, ວົງເງິນການຄ້າຫວຽດນາມ-ອາເມລິກາບັນລຸກ່ວາ 36 ຕື້ USD . ອາເມລິກາໃນປະຈຸບັນ, ຢືນອັນດັບທີ 7 ໃນຈຳນວນບັນດາປະເທດ ແລະ ເຂດແຄ້ວນທີ່ລົງທຶນເຂົ້າຫວຽດນາມໂດຍກົງ. ສັນຍາ TPP ພ້ອມກັບບັນດາສັນຍາ 2 ຝ່າຍລະຫວ່າງຫວຽດນາມ-ອາເມລິກາ ຈະສ້າງບັນດາເງື່ອນໄຂສະດວກຕື່ມອີກໃຫ້ແກ່ການ ພົວພັນຮ່ວມມືດ້ານເສດຖະກິດ, ການຄ້າລະຫວ່າງ 2 ປະເທດມີຂອບຂະໜາດໃຫຍ່ກວ່າ ແລະ ມີຄຸນນະພາບດີກວ່າ.
ທ່ານລັດຖະມົນຕີວ່າການກະຊວງອຸດສາຫະກຳການຄ້າຫວຽດນາມ ວູ້ຮີຮ່ວາງ ມີຄວາມປາດຖະໜາຢ່າງຍິ່ງວ່າ ພາຍຫຼັງການຢ້ຽມຢາມອາເມລິກາຢ່າງເປັນທາງການຂອງທ່ານ ເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ, ຫວຽດນາມຈະມີຫຼາຍມາດຕະການສົ່ງເສີມຊຸກຍູ້ການຮ່ວມມືລະຫວ່າງຫວຽດນາມ ແລະ ອາເມລິກາ. ພ້ອມກັບສັນຍາ TPP, ແນ່ນອນວ່າ ການພົວພັນຮ່ວມມືທາງດ້ານເສດຖະກິດ, ການຄ້າ, ການລົງທຶນລະຫວ່າງຫວຽດນາມ ແລະ ອາເມລິກາຈະຮັບການເປີດກ້ວາງ.
ການເຊື່ອມໂຍງດ້ານເສດຖະກິດການຄ້າກັບປະເທດອື່ນໆ
ແຕ່ເດືອນ 1/2015 ມາຮອດປະຈຸບັນ, ບັນດາປະເທດທີ່ເຂົ້າຮ່ວມການເຈລະຈາສັນຍາ TPP ພວມຮີບຮ້ອນກຳນົດທິດແກ້ໄຂບັນດາບັນຫາທີ່ສຳຄັນ, ໂດຍມີການເຂົ້າຮ່ວມຂອງບັນດາລັດຖະມົນຕີ, ສ້າງປະຖົມປັດໄຈໃຫ້ແກ່ການສຳເລັດການເຈລະຈາໃນປີນີ້. ວິວັດທະນາການເຈລະຈາສິ້ນສຸດລົງໃນປີນີ້ ແລະ ສັນຍາ TPP ທີ່ຮັບການລົງນາມ, ຈະສົ່ງຜົນກະທົບຕັ້ງໜ໊າເຖິງຫຼາຍຂົງເຂດຂອງຫວຽດນາມ, ພິເສດແມ່ນດ້ານການຄ້າ. ສັນຍາ TPP ຈະຊ່ວຍການສົ່ງອອກຂອງຫວຽດນາມເຕີບໂຕສູງ, ຫວຽດນາມຈະສ້າງໂຄງປະກອບຕະຫຼາດຄືນໃໝ່ເພື່ອດຸນດ່ຽງການພົວພັນດ້ານການຄ້າກັບຕະຫຼາດອື່ນໆ.
ອາເມລິກາ ແມ່ນຄູ່ຮ່ວມມືສຳຄັນໃນ TPP. ດັ່ງນັ້ນ, ເລື່ອງຫວຽດນາມ ສຳເລັດການເຈລະຈາສັນຍາ TPP ກັບ ອາເມລິກາ, ຈະເປີດບັນດາກາລະໂອກາດຮ່ວມມື ບໍ່ພຽງແຕ່ລະຫວ່າງ 2 ປະເທດເທົ່ານັ້ນ, ຫາກຍັງຊ່ວຍTPP ໄປສູ່ໄລຍະສຸດທ້າຍ, ທັງເປັນການເປີດແງ່ຫວັງໃໝ່ໃນການເຊື່ອມໂຍງເຂົ້າກັບເສດຖະກິດທົ່ວໂລກຂອງຫວຽດນາມ.