(vovworld)- ທ່ານນາຍົກລັດຖະມົນຕີ ແຫ່ງລາຊະອານາຈັກ ໂຮນລັງ Mark Rutte ພວມຢ້ຽມຢາມຫວຽດນາມ ຢ່າງເປັນທາງການ ຕາມຄຳເຊີນຂອງນາຍົກລັດຖະມົນຕີ ຫວຽດນາມ ຫງວຽນເຕີນຢູງ ແນໃສ່ຮັດແຫນ້ນສາຍພົວພັນຮ່ວມມືມິດຕະພາບ ລະຫວ່າງຫວຽດນາມ ແລະ ໂຮນລັງ.
ທ່ານນາຍົກລັດຖະມົນຕີ ໂຮນລັງ Mark Rutte ແລະ ທ່ານນາຍົກ
ລັດຖະມົນຕີ ຫວຽດນາມ ຫງວຽນເຕີນຢູງ
ພາບ:TTXVN
|
ການພົວພັນດ້ານການທູດຢ່າງເປັນທາງການລະຫວ່າງຫວຽດນາມ ແລະ ໂຮນລັງ ໄດ້ຮັບການສ້າງຕັ້ງຂຶ້ນກ່ອນນີ້ 41 ປີ, ແຕ່ການພົວພັນດ້ານການຄ້າລະຫວ່າງ 2 ປະເທດແມ່ນດຳເນີນໃນຫລາຍປີກ່ອນນັ້ນ. ປີ 1633, ກຳປັ່ນ ລຳທຳອິດຂອງໂຮນລັງ ໄດ້ເດີນທາງມາຫວຽດນາມ ເພ່ືອຊື້ເຂົ້າສານ, ແພໄຫມ, ເຄື່ອງປັ້ນດິນເຜົາ.. ເລີ່ມຕົ້ນການພົວພັນດ້ານການຄ້າລະຫວ່າງສອງປະເທດ. ມາຮອດປະຈຸບັນ, ການພົວພັນລະຫວ່າງ ຫວຽດນາມ ແລະ ໂຮນລັງ ໄດ້ຜ່ານຫລາຍໄລຍະແຫ່ງການພັດທະນາ ແລະ ຢູ່ໃນຫລາຍຂົງເຂດ. ຄຽງຄູ່ກັນນັ້ນ ບັນດາການຢ້ຽມຢາມຂັ້ນສູງ ແລະ ເປັນປະຈຳ ລະຫວ່າງໂຮນລັງ ແລະ ຫວຽດນາມ ແມ່ນຢັ້ງຢືນກ່ຽວກັບການພົວພັນສອງຝ່າຍອັນດີງາມ ລະຫວ່າງສອງປະເທດ. ປີ 2011, ອົງມົງກຸດລາຊະກຸມມານ ແລະ ລາຊະທິດາ Maxima ມາຢ້ຽມຢາມຫວຽດນາມ ແລະ ທ່ານນາຍົກລັດຖະມົນຕີ ຫງວຽນເຕີນຢູງ ກໍໄດ້ໄປຢ້ຽມຢາມ ໂຮນລັງ. ໃນໂອກາດສະເຫລີມສະຫລອງ 40 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງ ຫວຽດນາມ ແລະ ໂຮນລັງ ກໍໄດ້ຈັດການເຄື່ອນໄຫວຫລາຍຢ່າງ ຢູ່ ໂຮນລັງ ແລະ ຫວຽດນາມ ໃນປີ 2013.
ການຮ່ວມມືດ້ານເສດຖະກິດ ແລະ ຄູ່ຮ່ວມມືໃນຂົງເຂດຮັບມືກັບການປ່ຽນແປງຂອງດິນຟ້າອາກາດ
ກ່ຽວກັບການຮ່ວມມືດ້ານເສດຖະກິດ, ວົງເງິນການຄ້າລະຫວ່າງ ຫວຽດນາມ ແລະ ໂຮນລັງ ພັດທະນາຢ່າງບໍ່ຢຸດຢັ້ງ ແລະ ເພີ່ມຂຶ້ນໃນແຕ່ລະປີ, ໃນນັ້ນ ຍາມໃດຫວຽດນາມ ກໍສົ່ງອອກເກີນດຸນ. ປະຈຸບັນ, ໂຮນລັງແມ່ນຕະຫລາດສົ່ງອອກໃຫຍ່ແຫ່ງທີ 3 ຂອງຫວຽດນາມ ຢູ່ ເອີລົບ. ປີ 2013, ວົງເງິນແລກປ່ຽນດ້ານການຄ້າ ສອງສົ້ນ ລະຫວ່າງ ຫວຽດນາມ ແລະ ໂຮນລັງ ບັນລຸ 3,6 ຕື້ USD. ໄລ່ຮອດປີ 2013, ໂຮນລັງ ຖືກຈັດອັນດັບທີ 11 ໃນຈຳນວນ 96 ປະເທດ ແລະ ເຂດແຄ້ວນລົງທຶນເຂົ້າຫວຽດນາມ, ດ້ວຍ ຈຳນວນເງິນ 6,29 ຕື້ USD ແລະ 192 ໂຄງການ. ມີບາງໂຄງການຈຸດສຸມຂອງ ໂຮນລັງ ຢູ່ ຫວຽດນາມ ນັ້ນແມ່ນ ໂຮງງານໄຟຟ້າ ມົງເຢືອງ ລວມມູນຄ່າ 2,1 ຕື້ USD, ໂຮງງານໄຟຟ້າ ຟູໝີ 3 ລວມມູນຄ່າ 410 ລ້ານ USD.
ໃນຊຸມປີຜ່ານມາ, ຫວຽດນາມ ໄດ້ກາຍເປັນຄູ່ຮ່ວມມືສຳຄັນຂອງໂຮນລັງ. ດ້ວຍຈຸດຄ້າຍຄືກັນຫຼາຍຢ່າງ, ສອງປະເທດກາຍເປັນຄູ່ຮ່ວມມື ແລະ ເພື່ອນມິດໃນຫຼາຍຂົງເຂດ. ກ່ອນອື່ນໝົດ, ສອງປະເທດລ້ວນແຕ່ມີເຂດທົ່ງພຽງອັນກ້ວາງໃຫ່ຍ ແລະ ຕ້ອງປະເຊີນໜ້າກັບການປ່ຽນແປງຂອງດິນຟ້າອາກາດຍ້ອນນ້ຳທະເລຂຶ້ນສູງ ແລະ ປະລິມານນ້ຳຝົນຫຼາຍ. ທີສອງແມ່ນ, ຍ້ອນວ່າລ້ວນແຕ່ແມ່ນບັນດາປະເທດແຄມທະເລມີທີ່ຕັ້ງຍຸດທະສາດໃນພາກພື້ນ, ສອງປະເທດໄດ້ກາຍເປັນຄູ່ຮ່ວມມືໃນບັນດາບັນຫາການເດີນທະເລ, ຂົນສົ່ງ ແລະ ພະລາທິການ. ໂຮງລັງ ແລະ ຫວຽດນາມ ແມ່ນຄູ່ຮ່ວມມືຍຸດທະສາດໃນການຄຸ້ມຄອງຊັບພະຍາກອນນ້ຳ ແລະ ຮັບມືກັບການປ່ຽນແປງຂອງດິນຟ້າອາກາດ. ການຮ່ວມມືນີ້ໄດ້ຮັບຢັ້ງຢືນໃນສັນຍາຄູ່ຮ່ວມມືຍຸດທະສາດ (SPA) ລະຫວ່າງສອງປະເທດ ໂດຍທ່ານນາຍົກລັດຖະມົນຕີຫວຽດນາມ ຫງວຽນເຕິນຢູງ ແລະ ອະດີດນາຍົກລັດຖະມົນຕີ Jan Peter Balkenendein ລົງນາມເມື່ອເດື່ອນ 10/2010. ກອງປະຊຸມຄະນະກຳມະການລະຫວ່າງລັດຖະບານຄັ້ງຕ່າງໆກ່ຽວກັບບັນຫານີ້ໄດ້ຖືກຈັດຂຶ້ນເປັນປະຈຳປີເພື່ອຜັນຂະຫຍາຍແຜນການເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ, ສ້າງຍຸດທະສາດການພັດທະນາເຂດນີ້ເພື່ອກາຍເປັນເຂດເສດຖະກິດພັດທະນາ ແລະ ປອດໄພໃຫ້ແກ່ລຸ້ນຫຼັງ. ການຮ່ວມມືໃນຂົງເຂດການປ່ຽນແປງຂອງດິນຟ້າອາກາດ ໄດ້ສະແດງອອກຜ່ານເລື່ອງນະຄອນ Rotterdam ແລະ ນະຄອນໂຮ່ຈິມິນ ໄດ້ຮ່ວມມືກັນໃນໂຄງການ “ນະຄອນໂຮ່ຈິມິນ ມຸ່ງໄປສູ່ທະເລ“. ນອກຈາກນັ້ນແລ້ວ, ໂຄງການ “ການບໍລິການນ້ຳ ແລະ ດິນຟ້າອາກາດສຳລັບການຄຸ້ມຄອງນ້ຳຂ້ຜ່ານຊາຍແດນ“ ຂອງ 30 ອົງການຈັດຕັ້ງຂອງໂຮນລັງ ກັບບັນດາຄູ່ຮ່ວມມືຫວຽດນາມ ກ່ຽວກັບການນຳໃຊ້ຂໍ້ມູນຂ່າວສານດາວທຽມໃຫ້ແກ່ການຄຸ້ມຄອງນ້ຳກໍ່ພວມໄດ້ຮັບການຜັນຂະຫຍາຍປະຕິບັດ.
ການຮ່ວມມືດ້ານການສືກສາ, ສາທາລະນະສຸກ ເພື່ອຮັບປະກັນຊີວິດສັງຄົມ
ການສຶກສາມະຫາວິທະຍາໄລແມ່ນສວມບົດບາດສຳຄັນໃນການຮ່ວມມື 2 ຝ່າຍລະຫວ່າງຫວຽດນາມ - ໂຮນລັງ. ແຕ່ກາງປີ 1970, ໂຮນລັງ ໄດ້ສະໜອງບັນດາໂຄງການທຶນສຶກສາໃຫ້ແກ່ຫວຽດນາມ, ຜ່ານບັນດາໂຄງການທຶນສຶກສາໂຮນລັງ (NFP). ຜ່ານຂໍ້ລິເລີ່ມໂຮນລັງ ກ່ຽວກັບການຮ່ວມມືໃນການສຶກສາມະຫາວິທະຍາໄລ (NICHE), ຈຳນວນກວ່າ 10 ລ້ານ ເອີໂຣ ໄດ້ຮັບການລົງທຶນ ເພື່ອແນໃສ່ເພີ່ມທະວີການສຶກສາຫຼັງມັດທະຍົມຕອນປາຍຂອງຫວຽດນາມ. ໂຄງການໄດ້ສຸມໃສ່ເຂົ້າໃນບັນດາຂົງເຂດສຶກສາມະຫາວິທະຍາໄລຂອງຫວຽດນາມ, ຊື່ງແມ່ນສະຖານທີ່ມີຄວາມຕ້ອງການກ່ຽວກັບດ້ານວິຊາສະເພາະຂອງໂຮນລັງ ຢ່າງໃຫຍ່ຫຼວງຄື: ກະສິກຳ, ຄຸ້ມຄອງແຫຼ່ງນ້ຳສັງລວມ, ການປ່ຽນແປງຂອງດິນຟ້າອາກາດ ແລະ ການສອນວິສາຊີບໃຫ້ການສຶກສາຂັ້ນສູງກວ່າ. ໂຮນລັງແມ່ນໜຶ່ງໃນບັນດານັກອຸປະຖຳ 2 ຝ່າຍໃນການຊ່ວຍເຫຼືອຫວຽດນາມ ຕ້ານພະຍາດວັນລະໂລກ ແລະ HIV/AIDS ຢ່າງຕັ້ງໜ້າ. ຄະນະກຳມະການສາທາລະນະສຸກໂຮນລັງ - ຫວຽດນາມ (MCNV) ໄດ້ເຄື່ອນໄຫວຢູ່ຫວຽດນາມ ເປັນເວລາ 45 ປີ, ເຊິ່ງແມ່ນຕົວຢາງທີ່ຈະແຈ້ງກ່ຽວກັບການຮ່ວມມືໃນຂົງເຂດສາທາລະນະສຸກລະຫວ່າງ 2 ປະເທດ.
ເລີ່ມແຕ່ການພົວພັນຄ້າຂາຍໃນປະຫວັດສາດ, ມາຮອດປະຈຸບັນ ການພົວພັນລະຫວ່າງຫວຽດນາມ - ໂຮນລັງ ບັນລຸໄດ້ບັນດາໝາກຜົນອັນດີງາມ. ການຢ້ຽມຢາມຫວຽດນາມ ຂອງທ່ານນາຍົກລັດຖະມົນຕີໂຮນລັງ ຄັ້ງນີ້ ໄດ້ຮັບຖືວ່າເປັນຂີດໝາຍເປີດສັງກາດໃໝ່ໃນການພົວພັນຮ່ວມມືມິດຕະພາບລະຫວ່າງຫວຽດນາມ - ໂຮນລັງ.