ທ່ານນາຍົກລັດຖະມົນຕີ ຫວຽດນາມ Nguyen Tan Dung (ພາບ:TTXVN)
|
vovworld- ໂດຍຮັບຄຳເຊີນຈາກລັດຖະບານແຫ່ງ ສ.ປ.ຊ ຈີນ ແລະ ອຳນາດການປົກຄອງເຂດປົກຄອງດ້ວຍຕົນເອງຊົນເຜົ່າຈວາງແຂວງກວາງສີແຫ່ງປະເທດຈີນ, ວັນທີ 20/9, ທ່ານນາຍົກລັດຖະມົນຕີ ຫວຽດນາມ Nguyen Tan Dung ໄດ້ໄປເຂົ້າຮ່ວມງານຕະຫຼາດນັດອາຊຽນ-ຈີນ ແລະ ກອງປະຊຸມສຸດຍອດ ການລົງທຶນ, ການຄ້າອາຊຽນ-ຈີນຄັ້ງທີ່ 9 ທີ່ຈັດຂຶ້ນຢູ່ໜານໜິງແຂວງກວາງສີແຫ່ງປະເທດຈີນ. ການເຂົ້າຮ່ວມຂອງ ທ່ານນາຍົກລັດຖະມົນຕີຫວຽດນາມ Nguyen Tan Dung ໃນບັນດາເຫດການນີ້ ແມ່ນເພື່ອແນໃສ່ເພີ່ມທະວີການພົວພັນຄູ່ຮ່ວມມືຍຸດທະສາດ ອາຊຽນ-ຈີນ, ຊຸກຍູ້ການສ້າງຕັ້ງເຂດການຄ້າເສລີ ອາຊຽນ-ຈີນ, ພ້ອມທັງໜູນຊ່ວຍບັນດາວິສາຫະກິດຫວຽດນາມໄດ້ຊອກຫາ ແລະ ເປີດກ້ວາງກາລະໂອກາດດຳເນີນທຸລະກິດຢູ່ຕະຫຼາດຈີນ, ເພີ່ມທະວີການພົວພັນຮ່ວມມືກັບບັນດາທ້ອງຖິ່ນເຂດຊາຍແດນຂອງຈີນ, ເປັນຕົ້ນແມ່ນທາງດ້ານເສດຖະກິດ, ການຄ້າ ແລະ ການລົງທຶນກັບ ແຂວງກວາງສີ.
ງານຕະຫຼາດນັດອາຊຽນ-ຈີນ ແລະ ກອງປະຊຸມສຸດຍອດການລົງທຶນ, ການຄ້າອາຊຽນ-ຈີນແມ່ນການເຄື່ອນໄຫວປະຈຳປີໂດຍກະຊວງການຄ້າຈີນ ແລະ 10 ປະເທດອາຊຽນຮ່ວມກັນຈັດຂຶ້ນຢູ່ໜານໜິງແຂວງກວາງສີແຫ່ງປະເທດຈີນ. ບໍ່ແມ່ນເລື່ອງບັງເອີນທີ່ງານຕະຫຼາດນັດນີ້ໄດ້ຮັບການເລືອກເຟັ້ນແມ່ນໜຶ່ງໃນ 10 ງານຕະຫຼາດນັດ-ການວາງສະແດງອັນດັບໜຶ່ງຂອງຈີນ, ຫາກຍ້ອນບົດບາດທີ່ນັບມື້ນັບພົນເດັ່ນ ແລະ ເປັນຈຸດນັດພົບຊຶ່ງບໍ່ພຽງແຕ່ສຳລັບວິສາຫະກິດຈີນ ແລະ ບັນດາປະເທດອາຊຽນເທົ່ານັ້ນ, ຫາກຍັງສຳລັບບັນດາຄູ່ຮ່ວມມືຢູ່ນອກພາກພື້ນອີກດ້ວຍ. ງານຕະຫຼາດນັດສາມາດຢັ້ງຢືນໄດ້ຄວາມສຳຄັນຂອງຕົນ. ພ້ອມກັນນັ້ນ, ກອງປະຊຸມສຸດຍອດການ ລົງທຶນ, ການຄ້າອາຊຽນ-ຈີນໄດ້ເປີດເວທີປາໄສສົນທະນາຂັ້ນສູງທີ່ສຳຄັນລະຫວ່າງ ອາຊຽນ-ຈີນ ແນໃສ່ເພີ່ມທະວີການພົວພັນຄູ່ຮ່ວມມືຍຸດທະສາດ ອາຊຽນ-ຈີນ, ຊຸກຍູ້ການສ້າງຕັ້ງເຂດການຄ້າເສລີ ອາຊຽນ-ຈີນ ກໍຄືເຮັດໃຫ້ການພົວພັນຮ່ວມມືທາງດ້ານເສດຖະກິດ, ການຄ້າຢູ່ພາຍໃນພາກພື້ນເລິກເຊິ່ງຂຶ້ນຕື່ມ.
ໂດຍຖືກດຳເນີນໃນສະພາວະທີ່ ອາຊຽນ ແລະ ຈີນພວມຈັດຕັ້ງສະເຫຼີມສະຫຼອງ 21 ປີແຫ່ງວັນສ້າງຕັ້ງການພົວພັນຄູ່ເຈລະຈາ, ງານຕະຫຼາດນັດອາຊຽນ-ຈີນ ແລະ ກອງປະຊຸມສຸດຍອດການ ລົງທຶນ, ການຄ້າອາຊຽນ-ຈີນຄັ້ງນີ້ ສືບຕໍ່ໄດ້ຮັບຄວາມຫວັງວ່າຈະມີບາດກ້າວຂະຫຍາຍຕົວໃໝ່. ຜ່ານການຈັດຕັ້ງ 8 ຄັ້ງ, ມາຮອດປະຈຸບັນ, ຍອດມຸນຄ່າແລກປ່ຽນການຄ້າຢູ່ທີ່ ງານຕະຫຼາດນັດອາຊຽນ-ຈີນ ໄດ້ບັນລຸກ່ວາ 12 ຕື້ USD . ປະຈຸບັນວົງເງິນການຄ້າ ອາຊຽນ-ຈີນ ໄດ້ເພີ່ມຂຶ້ນ 37 ເທົ່າ, ບັນລຸກ່ວາ 360 ຕື້ USD ກາຍເປັນໜຶ່ງໃນຈຳນວນຄູ່ຄ້າລາຍໃຫຍ່ກ່ວາໝູ່ຂອງກັນ. ທີ່ກອງປະຊຸມສຸດຍອດອາຊຽນ-ຈີນປີກາຍນີ້, 2 ຝ່າຍໄດ້ຮັບຮອງເອົາແຜນການ 5 ປີ ຄັ້ງທີ່ 2 , ແຜນກຳນົດຮ່ວມມື 5 ປີ ( 2011-2015 ) , ຕາມນັ້ນແລ້ວ, 2 ຝ່າຍໄດ້ວາງຈຸດໝາຍຮອດປີ 2015, ຈະຍົກວົງເງິນການຄ້າ 2 ຝ່າຍບັນລຸ 500 ຕື້ USD . ທ່ານເຮື້ອໜິງໜິງ ຮອງເລຂາທິການໃຫຍ່ສະພາການຄ້າ ອາຊຽນ-ຈີນ, ຜູ້ຊ່ຽວຊານອັນດັບໜຶ່ງກ່ຽວກັບເສດຖະກິດການຄ້າກັບ ອາຊຽນຂອງ ຈີນໃຫ້ຮູ້ວ່າ :
“ ໃນສະພາບການທີ່ຈີນພວມປະຕິບັດແຜນການ 5 ປີ ຄັ້ງທີ່ 12, ບັນດາປະເທດອາຊຽນຍູ້ໄວການສ້າງປະຊາຄົມອາຊຽນ, ພວກເຮົາມີກາລະໂອກາດຫຼາຍຢ່າງເພື່ອເພີ່ມທະວີການຮ່ວມມື ແລະ ທຳມາຄ້າຂາຍ. ພິເສດແມ່ນການສ້າງເຂດການຄ້າ ເສລີ (FTA) ຈີນ - ອາຊຽນ ດ້ວຍສິນຄ້າຫຼາຍປະເພດທີ່ມີອັດຕາພາສີ 0%. ສິ່ງນີ້ເປັນການສ້າງເງື່ອນໄຂສະດວກເພື່ອໃຫ້ 2 ຝ່າຍພັດທະນາຢ່າງແຂງແຮງໃນ 20 ປີທີ່ຈະມາເຖິງ. ຂ້າພະເຈົ້າເຊື່ອໝັ້ນວ່າ ການຮ່ວມມື ຈີນ-ອາຊຽນນັບມື້ນັບກ້າວເຂົ້າສູ່ໄລຍະໃໝ່ ”
ສຳລັບຫວຽດນາມເວົ້າສະເພາະ, ການເຂົ້າຮ່ວມ ງານຕະຫຼາດນັດຄັ້ງນີ້ ໄດ້ນຳມາເຊິ່ງຄຸນຄ່າຫຼາຍຢ່າງ. ກ່ອນອື່ນໝົດ, ກ່ຽວກັບດ້ານພູມິສາດ, ກວາງສີແມ່ນທ້ອງຖິ່ນຂອງຈີນທີ່ມີຊາຍແດນທາງບົກຕິດກັບ 4 ແຂວງຊາຍແດນພາກເໜືອຫວຽດນາມ. ປີ 2011, ໄລ່ສະເພາະວົງເງິນຂາອອກຂາເຂົ້າລະຫວ່າງຫວຽດນາມ ແລະ ແຂວງກວາງສີ ໄດ້ບັນລຸ 7 ຕື້ USD (ເພີ່ມຂຶ້ນ 50% ເມື່ອທຽບໃສ່ປີ 2010) 8 ເດືອນຕົ້ນປີ 2012, ວົງເງິນຂາອອກຂາເຂົ້າລະຫວ່າງຫວຽດນາມ ແລະ ແຂວງກວາງສີ ໄດ້ບັນລຸກ່ວາ 3,2 ຕື້ USD, ເພີ່ມຂຶ້ນ 22,7% ເມື່ອທຽບໃສ່ໄລຍະດຽວກັນຂອງປີກາຍ. ໃນຂະນະນັ້ນ, ການພົວພັນທາງດ້ານການຄ້າລະຫວ່າງ ຈີນ - ຫວຽດນາມ ໃນຊຸມປີມໍ່ໆມານີ້ໄດ້ພັດທະນາຢ່າງວ່ອງໄວທີ່ສຸດ. ໂດຍແມ່ນປະເທດສະມາຊິກທີ່ຕັ້ງໜ້າຂອງອາຊຽນ, ຫວຽດນາມຍາມໃດກໍມານະພະຍາຍາມຊຸກຍູ້ການຮ່ວມມືລະຫວ່າງ ອາຊຽນ-ຈີນ, ຊຶ່ງປະກົດການທີ່ມີຊີວິດຊີວາທີ່ສຸດ ແມ່ນຫວຽດນາມໄດ້ເຮັດສຳເລັດບົດບາດແມ່ນປະເທດຄູ່ເຈລະຈາລະຫວ່າງ ອາຊຽນ -ຈີນໃນປີ 2011. ທັດສະນະທີ່ສະເໝີຕົ້ນສະເໝີປາຍຂອງຫວຽດນາມ ແມ່ນເພີ່ມທະວີຊຸກຍູ້ການຮ່ວມມືເພື່ອບໍ່ພຽງແຕ່ນຳມາເຊິ່ງຜົນປະໂຫຍດໃຫ້ບັນດາຝ່າຍເທົ່ານັ້ນ, ຫາກຍັງເພື່ອຄວາມວັດທະນາຖາວອນລວມຂອງພາກພື້ນອີກດ້ວຍ. ໃນບົດກ່າວປາໄສທີ່ກອງປະຊຸມບັນດາອົງການມິດຕະພາບປະຊາຊົນ ອາຊຽນ-ຈີນເມື່ອມໍ່ໆມານີ້, ທ່ານຮອງນາຍົກລັດຖະມົນຕີ ຫວຽດນາມ Nguyen Thien Nhan ໄດ້ຢືນຢັນວ່າ :
“ ອາດຈະຢືນຢັນວ່າການພົວພັນ ອາຊຽນ-ຈີນ ແມ່ນໜຶ່ງໃນບັນດາສາຍພົວພັນທີ່ຂະຫຍັນຂັ່ນເຄື່ອນ ແລະ ມີປະສິດທິຜົນລະຫວ່າງອາຊຽນ ແລະ ບັນດາຄູ່ຮ່ວມມືຫວຽດນາມສືບຕໍ່ມານະພະຍາຍາມພ້ອມກັບບັນດາປະເທດອາຊຽນ ແລະ ຈີນຊຸກຍູ້ການພົວພັນ 2 ຝ່າຍໃຫ້ພັດທະນາຢ່າງແຂງແຮງໃນທຸກໆຂົງເຂດ. ໂດຍແມ່ນ 2 ປະເທດບ້ານໃກ້ເຮືອນຄຽງທີ່ໃກ້ຊິດສະໜິດສະໜົມ, ໃນ 2 ທົດສະວັດທີ່ຜ່ານມາ, ການພົວພັນຫວຽດນາມ-ຈີນ ໄດ້ ແລະ ພວມມີບັນດາບາດກ້າວພັດທະນາທີ່ສຳຄັນ. ຫວຽດນາມຢືນຢັນວ່າ ຍາມໃດກໍໃຫ້ບຸລິມາະສິດຢ່າງສູງໃຫ້ແກ່ການພັດທະນາການພົວພັນຄູ່ຮ່ວມມືຍຸດທະສາດຫວຽດນາມ - ຈີນ ”
ບົນພື້ນຖານການພົວພັນມິດຕະພາບທີ່ດີງາມນັ້ນ, ການເຂົ້າຮ່ວມງານຕະຫຼາດ ນັດອາຊຽນ-ຈີນ ແລະ ກອງປະຊຸມສຸດຍອດການລົງທຶນ, ການຄ້າອາຊຽນ-ຈີນຄັ້ງນີ້ຂອງ ທ່ານນາຍົກລັດຖະມົນຕີຫວຽດນາມ Nguyen Tan Dung ກໍແມ່ນເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງ, ຢືນຢັນຢ່າງຈະແຈ້ງກ່ຽວກັບແຜນນະໂຍບາຍຂອງພັກ, ລັດຫວຽດນາມ ແມ່ນຖືເປັນສຳຄັນທີ່ສຸດການພັດທະນາການພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານກັບຈີນ. ພ້ອມກັນນັ້ນ, ກໍໜູນຊ່ວຍບັນດາວິສາຫະກິດຫວຽດນາມໄດ້ຊອກຫາ ແລະ ເປີດກ້ວາງກາລະໂອກາດດຳເນີນທຸລະກິດຢູ່ຕະຫຼາດຈີນ, ເພີ່ມທະວີການພົວພັນຮ່ວມມືກັບບັນດາທ້ອງຖິ່ນເຂດຊາຍແດນຂອງຈີນ, ເປັນຕົ້ນແມ່ນທາງດ້ານເສດຖະກິດ, ການຄ້າ ແລະ ການລົງທຶນກັບແຂວງກວາງສີ. ດ້ວຍສານທີ່ຕັ້ງໜ້າດັ່ງກ່າວ, ການຢ້ຽມຢາມ ແລະ ເຮັດວຽກຂອງທ່ານນາຍົກລັດຖະມົນຕີຫວຽດນາມ Nguyen Tan Dung ຈະບັນລຸໝາກຜົນທີ່ດີງາມ, ຊຸກຍູ້ການພົວພັນຮ່ວມມືຫຼາຍດ້ານລະຫວ່າງຫວຽດນາມ-ຈີນ ໃຫ້ດີຍິ່ງໆຂຶ້ນ.