ທ່ານນາຍົກລັດຖະມົນຕີຫວຽດນາມ Nguyen Tan Dung ເຂົ້າຮ່ວມ WEF ອາຊີຕາເວັນອອກ 2010 ດ້ວຍຫົວຂໍ້ “ ຍົກສູງບົດບາດຂອງອາຊີ ”
(ພາບ:internet)
|
ໃນລະຫວ່າງວັນທີ 31/5 ຫາ 1/6, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ ນຳໜ້າຄະນະຜູ້ແທນຫວຽດນາມເຂົ້າຮ່ວມກອງປະຊຸມເວທີປາໄສເສດຖະກິດໂລກອາຊີຕາເວັນອອກປີ 2012 (WEF ອາຊີຕາເວັນອອກ 2012) ຢູ່ບາງກອກປະເທດໄທ ຕາມຄຳເຊີນຂອງທ່ານນາງ ຍິງຣັກ ຊິນນະວັດ ນາຍົກລັດຖະມົນຕີແຫ່ງລາຊະອານາຈັກໄທ ແລະ ປະທານ ເວທີປາໄສເສດຖະກິດໂລກ Klaus Schwab. ການເຂົ້າຮ່ວມຢ່າງຕັ້ງໜ້າຂອງຫວຽດນາມເຂົ້າໃນ ເວທີປາໄສເສດຖະກິດພາກພື້ນຄັ້ງນີ້ ຈະເປັນການປະກອບສ່ວນຍົກສູງທີ່ຕັ້ງບົດບາດຂອງຫວຽດນາມ ແລະ ຊຸກຍູ້ການພົວພັນຮ່ວມມືລະຫວ່າງ ຫວຽດນາມ - WEF.
ໃນສະພາບພື້ນຖານເສດຖະກິດໂລກມີສັນຍານຟື້ນຕົວຄືນ, ການເຕີບໂຕບັນລຸລະດັບທີ່ໜ້າຊື່ນຊົມກວ່າເມື່ອທຽບໃສ່ປີ 2011 ແຕ່ວິກິດການເສດຖະກິດທົ່ວໂລກຍັງຄົງມີການຜັນແປຢ່າງສັບສົນ, ທະວີບເອີລົບ ຊຶ່ງໃນນັ້ນຈຸດສຸມແມ່ນພາກພື້ນໃຊ້ກະກຸນເງິນເອີໂຣລວມ ພວມມີການຫັນປ່ຽນທີ່ຍາກຈະຄາດຄະເນໄດ້ລວງໜ້າ. ເວທີປາໄສເສດຖະກິດໂລກອາຊີຕາເວັນອອກປີ 2012 ໄດ້ດຶງດູດຄວາມສົນໃຈຢ່າງໃຫຍ່ຫຼວງຈາກປະຊາຄົມໂລກ ແລະ ພາກພື້ນ. ຫົວຂໍ້ຂອງກອງປະຊຸມປີນີ້ແມ່ນ “ ສ້າງອະນາຄົດໃຫ້ແກ່ພາກພື້ນຜ່ານການເຊື່ອມຕໍ່ກັນ ”. ກອງປະຊຸມຄາດຄະເນວ່າ ສຸມໃສ່ປຶກສາຫາລື 3 ເນື້ອໃນຕົ້ນຕໍ່ຄື: ບົດບາດຂອງບັນດາພື້ນຖານເສດຖະກິດເຕີບໂຕສູງຂອງອາຊຽນ ໃນການສ້າງຄວາມດຸນດຽງກ່ຽວກັບແງ່ຫວັງເສດຖະກິດທົ່ວໂລກ ແລະ ພາກພື້ນຄືນໃໝ່; ບົດບາດຂອງບັນດາລັດຖະບານ ແລະ ອົງການຈັດຕັ້ງໃນການນຳສະເໜີ, ຜັນຂະຫຍາຍບັນດານະໂຍບາຍການເງິນຢ່າງມີປະສິດທິຜົນ ແນໃສ່ຄວບຄຸມໄພເງິນເຟີ້, ທຶນໝູນວຽນ, ການເໜັງຕີງຂອງລາຄາສິນຄ້າ ແລະ ການເຕີບໂຕແບບດຸ່ນດ່ຽງ; ການນຳໃຊ້ທ່າໄດ້ປຽບດ້ານປະຊາກອນ ແລະ ເຕັກໂນໂລຢີໃນພາກພື້ນເພື່ອພັດທະນາບັນດາຮູບແບບການເຕີບໂຕໂດຍຜ່ານການປ່ຽນແປງໃໝ່, ປັບປຸງກົນໄກປຸກລະດົມຖັນແຖວຜູ້ມີຄວາມເກັ່ງກ້າສາມາດ, ມີຈິດໃຈດຳເນີນທຸລະກິດ ແລະ ກໍ່ສ້າງດ້ານເຕັກນິກ.
ເວທີປາໄສເສດຖະກິດໂລກ WEF ເປັນທີ່ຮູ້ຈັກກັນດີວ່າ ແມ່ນໜຶ່ງໃນບັນດາ ເວທີປາໄສທົ່ວໂລກທີ່ມີອິດທິພົນຊື່ສຽງ ແລະ ເຄື່ອນໄຫວຢ່າງມີປະສິດທິຜົນ, ດຶງດູດຄວາມສົນໃຈ ແລະ ການເຂົ້າຮ່ວມຂອງການນຳບັນດາປະເທດມະຫາອຳນາດ, ບັນດາອົງການຈັດຕັ້ງສາກົນ ກໍຄືບັນດາບໍລິສັດ, ກຸ່ມບໍລິສັດອັນດັບໜຶ່ງໃນໂລກ. ແຕ່ລະປີ, WEF ໄດ້ຈັດຕັ້ງ ເວທີປາໄສລະດັບທົ່ວໂລກ ແລະ ພາກພື້ນຫຼາຍຄັ້ງ, ເຕົ້າໂຮມບັນດາການນຳລັດຖະບານ, ການນຳວິສາຫະກິດ, ບັນດາອົງການຈັດຕັ້ງສັງຄົມ, ສາສະໜາ, ບັນດານັກຮຽນຮູ້ໃນທົ່ວໂລກ ເພື່ອປຶກສາຫາລືບັນດາບັນຫາສະຖານະການທົ່ວໂລກ ແລະ ໃຫ້ຄຳໝັ້ນສັນຍາເພີ່ມທະວີການຮ່ວມມືເພື່ອຄວາມວັດທະນາຖາວອນລວມ. ເວທີປາໄສທີ່ສຳຄັນກ່ວາໝູ່ຂອງ WEF ແມ່ນກອງປະຊຸມປະຈຳປີຖືກຈັດຂຶ້ນໃນທ້າຍເດືອນມັງກອນໃນແຕ່ລະປີຢູ່ ດາໂວດ ປະເທດສະວິດ. ນອກຈາກນັ້ນ, WEF ຍັງຈັດຕັ້ງບັນດາເວທີປາໄສລະດັບພາກພື້ນ, ຊຶ່ງພົ້ນເດັ່ນແມ່ນແມ່ນ ກອງປະຊຸມ WEF ກ່ຽວກັບອາຊີຕາເວັນອອກ, ກອງປະຊຸມ WEF ກ່ຽວກັບອີນເດຍ, ກອງປະຊຸມ WEF ກ່ຽວກັບອາເມລິກາລາຕິນ, ກອງປະຊຸມ WEF ກ່ຽວກັບຕາເວັນອອກກາງ....ເພື່ອແລກປ່ຽນ ແລະ ໄຈ້ແຍກ, ຕີລາຄາບັນດາບັນຫາພັດທະນາຂອງພາກພື້ນ.
ໃນຊຸມປີມໍ່ໆມານີ້, ພ້ອມກັບວິວັດທະນາການເຊື່ອມໂຍງເຂົ້າກັບສາກົນທີ່ນັບມື້ນັບເລິກເຊິ່ງກ້ວາງຂວາງນັ້ນ, ຫວຽດນາມໄດ້ຕັ້ງໜ້າ, ເປັນເຈົ້າການເຂົ້າຮ່ວມບັນດາເວທີປາໄສສາກົນ, ໃນນັ້ນມີການຈັດຕັ້ງບັນດາກອງປະຊຸມສາກົນທີ່ສຳຄັນຢ່າງສຳເລັດຜົນ. ໜຶ່ງໃນບັນດາກອງປະຊຸມ WEF ໄດ້ຮັບການຕີລາຄາສູງ ແລະ ປະສົບຜົນສຳເລັດດີທີ່ສຸດ ແມ່ນກອງປະຊຸມ WEF ອາຊີຕາເວັນອອກປີ 2010 ໂດຍຫວຽດນາມເປັນເຈົ້າພາບຈັດຂຶ້ນຢູ່ນະຄອນ ໂຮ່ຈິມິນ ຊຶ່ງມີຫົວເລື່ອງວ່າ “ ບົດບາດພວມສູງຂຶ້ນຂອງອາຊີໃນການພັດທະນາເສດຖະກິດທົ່ວໂລກ ”. ດ້ວຍວາລະປະຊຸມຢ່າງເປັນທາງການ 20 ຄັ້ງ, ກອງປະຊຸມສຸມໃສ່ 4 ເນື້ອໃນຕົ້ນຕໍຄື: ບົດບາດພວມສູງຂຶ້ນຂອງອາຊີ; ບັນດາຄວາມສ່ຽງທົ່ວໂລກ; ເສັ້ນທາງເຕີບໂຕຂຽວຂອງອາຊີ; ຄວາມສາມາດແກ່ງແຍ້ງ. ກອງປະຊຸມ WEF ອາຊີຕາເວັນອອກປີ 2010 ໄດ້ດຶງດູດການເຂົ້າຮ່ວມຂອງຜູ້ແທນກ່ວາ 450 ທ່ານຊຶ່ງລວມມີບັນດານັກການເມືອງຂັ້ນສູງ, ການນຳວິສາຫະກິດອັນດັບໜຶ່ງ, ນັກຮຽນຮູ້ ພ້ອມກັບນັກຂ່າວຂອງຫວຽດນາມ ແລະ ຕ່າງປະເທດກວ່າ 200 ຄົນ. ກອງປະຊຸມຍັງດຶງດູດການເຂົ້າຮ່ວມຂອງການນຳຂັ້ນສູງຂອງລັດຖະບານເປັນຈຳນວນຫຼາຍທີ່ສຸດຊຶ່ງລວມມີ : ນາຍົກລັດຖະມົນຕີຂອງ ກຳປູເຈຍ, ລາວ, ມຽນມາ, ໄທ, ຫວຽດນາມ; ຮອງປະທານສະພາປຶກສາການເມືອງແຫ່ງຊາດຈີນ ແລະ ລັດຖະມົນຕີອີກຫຼາຍທ່ານສັງກັດບັນດາອົງການສາກົນຄື: ຜູ້ອຳນວຍການໃຫຍ່ WTO, ເລຂາທິການໃຫຍ່ UNCTAD, ເລຂາທິການໃຫຍ່ ອາຊຽນ, ຮອງເລຂາທິການໃຫຍ່ OECD ແລະ ບັນດາເຈົ້າໜ້າທີຂັ້ນສູງຂອງ WB, IMF, ADB …ກອງປະຊຸມWEFອາຊີຕາເວັນອອກປີ 2010 ໄດ້ເປັນຂີດໝາຍທາງດ້ານການທູດທີ່ແຂງແຮງສຳລັບບັນດາການນຳຂັ້ນສູງ ແລະ ປະຊາຄົມວິສາຫະກິດສາກົນທີ່ໄດ້ເຂົ້າຮ່ວມກອງປະຊຸມ. ຂີດໝາຍດັ່ງກ່າວແມ່ນບັນດາຜົນງານ, ບັນດາບົດຮຽນທີ່ດີຊຶ່ງບັນດາປະເທດພາຄີປະຕິບັດໃນສະພາວະທີ່ພື້ນຖານເສດຖະກິດໂລກພວມຊຸດໂຊມລົງ. ແລະ ມາເຖິງກອງປະຊຸມWEF ອາຊີຕາເວັນອອກປີ 2011 ທີ່ຖືກຈັດຂຶ້ນຢູ່ ອີນໂດເນເຊຍດ້ວຍຫົວຂໍ້ວ່າ “ ດັດປັບໃຫ້ແທດເໝາະກັບລັດທິຫັນເປັນໂລກາພິວັດແບບໃໝ່ ”, ຂໍ້ສະເໜີຂອງຫວຽດນາມກ່ຽວກັບການສ້າງຕັ້ງ 5 ກຸ່ມປະຕິບັດງານຢູ່ທີ່ກອງປະຊຸມWEF ອາຊີຕາເວັນອອກປີ 2010 ເພື່ອຜັນຂະຫຍາຍຂໍ້ລິເລີ່ມ “ ວິໄສທັດໃໝ່ກ່ຽວກັບກະສີກຳ ” ແນໃສ່ຄ້ຳປະກັນດ້ານສະບຽງອາຫານ, ຄວາມ ໝັ້ນຄົງທາງດ້ານສິ່ງແວດລ້ອມ ແລະ ມີຜົນປະໂຫຍດທາງດ້ານເສດຖະກິດ ໂດຍກອງປະຊຸມWEF ອາຊີຕາເວັນອອກປີ 2011 ຂະຫຍາຍຂຶ້ນສູ່ບາດກ້າວໃໝ່ທີ່ແທດຈິງກວ່າ.
ດ້ວຍຈິດໃຈເປັນເຈົ້າການ, ຕັ້ງໜ້າເຂົ້າຮ່ວມບັນດາເວທີປາໄສສາກົນ, ໃນນັ້ນມີການເຂົ້າຮ່ວມ ແລະ ຈັດຕັ້ງບັນດາກອງປະຊຸມສາກົນທີ່ສຳຄັນຢ່າງສຳເລັດຜົນ, ຄະນະຜູ້ແທນຫວຽດນາມໂດຍທ່ານນາຍົກລັດຖະມົນຕີຫວຽດນາມ Nguyen Tan Dung ນຳໜ້າເຂົ້າຮ່ວມ ກອງປະຊຸມ WEF ອາຊີຕາເວັນອອກປີ 2012 ຄັ້ງນີ້, ແນ່ນອນວ່າຈະມີບັນດາການປະກອບສ່ວນສຳຄັນເຂົ້າໃນເນື້ອໃນຂອງ ກອງປະ ຊຸມ. ເລື່ອງຫວຽດນາມເຂົ້າຮ່ວມ ເວທີປາໄສຄັ້ງນີ້ຍັງແມ່ນໂອກາດເພື່ອໃຫ້ການນຳບັນດາກະຊວງ, ບໍລິສັດ, ວິສາຫະກິດ ສືບຕໍ່ໂຄສະນາພາບພົດ, ຍົກສູງທີ່ຕັ້ງບົດບາດຂອງຫວຽດນາມໃນພາກພື້ນ ແລະ ໃນໂລກ. ການພົວພັນລະຫວ່າງ
ຫວຽດນາມ - WEF ເວົ້າລວມ ແລະ ກັບເວທີປາໄສອາຊີຕາເວັນອອກເວົ້າສະເພາະ ຈະໄດ້ຮັບການຍູ້ແຮງເພື່ອຄວາມມີສະຖຽນລະພາບ ແລະ ວັດທະນາຖາວອນລວມຂອງຫວຽດນາມ ແລະ ບັນດາປະເທດໃນພາກພື້ນ.