(vovworld)- ກ່ອນນີ້ 8 ປີເຕັມ, ຄືວັນທີ 7/11/2006, ຫວຽດນາມ ໄດ້ເຂົ້າຮ່ວມອົງການການຄ້າໂລກ (WTO) ແລະ ຫລັງຈາກນັ້ນ ໄດ້ຮັບເຂົ້າເປັນສະມາຊິກຂອງອົງການນີ້ຢ່າງເປັນທາງການເມື່ອວັນທີ 11/1/2007. ເລື່ອງເຂົ້າເປັນສະມາຊິກ WTO ໄດ້ເປີດກາລະໂອກາດໃຫຍ່ໃຫ້ແກ່ສິນຄ້າ ແລະ ການບໍລິການຂອງຫວຽດນາມ ກັບຕະຫລາດທີ່ກວ້າງໃຫຍ່ ຊື່ງລວມມີ: 160 ປະເທດສະມາຊິກ, ກວມ 97% GDP ຂອງທົ່ວໂລກ. ພາຍຫລັງ 8 ປີ, ຫວຽດນາມ ຍາດແຍ່ງບັນດາທ່າໄດ້ປຽບຂອງສະມາຊິກ WTO ເພື່ອພັດທະນາປະເທດຊາດ.
ຕາມຂໍ້ສັງເກດຂອງ WTO ແລ້ວ, ເຖິງວ່າ ຍັງມີຫລາຍບັນຫາຕ້ອງສືບຕໍ່ປະຕິຮູບ, ປັບປຸງ ກໍຕາມ ແຕ່ການປ່ຽນແປງຢ່າງຕັ້ງຫນ້າພາຍຫລັງ 7 ປີເຂົ້າເປັນສະມາຊິກຂອງ WTO ໄດ້ສະແດງໃຫ້ເຫັນວ່າ: ຫວຽດນາມ ໄດ້ ແລະ ພວມປະຕິບັດຢ່າງເຂັ້ມງວດ ແລະ ມີຄວາມຮັບຜິດຊອບບັນດາຄຳໝັ້ນສັນຍາເຂົ້າຮ່ວມ WTO.
ເສດຖະກິດ ຫວຽດນາມ ເຕີບໂຕແບບຍືນຍົງ
ທ່ານ ເຈີນກວກແຄງ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າຫວຽດນາມ, ຫົວຫນ້າຄະນະເຈລະຈາລັດຖະບານ ກ່ຽວກັບການຄ້າສາກົນ ຖືວ່າ: ນັບແຕ່ເມື່ອເຂົ້າເປັນສະມາຊິກ WTO ມາຮອດປະຈຸບັນ, ຫວຽດນາມ ປະຕິບັດຢ່າງເຂັ້ມງວດບັນດາຄຳໝັ້ນສັນຍາຂອງ WTO ກ່ຽວກັບການເປີດປະຕູຕະຫລາດ, ເປີດເຜີຍ, ກະຈ່າງແຈ້ງ, ສ້າງກອບກົດໝາຍໃຫ້ສົມບູນແບບເທື່ອລະກ້າວ, ສ້າງສະພາບແວດລ້ອມແຫ່ງການດຳເນີນທຸລະກິດຢ່າງສະເຫມີພາບ, ສ້າງເງື່ອນໄຂສະດວກໃຫ້ແກ່ບັນດານັກລົງທຶນພາຍໃນປະເທດ ແລະ ຕ່າງປະເທດຜະລິດດຳເນີນທຸລະກິດ. ພ້ອມກັນນັ້ນ ຄວາມສາມາດສຳພັດກັບຕະຫລາດຕ່າງປະເທດກໍໄດ້ຮັບການປັບປຸງເທື່ອລະກ້າວ, ປະກອບສ່ວນເພີ່ມວົງເງິນສົ່ງອອກຂອງຫວຽດນາມ. ປີ 2007, ປີທຳອິດເຂົ້າເປັນສະມາຊິກ WTO, ຍອດມູນຄ່າການສົ່ງອອກນຳເຂົ້າສິນຄ້າເພີ່ມຂຶ້ນ 31,3%(ເທົ່າກັບລະດັບເພີ່ມຂຶ້ນ 26,52% ເມື່ອທຽບໃສ່ປີ 2006). ປີ 2013, ວົງເງິນສົ່ງອອກບັນລຸກວ່າ 132 ຕື້ USD, ເພີ່ມຂຶ້ນ 15,4 % ເມື່ອທຽບໃສ່ປີ 2012, ເທົ່າກັບ 17,6 ຕື້ USD, ແມ່ນປີທີ 2 ຢ່າງລຽນຕິດກ່ຽວກັບການສົ່ງອອກເກີນດຸນນັບແຕ່ເມື່ອເຂົ້າເປັນສະມາຊິກ WTO. ທ່ານ ເຈີນກວກແຄງ ເນັ້ນຫນັກວ່າ: ເລື່ອງຫວຽດນາມ ປະຕິຮູບລະບອບເສດຖະກິດ, ນະໂຍບາຍການຄ້າຕາມທິດນັບມື້ນັບສອດຄ່ອງກັບມາດຕະຖານ, ກົດໝາຍ ຂອງ WTO, ໄດ້ຮັບການຮັບຮູ້ ແລະ ສະຫນັບສະຫນູນຈາກບັນດາປະເທດສະມາຊິກ WTO.
“ຫວຽດນາມ ຮັກສາລະດັບການເຕີບໂຕສູງໃນໄລຍະຍາວ ແລະ ຫລຸດຜ່ອນອັດຕາສ່ວນອຶດຫິວທຸກຍາກດີພໍສົມຄວນ. ຫວຽດນາມ ສືບຕໍ່ຕັດສິນໃຈເຊື່ອມໂຍງ ກັບເສດຖະກິດພາກພື້ນ ແລະ ໂລກນັບມື້ນັບເລິກເຊິ່ງ, ກວ້າງຂວາງ, ຜ່ານນັ້ນ ກາຍເປັນພື້ນຖານເສດຖະກິດນັບມື້ນັບຂະຫຍັນຂັນເຄື່ອນ.”
ຄະນະຜູ້ແທນຫວຽດນາມທີ່ພິທີລົງນາມເອກະສານເຂົ້າເປັນ
ສະມາຊິກ WTO
ພາບ:baodatmui.vn
|
ໃນຊຸມປີຜ່ານມາ, ເສດຖະກິດຫວຽດນາມ ບັນລຸລະດັບເຕີບໂຕສະເລ່ຍ 7,3%/ປີ, ລາຍຮັບສະເລ່ຍໃສ່ຫົວຄົນເພີ່ມຂຶ້ນເກືອບ 4 ເທົ່າ ແລະອັດຕາເງິນເຟີ້ໃນປີກ່າຍນີ້ຫລຸດລົງເຫລືອພຽງ 6-7%. ກ່ຽວກັບດ້ານການຄ້າ, ປະຈຸບັນ ຫວຽດນາມ ແມ່ນພື້ນຖານເສດຖະກິດມີລະດັບການເຊື່ອມໂຍງເຂົ້າກັບສາກົນເປັນຢ່າງດີ, ໃນນັ້ນ ການສົ່ງອອກກວມ ¾ ຍອດຜະລິດຕະພັນພາຍໃນ. ຫວຽດນາມ ກາຍເປັນພາກສ່ວນເສດຖະກິດ ແລະ ການເມືອງສຳຄັນໃນອາຊຽນ ແລະ ພາກພື້ນ ອາຊີ ແລະ ແມ່ນຄູ່ຮ່ວມມືສຳຄັນຂອງຫລາຍປະເທດ, ພາກພື້ນ.
ຍູ້ແຮງການປະຕິຮູບ, ສ້າງພື້ນຖານເສດຖະກິດຕາມທ່າອ່ຽງການຄ້າທົ່ວໂລກ
ພື້ນຖານເສດຖະກິດຫວຽດນາມ ພວມມີບັນດາການຫັນປ່ຽນສຳຄັນ ຍ້ອນມີບັນດາການປະຕິຮູບລະບອບກົດໝາຍຮອບດ້ານ ຊື່ງຫວຽດນາມ ປະຕິບັດຕາມຄຳໝັ້ນສັນຍາກັບ WTO. ທ່ານ ຫວູຕຽນລົກ, ປະທານ ຫ້ອງການການຄ້າ ແລະ ອຸດສາຫະກຳ ຫວຽດນາມ ເນັ້ນຫນັກວ່າ: ການປະຕິຮູບລະບອບ ຍາມໃດກໍແມ່ນຫນ້າທີ່ບຸລິມະສິດ ຊ່ວຍຫວຽດນາມ ຫັນປະສິດທິຜົນຈາກເລື່ອງກາຍເປັນສະມາຊິກ WTO ນຳມາໃຫ້ເປັນລະອຽດ.
“ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ສະເຫນີ ຕ້ອງບຸກທະລຸກ່ຽວກັບລະບອບລະບຽບການ ແລະ ຖືການບຸກທະລຸລະບອບລະບຽບການ ແມ່ນສ້າງກຳລັງຫນູນໃຫມ່ໃຫ້ແກ່ການເຕີບໂຕ ແມ່ນຄຳຮຽກຮ້ອງທີ່ສຳຄັນຕົ້ນຕໍຂອງຫວຽດນາມ. ການບຸກທະລຸລະບອບລະບຽບການພາຍໃນປະເທດແມ່ນສຳຄັນທີ່ສຸດ ເພື່ອໃຫ້ຫວຽດນາມ ຍາດແຍ່ງທ່າໄດ້ປຽບຂອງ WTO ກໍຄື ບັນດາສັນຍາການຄ້າເສລີໃຫມ່ ພວມກະກຽມລົງນາມຄື: TPP, ສັນຍາການຄ້າ ຫວຽດນາມ -ອີຢູ ແລະ ສັນຍາການຄ້າເສລີອື່ນ.”
ເຖິງຢ່າງໃດກໍຕາມ, ເລື່ອງເຂົ້າເປັນສະມາຊິກ WTO ກໍນຳມາເຊິ່ງບັນດາການກະທົບບໍ່ສະດວກສຳລັບກະສິກຳຫວຽດນາມ ແລະ ນຳມາເຊິ່ງຜົນປະໂຫຍດບໍ່ທັນເໝາະສົມໃຫ້ແກ່ເປົ້າໝາຍຖືກຄວາມສ່ຽງສູງກວ່າໝູ່ໃນສັງຄົມ. ຄຽງຄູ່ກັນນັ້ນ ດຸ່ນດ່ຽງການນຳເຂົ້າສົ່ງອອກໃນຊຸມປີມໍ່ໆມານີ້ກໍຄົງຕົວຫລາຍບັນຫາ. ທ່ານ Pascal Lamy, ອະດີດຜູ້ອຳນວຍການໃຫຍ່ WTO ຖືວ່າ: ເພື່ອຈຳກັດບັນດາຄວາມສ່ຽງໃຫ້ແກ່ພື້ນຖານເສດຖະກິດກໍຄືສ້າງຄວາມສະດວກໃນການພັດທະນາເສດຖະກິດໄລຍະ ພາຍຫລັງເຂົ້າເປັນສະມາຊິກ WTO, ວິສາຫະກິດ ພ້ອມກັບຂະແຫນງສົ່ງອອກຂອງຫວຽດນາມ ຄວນເອົາໃຈໃສ່ບັນດາປະເພດສິນຄ້າສ້າງມູນຄ່າເພີ່ມເປັນປົກກະຕິ. ທ່ານ Lami ຊີ້ແຈ້ງວ່າ ບັນດາປະເທດສົ່ງອອກຕົ້ນຕໍໃນໂລກ ກໍແມ່ນບັນດາປະເທດນຳເຂົ້າຫລາຍສຸດໃນລໂກ. ສະນັ້ນ ຢາກເຂົ້າຮ່ວມທ່າອ່ຽງການຄ້າທົ່ວໂລກໃຫມ່ຢ່າງທັນການ, ຫວຽດນາມ ຄວນເອົາໃຈໃສ່ເຖິງການນຳເຂົ້າບັນດາປະເພດສິນຄ້າສາມາດສ້າງມູນຄ່າເພີ່ມສູງ ອີງໃສ່ທ່າໄດ້ປຽບແກ້ງແຍ້ງຂອງຕົນ.
ປະຈຸບັນ, ລັດຖະບານຫວຽດນາມ ໄດ້ສ້າງນະໂຍບາຍກຳນົດທິດສົ່ງອອກ ເພື່ອສ້າງກຳລັງຫນູນຊ່ວຍໃຫ້ບັນດາວິສາຫະກິດ ຍົກສູງກຳລັງຄວາມສາມາດໃນເວທີສາກົນ ກໍຄືພັດທະນາພື້ນຖານເສດຖະກິດປະເທດຊາດ. ບັນດາການປະຕິຮູບລະອຽດ, ຖືກຕ້ອງກ່ຽວກັບລະບອບ, ນະໂຍບາຍ ຊຸກຍູ້ຫັນການຄ້າເປັນເສລີ ແລະ ແກ້ໄຂບັນດາຜົນສະທ້ອນພາຍຫລັງເຂົ້າເປັນສະມາຊິກ WTO ປະກອບສ່ວນຮັບປະກັນການຈະເລີນເຕີບໂຕ ແລະ ເຊື່ອມໂຍງເຂົ້າກັບພື້ນຖານເສດຖະກິດທົ່ວໂລກ ແບບຍືນຍົງຂອງຫວຽດນາມ.