(vovworld)- ທ່ານນາຍົກລັດຖະມົນຕີ ຫງວຽນເຕີນຢູງ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ຫາກໍສິ້ນສຸດການຢ້ຽມຢາມ ແລະ ເຂົ້າຮ່ວມກອງປະຊຸມຂັ້ນສູງພິເສດ ອາຊຽນ - ອາເມລິກາ ຊື່ງຖືກຈັດຂຶ້ນຢູ່ ອາເມລິກາ ຢ່າງຈົບງາມ. ທີ່ກອງປະຊຸມຄັ້ງນີ້, ຫວຽດນາມ ສືບຕໍ່ ປະກອບສ່ວນຢ່າງຕັ້ງຫນ້າ, ສ້າງຂີດໝາຍໃຫມ່ໃນການພົວພັນຄູ່ຮ່ວມມືຍຸດທະສາດ ອາຊຽນ - ອາເມລິກາ.
ທ່ານນາຍົກລັດຖະມົນຕີ ຫງວຽນເຕີນຢູງ ພົບປະກັບ ປະທານາທິບໍດີ ອາເມລິກາ B. Obama
ພາບ: cafer.vn
|
ກອງປະຊຸມແມ່ນຂີດໝາຍໃຫມ່ໃນການພົວພັນຄູ່ຮ່ວມມືຍຸດທະສາດ ອາຊຽນ - ອາເມລິກາ ພ້ອມທັງສະແດງໃຫ້ເຫັນບົດບາດ ແລະ ທີ່ຕັ້ງ ນັບມື້ນັບສູງຂອງ ອາຊຽນ ໃນເວທີສາກົນ ກໍຄືຄວາມປາດຖະຫນາຂອງບັນດາປະເທດສະມາຊິກ ອາຊຽນແມ່ນຍາດແຍ່ງການຮ່ວມມືຂອງບັນດາຄູ່ຮ່ວມມືໃນການຮັກສາສັນຕິພາບ, ຄວາມໝັ້ນຄົງຂອງພາກພື້ນ, ຮັກສາລະດັບເຕີບໂຕສູງ, ຊຸກຍູ້ການຮ່ວມສຳພັນດ້ານເສດຖະກິດ ແລະ ການສະຫນັບສະຫນູນບົດບາດໃຈກາງຂອງ ອາຊຽນ.
ຊຸກຍູ້ການຜັນຂະຫຍາຍປະສິດທິຜົນບັນດາໂຄງການຮ່ວມມືລະຫວ່າງ ອາຊຽນ ແລະ ອາເມລິກາ
ເຂົ້າຮ່ວມວາລະປຶກສາຫາລືທັງໝົດທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢູງ ຍາມໃດກໍເນັ້ນຫນັກເຖິງຄວາມສຳຄັນຍຸດທະສາດຂອງການພົວພັນລະຫວ່າງ ອາຊຽນ ແລະ ອາເມລິກາ ສຳລັບສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນ, ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີວ່າ: ໃນໄລຍະຈະມາເຖິງ ສອງຝ່າຍຄວນຜັນຂະຫຍາຍບັນດາໂຄງການຮ່ວມມືທີ່ໄດ້ຕົກລົງ, ເປັນຕົ້ນແມ່ນແຜນການດຳເນີນງານ ອາຊຽນ - ອາເມລິກາ ໄລຍະ 2016-2020, ເພີ່ມທະວີບັນດາການຮ່ວມມື, ການລົງທຶນ, ແບ່ງປັນບົດຮຽນເລີ່ມອາຊີບ, ພູມປັນຍາ, ເຕັກໂນໂລຊີ ລະຫວ່າງບັນດາວິສາຫະກິດອາຊຽນ ແລະ ອາເມລິກາ ເພື່ອຫນູນຊ່ວຍ ອາຊຽນ ສ້າງສະພາບແວດລ້ອມດຳເນີນທຸລະກິດຢ່າງສະດວກໃຫ້ແກ່ການປ່ຽນໃຫມ່, ມີຫົວຄິດປະດິດສ້າງ, ຂະຫຍັນຂັນເຄື່ອນ, ຍົກສູງກຳລັງຄວາມສາມາດໃນຂົງເຂດເຕັກໂນໂລຊີຂໍ້ມູນຂ່າວສານ ແລະ ການພັດທະນາແບບຍືນຍົງ. ທ່ານນາຍົກລັດຖະມົນຕີ ຫງວຽນເຕີນຢູງ ກໍໄດ້ສະເຫນີສ້າງຕັ້ງສູນ ອາຊຽນ - ອາເມລິກາ ກ່ຽວກັບການຫນູນຊ່ວຍເລີ່ມອາຊີບ ແລະ ພັດທະນາບັນດາວິສາຫະກິດຂະຫນາດກາງ ແລະ ນ້ອຍ ຢູ່ ຫວຽດນາມ ເພື່ອເສີມຂະຫຍາຍຄວາມສາມາດປະດິດຄິດສ້າງ, ການເຊື່ອມຕໍ່ຂອງບັນດາວິສາຫະກິດ ອາຊຽນ.
ແລະກໍໃນໄລຍະຢູ່ ອາເມລິກາ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ພົບປະກັບປະທານາທິບໍດີ ອາເມລິກາ B. Obama, ພົບປະສອງຝ່າຍກັບ ປະທານາທິບໍດີ ອິນໂດເນເຊຍ Joko Widodo, ນາຍົກລັດຖະມົນຕີ ໄທ ປຣາຢຸດ ຈັນໂອຈາ. ຄຽງຄູ່ກັນນັ້ນ ທ່ານນາຍົກລັດຖະມົນຕີ ຫງວຽນເຕີນຢູງ ພ້ອມກັບບັນດາການນຳອາຊຽນ ແລະ ອາເມລິກາ ພົບປະແລກປ່ຽນກັບຜູ້ຕາງຫນ້າກຸ່ມບໍລິສັດຊັ້ນນຳຈຳນວນຫນຶ່ງຂອງ ອາເມລິກາ ຄື: IBM, Microsoft, Cisco… ເພື່ອຍົກອອກບັນດາຂໍ້ສະເຫນີ ແລະ ຊອກຫາບັນດາມາດຕະການຊຸກຍູ້ພື້ນຖານເສດຖະກິດດີຈີຕອນ ແລະ ການຮ່ວມມື, ຫນູນຊ່ວຍຂອງບັນດາບໍລິສັດ ອາເມລິກາ ສຳລັບບັນດາວິສາຫະກິດເຕັກໂນໂລຊີຂໍ້ມູນຂ່າວສານຂອງບັນດາປະເທດ ອາຊຽນ. ທ່ານນາຍົກລັດຖະມົນຕີ ຫງວຽນເຕີນຢູງ ໃຫ້ຮູ້ວ່າ: ໃນໄລຍະຈະມາເຖິງ, ຫວຽດນາມ ຈະຍູ້ແຮງກິດຈະການປ່ຽນແປງໃຫມ່ຢ່າງຮອບດ້ານ, ຄົບຊຸດ ພ້ອມທັງຕັ້ງຫນ້າຜັນຂະຫຍາຍນະໂຍບາຍເຊື່ອມໂຍງເຂົ້າກັບສາກົນຢ່າງເລິກເຊິ່ງ ກວ້າງຂວາງ ແລະ ເຂົ້າຮ່ວມການຮ່ວມສຳພັນດ້ານເສດຖະກິດຫລາຍຂັ້ນ, ໃນນັ້ນ ປະຊາຄົມເສດຖະກິດ ອາຊຽນ (AEC), ເວທີປາໄສການຮ່ວມມືເສດຖະກິດ ອາຊີ ປາຊີຟີກ (APEC). ສັນຍາຄູ່ຮ່ວມມືຂ້າມປາຊີຟີກ (TPP) ແລະ ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ແມ່ນບັນດາຂອບເຂດຫລັກແຫລ່ງແກ່ນສານ.
ທ່ານນາຍົກລັດຖະມົນຕີ ຫງວຽນເຕີນຢູງ ພົບປະກັບ ປະທານາທິບໍດີ
ອິນໂດເນເຊຍ Joko Widodo
|
ຮ່ວມແຮງຮ່ວມໃຈແກ້ໄຂບັນດາສິ່ງທ້າທາຍທົ່ວໂລກ
ຄຽງຄູ່ກັບຄວາມຕັ້ງຫນ້າຊຸກຍູ້ການຜັນຂະຫຍາຍປະສິດທິຜົນບັນດາໂຄງການຮ່ວມມືລະຫວ່າງ ອາຊຽນ - ອາເມລິກາ, ທີ່ກອງປະຊຸມຄັ້ງນີ້ ທ່ານນາຍົກລັດຖະມົນຕີ ຫງວຽນເຕີນຢູງ ພ້ອມກັບບັນດາການນຳ ອາຊຽນ ແລະ ອາເມລິກາ ເນັ້ນຫນັກຄວາມສຳຄັນຂອງການພົວພັນຄູ່ຮ່ວມມືຍຸດທະສາດ ອາຊຽນ - ອາເມລິກາ, ເປັນຕົ້ນໃນການຊຸກຍູ່ວັດທະນາຖາວອນຂອງພາກພື້ນ ແລະ ແກ້ໄຂບັນດາສິ່ງທ້າທາຍຂ້າມຊາດ. ກ່ຽວກັບການຜັນແປຢ່າງສັບສົນຢູ່ທະເລຕາເວັນອອກຫວ່າງແລ້ວນີ້, ພິເສດ ແມ່ນບັນດາການກະທຳປ່ຽນແປງສະພາບເດີມ, ເພີ່ມທະວີການນຳໃຊ້ກຳລັງທະຫານ, ການນາບຂູ່ເຖິງສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນທະເລ, ການບິນ ຢູ່ ພາກພື້ນ, ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ: ບັນດາປະເທດຄວນໃຫ້ບຸລິມະສິດສ້າງຄວາມໄວ້ເນື້ອເຊື່ອໃຈຍຸດທະສາດ, ເພີ່ມທະວີການເຈລະຈາ ແລະ ການຮ່ວມມື, ຍົກສູງການເຄົາລົບກົດໝາຍສາກົນ, ເປັນຕົ້ນແມ່ນສົນທິສັນຍາກົດໝາຍທະເລປີ 1982; ເສີມຂະຫຍາຍບົດບາດຂອງບັນດາລະບອບນະໂຍບາຍຫລາຍຝ່າຍ ແລະ ສະຫນັບສະຫນູນບົດບາດຫລັກແຫລ່ງຂອງອາຊຽນ ໃນການຮັກສາສະພາບແວດລ້ອມສັນຕິພາບ ແລະ ຄວາມໝັ້ນຄົງຢູ່ພາກພື້ນ. ເນັ້ນຫນັກເຖິງຄວາມໝາຍຍຸດທະສາດຂອງການພົວພັນລະຫວ່າງ ອາຊຽນ ແລະ ອາເມລິກາ, ທ່ານນາຍົກລັດຖະມົນຕີ ຫງວຽນເຕີນຢູງ ຊົມເຊີຍການສະຫນັບສະຫນູນຢ່າງຕັ້ງຫນ້າ ແລະ ມີລັກສະນະສ້າງສັນຂອງ ອາເມລິກາ ແລະ ບັນດາຄູ່ຮ່ວມມືເວົ້າລວມສຳລັບຫລັກໝັ້ນຂອງ ອາຊຽນ ໃນການແກ້ໄຂບັນດາບັນຫາຄວາມໝັ້ນຄົງຂອງພາກພື້ນ, ໃນນັ້ນ ມີບັນຫາທະເລຕາເວັນອອກ. ທ່ານນາຍົກລັດຖະມົນຕີ ຫງວຽນເຕີນຢູງ ຕີລາຄາຢ່າງຕັ້ງຫນ້າບັນດາຄວາມຄືບຫນ້າ ແລະ ໝາກຜົນສຳຄັນທີ່ບັນລຸໄດ້ໃນການພົວພັນຄູ່ຮ່ວມມື ອາຊຽນ - ອາເມລິກາ ໃນໄລຍະຜ່ານມາ, ປາດຖະຫນາຢາກສອງຝ່າຍສົມທົບກັນຜັນຂະຫຍາຍປະສິດທິຜົນແຜນການດຳເນີນງານ ອາຊຽນ - ອາເມລິກາ ໄລຍະ 2016-2020, ປະກອບສ່ວນຊຸກຍູ້ການພົວພັນ ອາຊຽນ - ອາເມລິກາ ພັດທະນາຢ່າງແຮງໃນໄລຍະຈະມາເຖິງ.
ຄຳເຫັນຂອງທ່ານນາຍົກລັດຖະມົນຕີ ຫງວຽນເຕີນຢູງ ກໍໄດ້ສະແດງໃຫ້ເຫັນໃນຖະແຫລງການຮ່ວມທີ່ກອງປະຊຸມ, ຕາມນັ້ນແລ້ວ ອາຊຽນ ແລະ ອາເມລິກາ ຈະສືບຕໍ່ ເຊີດຊູບັນດາຫລັກການພື້ນຖານຂອງກົດໝາຍສາກົນ, ກົດບັດ ສປຊ ແລະ ກົດບັດ ອາຊຽນ, ສະຫນັບສະຫນູນ ສ້າງລະບຽບຮຽບຮ້ອຍຢູ່ ພາກພື້ນ ແລະ ສາກົນ ໂດຍອີງໃສ່ກົດໝາຍ, ຄຳໝັ້ນສັນຍາແກ້ໄຂບັນດາຄວາມຂັດແຍ້ງໂດຍສັນຕິວິທີ, ບໍ່ນາບຂູ່ ຫລື ນຳໃຊ້ກຳລັງອາວຸດ, ບໍ່ນຳໃຊ້ການທະຫານ, ລະງັບໃຈ, ຮັບປະກັນຄວາມໝັ້ນຄົງ, ຄວາມປອດໄພການເດີນທະເລ, ການບິນເໝາະສົມກັບບັນດາຫລັກການທີ່ໄດ້ຮັບການຮັບຮູ້ຢ່າງກວ້າງຂວາງຂອງກົດໝາຍສາກົນ, ຊື່ງລວມມີ ສົນທິສັນຍາ ສປຊ ກ່ຽວກັບກົດໝາຍທະເລປີ 1982.
ການຢ້ຽມຢາມ ແລະ ເຂົ້າຮ່ວມກອງປະຊຸມຂັ້ນສູງພິເສດ ອາຊຽນ - ອາເມລິກາ ຂອງທ່ານນາຍົກລັດຖະມົນຕີ ຫງວຽນເຕີນຢູງ ແລະ ຄະນະຜູ້ແທນຫວຽດນາມ ອີກຄັ້ງຫນຶ່ງຢັ້ງຢືນບົດບາດເປັນເຈົ້າການ, ຕັ້ງຫນ້າ ແລະ ມີຄວາມຮັບຜິດຊອບຂອງຫວຽດນາມໃນອາຊຽນ ພ້ອມທັງຢັ້ງຢືນຄວາມມານະພະຍາຍາມຂອງຫວຽດນາມ ປະກອບສ່ວນນຳການພົວພັນຄູ່ຮ່ວມມືຍຸດທະສາດ ອາຊຽນ - ອາເມລິກາ ເຂົ້າສູ່ແທດຈິງ, ມີປະສິດທິຜົນ, ຍາດແຍ່ງການຮ່ວມມື ແລະ ຫນູນຊ່ວຍຂອງອາເມລິກາໃນບັນດາຂົງເຂດ ອາຊຽນ ແລະ ຫວຽດນາມ ຕ່າງມີຜົນປະໂຫຍດ. ກ່ຽວກັບການພົວພັນສອງຝ່າຍ ຫວຽດນາມ ແລະ ອາເມລິກາດ ການພົບປະລະຫວ່າງການນຳສອງທ່ານ ໄດ້ຢືນຢັນເຈດຕະນາດີ, ຄວາມມານະພະຍາຍາມລວມຂອງທັງສອງຝ່າຍໃນການເພີ່ມທະວີຄວາມໄວ້ເນື້ອເຊື່ອໃຈ, ຄວາມເຂົ້າໃຈເຊິ່ງກັນ ແລະກັນ ແລະ ເຮັດໃຫ້ການພົວພັນຄູ່ຮ່ວມມືຮອບດ້ານ ອາເມລິກາ - ຫວຽດນາມ ໃນທຸກຂົງເຂດມີຄວາມ ແທດຈິງ ແລະ ເລິກເຊິ່ງກວ່າ.