ວັນທີ 24/9, ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ນໍາໜ້າຄະນະຜູ້ແທນຫວຽດນາມໄປເຖິງນິວຢອກ (ອາເມລິກາ) ເພື່ອເຂົ້າຮ່ວມກອງປະຊຸມສຸດຍອດ ສ.ປ.ຊ ຮັບຮອງເອົາໂຄງການດຳເນີນງານ 2030 ກ່ຽວກັບການພັດທະນາແບບຍືນຍົງ . ເລື່ອງທ່ານປະທານປະເທດຫວຽດນາມ ເຈືອງເຕີ້ນຊາງ ເຂົ້າຮ່ວມ ແລະ ກ່າວຄຳເຫັນໃນກອງປະຊຸມທີ່ໃຫຍ່ທີ່ສຸດຂອງສະຫະປະຊາຊາດນັບຕັ້ງແຕ່ພາຍຫຼັງກອງປະຊຸມສຸດຍອດປີ 2000 ຮັບຮອງເອົາບັນດາເປົ້າຫມາຍພັດທະນາສະຫັດສະວັດ ໄດ້ເປັນການສະແດງໃຫ້ເຫັນຄວາມເປັນເຈົ້າການ, ຕັ້ງໜ້າປະກອບສ່ວນເຂົ້າໃນບັນດາບັນຫາທົ່ວໂລກຂອງຫວຽດນາມ.
ສຳນັກງານອົງການສະຫະປະຊາຊາດ ຕັ້ງຢູ່ນິວຢອກປະເທດອາເມລິກາ |
ເຂົ້າຮ່ວມກອງປະຊຸມຄັ້ງນີ້, ມີປະມຸກລັດ ແລະຜູ້ນໍາລັດຖະບານຂອງປະເທດຕ່າງໆເກືອບ 170 ທ່ານ. ການນໍາບັນດາປະເທດຈະຮັບຮອງໂຄງການດຳເນີນງານທົ່ວໂລກໃໝ່ກ່ຽວກັບການພັດທະນາ, ສ້າງຂອບເຂດ ແລະກຳນົດທິດຍຸດທະສາດກ່ຽວກັບການພັດທະນາແບບຍືນຍົງໃນທົ່ວໂລກ. ເອກະສານກອງປະຊຸມທີ່ຈະຮັບຮອງເອົານັ້ນ ລວມມີ 17 ເປົ້າຫມາຍ ແລະ 169 ຄາດໝາຍພັດທະນາແບບຍືນຍົງ. ນີ້ແມ່ນຫມາກຜົນຂອງການເຈລະຈາຢ່າງຕັ້ງໜ້າຂອງບັນດາປະເທດສະມາຊິກ ສປຊ ໃນ 2 ປີທີ່ຜ່ານມາ, ຊຶ່ງໄດ້ຮັບການຕີລາຄາວ່າ ແມ່ນສາມາດຕອບສະໜອງຄວາມສົນໃຈ ແລະ ຜົນປະໂຫຍດຂອງທຸກໆປະເທດ, ໂດຍສະເພາະແມ່ນບັນດາປະເທດພວມພັດທະນາ.
ຫວຽດນາມບັນລຸໄດ້ເປົ້າຫມາຍສະຫັດສະຫວັດເປັນຈໍານວນຫຼາຍ
ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ນໍາໜ້າຄະນະຜູ້ແທນຫວຽດນາມໄປເຖິງນິວຢອກ (ອາເມລິກາ) ເພື່ອເຂົ້າຮ່ວມກອງປະຊຸມສຸດຍອດ ສ.ປ.ຊ ຄັ້ງນີ້ ໃນສະພາວະທີ່ຫວຽດນາມສາມາດບັນລຸບັນດາຜົນງານທີ່ສໍາຄັນໃນການພັດທະນາເສດຖະກິດ - ສັງຄົມ: ເສດຖະກິດມະຫາພາກ, ຕະຫຼາດເງິນຕາມີສະຖຽນລະພາບ; ການເຕີບໂຕ GDP ໃນ 6 ເດືອນຕົ້ນປີ 2015 ບັນລຸ 6,28%ຊຶ່ງແມ່ນລະດັບສູງສຸດໃນ 5 ປີຜ່ານມາ. ສິ່ງທີ່ເປັນໜ້າສົນໃຈ ນັ້ນແມ່ນຫວຽດນາມໄດ້ສໍາເລັດບັນດາເປົ້າຫມາຍພັດທະນາສະຫັດສະວັດໂດຍພື້ນຖານແລ້ວຊຶ່ງກອງປະຊຸມສຸດຍອດສະຫະປະຊາຊາດປີ 2000 ໄດ້ຍົກອອກມາ ລວມມີການລົບລ້າງຄວາມອຶດຫິວ ແລະ ທຸກຍາກທີ່ເປັນໜ້າສົມເພດເວດທະນາ, ບັນລຸລະດັບການສຶກສາຂັ້ນປະຖົມພາກບັງຄັບຢ່າງທົ່ວເຖິງ , ຍົກສູງຄວາມສະເຫມີພາບລະຫວ່າງຍິງ-ຊາຍ ແລະ ທີ່ຕັ້ງບົດບາດ ແລະຄວາມສາມາດຂອງແມ່ຍິງ; ຫຼຸດຜ່ອນອັດຕາການຕາຍຂອງເດັກ; ປົວແປງສຸຂະພາບຈະເລີນພັນ; ປ້ອງກັນ ແລະ ຕ້ານການຕິດເຊື້ອແຮັດໄອວີ / ໂລກເອດ, ໄຂ້ຍຸງ ແລະ ໂລກພະຍາດອື່ນໆ; ຮັບປະກັນຄວາມໝັ້ນຄົງດ້ານສິ່ງແວດລ້ອມ; ເພີີ່ມທະວີການພົວພັນຄູ່ຮ່ວມມືທົ່ວໂລກເພື່ອການພັດທະນາ. ໃນນັ້ນ, ຫວຽດນາມໄດ້ຮັບການຮັບຮູ້ຈາກປະຊາຄົມໂລກວ່າ ໄດ້ສາມາດບັນລຸ ແລະ ເກີນກຳນົດສຳລັບຫຼາຍເປົ້າຫມາຍ, ໃນນັ້ນ ເປັນໜ້າປະທັບໃຈທີ່ສຸດ ແມ່ນຜົນງານການລົບລ້າງຄວາມທຸກຍາກທີ່ເປັນໜ້າສົມເພດເວດທະນາ ແລະ ຄວາມອຶດຫິວນັບຕັ້ງແຕ່ປີ 2002, ກ່ອນກໍານົດເວລາ 13 ປີ.
ຫວຽດນາມກໍໄດ້ບັນລຸຫຼາຍຜົນງານທາງດ້ານການພົວພັນຕ່າງປະເທດ, ພິເສດແມ່ນໄດ້ປັບປຸງ ແລະ ພັດທະນາການພົວພັນຮ່ວມມືຫຼາຍດ້ານກັບບັນດາປະເທດມະຫາອຳນາດ, ບັນດາຄູ່ຮ່ວມມືທີ່ສໍາຄັນ, ຍູ້ແຮງການເຊື່ອມໂຍງ, ຮ່ວມສຳພັນໃນພາກພື້ນ, ເພີ່ມທະວີການພົວພັນກັບສະຫະປະຊາຊາດ ແລະ ອົງການຈັດຕັ້ງສາກົນໃນຂອບສປຊ. ໄລຍະທີ່ຜ່ານມາ, ຫວຽດນາມໄດ້ຕັ້ງໜ້າເຂົ້າຮ່ວມໃນບັນດາວຽກງານຂອງສປຊ, ເປັນເຈົ້າການຍົກອອກບັນດາຂໍ້ລິເລີ່ມຫຼາຍຂໍ້ທີ່ແທດຈິງ , ສູ້ຊົນເພື່ອບັນດາເປົ້າຫມາຍລວມຂອງສະຫະປະຊາຊາດ. ນັບແຕ່ປີ 2006, ຫວຽດນາມແມ່ນຫນຶ່ງໃນຈຳນວນ 8 ປະເທດ ປະຕິບັດທົດລອງຂໍ້ລິເລີ່ມ "ເປັນເອກະພາບກັນກະທຳ" ຂອງສປຊ ແລະ ພວມຜັນຂະຫຍາຍຂໍ້ລິເລີ່ມນີ້ຢ່າງສຳເລັດຜົນ. ການເຂົ້າຮ່ວມຢ່າງຕັ້ງໜ້າຂອງຫວຽດນາມເຂົ້າໃນບັນດາການເຄື່ອນໄຫວທີ່ສໍາຄັນຂອງສະຫະປະຊາຊາດເຊັ່ນ: ການຮ່ວມມືພັດທະນາ , ຮັກສາສັນຕິພາບໃນໂລກ…ໄດ້ຮັບການຕີລາຄາສູງຈາກບັນດາປະເທດ .
ເປັນເຈົ້າການ, ຕັ້ງໜ້າປະກອບສ່ວນເຂົ້າໃນບັນຫາທົ່ວໂລກ
ໃນສະພາບການນີ້, ດ້ວຍບົດຮຽນ, ປະສົບການຂອງຕົນ , ຫວຽດນາມໄດ້ເປັນເຈົ້າການເຂົ້າຮ່ວມ ແລະ ປະກອບສ່ວນຢ່າງແທດຈິງເຂົ້າໃນວິວັດການເຈລະຈາສ້າງເອກະສານກອງປະຊຸມສຸດຍອດຂອງ ສປຊ ຄັ້ງນີ້ ແລະ ໂຄງການດຳເນີນງານ 2030 ກ່ຽວກັບການພັດທະນາແບບຍືນຍົງ . ໃນກອງປະຊຸມຄັ້ງນີ້, ທ່ານປະທານປະເທດຫວຽດນາມ ເຈືອງເຕີ້ນຊາງ ຈະສະເຫນີບົດລາຍງານການປະກາດໝາກຜົນ 15 ປີແຫ່ງການປະຕິບັດເປົ້າຫມາຍພັດທະນາສະຫັດສະວັດ - ເພື່ອໂລກໜຶ່ງທີ່ບໍ່ມີໃຜຖືກປະປ່ອຍທາງຫລັງ , ແບ່ງປັນບົດຮຽນ, ປະສົບການກັບໂລກກ່ຽວກັບການປະຕິບັດເປົ້າຫມາຍພັດທະນາສະຫັດສະວັດ ແລະ ເປົ້າໝາຍພັດທະນາແບບຍືນຍົງຂອງຫວຽດນາມຢ່າງສໍາເລັດຜົນ . ໃນຂອບເຂດຂອງກອງປະຊຸມດັ່ງກ່າວ, ທ່ານປະທານປະເທດຫວຽດນາມ ເຈືອງເຕີ້ນຊາງ ນໍາໜ້າຄະນະຜູ້ແທນຫວຽດນາມຈະພ້ອມກັບການນຳປະເທດຕ່າງໆຮັບຮອງເອົາເອກະສານກອງປະຊຸມສຸດຍອດທີ່ວາລະດຳເນີນກອງປະຊຸມຄົບຄະນະ; ເຂົ້າຮ່ວມກອງປະຊຸມສຸດຍອດກ່ຽວກັບການເຄື່ອນໄຫວຮັກສາສັນຕິພາບຂອງສະຫະປະຊາຊາດ; ເຂົ້າຮ່ວມກອງປະຊຸມການນໍາທົ່ວໂລກກ່ຽວກັບຄວາມສະເຫມີພາບລະຫວ່າງຍິງ-ຊາຍ. ທ່ານປະທານປະເທດຫວຽດນາມ ເຈືອງເຕີ້ນຊາງ ຍັງຈະພົບປະກັບປະທານາທິບໍດີ, ນາຍົກລັດຖະມົນຕີປະເທດຕ່າງໆທີ່ຫວຽດນາມຄວນຊຸກຍູ້ການພົວພັນຮ່ວມມື , ໂດຍສະເພາະທາງດ້ານເສດຖະກິດ, ການຄ້າ.
ເລື່ອງທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ນໍາໜ້າຄະນະຜູ້ແທນຫວຽດນາມເຂົ້າຮ່ວມກອງປະຊຸມສຸດຍອດ ສ.ປ.ຊ ຮັບຮອງເອົາໂຄງການດຳເນີນງານ 2030 ກ່ຽວກັບການພັດທະນາແບບຍືນຍົງ ແມ່ນບາດກ້າວສືບຕໍ່ຜັນຂະຫຍາຍແຜນນະໂຍບາຍເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນ, ຍົກສູງຮູບພາບ, ທີ່ຕັ້ງບົດບາດສາກົນຂອງຫວຽດນາມ; ສະແດງໃຫ້ເຫັນຄໍາຫມັ້ນສັນຍາ ແລະ ການຕັດສິນໃຈຂອງຫວຽດນາມໃນການປະຕິບັດບັນດາເປົ້າໝາຍພັດທະນາແບບຍືນຍົງ ແລະ ແບ່ງປັນບົດຮຽນ,ປະສົບການຂອງຫວຽດນາມໃນຂົງເຂດນີ້.