ໂດຍໄດ້ຮັບຄຳເຊື້ອເຊີນຂອງທ່ານປະທານປະເທດຫວຽດນາມເຈືອງເຕີນຊາງ, ວັນທີ 23/11, ປະທານາທິບໍດີແຫ່ງລັດອິດສະຣາແອນ Shimon Peres ໄດ້ເລີ່ມຕົ້ນການມາຢ້ຽມຢາມຫວຽດນາມຢ່າງເປັນທາງການ ໃນເວລາ 4 ວັນ. ນີ້ແມ່ນການມາຢ້ຽມຢາມຫວຽດນາມຂອງການນຳສູງສຸດອິດສະຣາແອນ ນັບແຕ່ສອງປະເທດສ້າງຕັ້ງການພົວພັນທາງການທູດນຳກັນເມື່ອປີ 1993. ການຢ້ຽມຢາມໄດ້ສ້າງກາລະໂອກາດໃຫ້ແກ່ການຮ່ວມມືລະຫວ່າງສອງປະເທດໃນຫລາຍຂົງເຂດ, ໂດຍສະເພາະແມ່ນບັນດາຂົງເຂດຊື່ງອິດສະຣາແອນມີທ່າແຮງ ແລະຫວຽດນາມມີຄວາມຕ້ອງການຮ່ວມມືຄື: ກະສິກຳ, ວິທະຍາສາດ-ເຕັກໂນໂລຊີ, ການລົງທຶນ, ການຄ້າ, ແຮງງານ, ການທ່ອງທ່ຽວ….
ພາຍຫລັງໄດ້ສ້າງຕັ້ງການພົວພັນທາງການທູດເມື່ອວັນທີ 12 ເດືອນກໍລະກົດປີ 1993, ສອງປະເທດຫວຽດນາມ ແລະອິດສະຣາແອນ ໄດ້ຈັດການເຄື່ອນໄຫວຫລາຍຢ່າງ ເປີດກ້ວາງຄວາມເຂົ້າອົກເຂົ້າໃຈຊື່ງກັນ ແລະກັນ, ຊຸກຍູ້ການຮ່ວມມືດ້ານເສດຖະກິດ, ການຄ້າ, ການບຳລຸງສ້າງ, ແລກປ່ຽນບົດຮຽນດ້ານວິທະຍາສາດ-ເຕັກໂນໂລຊີ…ພິເສດ, ໃນຂົງເຂດກະສິກຳ, ຊົນລະປະທານ, ສາທາລະນະສຸກ. ໃນໄລຍະມໍ່ໆມານີ້, ການພົວພັນລະຫວ່າງສອງປະເທດໄດ້ພັດທະນາເປັນຢ່າງດີ. ເດືອນມີນາປີ 2010, ທ່ານນາຍົກໆຫວຽດນາມຫງວຽນເຕີນຢູງ ໄດ້ຮັບຮອງເອົາແຜນນະໂຍບາຍຊຸກຍູ້ການພົວພັນຮ່ວມມືຫລາຍດ້ານລະຫວ່າງສອງປະເທດ. ອິດສະຣາແອນກໍ່ຖືການຊຸກຍູ້ການພົວພັນຮ່ວມມືກັບຫວຽດນາມເປັນສຳຄັນ ທີ່ສຸດ, ເປັນເຈົ້າການໃນການສົ່ງຫລາຍຄະນະຜູ້ແທນຂັ້ນສູງມາຫວຽດ ນາມ. ຜ່ານນັ້ນ, ໄດ້ຊຸກຍູ້ການພົວພັນດ້ານເສດຖະກິດລະຫວ່າງສອງຝ່າຍຫລາຍກ່ວາອີກ. ປີ 2010, ວົງເງິນການຄ້າຫວຽດນາມ-ອິດສະຣາແອນບັນລຸກ່ວາ 220 ລ້ານໂດລາສະຫະລັດ, ເພີ່ມຂຶ້ນ 34% ເມື່ອທຽບກັບປີ 2008. ປະຈຸບັນ, ອິດສະຣາແອນຢືນອັນດັບທີ 54 ໃນຈຳນວນ 93 ປະເທດ ແລະເຂດແຄ້ວນລົງທຶນເຂົ້າຫວຽດນາມ. ບັນດາບໍລິສັດຂອງອິດສະຣາແອນ ກໍ່ໄດ້ເຂົ້າຮ່ວມການຮ່ວມທຸລະກິດ, ລົງທຶນເຂົ້າບາງໂຄງການຢູ່ຮ່າໂນ້ຍ, ແຄງຮົ່ວ, ນະຄອນໂຮ່ຈິມິນ… ແຕ່ເຖິງແນວນັ້ນກໍ່ຕາມ, ທ່າແຮງຕົ້ນຕໍລະຫວ່າງອິດສະຣາແອນ ແລະຫວຽດນາມ ແມ່ນການຮ່ວມມືໃນຂົງເຂດກະສິກຳ. ຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ກ່ອນການມາຢ້ຽມຢາມຫວຽດນາມ, ປະທານາ ທິບໍດີ Shimon Peres ໄດ້ເນັ້ນໜັກວ່າ: “ຂ້າພະເຈົ້າຖືວ່າ ໜື່ງໃນບັນດາຂົງເຂດຮ່ວມມືສຳຄັນທີ່ສຸດລະຫວ່າງສອງປະເທດ ແມ່ນດ້ານກະສິກຳ. ອິດສະຣາແອນມີທ່າແຮງກ່ຽວກັບການພັດທະນາກະສິກຳ ແລະເຕັກນິກກະສິກຳ ແລະພວກຂ້າພະເຈົ້າຢາກແບ່ງປັນກັບພວກເພື່ອນ. ນອກຈາກນັ້ນແລ້ວ, ຂົງເຂດອື່ນທີ່ພວກຂ້າພະເຈົ້າຢາກເພີ່ມທະວີການ ຮ່ວມມືກັບຫວຽດນາມ ນັ້ນແມ່ນວິທະຍາສາດ, ບໍ່ພຽງແຕ່ໃນລະດັບລັດຖະບານເທົ່ານັ້ນ, ຫາກຍັງຢາກຮ່ວມມືລະຫວ່າງບັນດາບໍລິສັດ, ວິສາຫະກິດອີກດ້ວຍ”
ເຖິງວ່າ ແມ່ນປະເທດມີຄວາມຈຳກັດດ້ານຊັບພະຍາກອນທຳມະຊາດກໍ່ຕາມ, ແຕ່ຍ້ອນໄດ້ມີການພັດທະນາເຕັກໂນໂລຊີສູງ ແລະໄດ້ໝູນໃຊ້ເຂົ້າໃນການຜະລິດໃນທຸກໆຂະແໜງກະສິກຳ, ອຸດສາຫະກຳ .... ນັ້ນ, ອິດສະຣາແອນບັນລຸໄດ້ຜົນງານອັນໃຫ່ຍຫຼວງຫຼາຍຢ່າງ ໃນດ້ານເສດຖະກິດ; ແລະຖືກຈັດເຂົ້າບັນຊີລາຍຊື່ບັນດາປະເທດພັດທະນາ ແລະເປັນໜື່ງໃນຈຳນວນ 25 ປະເທດທີ່ມີລາຍຮັບສະເລັ່ຍຕໍ່ຫົວຄົນສູງກ່ວາໝູ່ໃນໂລກ. ສະມັດຕະພາບ ແລະຄຸນນະພາບຜະລິດຕະພັນກະເສດຂອງອິດສະຣາແອນ ຢືນອັນດັບໜື່ງໃນໂລກ. ຂະແໜງອຸດສາຫະກຳຂອງປະເທດນີ້ ກໍ່ມີການພັດທະນາດີ ດ້ວຍອັດຕາສ່ວນການຜະລິດຮັບໃຊ້ການສົ່ງອອກກວມເກືອບ 90% ວົງເງິນສົ່ງອອກສິນຄ້າ, ຢືນອັນດັບທີສອງກ່ຽວກັບຈຳນວນບັນດາບໍລິສັດເຕັກໂນໂລຊີຂໍ້ມູນຂ່າວສານ. ເພາະສະນັ້ນ, ດ້ວຍບັນດາບົດຮຽນອັນລ້ຳຄ່າຂອງຕົນ, ໃນໄລຍະຜ່ານມາ, ອິດສະຣາແອນໄດ້ສົ່ງຜູ້ຊ່ຽວຊານມາຫວຽດນາມເພື່ອຖ່າຍຖອດເຕັກໂນໂລຊີ. ຕາມທ່ານດິງຊວນລືວ ເອກອັກຄະລັດຖະທູດຫວຽດນາມປະຈຳອິດສະຣາແອນແລ້ວ, ອິດສະຣາແອນມີທ່າແຮງໃນບັນດາຂົງເຂດຊື່ງຫວຽດນາມມີຄວາມເອົາໃຈໃສ່, ສິ່ງນີ້ມີປະ ໂຫຍດທີ່ສຸດໃຫ້ແກ່ຫວຽດນາມ ໃນການໝູນໃຊ້ບັນດາຄວາມກ້າວໜ້າດ້ານວິທະຍາສາດເຕັກນິກ ແລະເຕັກໂນໂລຊີສູງ ເພື່ອພັດທະນາພື້ນຖານເສດຖະກິດ: “ຫວຽດນາມແມ່ນປະເທດທີ່ມີຄວາມສາມາດບົ່ມຊ້ອນດ້ານຊັບພະຍາກອນມະນຸດ, ແນ່ນອນວ່າ ດ້ານທຶນຮອນກໍ່ສຳຄັນ ແຕ່ຖ້າບໍ່ມີເຕັກໂນໂລຊີໃໝ່, ບໍ່ມີຄວາມກ້າວໜ້າດ້ານວິທະຍາສາດເຕັກນິກ ເລື່ອງຊຸກຍູ້ວິວັດທະນາການຫັນປະເທດຊາດເປັນອຸດສາຫະກຳ ທັນສະໄໝຢ່າງວ່ອງໄວ ກໍ່ຈະປະສົບກັບຄວາມຫຍູ້ງຍາກ. ກົງກັນຂ້າມ, ສຳລັບອິດສະຣາແອນແລ້ວ, ຫວຽດນາມແມ່ນຕະຫຼາດທີ່ໃຫ່ຍໂຕ. ໂດຍແມ່ນສະມາຊິກຂອງອາຊຽນ ແລະໃນເຂດການຄ້າເສລີອາຊຽນ-ຈິນ ດ້ວຍພົນລະເມືອງປະມານ 1 ຕື້ 900 ລ້ານຄົນນັ້ນ, ນີ້ຈະແມ່ນຕະຫຼາດທີ່ໃຫ່ຍຫຼວງທີ່ສຸດ ສຳລັບບັນດານັກເຕັກໂນໂລຊີອິດສະຣາແອນ”
ປະຈຸບັນ, ໂຄງການຮ່ວມມືດ້ານກະສິກຳຈຳນວນໜື່ງຄືປູກດອກໄມ້, ຜັກ, ຕົ້ນໄມ້ກິນໝາກ, ລ້ຽງງົວພັນນົມ….ທີ່ນຳໃຊ້ເຕັກໂນໂລຊີຂອງອິດສະຣາແອນຢູ່ຮ່າໂນ້ຍ, ຫາຍຟອງ, ເງະອານ, ດາລາດ ແລະນະຄອນໂຮ່ຈິມິນ ບັນລຸໄດ້ບັນດາໝາກຜົນໃນເບື້ອງຕົ້ນ ແລະພວມເສີມຂະຫຍາຍປະສິດທິຜົນ. ຄຽງຂ້າງນັ້ນ, ໃນໄລຍະທີ່ຜ່ານມາ, ຫວຽດນາມ ແລະອິດສະຣາແອນໄດ້ຮ່ວມມືກັນ ໃນຂົງເຂດຖ່າຍຖອດເຕັກໂນໂລຊີຢ່າງແໜ້ນແຟ້ນ ໂດຍສະເພາະແມ່ນໃນຂົງເຂດຫລຸດຜ່ອນບັນດາບັນຫາມົນລະພິດແຫລ່ງ ນ້ຳ, ຍົກສູງຄຸນນະພາບແຫຼ່ງນ້ຳ, ເຕັກໂນໂລຊີໃນການຫົດນ້ຳ, ບຳບັດນ້ຳເສດເຫຼືອ… ທ່ານເລດິງຕຽນ, ລັດຖະມົນຕີຊ່ວຍວ່າການກະຊວງວິທະຍາສາດ ແລະເຕັກໂນໂລຊີຫວຽດນາມຖືວ່າ: ການຄົ້ນຄ້ວາບັນດາເຕັກໂນໂລຊີກ້າວໜ້າຂອງອິດສະຣາແອນ ເພື່ອສ້າງເຕັກໂນໂລຊີບຳບັດນ້ຳ ກໍ່ຄືຄົ້ນຄ້ວາເພື່ອຄຸ້ມຄອງແຫຼ່ງຊັບພະຍາກອນນ້ຳໃຫ້ເໝາະສົມ, ຮັບເອົາບົດຮຽນ, ເປັນເຈົ້າການ, ນຳໃຊ້ບັນດາເຕັກໂນໂລຊີກ້າວໜ້າຢູ່ຫວຽດນາມຢ່າງເໝາະສົມ ແມ່ນບັນດາບັນຫາທີ່ຫວຽດນາມມີຄວາມເອົາໃຈໃສ່ທີ່ສຸດ. ສະນັ້ນ, ບັນດາເຕັກໂນໂລຊີກ້າວໜ້າຂອງອິດສະຣາແອນ ຈະສ້າງປະຖົມປັດໃຈສຳຄັນໃຫ້ແກ່ການຮ່ວມມືລະຫວ່າງສອງປະເທດ”
ປະຈຸບັນ, ຫວຽດນາມ ແລະອິດສະຣາແອນໄດ້ລົງນາມໃນສັນຍາຮ່ວມມືຫລາຍສະບັບໃນຂົງເຂດເສດຖະກິດ, ວິທະຍາສາດເຕັກນິກ, ກະສິກຳ, ການຄ້າ, ການທ່ອງທ່ຽວ, ວັດທະນະທຳ, ການຂົນສົ່ງທາງອາກາດ; ສັນຍາກ່ຽວກັບການຍົກເວັ້ນວີຊາໃຫ້ແກ່ໜັງສືຜ່ານແດນການທູດ, ລັດຖະການ; ສັນຍາຫລິກເວັ້ນການເກັບພາສີຊ້ອນ ແລະຕ້ານການໜີພາສີອາກອນ ສຳລັບອາກອນລາຍຮັບ ແລະຊັບສົມບັດ….. ນີ້ແມ່ນພື້ນຖານດ້ານກົດໝາຍສຳຄັນ ເພື່ອໃຫ້ສອງຝ່າຍເພີ່ມທະວີການຮ່ວມມື. ໃນການຕ້ອນຮັບປະທານາທິບໍດີ Shimon Peres ມາຢ້ຽມຢາມຫວຽດນາມຢ່າງເປັນການການ, ຫວຽດນາມ ຢັ້ງຢືນນະໂຍບາຍການພົວພັນກັບຕ່າງປະເທດ ຫັນເປັນຫຼາຍຮູບຫຼາຍແບບ, ຫຼາຍຝ່າຍກັບທຸກໆປະເທດ, ສະແດງໃຫ້ເຫັນຄວາມປາດຖະໜາ ຢາກເພີ່ມທະວີການຮ່ວມມືຫຼາຍດ້ານກັບອິດສະຣາແອນ, ພິເສດແມ່ນໃນບັນດາຂົງເຂດທີ່ອິດສະຣາແອນມີທ່າແຮງ. ການຢ້ຽມຢາມຈະເປີດຫຼາຍກາລະໂອກາດການຮ່ວມມືໃໝ່ລະຫວ່າງສອງປະເທດ.
ແອງຮ່ວຽນ+VOVTV