ທີ່ວາລະໄຂກອງປະຊຸມສະໄໝສາມັນເທື່ອທີ 11 ສະພາແຫ່ງຊາດຫວຽດນາມຊຸດທີ 13 ໃນຕອນເຊົ້າວັນທີ 21/3, ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ສະເໜີບົດລາຍງານເພີ່ມເຕີມຂອງລັດຖະບານກ່ຽວກັບການພັດທະນາເສດຖະກິດ-ສັງຄົມ, ໃນນັ້ນ ມີແຜນການພັດທະນາເສດຖະກິດ-ສັງຄົມໄລຍະ 5 ປີ 2016-2020. ແຜນການວາງອອກບັນດາເປົ້າໝາຍສັງລວມ ແລະ ຍົກອອກບັນດາວິທີການແກ້ໄຂເພື່ອປະຕິບັດໃນໄລຍະທີ່ຈະມາເຖິງ ຊຶ່ງຈະໄດ້ຮັບການປະກອບຄຳເຫັນຈາກບັນດາສະມາຊິກສະພາແຫ່ງຊາດ ກ່ອນທີ່ສະພາແຫ່ງຊາດລົງຄະແນນສຽງຮັບຮອງເອົາໃນກອງປະຊຸມສະພາແຫ່ງຊາດເທື່ອນີ້.
ທ່ານຮອງນາຍົກລັດຖະມົນຫວຽດນາມ ຫງວຽນຊວນຟຸກ ໄດ້ສະເໜີບົດລາຍງານເພີ່ມເຕີມຂອງລັດຖະບານກ່ຽວກັບການພັດທະນາ ເສດຖະກິດ-ສັງຄົມ |
ແຜນການພັດທະນາເສດຖະກິດ-ສັງຄົມໄລຍະ 5 ປີ 2016-2020 ໄດ້ວາງອອກບັນດາເປົ້າໝາຍສັງລວມ ນັ້ນແມ່ນຮັບປະກັນຄວາມສະຫງົບໝັ້ນທຽງທາງດ້ານເສດຖະກິດມະຫາພາກ, ສູ້ຊົນບັນລຸລະດັບການເຕີບໂຕເສດຖະກິດສູງກວ່າ 5 ປີກ່ອນນີ້. ຍູ້ແຮງການປະຕິບັດບັນດາບາດກ້າວບຸກທະລຸຍຸດທະສາດ, ສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບການເຕີບໂຕ, ຍົກສູງສະມັດທະພາບ, ປະສິດທິຜົນ ແລະ ກຳລັງແກ່ງແຍ້ງ. ເປັນເຈົ້າການຮັບມືກັບການປ່ຽນແປງຂອງດິນຟ້າອາກາດ, ປົກປັກຮັກສາອະທິປະໄຕແຫ່ງຊາດ ແລະ ຜຶນແຜ່ນດິນອັນຄົບຖ້ວນ, ຍົກສູງທີ່ຕັ້ງບົດບາດຂອງຫວຽດນາມບົນເວທີສາກົນ.
ທາງດ້ານເສດຖະກິດ, ລະດັບການເຕີບໂຕເສດຖະກິດ GDP ຄິດສະເລ່ຍ 5 ປີບັນລຸ 6,5-7%/ປີ. ຮອດປີ 2020 GDP ຄິດສະເລ່ຍໃສ່ຫົວຄົນແມ່ນປະມານ 3.200 ຫາ 3.500 USD . ອັດຕາສ່ວນອຸດສາຫະກຳ ແລະ ການບໍລິການໃນ GDP ບັນລຸກວ່າ 85%. ອັດຕາແຮງງານຜ່ານການບຳລຸງສ້າງບັນລຸປະມານ 65-70%. ອັດຕາການຊົມໃຊ້ປະກັນສຸຂະພາບບັນລຸປະມານ 80% ຈຳນວນພົນລະເມືອງ.
ສ້າງເສດຖະກິດມະຫາພາກເປັນປົກກະຕິ, ສ້າງສະພາບແວດລ້ອມ ແລະ ກຳລັງໜູນໃຫ້ແກ່ການ ພັດທະນາເສດຖະກິດ-ສັງຄົມ
ເພື່ອບັນລຸບັນດາຕົວເລກຄາດໝາຍ ພັດທະນາເສດຖະກິດ, ໃນ5 ປີ 2016-2020, ຫວຽດນາມສຸມໃສ່ສ້າງລະບອບເສດຖະກິດຕະຫຼາດໃຫ້ສົມບູນແບບ ຄົບຊຸດ ແລະ ທັນສະໄໝບົນພື້ນຖານປະຕິບັດຕາມບັນດາກົດເກນຂອງເສດຖະກິດການຕະຫຼາດ ແລະ ການເຊື່ອມໂຍງເຂົ້າກັບເສດຖະກິດສາກົນຢ່າງຄົບຖ້ວນ. ທ່ານຮອງນາຍົກລັດຖະມົນຕີລັດຖະມົນຕີຫວຽດນາມ ຫງວຽນຊວນຟຸກ ໃຫ້ຮູ້ວ່າ :
“ພັດທະນາ ແລະ ນຳບັນດາຕະຫຼາດເຂົ້າສູ່ການເຄື່ອນໄຫວຢ່າງທະລຸລົງ ແລະ ມີປະສິດທິຜົນ; ຮັບປະກັນການແກ່ງແຍ້ງຢ່າງສະເໝີພາບ, ໂປ່ງໃສລະຫວ່າງບັນດາວິສາຫະກິດ. ບໍລິຫານນະໂຍບາຍເງິນຕາ, ນະໂຍບາຍປີງົບປະມານ ແລະ ບັນດານະໂຍບາຍອື່ນໆຢ່າງມີປະສິດທິຜົນເພື່ອຄວບຄຸມເງິນເຟີ້, ສ້າງມຸນຄ່າຂອງສະກຸນເງິນດົງຫວຽດນາມໃຫ້ມີຄວາມສະຫງົບໝັ້ນທຽງ, ເພີ່ມທະວີການສະສົມເງິນຕາຕ່າງປະເທດ, ຮັບປະກັນຄວາມດຸ່ນດ່ຽງໃຫຍ່ຂອງພື້ນຖານເສດຖະກິດ; ຂຸດຄົ້ນບັນດາຄຳໝັ້ນສັນຍາສາກົນ, ເປີດກ້ວາງຕະຫຼາດສົ່ງອອກ, ເພີ່ມທະວີການສົ່ງເສີມການຄ້າຕິດພັນກັບການສ້າງເຄື່ອງໝາຍການຄ້າ, ພັດທະນາຕະຫຼາດພາຍໃນປະເທດຢ່າງແຂງແຮງ ”
ຫວຽດນາມກໍຕ້ອງຍູ້ແຮງການສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບການເຕີບໂຕ, ຍົກສູງສະມັດທະພາບ, ປະສິດທິຜົນ ແລະ ກຳລັງແກ່ງແຍ້ງ. ທ່ານຮອງນາຍົກລັດຖະມົນຕີລັດຖະມົນຕີຫວຽດນາມ ຫງວຽນຊວນຟຸກ ເນັ້ນໜັກວ່າ :
“ປ່ຽນໃໝ່ຮູບແບບການເຕີບໂຕ, ຮັບປະກັນການພັດທະນາໄວ ແລະ ຍືນຍົງ. ສືບຕໍ່ຜັນຂະຫຍາຍແຜນຮ່າງສັງລວມສ້າງໂຄງປະກອບພື້ນຖານເສດຖະກິດຄືນໃໝ່ ແລະ ສ້າງໂຄງປະກອບຂະແໜງການ ແລະ ຂົງເຂດຕ່າງໆຄືນໃໝ່. ປະຕິບັດບັນດາວິທີການແກ້ໄຂຍູ້ແຮງ ແລະ ຍົກສູງປະສິດທິຜົນການສ້າງໂຄງປະກອບກະສີກຳຄືນໃໝ່ຕິດພັນກັບການກໍ່ສ້າງຊົນນະບົດໃໝ່. ຍູ້ແຮງການສ້າງໂຄງປະກອບອຸດສາຫະກຳຄືນໃໝ່, ສ້າງພື້ນຖານໃຫ້ແກ່ການຫັນເປັນອຸດສາຫະກຳ ແລະ ທັນສະໄໝ, ສຸມໃສ່ພັດທະນາການທ່ອງທ່ຽວໃຫ້ກາຍເປັນຂະແໜງເສດຖະກິດປາຍແຫຼມ; ເອົາໃຈໃສ່ເຖິງການເຂົ້າຮ່ວມເຄືອຂ່າຍແຈກຢາຍທົ່ວໂລກ. ພັດທະນາບັນດາຂະແໜງເສດຖະກິດທະເລຕິດພັນກັບການປົກປັກຮັກສາອະທິປະໄຕແຫ່ງຊາດຢ່າງໝັ້ນຄົງໜັກແໜ້ນ. ສົ່ງເສີມບັນດາພາກສ່ວນເສດຖະກິດລົງທຶນພັດທະນາບັນດາຂະແໜງຂຸດຄົ້ນ, ປຸງແຕ່ງນ້ຳມັນອາຍແກັສ, ທ່າກຳປັ່ນທະເລ, ຕໍ່ ແລະ ສ້ອງແປງກຳປັ່ນ, ຂຸດຄົ້ນ ແລະ ປຸງແຕ່ງສິນທະເລ, ບັນດາການບໍລິການຮັບໃຊ້ອາຊີບການປະມົງ ແລະ ການທ່ອງທ່ຽວຢູ່ໝູເກາະທະເລ ”
ຫວຽດນາມຍັງຈະຜັນຂະຫຍາຍປະຕິບັດກົດໝາຍວ່າດ້ວຍການລົງທຶນສາທາລະນະ ແລະ ແຜນການລົງທຶນສາທາລະນະໄລຍະກາງ 2016-2020, ຮັບປະກັນການຄຸ້ມຄອງລວມສຸນ, ເປັນເອກະພາບ, ແທດເໝາະກັບໜ້າທີ່ພັດທະນາເສດຖະກິດ-ສັງຄົມ; ຄວາມສາມາດດຸ່ນດ່ຽງເງິນລົງທຶນຂອງລັດ ແລະ ເພີ່ມທະວີການດຶງດູດບັນດາແຫຼ່ງເງິນລົງທຶນຂອງຕ່າງປະເທດ.
ເອົາໃຈໃສ່ຮັບມືກັບການປ່ຽນແປງຂອງດິນຟ້າອາກາດ
ໜຶ່ງໃນບັນດາເນື້ອໃນບຸລິມະສິດຂອງຫວຽດນາມໃນໄລຍະ 5 ປີທີ່ຈະມາເຖິງ ແມ່ນເອົາໃຈໃສ່, ເປັນເຈົ້າການຮັບມືກັບການປ່ຽນແປງຂອງດິນຟ້າອາກາດ, ປ້ອງກັນ ແລະ ຕ້ານໄພທຳມະຊາດ. ຕາມນັ້ນແລ້ວ, ຫວຽດນາມເພີ່ມທະວີການກຄຸ້ມຄອງລັດ, ເປັນເຈົ້າການຮ່ວມມືກັບສາກົນກ່ຽວກັບການຮັບມືກັບການປ່ຽນແປງຂອງດິນຟ້າອາກາດ; ສ້າງລະບົບກົດໝາຍ, ກົນໄກນະໂຍບາຍໃຫ້ສົມບູນແບບ ແລະ ປະຕິບັດບັນດາມາດຕະການເປັນເຈົ້າການຮັບມືກັບການປ່ຽນແປງຂອງດິນຟ້າອາກາດ, ປ້ອງກັນ ແລະ ຕ້ານໄພທຳມະຊາດ, ຄຸມຄອງຊັບພະຍາກອນທຳມະຊາດ ແລະ ປົກປັກຮັກສາສິ່ງແວດລ້ອມ…
ປົກປັກຮັກສາອະທິປະໄຕແຫ່ງຊາດຢ່າງໝັ້ນຄົງໜັກແໜ້ນ, ເປັນເຈົ້າການເຊື່ອມໂຍງເຂົ້າກັບເສດຖະກິດສາກົນ
ໃນໄລຍະ 5 ປີທີ່ຈະມາເຖິງ, ຫວຽດນາມສືບຕໍ່ປະຕິບັດຍຸດທະສາດປົກປັກຮັກສາປະເທດຊາດໃນສະພາບການໃໝ່ໃຫ້ເປັນຢ່າງດີ, ປະຕິບັດການເຄື່ອນໄຫວພົວພັນຕ່າງປະເທດຢ່າງມີປະສິດທິຜົນ. ເມື່ອເຕື້ອງເຖິງໜ້າທີ່ນີ້, ທ່ານຮອງນາຍົກລັດຖະມົນຕີລັດຖະມົນຕີຫວຽດນາມ ຫງວຽນຊວນຟຸກ ຊີ້ແຈ້ງວ່າ :
“ ເດັດດ່ຽວ ແລະ ຍຶດໝັ້ນການຕໍ່ສູ້ປົກປັກຮັກສາເອກະລາດອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນ, ຮັກສາສະຖຽນລະພາບທາງດ້ານການເມືອງສັງຄົມໃຫ້ໝັ້ນຄົງ, ສ້າງສະພາບແວດລ້ອມແຫ່ງສັນຕິພາບເພື່ອສ້າງສາ ແລະ ພັດທະນາປະເທດຊາດ, ບໍ່ປະໃຫ້ຕົກຢູ່ໃນທ່າຮັບ, ກະທັນຫັນໃນທຸກສະພາບການ. ສ້າງເຫຼົ່າທັບ, ເຫຼົ່າຮົບຈຳນວນໜຶ່ງໃຫ້ທັນສະໄໝເທື່ອລະກ້າວ; ຍົກສູງປະສິດທິພາບການເຄື່ອນໄຫວຂອງບັນດາກຳລັງປະຕິບັດກົດໝາຍບົນທະເລ. ປະຕິບັດແນວທາງການຕ່າງປະເທດຂອງພັກ ແລະ ລັດຢ່າງສະເໝີຕົ້ນສະເໝີປາຍ, ນຳການພົວພັນກັບບັນດາຄູ່ຮ່ວມມືເຂົາສູ່ລວງເລິກ, ແທດດຈິງ ແລະ ມີປະສິດທິຜົນ, ຍົກສູງປະສິດທິຜົນການເຄຶ່ອນໄຫວພົວພັນຫຼາຍຝ່າຍ, ເປັນຕົ້ນແມ່ນໃນຂອບເຂດອາຊຽນ, ສະຫະປະຊາຊາດ. ປະຕິບັດບັນດາຄຳໝັ້ນສັນຍາສາກົນ ແລະ ບັນດາສັນຍາການຄ້າເສລີລຸ່ນໃໝ່ຢ່າງມີປະສິດທິຜົນ. ປະຕິບັດວຽກງານຊາວຫວຽດນາມອາໄສຢູ່ຕ່າງປະເທດ ແລະ ປົກປ້ອງພົນລະເມືອງ, ສ້າງເງື່ອນໄຂສະດວກເພື່ອໃຫ້ ຊາວຫວຽດນາມອາໄສຢູ່ຕ່າງປະເທດເຂົ້າຮ່ວມໃນການສ້າງສາ ແລະ ປົກປັກຮັກສາປະເທດຊາດ”
ແຜນການພັດທະນາເສດຖະກິດ-ສັງຄົມໄລຍະ 5 ປີ 2016-2020 ໂດຍ ທ່ານຮອງນາຍົກລັດຖະມົນຕີລັດຖະມົນຕີຫວຽດນາມ ຫງວຽນຊວນຟຸກ ສະເໜີນັ້ນ ໄດ້ຊີ້ແຈ້ງວ່າ ຫວຽດນາມປະຕິບັດແຜນການ 5 ປີໃນສະພາບການຢູ່ພາຍໃນປະເທດ ແລະ ສາກົນມີເງື່ອນໄຂສະດວກຫຼາຍຢ່າງ ແຕ່ກໍປະສົບກັບສິ່ງທ້າທາຍບໍ່ແມ່ນໜ້ອຍ. ລັດຖະບານຈະຮີບເຮັ່ງສ້າງໂຄງການດຳເນີນງານພາຍຫຼັງທີ່ແຜນການໄດ້ຮັບການຮັບຮອງເອົາຈາກສະພາແຫ່ງຊາດເພື່ອຜັນຂະຫຍາຍປະຕິບັດບັນດາເປົ້າໝາຍ, ໜ້າທີ່, ວິທີການແກ້ໄຂທີ່ໄດ້ວາງອອກຢ່າງຄົບຊຸດ ແລະ ມີຈຸດສຸມ.