ບົດລາຍງານແງ່ຫວັງເສດຖະກິດໂລກ ໂດຍກອງທຶນເງິນຕາສາກົນປະກາດຫວ່າງແລ້ວນີ້ ໄດ້ຕີລາຄາສູງບັນດາໝາກຜົນຊຶ່ງຫວຽດນາມບັນລຸໄດ້ ພາຍຫລັງປະຕິບັດມະຕິເລກທີ 11 ຂອງລັດຖະບານກ່ຽວກັບການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັບປະກັນຊີວິດສັງຄົມ ໂດຍລະອຽດແມ່ນ ໄພເງິນເຟີ້ ໃນໄລຍະມໍ່ໆມານີ້ ໄດ້ມີທ່າອ່ຽງຫລຸດລົງ ແຕ່ເຖິງຢ່າງໃດກໍຕາມ, ຕໍ່ຫນ້າບັນດາການກະທົບຈາກການຊຸກໂຊມເສດຖະກິດໂລກ ພິເສດແມ່ນບ້ວງຫນິ້ສິນຂອງສະຫະລັດອາເມລິກາ ແລະ ພາກພື້ນເອີລົບ, ຫວຽດນາມ ໄດ້ກຳນົດຈະສືບຕໍ່ຢືດໝັ້ນບັນດານະໂຍບາຍການເງິນຢ່າງແຫນ້ນແຟ້ນ ແລະ ມີບັນດາມາດຕະການແກ້ໄຂດ້ວຍຄວາມໄຫວພິບກວ່າ ເພື່ອຮັບປະກັນຄາດໝາຍທີ່ໄດ້ວາງອອກໃຫ້ແກ່ປີນີ້ ແລະ ຊຸມປີຕໍ່ໄປ.
ສະພາບເສດຖະກິດຊຸດໂຊມຢູ່ບັນດາປະເທດພັດທະນາ ພວມສົ່ງຜົນກະທົບຢ່າງຮ້າຍແຮງເຖິງບັນດາປະເທດຫາກໍ່ພົ້ນເດັ່ນຂຶ້ນ ບັນດາປະເທດພວມພັດທະນາ ໃນນັ້ນ ມີຫວຽດນາມ ເປັນຕົ້ນແມ່ນການກະທົບເຖິງສະພາບການສົ່ງອອກ, ການດຶງດູດແຫລ່ງເງິນລົງທຶນໂດຍກົງຈາກຕ່າງປະເທດ. ບັນດາຜູ້ຊ່ຽວຊານເສດຖະກິດຖືວ່າ: ສິ່ງທ້າທາຍຂອງຫວຽດນາມກໍ່ຄືບັນດາປະເທດຫາກໍ່ພົ້ນເດັ່ນຂຶ້ນ ຢູ່ ອາຊີ ແມ່ນຂາດດຸນງົບປະມານ, ຫນິ້ສິນຂອງລັດໄດ້້ສົ່ງຜົນສະທ້ອນເຖິງການພັດທະນາໄລຍະຍາວ. ປະຈຸບັນ ການນຳເຂົ້າສິນຄ້າຂອງຫວຽດນາມ ກວມອັດຕາສ່ວນສູງໃນພື້ນຖານເສດຖະກິດ ເມື່ອສິນຄ້າຂອງໂລກເພີ່ມຂຶ້ນສູງ ຈະສົ່ງຜົນກະທົບບໍ່ຫນ້ອຍເຖິງສະພາບໄພເງິນເຟີ້ຢູ່ພາຍໃນປະເທດ. ດອກເຕີ ຫວໍຈີແທ່ນ ຮອງຫົວຫນ້າສະຖາບັນຄົ້ນຄ້ວາບໍລິຫານເສດຖະກິດສູນກາງ ໄດ້ໄຈ້ແຍກວ່າ:
“ຫວຽດນາມພວມຕ້ອງປະເຊີນຫນ້າກັບສະພາບເສດຖະກິດມະຫາພາກຂາດຄວາມເປັນປົກກະຕິ ແລະ ໄພເງິນເຟີ້ຢູ່ໃນລະດັບສູງ. ຫວຽດນາມກໍພວມໃນວິວັດການຮຽບຮຽງຄືນໃຫມ່ ແລະ ສ້າງສຳເລັດແຜນການ 5 ປີ. ໃນແຜນການ 5 ປີນັ້ນ ສອງບັນຫາຍັງຄົງສ້າງຄວາມສົນໃຈເປັນພິເສດ. ທີຫນຶ່ງແມ່ນເລືອກເຟັ້ນຄວາມດຸນດຽງລະຫວ່າງຄວາມເປັນປົກກະຕິຂອງພື້ນຖານເສດຖະກິດມະຫາພາກໃນຕະຫລອດໄລຍະຈະມາເຖິງ ແລະ ການປະຕິຮູບໂຄງປະກອບ, ພິເສດແມ່ນກ່ຽວຂ້ອງເຖິງການປະຕິຮູບລັດວິສາຫະກິດ, ປະຕິຮູບການລົງທຶນຂອງລັດ, ປະຕິຮູບງົບປະມານ, ລະບົບຈັດແບ່ງສິດອຳນາດ, ພັດທະນາອົງປະກອບພື້ນຖານໂຄງລ່າງ, ແຫລ່ງຊັບພະຍາ ກອນມະນຸດ, ປະຕິຮູບລະບອບອື່ນໆ. ພິເສດແມ່ນບັນດາການປະຕິຮູບທີ່ກ່ຽວຂ້ອງເຖິງລະບອບຂອງລັດ, ປັດໃຈການຜະລິດຄື: ທີ່ດິນ, ແຮງງານ, ຕະຫລາດທຶນຮອນ ແລະ ອື່ນໆ.“
ຕໍ່ຫນ້າສິ່ງທ້າທາຍຄືດັ່ງກ່າວ,ໃນໄລຍະຜ່ານມາ, ລັດຖະບານຫວຽດນາມ ໄດ້ມີການເຄື່ອນໄຫວຢ່າງຕັ້ງຫນ້າໃນການຄວບຄຸມໄພເງິນເຟິ້, ຮັກສາເສດຖະກິດມະຫາພາກເປັນປົກກະຕິ ແລະ ຮັບປະກັນຊີວິດສັງຄົມ. ທຳອິດແມ່ນການປະກາດໃຊ້ມະຕິເລກທີ 11 ຂອງລັດຖະບານ ດ້ວຍໝວດ 6 ມາດຕະການ ແລະ ໃນເບື້ອງຕົ້ນໄດ້ສະແດງໃຫ້ເຫັນຢ່າງຈະແຈ້ງຄຳໝັ້ນສັນຍາຂອງລັດຖະບານໃນການບໍລິຫານເສດຖະກິດມະຫາພາກ. ຫວ່າງແລ້ວນີ້ ທະນາຄານແຫ່ງລັດໄດ້ມີຫລາຍມາດຕະການແກ້ໄຂບັນຫາຕະຫລາດເງິນຕາຕ່າງປະເທດ ແລະ ຫລຸດຜ່ອນອັດຕາໄພເງິນເຟີ້, ສ້າງພື້ນຖານອັນຕັ້ງຫນ້າທີ່ມີຕໍ່ຕະຫລາດເງິນຕາ, ເລື່ອງຫລຸດຜ່ອນອັດຕາດອກເບ້ຍທະນາຄານໃນໄລຍະຜ່ານມາກໍໄດ້ບັນເທົາຄວາມວິກັງວົນຂອງປະຊາຊົນຂອງປຊຊ ກ່ຽວກັບຄວາມສ່ຽງຕໍ່ໄພເງິນເຟີ້ ແລະ ສ້າງຄວາມໄວ້ເນື້ອເຊື່ອໃຈ ແລະ ນຳມາຊຶ່ງຄວາມເປັນປົກກະຕິໃຫ້ແກ່ສະກຸນເງິນດົງ. ຜູ້ວ່າການທະນາຄານແຫ່ງລັດຫວຽດນາມ ຫງວຽນວັນບີ່ນຖືວ່າ:
“ນະໂຍບາຍເງິນຕາຂອງພວກເຮົາ ພວມໄດ້ຮັບການບໍລິຫານຢ່າງແຫນ້ນແຟ້ນ ເພື່ອຄວບຄຸມໄພເງິນເຟີ້ຕາມເນື້ອໃນຈິດໃຈຂອງມະຕິເລກທີ 11. ດ້ວຍການກຳນົດອັດຕາດອກເບ້ຍເພດານ 14% ຄືໄລຍະຜ່ານມານັ້ນ ພວກເຮົາໄດ້ມີເງື່ອນໄຂເພື່ອຫລຸດຜ່ອນອັດຕາດອກເບ້ຍໃຫ້ກູ້ຢືມ, ເຮັດໃຫ້ວິສາຫະກິດມີເງື່ອນໄຂສຳພັດກັບແຫລ່ງທຶນຂອງທະນາຄານອີກບາດກ້າວຫນຶ່ງ ແລະ ຊ່ວຍບັນເທົາຄວາມຫຍູ້ງຍາກໃນການຜະລິດ.“
ຕາມການຄາດຄະແລ້ວ, ລະດັບການເຕີບໂຕຂອງຫວຽດນາມໃນປີນີ້ແມ່ນປະມານ 5,8%. ປີຫນ້າອາດຈະຕ່ຳກວ່າ ຍ້ອນຜົນສະທ້ອນບໍ່ດີຂອງພື້ນຖານເສດຖະກິດໂລກ. ດ້ວຍການເປີດກວ້າງຂອງພື້ນຖານເສດຖະກິດຫວຽດນາມ, ເມື່ອເສດຖະກິດໂລກຖືກຊຸດໂຊມ ແນ່ນອນວ່າຈະສົ່ງຜົນສະທ້ອນເຖິງການລົງທຶນ ແລະ ການຄ້າ. ໃນສະພາບການນັ້ນ ເພື່ອບັນລຸຈຸດໝາຍທີ່ໄດ້ວາງອອກ ແມ່ນຄວບຄຸມໄພເງິນເຟີ້ຢູ່ໃນລະດັບ 18%/ປີ ໃນປີນີ້ ແລະ ຕ່ຳກວ່າ 10%/ປີໃນຫນ້າ. ໃນໄລຍະກາງ, ຈະຄວບຄຸມໄພເງິນເຟີ້ຢູ່ໃນລະດັບ 5%/ປີ, ຫວຽດນາມກຳນົດວ່າ ຄວນສ້າງຄວາມດຸນດ່ຽງລະຫວ່າງຄວາມມານະພະຍາຍາມຕ້ານໄພເງິນເຟີ້ ດ້ວຍຈຸດໝາຍຈະເລີນເຕີບໂຕ, ເພື່ອຮັບປະກັນພື້ນຖານເສດຖະກິດພັດທະນາແບບຍື່ນຍົງກວ່າ. ເພື່ອຄວບຄຸມໄພເງິນເຟີ້ໃຫ້ໄດ້, ຫນຶ່ງໃນບັນດາມາດຕະການຊຶ່ງຫວຽດນາມໄດ້ປະຕິບັດຢ່າງຂ້ຽວຂາດໃນໄລຍະຜ່ານມາ ແມ່ນຫລຸດຜ່ອນການລົງທຶນຂອງລັດ. ເຖິງຢ່າງໃດກໍຕາມ ມາດຕະການນີ້ກໍໄດ້ຮັບການຜັນຂະຫຍາຍການປະຕິບັດຢ່າງມີໄຫວພິບ. ຕາມທ່ານ ບູ່ຍກວາງວິນ ລັດຖະມົນຕີກະຊວງແຜນການ ແລະ ການລົງທຶນແລ້ວ, ກ່ອນນີ້ ຮູບແບບການເຕີບໂຕຂອງຫວຽດນາມ ແມ່ນອີງໃສ່ການລົງທຶນຂອງລັດເປັນຕົ້ນ ແຕ່ປະຈຸບັນແມ່ນຮອດຈຸດເວລາແລ້ວ ຕ້ອງມີການດັດປັບໂຄງປະກອບການລົງທຶນເທື່ອລະກ້າວ ຕາມທິດຄອ່ຍໆຫລຸດຜ່ອນການລົງທຶນຂອງລັດ. ເຖິງຢ່າງໃດກໍຕາມ ຫລຸດຜ່ອນການລົງທຶນຂອງລັດບໍ່ໝາຍຄວາມວ່າ ຫລຸດຜ່ອນຍອດລະດັບເງິນລົງທຶນຂອງສັງຄົມ ຫາກຈະເພີ່ມທະວີເງິນລົງທຶນຂອງບັນດາພາກສ່ວນເສດຖະກິດພາຍໃນ ແລະ ຕ່າງປະເທດ ເພື່ອພັດທະນາ. ຍ້ອນຄວາມຕ້ອງການລົງທຶນກໍ່ສ້າງພື້ນຖານໂຄງລ່າງຂອງປະເທດຊາດ ຍັງຄົງມີຄວາມຈຳເປັນທີ່ສຸດໃນໄລຍະປະຈຸບັນ. ທ່ານບູ່ຍກວາງວີນ ເນັ້ນຫນັກ:
“ໃນໄລຍະຫັນປ່ຽນຮູບການການລົງທຶນຄືປະຈຸບັນ, ພວກເຮົາຄວນເປີດກວ້າງກົນໄກໃຫ້ສະດວກງ່າຍດາຍກວ່າ, ລັດອາດຈະຮັບຮູ້ການຫນູນຊ່ວຍສ່ວນຫນຶ່ງໃຫ້ແກ່ວິສາຫະກິດ ເພື່ອໃຫ້ວິສາຫະກິດລົງທຶນເຂົ້າໃນບັນດາໂຄງການ ແລະ ບັນລຸປະສິດທິຜົນຢ່າງໂປ່ງໃສ. ໃນໄລຍະຈະມາເຖິງ, ກະຊວງແຜນການ ແລະ ການລົງທຶນຈະພິຈາລະນາສະເຫນີໃຫ້ລັດຖະບານປັບປຸງ, ເພີ່ມເຕີມຂໍ້ຕົກລົງກ່ຽວກັບຮູບການການລົງທຶນຂອງລັດ, ໃຫ້ສອດຄ່ອງກັບພຶດຕິກຳຕົວຈິງຂອງຫວຽດນາມກວ່າອີກ.“
ຕາມການຕີລາຄາຂອງບັນດາຜູ້ຊ່ຽວຊານແລ້ວ, ຫວຽດນາມ ພວມເດີນຖືກທິດໃນການຫລຸດຜ່ອນໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ.ໃນໄລຍະຈະມາເຖິງ, ຫວຽດນາມ ຄວນສືບຕໍ່ຮັກສາການບໍລິຫານນະໂຍບາຍເງິນຕາຢ່າງແຫນ້ນແຟ້ນ ແລະ ມີຄວາມໄຫວພິບ. ພ້ອມກັນນັ້ນ ຫວຽດນາມ ກໍພວມມານະພະຍາຍາມຍົກສູງລະບົບຮັບປະກັນຊີວິດສັງຄົມ ເພື່ອຫລຸດຜ່ອນການກະທົບຈາກສະພາບຂາດຄວາມສະຖຽນລະພາບເສດຖະກິດຕໍ່ຜູ້ທຸກຍາກ ຜູ້ມີລາຍຮັບຕ່ຳ./