ທີ່ກອງປະຊຸມສະໄໝສາມັນເທື່ອທີ 10 ສະພາແຫ່ງຊາດຫວຽດນາມຊຸດທີ 13, ບັນດາສະມາຊິກສະພາແຫ່ງຊາດພວມສຸມໃສ່ປຶກສາຫາລືບັນດາມາດຕະການແກ້ໄຂເພື່ອພັດທະນາເສດຖະກິດ-ສັງຄົມໃນໄລຍະທີ່ຈະມາເຖິງ, ໃນນັ້ນເອົາໃຈໃສ່ສ້າງເສດຖະກິດມະຫາພາກເປັນປົກກະຕິ, ສູ້ຊົນບັນລຸລະດັບການເຕີບໂຕເສດຖະກິດປີ 2016 ສູງກວ່າປີ 2015.
ບັນດາສະມາຊິກສະພາແຫ່ງຊາດພວມສຸມໃສ່ປຶກສາຫາລືບັນດາມາດຕະການແກ້ໄຂເພື່ອພັດທະນາເສດຖະກິດ-ສັງຄົມໃນໄລຍະທີ່ຈະມາເຖິງ |
ລາຍງານຕໍ່ສະພາແຫ່ງຊາດ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ໃຫ້ຮູ້ວ່າ : ໃນໄລຍະ 5 ປີ 2016-2020, ລັດຖະບານສືບຕໍ່ປະຕິບັດການຊຸກຍູ້ການສ້າງໂຄງປະກອບເສດຖະກິດຄືນໃໝ່ຢ່າງຄົບຊຸດ ແລະ ຂ້ຽວຂາດໂດຍຕິດພັນກັບການປ່ຽນໃໝ່ຮູບແບບການເຕີບໂຕ, ຍົກສູງຊີວິດທາງດ້ານວັດຖຸ ແລະ ຈິດໃຈໃຫ້ແກ່ປະຊາຊົນ. ສຸມໃສ່ສ້າງລະບອບເສດຖະກິດຕະຫຼາດໃຫ້ສົມບູນແບບ, ຄົບຊຸດ ແລະ ທັນສະໄໝບົນພື້ນຖານປະຕິບັດຕາມກົດເກນຂອງເສດຖະກິດຕະຫຼາດ ແລະ ເຊື່ອມໂຍງເຂົ້າກັບເສດຖະກິດສາກົນ. ພັດທະນາບັນດາຕະຫຼາດ ແລະ ໃຫ້ເຄື່ອນໄຫວຢ່າງທະລຸລົງ, ມີປະສິດທິຜົນ; ຮັບປະກັນການແກ່ງແຍ້ງຢ່າງສະເໝີພາບ, ກະຈ່າງແຈ້ງລະຫວ່າງບັນດາວິສຫະກິດທີ່ຂຶ້ນກັບທຸກພາກສ່ວນເສດຖະກິດ.
ຍູ້ແຮງການສ້າງໂຄງປະກອບເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບການເຕີບໂຕ
ບັນດາສະມາຊິກສະພາແຫ່ງຊາດໄດ້ເຫັນດີເປັນເອກະສັນຢ່າງສູງດ້ວຍຄວາມຕັດສິນໃຈ, ລັດຖະນະໂຍບາຍຂອງລັດຖະບານ ແລະ ຖືວ່າ ຄາດໝາຍການເຕີບໂຕໃນໄລຍະ 5 ປີ 2016-2020 ແມ່ນຢູ່ໃນລະດັບແຕ່ 6,5-7%/ປີ ແມ່ນອາດເປັນໄປໄດ້. ທ່ານເຈີນຮ່ວາງເງິນ ກຳມະການໃນກຳມາທິການເສດຖະກິດຂອງສະແຫ່ງຊາດຫວຽດນາມ,ສະມາຊິກສະພາແຫ່ງຊາດນະຄອນໂຮ່ຈິມິນ ຖືວ່າ :
“ຫວຽດນາມໄດ້ຍູ້ໄວວິວັດການສ້າງໂຄງປະກອບເສດຖະກິດຄືນໃໝ່ໃນ 3 ປີມໍ່ໆມານີ້, ເປັນຕົ້ນແມ່ນໃນການສ້າງໂຄງປະກອບການລົງທຶນພາກລັດຄືນໃໝ່, ສ້າງໂຄງປະກອບບັນດາກຸ່ມບໍລິສັດ, ບໍລິສັດໃຫຍ່ແຫ່ງລັດຄືນໃໝ່, ພິເສດແມ່ນບັນລຸປະສິດທິຜົນໃນການສ້າງໂຄງປະກອບລະບົບທະນາຄານການຄ້າຄືນໃໝ່. ພວກເຮົາຕ້ອງເດັດດຽວຮັກສາເສດຖະກິດມະຫາພາກເປັນປົກກະຕິ ແລະ ໝັ້ນຄົງ, ໝາຍຄວາມວ່າ ພວກເຮົາຕ້ອງຄວບຄຸມເປັນຢ່າງດີສຳລັບເງິນເຟີ້ ແລະ ບັນຫາກ່ຽວກັບດຸ່ນການຄ້າ, ດຸນຊຳລະການຄ້າ, ອັດຕາແລກປ່ຽນເງິນຕາ, ຄວບຄຸມລາຍຈ່າຍງົບປະມານເກີນດຸນ, ຄວບຄຸມລະດັບເພີ່ມຂອງໜີ້ສາທາລະນະ. ທັງໝົດເຫຼົ່ານັ້ນ ກໍເປັນການຊ່ວຍຫວຽດນາມມີການເຕີບໂຕຢ່າງໝັນຄົງ”
ບັນດາສະມາຊິກສະພາແຫ່ງຊາດເນັ້ນໜັກເຖິງເລື່ອງສືບຕໍ່ຜັນຂະຫຍາຍແຜນສັງລວມສ້າງໂຄງປະກອບເສດຖະກິດ ແລະ ສ້າງໂຄງປະກອບບັນດາຂະແໜງການ, ຂົງເຂດຕ່າງໆຄືນໃໝ່. ປະຕິບັດບັນດາມາດຕະການຍູ້ແຮງ ແລະ ຍົກສູງປະສິດທິຜົນການສ້າງໂຄງປະກອບກະສີກຳຄືນໃໝ່ໂດຍຕິດພັນກັບການກໍ່ສ້າງຊົນນະບົດໃໝ່. ຍູ້ແຮງການສ້າງໂຄງປະກອບອຸດສາຫະກຳຄືນໃໝ່, ສ້າງພື້ນຖານໃຫ້ແກ່ການຫັນເປັນອຸດສາຫະກຳ ແລະ ທັນສະໄໝ. ສຸມໃສ່ພັດທະນາບັນດາຂະແໜງອຸດສາຫະກຳທີ່ໃຊ້ເຕັກໂນໂລຢີສູງ, ມີມູນຄ່າເພີ່ມສູງ, ອຸດສາຫະກຳໜູນຊ່ວຍ, ອຸດສາຫະກຳປຸງແຕ່ງຜະລິດ, ມີຄວາມສາມາດກໍ່ສ້າງ, ຕິດຕັ້ງດ້ວຍເຕັກນິກສູງ. 3 ຂົງເຂດຈຸດສຸມທີ່ໄດ້ຮັບການກຳນົດລວມມີ ການສ້າງໂຄງປະກອບການລົງທຶນພາກລັດຄືນໃໝ່; ສ້າງໂຄງປະກອບລະບົບການເງິນ-ທະນາຄານຄືນໃໝ່ ແລະ ສ້າງໂຄງປະກອບລັດວິສາຫະກິດຄືນໃໝ່
ຍົກສູງຄວາມສາມາດຜະລິດ, ດຳເນີນທຸລະກິດ, ຄວາມສາມາດແກ່ງແຍ້ງຂອງວິສາຫະກິດ
ເອົາໃຈໃສ່ຍົກສູງຄວາມສາມາດຜະລິດ, ດຳເນີນທຸລະກິດ, ຄວາມສາມາດແກ່ງແຍ້ງຂອງວິສາຫະກິດແມ່ນໜຶ່ງໃນບັນດາໜ້າທີ່ໂດຍສະພາແຫ່ງຊາດໄດ້ມອບໝາຍໃຫ້ລັດຖະບານໃຫ້ບຸລິມະສິດຊີ້ນຳ, ບໍລິຫານໃນໄລຍະທີ່ຈະມາເຖິງ. ບັນດາ ສະມາຊິກສະພາແຫ່ງຊາດຕີລາຄາສູງບັນດາມາດຕະການແກ້ໄຂຂອງລັດຖະບານໂດຍສຸມໃສ່ປົວແປງສະພາບແວດລ້ມແຫ່ງການລົງທຶນ, ແກ້ໄຂຄວາມຫຍຸ້ງຍາກໃຫ້ແກ່ການຜະລິດ, ດຳເນີນທຸລະກິດ, ເປີດກ້ວາງຕະຫຼາດສົ່ງອອກ, ຂຸດຄົ້ນບັນດາທ່າໄດ້ປຽບໃນບັນດາສັນຍາການຄ້າສາກົນຢ່າງມີປະສິດທິຜົນ… ພ້ອມກັນນັນ, ຍູ້ໄວການປະຕິບັດ ແລະ ການປ່ອຍບັນດາແຫຼ່ງເງິນລົງທຶນເພື່ອພັດທະນາຈາກແຫຼ່ງທຶນງົບປະມານແຫ່ງລັດ, ພັດທະບັດລັດຖະບານ,ແຫຼ່ງທຶນຊ່ວຍເຫຼືອພັດທະນາຈາກຕ່າງປະເທດ ODA ….. ທ່ານຫງວຽນດຶກກຽນ ຮອງຫົວໜ້າກຳມາທິການເສດຖະກິດຂອງສະພາແຫ່ງຊາດ ສະມາຊິກສະພາແຫ່ງຊາດແຂວງຊອກຈັງໃຫ້ຮູ້ວ່າ :
“ລັດຖະບານໄດ້ມີ 8 ໝວດມາດຕະການ, ພວກເຮົາຕ້ອງຜັນຂະຫຍາຍຢ່າງຄົບຊຸດ ແລະ ຂ້ຽວຂາດ. ລັດຖະບານເອງ ກໍບໍ່ສາມາດສ້າງການເຕີບໂຕໄດ້, ຫາກແມ່ນວິສາຫະກິດ. ຄວນຍົກສູງທີ່ຕັ້ງບົດບາດຂອງວິສາຫະກິດພາຍໃນປະເທດ”
ສ່ວນທ່ານ ດຣ ເຈີນຢູລິກ ຮອງຫົວໜ້າຄະນະ ສະມາຊິກສະພາແຫ່ງຊາດນະຄອນໂຮ່ຈິມິນ ພັດຖືວ່າ :
“ ທີ່ຈິງແລ້ວ, ບັນດາວິສາຫະກິດຂະໜາດກາງ ແລະ ນ້ອຍແມ່ນວິສາຫະກິດເອກະຊົນ. ແຜນນະໂຍບາຍປະຈຸບັນ ແມ່ນຈະແຈ້ງທີ່ສຸດ ຊຶ່ງໄດ້ຖືເສດຖະກິດພາກເອກະຊົນແມ່ນໜຶ່ງໃນຂົງເຂດເສດຖະກິດທີ່ສຳຄັນຂອງພື້ນຖານເສດຖະກິດ. ພວກເຮົາຕ້ອງຖືການພັດທະນາວິສາຫະກິດຂະໜາດກາງ ແລະ ນ້ອຍຄືດັ່ງຍຸດທະສາດແຫ່ງຊາດກ່ຽວກັບວິສາຫະກິດ ”
ບັນດາສະມາຊິກສະພາແຫ່ງຊາດໃຫ້ຂໍ້ສັງເກດວ່າ ຫວຽດນາມພວມຢືນຢູ່ຕໍ່ໜ້າສິ່ງທ້າທາຍ ແລະ ກາລະໂອກາດທີ່ດີ ຂະນະທີ່ສັນຍາການຄ້າສາກົນຫຼາຍສະບັບໄດ້ຮັບການລົງນາມ, ໃນນັ້ນ ພິເສດແມ່ນມີສັນຍາ TPP.
ປີ 2016, ຫວຽດນາມຈະສືບຕໍ່ຮັກສາທ່າເຕີບໂຕເສດຖະກິດ. ຖ້າຫາກວ່າ ໃນປີ 2015, ຄາດຄະເນວ່າ ລະດັບເຕີບໂຕ GDP ບັນລຸ 6,5% ນັ້ນ, ໃນປີ 2016 ລະດັບເຕີບໂຕ GDP ຈະສູງກວ່າຄື ບັນລຸ 6,7%. ເປັນອັນວ່າ ເປົ້າໝາຍສືບຕໍ່ຮັບປະກັນສ້າງເສດຖະກິດມະຫາພາກເປັນປົກກະຕິ, ຮັກສາທ່າເຕີບໂຕເສດຖະກິດ ໄດ້ ແລະ ພວມຮັບການກຳນົດ ແລະ ປະຕິບັດຈາກສະພາແຫ່ງຊາດຫວຽດນາມ.