(vovworld)- ປີ 2013, ເຖິງວ່າເສດຖະກິດຍັງປະສົບກັບຄວາມຫຍຸ້ງຍາກຫລາຍ, ແຫລ່ງກຳລັງຖືກຂາດແຄນກໍຕາມ ແຕ່ເບິ່ງລວມແລ້ວ ສະພາບການຮັບປະກັນຊີວິດສັງຄົມຂອງຫວຽດນາມ ບັນລຸໝາກຜົນພົ້ນເດັ່ນຈຳນວນຫນຶ່ງ. ລັດຖະບານຫວຽດນາມ ຍັງຄົງຈັດແບ່ງແຫລ່ງກຳລັງຢ່າງພຽງພໍໃຫ້ແກ່ໂຄງການຫລຸດຜ່ອນຄວາມທຸກຍາກເວົ້າສະເພາະ ແລະ ບາງນະໂຍບາຍສັງຄົມເວົ້າລວມ.
ປີ 2013, ຫວຽດນາມ ຍັງຄົງສະເຫມີຕົ້ນສະເຫມີປາຍສຳລັບບັນດານະໂຍບາຍຄື: ບຸລິມະສິດຜູ້ມີຄຸນງາມຄວາມດີຕໍ່ການປະຕິວັດ, ຫລຸດຜ່ອນຄວາມທຸກຍາກ, ສ້າງວຽກເຮັດງານທຳ. ນີ້ແມ່ນຫນຶ່ງໃນບັນດາປັດໄຈຮັບປະກັນຊີວິດສັງຄົມ. ໃນຂົງເຂດອຸປະກະລະສັງຄົມ, ທຸກຂັ້ນ, ທຸກຂະແຫນງການສືບຕໍ່ສະຫງວນຄວາມເອົາໃຈໃສ່ເປັນພິເສດເຖິງຜູ້ອາຍຸສູງ, ຄົນພິການ, ປະຊາຊົນຢູ່ເຂດເສດຖະກິດ-ສັງຄົມທີ່ປະສົບກັບຄວາມຫຍຸ້ງຍາກເປັນພິເສດ.
ພາບປະກອບ:internet
|
ບັນດາໝາກຜົນອັນພົ້ນເດັ່ນ
ຕາມກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມແລ້ວ, ປີ 2013, ຫວຽດນາມ ຍັງຄົງຮັກສາຄາດໝາຍຫລຸດຜ່ອນຄວາມທຸກຍາກສະເລ່ຍໃນທົ່ວປະເທດຈາກ 1,7- 2%. ສຳລັບບັນດາເມືອງທຸກຍາກທີ່ສຸດຍັງຄົງຮັກສາໃນລະດັບກວ່າ 4%. ໃນປີຜ່ານມາ, ທັງປະເທດໄດ້ສ້າງວຽກເຮັດງານທຳໃຫ້ແກ່ຄົນງານກວ່າ 1,5 ລ້ານຄົນ. ບັນດາທ້ອງຖິ່ນ, ວິສາຫະກິດ ສົ່ງຄົນງານ ເກືອບ 90.000 ຄົນ ໄປເຮັດວຽກຢູ່ຕ່າງປະເທດໂດຍມີການກຳນົດເວລາ, ເພີ່ມຂຶ້ນ 10% ເມື່ອທຽບໃສ່ປີກ່ອນ. ພ້ອມກັບບັນດານະໂຍບາຍຮັບປະກັນຊີວິດສັງຄົມ, ການດັດປັບເງິນເດືອນພື້ນຖານ ນັບແຕ່ຕົ້ນປີ 2013 ກໍໄດ້ປະກອບສ່ວນປັບປຸງຊີວິດການເປັນຢູ່ໃຫ້ແກ່ປະຊາຊົນ.
ໄປຄຽງຄູ່ກັນນັ້ນ, ວຽກງານຮັບປະກັນຄວາມປອດໄພ, ຫລັກອະນາໄມໃນການອອກແຮງງານ, ອຸປະກະລະສັງຄົມ, ການປະຕິບັດນະໂຍບາຍປະກັນຊີວິດ, ປະກັນໄພວ່າງງານ, ສອນວິຊາຊີບ, ປົກປ້ອງ, ເບິ່ງແຍງດູແລເດັກ… ໄດ້ຮັບການຜັນຂະຫຍາຍຈາກອົງການຕ່າງໆຢ່າງມີປະສິດທິຜົນ. ໝົດປີ 2013, ຈຳນວນຜູ້ເຂົ້າຮ່ວມບໍລິການປະກັນສັງຄົມ, ປະກັນສຸຂະພາບບັນລຸກວ່າ 60 ລ້ານຄົນ, ເພີ່ມຂຶ້ນ 4,6% ເມື່ອທຽບໃສ່ໄລຍະດຽວກັນຂອງປີ 2012. ການແກ້ໄຂລະບອບ, ນະໂຍບາຍປະກັນສັງຄົມໄດ້ຮັບປະກັນສິດຜົນປະໂຫຍດໃຫ້ແກ່ຜູ້ເຂົ້າຮ່ວມບໍລິການ. ທ່ານນາງ ຫງວຽນທິແຮງຮ່ວາ, ສສຊ ແຂວງ ບັກນີງ ຕີລາຄາວ່າ:
“ບັນດາໝາກຜົນບັນລຸໄດ້ໃນປີ 2013 ເປັນຫນ້າຊື່ນຊົມ ແລະ ມີຄວາມໝາຍສຳຄັນ. ການລົງທຶນໃຫ້ແກ່ການຮັບປະກັນຊີວິດສັງຄົມຍັງຄົງໄດ້ຮັບຄວາມເອົາໃຈໃສ່ເປັນພິເສດກວ່າ, ຊີວິດການເປັນຢູ່ຂອງປະຊາຊົນກໍໄດ້ຮັບການປັບປຸງ. ອັດຕາສ່ວນຜູ້ເຂົ້າຮ່ວມປະກັນສັງຄົມເພີ່ມຂຶ້ນ. ເປົ້າໝາຍໄດ້ຮັບການອຸດຫນຸນຈາກສັງຄົມໄດ້ຮັບການເປີດກວ້າງ, ບາງນະໂຍບາຍຫນູນຊ່ວຍຄ່າຮຽນ, ຫນູນຊ່ວຍເຂົ້າສານໃຫ້ແກ່ນັກຮຽນທຸກຍາກ, ນັກຮຽນຊື່ງແມ່ນຊາວຊົນເຜົ່າສວ່ນຫນ້ອຍໄດ້ຮັບການປະຕິບັດ, ສຸຂະພາບຂອງປະຊາຊົນກໍໄດ້ຮັບການປັບປຸງຫລາຍຢ່າງ, ຕາຫນ່າງສາທາລະນະສຸກໄດ້ຮັບການເປີດກວ້າງ ແລະ ຄຸນນະພາບການກວດ,ປິ່ນປົວພະຍາດກໍໄດ້ຮັບການຍົກສູງຂຶ້ນ.”
ເພື່ອບັນລຸໄດ້ບັນດາໝາກຜົນດັ່ງກ່າວ, ທ່ານ ຫງວຽນຈ້ອງດາມ, ຮອງລັດຖະມົນຕີກະຊວງແຮງງານ,ທະຫານເສຍອົງຄະ ແລະ ສັງຄົມ ໄຈ້ແຍກວ່າ:
“ສິ່ງໃຫມ່ນັ້ນແມ່ນ ພວກເຮົາໄດ້ມີໂຄງການຈຸດໝາຍແຫ່ງຊາດ ຈາກ 2 ໂຄງການກ່ອນນີ້ ນັ້ນແມ່ນໂຄງການ 135 ແລະ ໂຄງການຈຸດໝາຍແຫ່ງຊາດ, ໂຄງການ 30 a … ປະຈຸບັນໂຮມເຂົ້າເປັນໂຄງການດຽວ, ສ້າງຄວາມສະດວກໃຫ້ແກ່ການບໍລິຫານຂອງລັດຖະບານ ແລະ ບັນດາກະຊວງຂະແຫນງການ. ສຳລັບຄອບຄົວທຸກຍາກ, ໃນປີຜ່ານມາ ພວກເຮົາມີຫລາຍນະໂຍບາຍໃຫ້ແກ່ເປົ້າໝາຍນີ້ກໍຄືເພີ່ມເຕີມນະໂຍບາຍສຳລັບຄອບຄົວໃກ້ຈະຖືກຈັດເຂົ້າລະດັບທຸກຍາກ ແລະ ຄອບຄົວຫາກໍຫລຸດພົ້ນອອກຈາກຄວາມທຸກຍາກເພື່ອຫລຸດຜ່ອນຄວາມທຸກຍາກແບບຍືນຍົງ.”
ການທ້າທາຍບໍ່ແມ່ນຫນ້ອຍ
ຄຽງຄູ່ກັບບັນດາໝາກຜົນພົ້ນເດັ່ນນັ້ນ, ຮູບພາບສັງລວມກ່ຽວກັບການຮັບປະກັນຊີວິດສັງຄົມຍັງມີຂໍ້ຈຳກັດ ເມື່ອຊ່ອງຫວ່າງຄວາມຮັ່ງມີ ແລະ ທຸກຍາກ ຍັງໃຫຍ່ຫລວງຢູ່. ອັດຕາຄອບຄົວທຸກຍາກຢູ່ເຂດຫ່າງໄກສອກຫລີກ, ເຂດຊົນເຜົ່າສ່ວນຫນ້ອຍຍັງຢູ່ໃນລະດັບສູງ. ວຽກງານສາທາລະນະສຸກ, ການສຶກສາ ມີຫລາຍດ້ານຍັງອ່ອນດ້ອຍ. ທ່ານ ຫງວຽນຈ້ອງດາມ, ຮອງລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ໃຫ້ຂໍ້ສັງເກດວ່າ:
“ການຫລຸດຜ່ອນຄວາມທຸກຍາກຂອງພວກເຮົາບໍ່ທັນໝັ້ນຄົງເທື່ອ, ເພາະວ່າ ປະຊາຊົນມີລາຍຮັບຕຳ່ໃກ້ຈະຕົກຢູ່ໃນລະດັບມາດຖານຄອບຄົວທຸກຍາກ ຍັງຫລາຍຢູ່. ການທ້າທາຍອີກ ນັ້ນແມ່ນຄວາມທຸກຍາກພວມສຸມໃສ່ບັນດາເຂດປະສົບກັບຄວາມຫຍຸ້ງຍາກ, ເປັນຕົ້ນເຂດຊົນເຜົ່າສ່ວນຫນ້ອຍ, ເຂດພູດອຍ. ໄພທຳມະຊາດ ແລະ ການປ່ຽນແປງຂອງດິນຟ້າອາກາດກໍແມ່ນການນາບຂູ່ສຳລັບພວກເຮົາ. ແຕ່ລະປີ, ມີນັບໝື່ນຄອບຄົວຫລຸດພົ້ນອອກຈາກຄວາມທຸກຍາກ ແຕ່ຍ້ອນໄພທຳມະຊາດ ສະນັ້ນເຂົາເຈົ້າຖືກຕົກເຂົ້າສູ່ລະດັບຄອບຄົວທຸກຍາກຄືນໃຫມ່. ແຫລ່ງກຳລັງເພື່ອລົບລ້າງຄວາມອຶດຫິວທຸກຍາກພາຍໃນປະເທດພວມປະສົບກັບຄວາມຫຍຸ້ງຍາກ,ແລະແຫລ່ງກຳລັງຈາກສາກົນກໍຫລຸດຜ່ອນ ຍ້ອນປະຊາຄົມໂລກເລີ່ມຫັນທິດ, ບຸລິມະສິດໃຫ້ແກ່ບັນດາປະເທດອື່ນຫລາຍກວ່າ.”
ດ້ວຍບັນດາຜົນງານທີ່ບັນລຸໄດ້ໃນປີ 2013, ປີ 2014 ນີ້ ຫວຽດນາມສືບຕໍ່ສ້າງນະໂຍບາຍຮັບປະກັນຊີວິດສັງຄົມທີ່ມີລັກສະນະພິເສດສະເພາະຕາມບັນດາໝວດຊົນເຜົ່າ, ເຂດຊຸມຊົນ ແລະ ໝວດບໍລິເວນ, ສົ່ງເສີມການເຂົ້າຮ່ວມຢ່າງຕັ້ງຫນ້າຂອງປະຊາຊົນ.