ຫວຽດນາມເດັດດຽວປົກປັກຮັກສາອະທິປະໄຕ ແລະ ຜົນປະໂຫຍດອັນຊອບທຳຢູ່ທະເລຕາເວັນອອກ. ນີ້ແມ່ນສານຂອງຫວຽດນາມໂດຍທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຍົກອອກມາໃນຊຸມມື້ທຳອິດຂອງປີໃໝ່ 2016. ໂດຍແມ່ນປະເທດທີ່ມີຄວາມຮັບຜິດຊອບຂອງອາຊຽນ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ໄດ້ຢືນຢັນວ່າ ຫວຽດນາມຈະເຮັດຈົນສຸດຄວາມສາມາດຂອງຕົນເພື່ອພ້ອມກັບບັນດາປະເທດໃນພາກພື້ນປະກອບສ່ວນເຂົ້າໃນການປັບປຸງສັນຕິພາບ, ສະຖຽນລະພາບໃນພາກພື້ນ, ພິເສດແມ່ນຢູ່ເຂດທະເລຕາເວັນອອກ.
ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຢືນຢັນທັດສະນະ
ເດັດດຽວປົກປັກຮັກສາອະທິປະໄຕ ແລະ ຜົນປະໂຫຍດອັນຊອບທຳ ຂອງຫວຽດນາມທີ່ງານລ້ຽງຊົມເຊີຍ ປະຊາຄົມອາຊຽນ ແລະ ປີໃໝ່ປະຈຳຊາດ ປີວອກ 2016 |
ຄວາມໝັ້ນຄົງຢູ່ເຂດທະເລຕາເວັນອອກໃນຊຸມມື້ຕົ້ນປີ 2016 ພັດຢືນຢູ່ຕໍ່ໜ້າສິ່ງທ້າທາຍຢ່າງໃຫຍ່ຫຼວງ ຂະນະທີ່ໃນ 2-3 ມື້ທີ່ຜ່ານມາ, ຈີນໄດ້ຈັດສົ່ງເຮືອບິນລົງຈອດຢູ່ເດີນບິນຖືກກໍ່ສ້າງຢ່າງຜິດກົດໝາຍຢູ່ເກາະ ຈື້ເທີບ ທີ່ຂຶ້ນກັບໝູ່ເກາະເຈືອງຊາຂອງຫວຽດນາມ. ການກະທຳນີ້ຂອງຈີນ ໄດ້ຖືກຄັດຄ້ານຢ່າງຮຸ່ນແຮງຈາກຫວຽດນາມ ແລະ ປະຊາຄົມໂລກ. ພ້ອມກັບການກະທຳກໍ່ສ້າງ, ຖົມດິນເປັນເກາະດ້ວຍຂອບຂະໜາດໃຫຍ່ຢ່າງຜິດກົດໝາຍຢູ່ທະເລຕາເວັນອອກໃນປີຜ່ານມາ, ບັນດາການກະທຳໃໝ່ນີ້ຂອງປັກກິງ ໄດ້ເຮັດໃຫ້ຄວາມເຄັ່ງຕຶງໃນພາກພື້ນເພີ່ມຂຶ້ນ.
ປີ 2015, ການຂັດແຍ້ງຢູ່ທະເລຕາເວັນອອກຍັງຄົງເພີ່ມທະວີຂຶ້ນ
ສະພາບການຢູ່ ທະເລຕາເວັນອອກໃນປີ 2015 ມີການປ່ຽນແປງໂດຍພື້ນຖານ, ຍ້ອນຈີນຍູ້ແຮງການກໍ່ສ້າງ, ຖົມດິນເປັນເກາະດ້ວຍຂອບຂະໜາດໃຫຍ່ຢ່າງຜິດກົດໝາຍ. ການເຄື່ອນໄຫວເຫຼົ່ານັ້ນຂອງຈີນ ໄດ້ພາໃຫ້ວົງຄະນະຍາດສາກົນຕ້ອງອອກສຽງ ແລະ ມີປະຕິກິລີຍາຢ່າງແຂງແຮງ. ກ່າວຄຳເຫັນທີ່ກອງປະຊຸມສຳມະນາສາກົນກ່ຽວກັບທະເລຕາເວັນອອກ ຊຶ່ງຈັດຂຶ້ນໃນເດືອນ 11 ຢູ່ນະຄອນວຸ້ງເຕົາ, ທ່ານເອກອັກຄະລັດຖະທູດ ດັ້ງດິງກຸ້ຍ, ຜູ້ອຳນວຍການສະຖາບັນການຕ່າງປະເທດ ໃຫ້ຂໍ້ສັງເກດວ່າ :
“ ໃນປີທີ່ຜ່ານມາ, ໂດຍພື້ນຖານແລ້ວ, ທະເລຕາເວັນອອກ ມີສັນຕິພາບ, ສະຖຽນລະພາບ. ເຖິງວ່າບໍ່ເກີດມີການປະທະກັນຢ່າງຮ້າຍແຮງກໍຕາມ, ແຕ່ການຂັດແຍ້ງກັນຍັງຄົງເກີດຂຶ້ນຢ່າງຕໍ່ເນື່ອງ. ປະຊາຄົມພາກພື້ນ ແລະ ໂລກ ນັບມື້ນັບມີຄວາມເປັນຫ່ວງເຖິງ ທະເລຕາເວັນອອກຫຼາຍກວ່າ, ເພາະ ທະເລຕາເວັນອອກ ຍັງຊ້ອນແຝງສິ່ງທີ່ຂາດສະຖຽນລະພາບ. ຖ້າຫາກບໍ່ມີຄວາມລະງັບໃຈ, ຄວາມເຄົາລົບບັນດາຫຼັກການພື້ນຖານຂອງກົດໝາຍສາກົນຂອງບັນດາຝ່າຍທີ່ກ່ຽວຂ້ອງ ແລະ ຖ້າຫາກບໍ່ມີຄວາມມານະພະຍາຍາມຈາກວົງຄະນະຍາດສາກົນນັ້ນ, ການປະທະກັນອາດຈະເກີດຂຶ້ນໃນທຸກໆເວລາ ”
ປີ 2015 ກໍແມ່ນປີທີ່ບັນດາປະເທດທີ່ກ່ຽວຂ້ອງມີຄວາມມານະພະຍາຍາມຫຼາຍຢ່າງເພື່ອສະກັດກັ້ນການປະທະກັນ, ຊຸກຍູ້ການຮ່ວມມື. ເປັນຄັ້ງທຳອິດ ພາຍຫຼັງ 9 ປີແຫ່ງການດຳເນີນການເຈລະຈາ, ອາຊຽນ ແລະ ຈີນໄດ້ບັນລຸຂໍ້ຕົກລົງກ່ຽວກັບບັນດາຫຼັກການຜັນຂະຫຍາຍ ຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ DOC. ລະຫວ່າງບັນດາປະເທດທີ່ກ່ຽວຂ້ອງໂດຍກົງເຖິງການຂັດແຍ້ງ, ໂດຍສະເພາະແມ່ນຫວຽດນາມ, ຟີລິບປິນ ແລະ ຈີນ ໄດ້ມີຄວາມມານະພະຍາຍາມດ້ານການທູດຫຼາຍຢ່າງ. ທີ່ບັນດາກອງປະຊຸມ, ເວທີປາໄສຢ່າງເປັນທາງການຂອງອາຊຽນ ແລະ ລະຫວ່າງອາຊຽນກັບບັນດາຄູ່ຮ່ວມມື, ທະເລຕາເວັນອອກ ແລະ ການຮັກສາສັນຕິພາບ, ສະຖຽນລະພາບ ແລະ ການພັດທະນາຢູ່ ທະເລຕາເວັນອອກໄດ້ກາຍເປັນຫົວຂໍ້ສຳຄັນໄດ້ຮັບຄວາມສົນໃຈ ແລະ ຖືກນຳມາປຶກສາຫາລືບົນຈິດໃຈສ້າງສັນ. ບັນດາກົນໄກຮ່ວມມືໃໝ່ຢູ່ ທະເລຕາເວັນອອກລະຫວ່າງກອງທັບ, ທະຫານເຮືອ ແລະ ບັນດາກຳລັງປະຕິບັດກົດໝາຍຂອງບັນດາປະເທດອາຊຽນ ແລະ ລະຫວ່າງອາຊຽນກັບບັນດາຄູ່ຮ່ວມມືໄດ້ຖືກນຳມາປຶກສາຫາລື. ຈາກຫົວເລື່ອງຮັບຖືວ່າແມ່ນ “ສະດຸ້ງໄວ”, ທະເລຕາເວັນອອກ ແລະ ການຮັກສາສັນຕິພາບ, ສະຖຽນລະພາບ ແລະ ການພັດທະນາຢູ່ ທະເລຕາເວັນອອກ ນັບມື້ນັບໄດ້ນຳມາປຶກສາຫາລືຢ່າງເປັນທາງການບົນຈິດໃຈເຄົາລົບກົດໝາຍ, ເປີດເຜີດ, ກະຈ່າງແຈ້ງເພື່ອຜົນປະໂຫຍດຂອງບັນດາຝ່າຍທີ່ກ່ຽວຂ້ອງ ແລະ ຜົນປະໂຫຍດລວມຂອງທັງວົງຄະນະຍາດສາກົນ.
ຫວຽດນາມເດັດດຽວປົກປັກຮັກສາອະທິປະໄຕ ແລະ ຜົນປະໂຫຍດອັນຊອບທຳຢູ່ທະເລຕາເວັນອອກ
ຕໍ່ໜ້າບັນດາສິ່ງທ້າທາຍຮ່ວມຂອງພາກພື້ນ ແລະ ການນາບຂູ່ໂດຍກົງເຖິງອະທິປະໄຕຜືນແຜ່ນດິນແຫ່ງຊາດ, ຫວຽດນາມຢືນຢັນຢ່າງແຂງແຮງກ່ຽວກັບທັດສະນະຂອງຕົນທີ່ວ່າ : ຫວຽດນາມເດັດດຽວປົກປັກຮັກສາອະທິປະໄຕ ແລະ ຜົນປະໂຫຍດອັນຊອບທຳຂອງຕົນ, ພ້ອມກັນນັ້ນ, ຍາມໃດກໍຍຶດໝັ້ນແຜນນະໂຍບາຍແກ້ໄຂບັນດາການຂັດແຍ້ງ, ຄວາມບໍ່ລົງລອຍກັນດ້ວຍມາດຕະການໂດຍສັນຕິວິທີບົນພື້ນຖານບັນດາຫຼັກການພື້ນຖານຂອງກົດໝາຍສາກົນ, ກົດບັດ ສ.ປ.ຊ, ສົນທິສັນຍາ ສ.ປ.ຊ ກ່ຽວກັບກົດໝາຍວ່າດ້ວຍທະເລປີ 1982, ຄັດຄ້ານການນຳໃຊ້ກຳລັງອາວຸດ ແລະ ນາບຂູ່ນຳໃຊ້ກຳລັງອາວຸດ, ຄັດຄ້ານການຫັນເປັນທະຫານ ແລະ ບັນດາການເຄື່ອນໄຫວພຽງລຳພັງຝ່າຍດຽວຢູ່ ທະເລຕາເວັນອອກ, ເຮັດໃຫ້ປ່ຽນແປງສະພາບເດີມ, ນາບຂູ່ຄວາມໝັ້ນຄົງ, ປອດໄພໃນການເດີນທະເລ, ການບິນ, ລະເມີດກົດໝາຍສາກົນ, ເຮັດໃຫ້ເພີ່ມທະວີຄວາມເຄັ່ງຕຶງ, ທຳລາຍຄວາມເຊື່ອໝັ້ນ, ສ້າງບັນດາຜົນພາຍຫຼັງທີ່ຮ້າຍແຮງ ແລະ ຍາວນານ, ສົ່ງຜົນສະທ້ອນເຖິງສັນຕິພາບ, ຄວາມໝັ້ນຄົງ, ສະຖຽນລະພາບ,ໃນພາກພື້ນ.
ທັດສະນະນີ້, ອີກເທື່ອໜຶ່ງໄດ້ຖືກທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຢືນຢັນຕໍ່ໜ້າບັນດາຄະນະທູຕານຸທູດ, ບັນດາເອກອັກຄະລັດຖະທູດ, ຫົວໜ້າຜູ້ຕ່າງໜ້າບັນດາອົງການຈັດຕັ້ງສາກົນທີ່ງານລ້ຽງຊົມເຊີຍປະຊາຄົມອາຊຽນ ແລະ ປີໃໝ່ປະຈຳຊາດ ປີວອກ 2016. ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ເນັ້ນໜັກວ່າ :
“ ຫວຽດນາມຈະເຮັດຈົນສຸດຄວາມສາມາດຂອງຕົນພ້ອມກັບບັນດາປະເທດໃນພາກພື້ນ ປະກອບສ່ວນເຂົ້າໃນການປັບປຸງສັນຕິພາບ, ສະຖຽນລະພາບໃນພາກພື້ນ ແລະ ຢູ່ ທະເລຕາເວັນອອກ, ພ້ອມກັນນັ້ນ ກໍຮຽກຮ້ອງບັນດາຝ່າຍທີ່ກ່ຽວຂ້ອງຈົ່ງປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ DOC ຢ່າງເຂັ້ມງວດ ແລະ ມີປະສີດທິຜົນ ແລະ ປຶກສາຫາລືເພື່ອຮັບຮອງເອົາປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ COC ໂດຍໄວ. ພວກຂ້າພະເຈົ້າຂອບໃຈ ແລະ ຮຽກຮ້ອງວົງຄະນະຍາດສາກົນ ຈົ່ງສືບຕໍ່ມີການກະທຳຢ່າງແຂງແຮງເພື່ອສະໜັບສະໜູນຄງວາມມານະພະຍາຍາມຂອງຫວຽດນາມ ແລະ ຂອງອາຊຽນເພື່ອສັນຕິພາບ, ສະຖຽນລະພາບ, ເຄົາລົບ ແລະ ປະຕິບັດຕາມກົດໝາຍໃນພາກພື້ນ ແລະ ສາກົນ ”.
ດ້ວຍຈິດໃຈ, ກຳລັງແຮງອາຊຽນ ແລະວິໄສທັດ 2025, ແນ່ນອນວ່າ ອາຊຽນຈະສ້າງພື້ນຖານອັນໝັ້ນແກ່ນ ແລະ ກຳລັງໜູນທີ່ແຂງແຮງໃຫ້ແກ່ການພັດທະນາຂອງບັນດາປະເທດອາຊີຕາເວັນອອກສ່ຽງໃຕ້, ໃນນັ້ນມີການຮັກສາສະພາບແວດລ້ອມສັນຕິພາບ, ສະຖຽນລະພາບຢູ່ທະເລຕາເວັນອອກ. ພາກພື້ນອາຊຽນແຫ່ງ ສັນຕິພາບ, ສະຖຽນລະພາບ ແລະ ພັດທະນາຢ່າງວັດທະນາຖາວອນ ແມ່ນຄວາມຫວັງລວມຂອງແຕ່ລະປະເທດອາຊຽນ, ໃນນັ້ນ ມີຫວຽດນາມ ແລະ ແນ່ນອນວ່າ ຫວຽດນາມຈະເຮັດຈົນສຸດຄວາມສາມາດຂອງຕົນເພື່ອເປົ້າໝາຍນີ້.