ວັນທີ 22/4, ຕາມເວລາທ້ອງຖິ່ນ, ຫວຽດນາມພ້ອມກັບກວ່າ 100 ປະເທດໄດ້ເຂົ້າຮ່ວມພິທີເຊັນຂໍ້ຕົກລົງປາຣີ ກ່ຽວກັບດິນຟ້າອາກາດ ຢທີ່ຈັດຂຶ້ນຢູ່ນິວຢອກ, ພາຍຫຼັງທີ່ໄດ້ຮັບການເຫັນດີເປັນເອກະສັນຮັບຮອງເອົາຈາກ 195 ປະເທດເປັນເວລາ 4 ເດືອນ. ໃນຂະນະນັ້ນ, ຢູ່ຫວຽດນາມ, ການຮັບມືກັບການປ່ຽນແປງຂອງດິນຟ້າອາກາດກໍແມ່ນໜຶ່ງໃນບັນດາໜ້າທີ່ໂດຍທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ຊີ້ນຳຜັນຂະຫຍາຍໂດຍກົງພາຍຫຼັງທີ່ທ່ານດຳລົງຕຳແໜ່ງເປັນນາຍົກລັດຖະມົນຕີ. ສິ່ງນີ້ໄດ້ສະແດງໃຫ້ເຫັນຄວາມສຳຄັນກໍຄືລັກສະນະຮີບດ່ວນຂອງວຽກງານຮັບມືກັບການປ່ຽນແປງຂອງດິນຟ້າອາກາດທີ່ມີຕໍ່ການພັດທະນາຂອງຫວຽດນາມ.
ສະພາບແຫ້ງແລ້ງຢູ່ຕາຮມທົ່ງນາຫວຽດນາມ |
ບົດລາຍງານຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຫວຽດນາມໃຫ້ຮູ້ວ່າ ປີ 2015, ການປ່ຽນແປງຂອງດິນຟ້າອາກາດຢູ່ຫວຽດນາມຜັນແປໄປຢ່າງສັບສົນ. ຫຼາຍທ້ອງຖິ່ນມີອຸ່ນຫະພູມລື່ນກາຍລະດັບ 40 ອົງສາ C . ຜົນສະທ້ອນຈາກ ການປ່ຽນແປງຂອງດິນຟ້າອາກາດໄດ້ສົ່ງຜົນກະທົບອັນຫຍໍ້ທໍ້ເຖິງສະພາບການພັດທະນາເສດຖະກິດ-ສັງຄົມຫວຽດນາມ. ປີ 2015, ຄາດວ່າ ໄພທຳມະຊາດໄດ້ເຮັດໃຫ້ມີຜູ້ເສຍຊີວິດ 154 ຄົນ, ຄວາມເສຍຫາຍທາງດ້ານວັດຖຸຄາດວ່າຈະຂຶ້ນຮອດ 8ພັນຕື້ກ່ວາດົງ. ພິເສດໃນຊຸມເດືອນຕົ້ນປີ 2016, ປະກົດການ ແອນນີໂນ ທີ່ຮ້າຍແຮງ ແລະ ແກ່ຍາວກວ່າໝູ່ໃນປະຫວັດສາດ ໄດ້ກໍ່ໃຫ້ເກີດສະພາບໄພແຫ້ງແລ້ງ ແລະ ນ້ຳທະເລແຊກຊຶມຢ່າງຮ້າຍແຮງຢູ່ເຂດຕອນໃຕ້ພາກກາງ, ເຂດໄຕງວຽນ ແລະ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ
ເປັນເຈົ້າການປັບຕົວໃຫ້ແທດເໝາະ
ໃນສະພາວະທີ່ ການປ່ຽນແປງຂອງດິນຟ້າອາກາດພວມຜັນແປໄປຢ່າງຮ້າຍແຮງນັ້ນ, ຜົນສະທ້ອນຈາກ ການປ່ຽນແປງຂອງດິນຟ້າອາກາດແມ່ນນັບມື້ນັບເປັນອັນຕະລາຍ. ຕາມທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກແລ້ວ, ຫວຽດນາມຕ້ອງຮີບເຮັ່ງຮັບມືກັບການປ່ຽນແປງຂອງດິນຟ້າອາກາດດ້ວຍບັນດາມາດຕະການທີ່ແຂງແຮງກວ່າ. ລະອຽດ, ຫວຽດນາມຄວນເພີ່ມທະວີຄວາມສາມາດວິເຄາະ, ພະຍາກອນ, ກ່າວເຕືອນກ່ຽວກັບການປ່ຽນແປງຂອງດິນຟ້າອາກາດ, ໄພທຳມະຊາດ. ລົງທຶນເຂົ້າວຽກງານຮັບມືກັບການປ່ຽນແປງຂອງດິນຟ້າອາກາດຢ່າງມີຈຸດສຸມ, ສຸມໃສ່ຕີລາຄາຜົນກະທົບຈາກການປ່ຽນແປງຂອງດິນຟ້າອາກາດທີ່ມີຕໍ່ແຕ່ລະເຂດເສດຖະກິດຈຸດສຸມເພື່ອສາມາດຈັດແບ່ງແຫຼ່ງກຳລັງເພື່ອຮັບມືຢ່າງມີປະສິດທິຜົນ. ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ຊີ້ແຈ້ງວ່າ :
“ ສຳລັບການປ່ຽນແປງຂອງດິນຟ້າອາກາດຢູ່ຫວຽດນາມນັ້ນ, ໃນໄລຍະທີ່ຈະມາເຖິງ ຕ້ອງທັງເປັນເຈົ້າການປັບຕົວໃຫ້ແທດເໝາະ, ທັງຮັບມືກັບການປ່ຽນແປງຂອງດິນຟ້າອາກາດຢ່າງມີປະສິດທິຜົນ. ພວກເຮົາຕ້ອງປັບຕົວໃຫ້ແທດເໝາະ ເສຍກ່ອນ, ດັ່ງນັ້ນການຄຸ້ມຄອງຊັບພະຍາກອນທຳມະຊາດ, ປັກປັກຮັກສາສິ່ງແວດລ້ອມຕ້ອງໄດ້ເຕື້ອງເຖິງຢ່າງຮອບດ້ານໃນການພັດທະນາເສດຖະກິດສັງຄົມ, ຖືປຽບເໝືອນລະບົບພັດທະນາ. ເສດຖະກິດ, ສັງຄົມ ແລະ ສິ່ງແວດລ້ອມແມ່ນ 3 ລ່ຽມພັດທະນາ. ໃນການຊີ້ນຳນຳພາ, ອຳນາດການປົກຄອງບໍ່ວ່າຂັ້ນໃດກໍຕ້ອງເຕື້ອງເຖິງຢ່າງເໝາະສົມ ”
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກຍັງຮຽກຮ້ອງໃຫ້ສືບຕໍ່ສ້າງນະໂຍບາຍກົດໝາຍກ່ຽວກັບການຮັບມືກັບການປ່ຽນແປງຂອງດິນຟ້າອາກາດໃຫ້ສົມບູນແບບ, ຄົນຄ້ວາຫັນປ່ຽນ ແລະ ພິເສດຕ້ອງສ້າງໂຄງປະກອບພື້ນຖານເສດຖະກິດຄືນໃໝ່, ຮັບປະກັນການເຕີບໂຕຕາມທິດສີຂຽວ, ຫຼຸດຜ່ອນດີໂອຊິດກາກບອນໃຫ້ໜ້ອຍລົງ, ຫຼຸດຜ່ອນການປ່ອຍອາຍພິດເຮືອນແກ້ວ ຕາມວິວັດທະນາການຂອງຂໍ້ຕົກລົງປາຣີກ່ຽວກັບດິນຟ້າອາກາດ (COP 21). ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ສະເໜີໃຫ້ປຸກລະດົມ, ຫັນແຫຼ່ງກຳລັງຮັບມືກັບ ການປ່ຽນແປງຂອງດິນຟ້າອາກາດເປັນຫຼາຍຮູບຫຼາຍແບບ, ໃນນັ້ນໃຫ້ບຸລິມະສິດແກ່ບັນດາໂຄງການ, ກິດຈະກຳຈຸດສຸມເຊັ່ນ: ການກໍ່ສ້າງ, ຍົກລະດັບບັນດາອ່າງເກັບນ້ຳຈືດຮັບໃຊ້ການຜະລິດ, ຊີວິດປະຈຳວັນ, ປັບປຸງຍົກລະດັບລະບົບຄັນຄູ່ທະເລ, ຄັນຄູ່ແມ່ນ້ຳ, ແກ້ໄຂສະພາບດິນເຊາະເຈື່ອນຢູ່ຕາມຝັ່ງທະເລ, ແມ່ນ້ຳ…
ມອບໝາຍໜ້າທີ່ໃຫ້ກະຊວງ, ຂະແໜງການໂດຍລະອຽດ
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ຊີ້ນຳຄະນະກຳມະການແຫ່ງຊາດກ່ຽວກັບ ການປ່ຽນແປງຂອງດິນຟ້າອາກາດ, ບັນດາກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງກະສີກຳ ແລະ ພັດທະນາຊົນນະບົດ, ກະຊວງການຕ່າງປະເທດ, ກະຊວງແຜນການ ແລະ ການລົງທຶນຈົ່ງຕັ້ງໜ້າຮ່ວມມືກັບສາກົນ, ຊອກຫາບັນດາແຫຼ່ງກຳລັງ, ບັນດາແຫຼ່ງເງິນອຸປະຖຳໃຫ້ແກ່ກິດຈະການຮັບມືກັບ ການປ່ຽນແປງຂອງດິນຟ້າອາກາດ. ສຳລັບ ກະຊວງກະສີກຳ ແລະ ພັດທະນາຊົນນະບົດ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ສະເໜີທາງກະຊວງ ສືບຕໍ່ກວດກາ, ປະສານສົມທົບບັນຫາ ການປ່ຽນແປງຂອງດິນຟ້າອາກາດກັບຍຸດທະສາດການວາງແຜນກຳນົດ, ແຜນການ, ພິເສດແມ່ນການວາງແຜນກຳນົດຊົນລະປະທານ, ວາງແຜນກຳນົດການຜະລິດກະສີກຳຢູ່ບາງເຂດຈຸດສຸມໃນປະຈຸບັນ. ໃນສະເພາະໜ້າ, ຕ້ອງຄົ້ນຄ້ວາຂໍ້ສະເໜີກ່ຽວກັບວິທີການແກ້ໄຂໃຫ້ແກ່ບັນດາເຂດຖືກນາບຂູ່ໂດຍກົງຈາກການປ່ຽນແປງຂອງດິນຟ້າອາກາດ, ກວດກາສະພາບຕົວຈິງກ່ຽວກັບລະດັບການກະທົບຈາກການປ່ຽນແປງຂອງດິນຟ້າອາກາດເພື່ອມີວິທີການແກ້ໄຂທີ່ດີກ່ວາ. ພິເສດ, ກະຊວງກະສີກຳ ແລະ ພັດທະນາຊົນນະບົດ ຕ້ອງກວດກາການວາງແຜນກຳນົດຢູ່ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ, ຮັບປະກັນການປິດລ້ອມເຂດເພື່ອຮັກສານ້ຳຈືດ, ດັດປັບນ້ຳເຄັມ, ພັດທະນາເສດຖະກິດຢູ່ຕາມເຂດນ້ຳເຄັມ. ສະເພາະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ໃຫ້ການຊີ້ນຳວ່າ :
“ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຕ້ອງຮັບຜິດຊອບການສົມທົບກັບກະຊວງ, ຂະແໜງການ, ທ້ອງຖິ່ນຕ່າງໆຈົ່ງຕິດຕາມຂໍ້ມູນຕົວຈິງຢ່າງທັນການ, ປະກາດແຜນການຮັບມືກັບການປ່ຽນແປງຂອງດິນຟ້າອາກາດ, ນ້ຳທະເລຂຶ້ນສູງໃຫ້ແທດເໝາະກັບສະພາບການປະຈຸບັນ. ຢາກເຮັດໄດ້ເຊັ່ນນັ້ນ, ຕ້ອງຍູ້ແຮງວຽກງານພະຍາກອນ, ຄົ້ນຄ້ວາຕີລາຄາລະອຽດສຳລັບບາງຂະແໜງການ, ຂົງເຂດຈຸດສຸມຮັບຜົນກະທົບຈາກ ການປ່ຽນແປງຂອງດິນຟ້າອາກາດໃນສະເພາະໜ້າ ແລະ ຍາວນານ, ພິເສດແມ່ນເຂດຊົນນະບົດ ”
ການຮັບມືກັບ ການປ່ຽນແປງຂອງດິນຟ້າອາກາດແມ່ນສິ່ງທ້າທາຍອັນໃຫຍ່ຫຼວງສຳລັບຫວຽດນາມ. ການປະຕິບັດໜ້າທີ່ເປັນຢ່າງດີນັ້ນ, ບໍ່ພຽງແຕ່ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມເທົ່ານັ້ນ ຫາກຍັງຊ່ວຍຜັນຂະຫຍາຍປະຕິບັດຂໍ້ຕົກລົງປາຣີກ່ຽວກັບດິນຟ້າອາກາດອີກດ້ວຍ.