ທ່ານປະທານປະເທດຫວຽດນາມ Truong Tan Sang ເຂົ້າຮ່ວມກອງປະຊຸມສຸດຍອດ APEC 2011 ທີ່ຈັດຂຶ້ນຢູ່ອາເມລິກາ (ພາບ : internet )
|
ໂດຍຕອບສະໜອງຕາມຄຳເຊີນຂອງປະທານາທິບໍດີແຫ່ງສະຫະພັນລັດເຊຍ Vladimir Putin ແລະ ພັນລະຍາ, ທ່ານປະທານປະເທດແຫ່ງສ.ສ ຫວຽດນາມ Truong Tan Sang ພ້ອມດ້ວຍພັນລະຍາໄດ້ເດີນທາງໄປຍັງ ລັດເຊຍ ເພື່ອເຂົ້າຮ່ວມກອງປະຊຸມບັນດາການນຳເວທີປາໄສຮ່ວມມືເສດຖະກິດອາຊີ - ປາຊີຟິກ (APEC) ຄັ້ງທີ່ 20 ຊຶ່ງຈັດຂຶ້ນຢູ່ Vladivostok ແຕ່ວັນທີ 7 ຫາວັນທີ 9/9/2012 ເພື່ອປຶກສາຫາລືກ່ຽວກັບຈຸດໝາຍຮ່ວມສຳພັນຊຸກຍູ້ການເຕີບໂຕດ້ານເສດຖະກິດໃນພາກພື້ນ. ນີ້ແມ່ນໂອກາດເພື່ອໃຫ້ຫວຽດນາມຍູ້ແຮງການຜັນຂະຫຍາຍການເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກ້ວາງຂວາງ ແລະ ຮອບດ້ານຕາມເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງທີ່ 11 ຂອງພັກກອມມູນິດຫວຽດນາມ, ກໍຄືເພີ່ມທະວີການພົວພັນຄູ່ຮ່ວມມືຍຸດທະສາດຢ່າງ ຮອບດ້ານລະຫວ່າງຫວຽດນາມ - ສະຫະພັນລັດເຊຍ ໃຫ້ຂຶ້ນສູ່ລະດັບສູງໃໝ່. ເວທີປາໄສຮ່ວມມືເສດຖະກິດອາຊີ - ປາຊີຟິກ (ຫຼື້ເອີ້ນຫຍໍ້ວ່າ APEC) ໄດ້ຮັບການສ້າງຕັ້ງຂຶ້ນເມື່ອປີ 1989 ຕາມຂໍ້ລິເລີ່ມຂອງປະເທດອົດສະຕາລີ. ຈາກ 12 ປະເທດສະມາຊິກເຂົ້າຮ່ວມການສ້າງຕັ້ງ, ພາຍຫຼັງເປີດກ້ວາງເປັນ 4 ເທື່ອ, ມາຮອດປະຈຸບັນ APEC ມີ 21 ປະເທດສະມາຊິກ, ໃນນັ້ນມີ 9 ປະເທດສະມາຊິກຂອງກຸ່ມ G 20 ຊຶ່ງກວມ 59% ຈຳນວນປະຊາກອນຂອງໂລກ, ປະກອບສ່ວນກ່ວາ 50% GDP ແລະ 57% ມຸນຄ່າການຄ້າທົ່ວໂລກ. ຍ້ອນເຫດນີ້ເອງ, ບັນດາປະເທດສະມາຊິກ APEC ລ້ວນແຕ່ຖືເປັນສຳຄັນການຮ່ວມມືໃນບັນດາ ເວທີປາໄສ. ປີ 2012, ກອງປະຊຸມ APEC ຖືກດຳເນີນໃນສະພາບການດ້ານການເມືອງ, ຄວາມສະຫງົບປອດໄພໃນໂລກສືບຕໍ່ມີການຜັນແປຢ່າງວອ່ງໄວ, ເສດຖະກິດໂລກຟື້ນຟູຢ່າງຊັກຊ້າ, ຊ້ອນແຝງໄປດ້ວຍຄວາມສ່ຽງຫຼາຍຢ່າງ, ຮອບເຈລະຈາ ໂດຮາ ຍັງບໍ່ທັນມີຄວາມຄືບໜ້າເທື່ອ.... ແຕ່ດ້ວຍບົດບາດແມ່ນ ເວທີປາໄສຮ່ວມສຳພັນເສດຖະກິດທີ່ສຳຄັນໃນພາກພື້ນອາຊີ - ປາຊີຟິກ, APEC ໄດ້ເປັນເອກະສັນກັນຍົກອອກການກຳນົດທິດຮ່ວມມືໃນປີ 2012 ແມ່ນ “ ຮ່ວມສຳພັນເພື່ອເຕີບໂຕ, ມີຫົວຄິດປະດິດສ້າງເພື່ອຄວາມວັດທະນາຖາວອນ ” ແນໃສ່ຊຸກຍູ້ການເຕີບໂຕ, ສ້າງວຽກເຮັດງານທຳ ແລະ ມຸ່ງໄປສູ່ການພັດທະນາແບບຍືນຍົງ. ຕາມນັ້ນແລ້ວ, APEC ປີ 2012 ແມ່ນເລັ່ງໃສ່ບຸລິມະສິດ 4 ປະການຄື : ຫັນການຄ້າ ແລະ ການລົງທຶນເປັນເສລີ; ຮ່ວມສຳພັນເສດຖະກິດໃນພາກພື້ນ; ເພີ່ມທະວີການຮັບປະກັນຄວາມໝັ້ນຄົງດ້ານສະບຽງອາຫານ; ສ້າງຕັ້ງບັນດາລະບົບສະໜອງທີ່ໜ້າໄວ້ເນື້ອເຊື່ອໃຈ ແລະ ຊຸກຍູ້ການເຕີບໂຕ, ປະດິດຄິດສ້າງ .
ນັບແຕ່ເວລາເຂົ້າເປັນສະມາຊິກ APEC ເມື່ອເດືອນ 11 ປີ 1998, ຍາມໃດຫວຽດນາມກໍເປັນສະມາຊິກທີ່ຕັ້ງໜ້າ, ຂະຫຍັນຂັ່ນເຄື່ອນ ແລະ ມີຄວາມຮັບ ຜິດຊອບຂອງເວທີປາໄສ, ເປັນເຈົ້າການຊຸກຍູ້ການຮ່ວມມືໃນທຸກຂົງເຂດເສດຖະ ກິດ, ການຄ້າ, ແລະການຮ່ວມມືໃນຂົງເຂດອື່ນໆ. ຈຸດທີ່ສຳຄັນໃນວິວັດທະນາການເຊື່ອມໂຍງເຂົ້າກັບສາກົນ, ນັ້ນແມ່ນຫວຽດນາມໄດ້ຮັບຜິດຊອບບົດບາດເປັນເຈົ້າພາບຈັດຕັ້ງ ເວທີປາໄສຮ່ວມມືເສດຖະກິດອາຊີ - ປາຊີຟິກ (APEC) ປີ 2006 ຢ່າງດີເດັ່ນ. ພິເສດແມ່ນຜົນສຳເລັດຂອງກອງປະຊຸມສຸດຍອດ APEC ຄັ້ງທີ່ 14 ຢູ່ຮ່າໂນ້ຍ, ຊຶ່ງແມ່ນໜຶ່ງໃນບັນດາກອງປະຊຸມໄດ້ຮັບການຕີລາຄາວ່າ ແມ່ນມີຄວາມໝາຍສຳຄັນຍິ່ງ, ຊຶ່ງໄດ້ຍົກອອກບັນດາການກຳນົດທິດຮ່ວມມືຍາວນານໃຫ້ແກ່ APEC. ຫວຽດນາມໄດ້ປະຕິບັດບັນດາຄຳໝັ້ນສັນຍາຮ່ວມມືຂອງ APEC ຄື : ບົດລາຍງານກ່ຽວກັບໂຄງການດຳເນີນງານແຫ່ງຊາດປະຈຳປີ, ປະຕິບັດໂຄງການດຳເນີນງານລວມໝູ່, ບັນດາແຜນການຮ່ວມມືກ່ຽວກັບການຫັນດ້ານການຄ້າ, ການລົງທຶນເປັນສະດວກ....ຫວຽດນາມກໍຮັບຜິດຊອບບົດບາດເປັນປະທານ ແລະ ຜູ້ບໍລິຫານບັນດາກຸ່ມປະຕິບັດງານທີ່ສຳຄັນຄື : ກຸ່ມປະຕິບັດງານການແພດອາຍຸການ 2009-2010, ກຸ່ມປະຕິບັດງານຮັບມືກັບສະພາບວະສຸກເສີນ, ກຸ່ມປະຕິບັດງານກ່ຽວກັບການຄ້າເອເລັກໂຕນິກ.... ຫວຽດນາມໄດ້ຜັນຂະຫຍາຍກ່ວາ 70 ຂໍ້ລິເລີ່ມຢ່າງສຳເລັດຜົນ ພ້ອມທັງເຄື່ອນໄຫວໃນເກືອບທຸກຂົງເຂດຄື ການຄ້າ, ການລົງທຶນ, ການຮ່ວມມືເສດຖະກິດເຕັກນິກ, ສາທາລະນະສຸກ, ການຮັບມືກັບໄພທຳມະຊາດ, ຕ້ານກໍ່ການການຮ້າຍ....
ເຂົ້າຮ່ວມ ກອງປະຊຸມສຸດຍອດ APEC ປີ 2012, ຢູ່ ສ .ລັດເຊຍ, ທ່ານປະທານປະເທດຫວຽດນາມ Truong Tan Sang ບໍ່ພຽງແຕ່ຢືນຢັນຄືນອີກຄັ້ງໜຶ່ງກ່ຽວກັບການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ສະຫະພັນລັດເຊຍ ຊຶ່ງຫາກໍໄດ້ຮັບການຍົກລະດັບໃນເດືອນ 7 ແລ້ວນີ້ເທົ່ານັ້ນ, ຫາກຍັງສົ່ງສານທີ່ຈະແຈ້ງເຖິງປະຊາຄົມໂລກອີກດ້ວຍ. ນັ້ນແມ່ນຫວຽດນາມເປັນເຈົ້າການເຊື່ອມໂຍງເຂົ້າກັບສາກົນ ແລະ ກຽມພ້ອມຮ່ວມມືກັບທຸກໆປະເທດ ແລະ ເຂດແຄ້ວນເພື່ອການພັດທະນາຂອງແຕ່ລະປະເທດ, ເພື່ອສັນຕິພາບ ແລະ ການ ພັດທະນາໃນພາກພື້ນ ແລະ ໃນໂລກ. ທ່ານປະທານປະເທດຫວຽດນາມ Truong Tan Sang ຈະມີບົດປາໄສທຳອິດ ແລະ ແນະນຳຫົວເລື່ອງຢູ່ທີ່ວາລະປະຊຸມລັບຂອງກອງປະຊຸມຂັ້ນສູງກ່ຽວກັບຄວາມໝັ້ນຄົງດ້ານສະບຽງອາຫານ ແລະ ໃນວາລະປະຊຸມຄົບຄະນະກອງປະຊຸມສຸດຍອດວິສາຫະກິດດ້ວຍຫົວຂໍ້ : “ ນ້ຳ - ແຫຼ່ງຊັບພະຍາກອນຍຸດທະສາດທົ່ວໂລກໃໝ່ ” . ສິ່ງນີ້ໄດ້ສະແດງໃຫ້ເຫັນທີ່ຕັ້ງບົດບາດໃໝ່ຂອງຫວຽດນາມໃນ APEC ແມ່ນນັບມື້ນັບຖືກຍົກສູງຂຶ້ນ. ກອງປະຊຸມສຸດຍອດ APEC 2012 ກໍແມ່ນໂອກາດເພື່ອໃຫ້ຫວຽດນາມປະກອບສ່ວນບັນດາຂໍ້ລິເລີ່ມເພື່ອຜົນປະໂຫຍດລວມຂອງພາກພື້ນ, ພ້ອມທັງຊອກຫາຄວາມສາມາດຮ່ວມມືກັບບັນດາພື້ໜຖານເສດຖະກິດອື່ນໆໃນ APEC, ແນໃສ່ຕອບສະໜອງບັນດາຈຸດໝາຍພັດທະນາຂອງຫວຽດນາມຄື ສ້າງໂຄງປະກອບເສດຖະກິດຄືນໃໝ່, ປ່ຽນໃໝ່ຮູບແບບການເຕີບໂຕ ແລະ ປະຕິບັດຍຸດທະສາດພັດທະນາເສດຖະກິດ-ສັງຄົມໄລຍະ 2011-2020 ຢ່າງສຳເລັດຜົນ.
ເຂົ້າຮ່ວມ ກອງປະຊຸມສຸດຍອດ APEC ຄັ້ງນີ້, ທ່ານປະທານປະເທດແຫ່ງສ.ສ ຫວຽດນາມ Truong Tan Sang ຢືນຢັນຢ່າງຈະແຈ້ງກ່ຽວກັບທີ່ຕັ້ງບົດບາດຂອງຫວຽດນາມໃນເວທີສາກົນດ້ວຍຄວາມເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນ. ຫວຽດນາມຈະສືບຕໍ່ຮຽງບ່າຮຽງໄຫຼ່ພ້ອມກັບບັນດາພື້ນຖານເສດຖະກິດພາຄີ ປະກອບສ່ວນເຂົ້າໃນຜົນສຳເລັດຮ່ວມຂອງ ກອງປະຊຸມສຸດຍອດ APEC 2012 ເພື່ອພາກພື້ນອາຊີ - ປາຊີຟິກແຫ່ງສັນຕິພາບ, ສະຖຽນລະພາບ ແລະ ວັດທະນາຖາວອນ.