(vovworld)-ປີນີ້ແມ່ນປີທຳອິດທີ່ຫວຽດນາມ ຈັດວັນຄວາມຜາສຸກສາກົນ (20/3) ພາຍຫຼັງ 1 ປີທີ່ ສປຊ ປຸກລະດົມເຫດການນີ້ໃນທົ່ວໂລກ. ເລື່ອງ ຫວຽດນາມ ຈັດວັນຄວາມຜາສຸກສາກົນ ລະດັບຊາດໃນປີທຳອິດໄດ້ສະແດງໃຫ້ເຫັນຄວາມມານະພະຍາຍາມຂອງຫວຽດນາມ ໃນການຍົກສູງຄຸນນະພາບຊີວິດຂອງປະຊາຊົນ, ມູ້ງໄປເຖິງການພັດທະນາແບບຍືນຍົງ.
ຕອບສະໜອງວັນຄວາມຜາສຸກສາກົນຢູ່ດົ່ງນາຍ
(ພາບ: baodongnai.com.vn)
ດ້ວຍຫົວຂໍ້ວ່າ “ຮັກແພງ ແລະ ແບ່ງປັນຊື່ງກັນ ແລະ ກັນ“, ວັນຄວາມຜາສຸກສາກົນຢູ່ຫວຽດນາມ ປີນີ້ ໄດ້ສຸມໃສ່ບັນດາການເຄື່ອນໄຫວຄື: ໂຄສະນາ, ຈັດງານໂຮມຊຸມນຸມ, ກອງປະຊຸມສຳມະນາ, ກອງປະຊຸມ, ການຝຶກອົບຮົມ, ພົບປະສົນທະນາ, ເວທີໄປໄສ, ງານປະກວດ, ບັນດາເຫດການວັດທະນະທຳ, ກິລາ, ການທ່ອງທ່ຽວ. ບັນດາຜູ້ຈັດຕັ້ງວັນຄວາມຜາສຸກສາກົນປາດຖະໜາວ່າ, ປຊຊ ຫວຽດນາມ ທຸກຄົນຈະຮັກແພງກັນ, ແບ່ງປັນ ແລະ ຮ່ວມແຮງຮ່ວມໃຈພັດທະນາຊີວິດສັງຄົມ.
ບັນດາແຜນນະໂຍບາຍ, ນະໂຍບາຍໃຫ່ຍລ້ວນແຕ່ມຸ້ງໄປເຖິງຄວາມຜາສຸກຂອງ ປຊຊ
ໃນຫຼາຍປີຜ່ານມາ, ບັນດາແຜນນະໂຍບາຍ, ນະໂຍບາຍໃຫ່ຍຂອງພັກ, ລັດເພື່ອໃຫ້ ປຊຊ ມີຊີວິດການເປັນຢູ່ທີ່ອີມໜຳສຳລານ, ມີຄວາມຜາສຸກ, ຮັບປະກັນຊີວິດສັງຄົມບັນລຸໄດ້ປະສິດທິຜົນທີ່ຕັ້ງໜ້າ. ຕາມໝາກຜົນແຫ່ງການສຳຫຼວດ “ໂລກແຫ່ງຄວາມຜາສຸກ“ ໂດຍສະຖາບັນໂລກ ສັງກັດມະຫາວິທະຍາໄລ Columbia ປະເທດອາເມລິກາ ປະກາດເມື່ອທ້າຍປີ 2013 ແລ້ວ, ຫວຽດນາມ ແມ່ນປະເທດໄດ້ຈັດອັບດັບ 63 ໃນໂລກ ກ່ຽວກັບຄວາມຜາສຸກ. ໃນຂະນະນັ້ນ, ຕາມການຕີລາຄາຂອງກອງທຶນເສດຖະກິດໃໝ່ໃນປີ 2012, ຫວຽດນາມ ຢືນອັນດັບ 2 ກ່ຽວກັບດັດຊະນີຄວາມຜາສຸກ (HIP-Happy planet index) ໃນໂລກ. ທ່ານເຈິ່ງເຮືອງເຢືອງ ຮອງຫົວໜ້າກົມຄອບຄົວ, ກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ຕີລາຄາວ່າ:
“ໃນຊຸມປີຜ່ານມາ, ພັກ, ລັດ, ລັດຖະບານກໍ່ຄືບັນດາຂະແໜງການ, ຂັ້ນຕ່າງໆ ໄດ້ເອົາໃຈໃສ່ເຖິງຊີວິດສັງຄົມ, ຊ່ວຍ ປຊຊ ມີຊີວິດອິ່ມໜຳສຳລານ, ມີຄວາມຜາສຸກ. ນັ້ນແມ່ນໝາກຜົນທີ່ຈະແຈ້ງທີ່ສຸດ. ຫວຽດນາມ ແມ່ນປະເທດພວມພັດທະນາຊື່ງໄດ້ເອົາໃຈໃສ່ເຖິງຊີວິດຂອງ ປຊຊ ທີ່ສຸດ. ສະນັ້ນ, ເມື່ອ ສປຊ ອອກແຈ້ງການກ່ຽວກັບຄວາມໝາຍຂອງວັນຄວາມຜາສຸກສາກົນຄືວັນທີ 20/3, ບັນດາມາດຖານຂອງ ສປຊ ກ່ຽວກັບວັນຄວາມຜາສຸກສາກົນຄື: ສຸຂະພາບ, ຈິດໃຈ, ການສຶກສາ, ສິ່ງແວດລ້ອມ, ຄຸນນະພາບການຄຸ້ມຄອງ ແລະ ລະດັບຄ່າຄອງຊີບຂອງ ປຊຊ ແມ່ນເໝາະສົມກັບບັນດາມາດຖານກ່ຽວກັບຊີວິດສັງຄົມຊື່ງຫວຽດນາມ ພວມມຸ້ງໄປເຖິງ“
ເປັນຄັ້ງທຳອິດຫວຽດນາມຈັດວັນຄວາມຜາສຸກສາກົນ
(ພາບ: .doisongphapluat.com)
ສືບຕໍ່ຍົກສູງຄຸນນະພາບຊີວິດຂອງ ປຊຊ
ໃນໂອກາດປຸກລະດົມວັນຄວາມຜາສຸກສາກົນປີ 2013, ທ່ານເລຂາທິການໃຫ່ຍ ສປຊ ບານກີມູນ ໄດ້ກ່າວຄຳເຫັນວ່າ: “ພວກເຮົາຕ້ອງການມີຮູບແບບເສດຖະກິດໃໝ່ທີ່ເຫັນໄດ້ຄວາມສຳຄັນຂອງ 3 ປັດໄຈທີ່ຕ້ອງການທີ່ສຸດໃຫ້ແກ່ການພັດທະນາແບບຍືນຍົງ. 3 ປັດໄຈນັນລວມມີ: ສັງຄົມ-ເສດຖະກິດ-ສິ່ງແວດລ້ອມ. ຖ້າເຮັດໄດ້ທັງ 3 ປັດໄຈດັ່ງກ່າວ, ພວກເຮົາຈະມີໂລກແຫ່ງຄວາມຜາສຸກ“. ດ້ວຍຄຳໝັ້ນສັນຍາວ່າ ວັນຄວາມຜາສຸກສາກົນ ບໍ່ພຽງແຕ່ແມ່ນວັນທີ່ມີຄວາມເປັນສັນຍາລັກເທົ່ານັ້ນ, ຫວຽດນາມ ພ້ອມກັບ 192 ປະເທດສະມາຊິກ ສປຊ ສະໜັບສະໜູນວັນດັ່ງກ່າວດ້ວຍຄວາມມານະພະຍາຍາມຍົກສູງຄຸນນະພາບຊີວິດ, ສ້າງສັງຄົມຍຸດຕິທຳ, ພັດທະນາແບບຍືນຍົງ, ເພື່ອນຳເອົາຄວາມຜາສຸກມາໃຫ້ ປຊຊ. ສິ່ງດັ່ງກ່າວໄດ້ພິສູດໃຫ້ເຫັນຜ່ານບັນດາຈຸດໝາຍ ແລະ ມາດຕະການບໍລິຫານເສດຖະກິດ-ສັງຄົມຂອງລັດຖະບານໃນປີ 2014 ຊື່ງທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ໄດ້ເຕື້ອງເຖິງໃນກອງປະຊຸມສາໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13 ທີ່ຜ່ານມາ:
“ປະຕິບັດມະຕິຂອງສູນກາງກ່ຽວກັບບາງບັນຫານະໂຍບາຍສັງຄົມຢ່າງມີປະສິດທິຜົນ. ປະຕິບັດບັນດາມາດຕະການແກ້ໄຂວຽກເຮັດງານທຳ, ຍົກສູງລາຍຮັບຂອງຜູ້ອອກແຮງງານ, ໂດຍສະເພາະແມ່ນຜູ້ອອກແຮງງານຊົນນະບົດຢ່າງຄົບຊຸດ. ຍູ້ແຮງການປະຕິບັດໂຄງການຈຸດໝາຍແຫ່ງຊາດຫລຸດຜ່ອນຄວາມທຸກຍາກແບບຍືນຍົງ. ກວດກາ, ເພິ່ມເຕິມນະໂຍບາຍພິເສດໜູນຊ່ວຍຊາວຊົນເຜົ່າສ່ວນໜ້ອຍ ແລະ ເຂດຫຍຸ້ງຍາກພິເສດ, ໂດຍສະເພາະແມ່ນດ້ານທັນຍາຫານ, ພັດທະນາການລ້ຽງສັດ, ປູກ ແລະ ປົກປັກຮັກສາປ່າ. ຈັດຕັ້ງປະຕິບັດມະຕິຂອງລັດຖະບານກ່ຽວກັບບາງບັນຫາຮີບດ່ວນໃນຂົງເຂດປົກປັກຮັກສາສິ່ງແວດລ້ອມຢ່າງມີປະສິດທິຜົນ. ປົກປ້ອງ, ພັດທະນາປ່າ, ອະນຸລັກຮັກສາທຳມະຊາດ ແລະ ຊີວະນາໆພັນ. ປັບປຸງຄຸນນະພາບສິ່ງແວດລ້ອມ ແລະ ເງື່ອນໄຂຊີວິດຂອງ ປຊຊ“.
ພ້ອມກັບການພັດທະນາດ້ານເສດຖະກິດ, ເລື່ອງຫວຽດນາມ ເອົາໃຈໃສ່, ຮັບປະກັນຊີວິດສັງຄົມກໍ່ແມ່ນຄວາມມານະພະຍາຍາມເພື່ອໃຫ້ ປຊຊ ມີຊີວິດທີ່ມີຄວາມຜາສຸກ, ປະກອບສ່ວນສຳຄັນ ຮັບປະກັນໃຫ້ແກ່ການພັດທະນາແບບຍືນຍົງຂອງປະເທດຊາດ./.