ຫວຽດນາມແມ່ນປະເທດໜຶ່ງທີ່ມີການພັດທະນາ
ດ້ານສື່ມວນຊົນຢ່າງແຂງແຮງທີ່ສຸດ
|
ຫວ່າງແລ້ວນີ້, ອົງການນັກຂ່າວບໍ່ມີພົມແດນໄດ້ມອບອັນທີ່ເອີ້ນວ່າ “ ລາງວັນພົນລະເມືອງເຄືອຂ່າຍ ອິນເຕີແນັດປີ 2013 ” ໃຫ້ແກ່ Blogger ຮີງງອກເຈີນ. ພ້ອມກັບລາງວັນນີ້, ໃນບົດລາຍງານເນືອ່ງໃນໂອກາດວັນຕ້ານການຄວບຄຸມທາງອິນເຕີແນັດ, ອົງການນີ້ໄດ້ຂາດພາວະວິໄສເມື່ອເອີ້ນຫວຽດນາມວ່າແມ່ນ “ສັດຕູຂອງອິນເຕີແນັດ”
ອົງການນັກຂ່າວບໍ່ມີພົມແດນເວົ້າວ່າ ການມອບລາງວັນໃຫ້ແກ່ Blogger ຮີງງອກເຈີນ ແມ່ນວິທີຊຶ່່ງອົງການນີ້ຮັບຮູ້ການປະກອບສ່ວນຂອງບັນດານັກຂ່າວເສລີຢູ່ຫວຽດນາມໃນການສົ່ງເສີມສິດເສລີໃນການປາກເວົ້າ, ສິດເສລີໃນການສື່ຂ່າວ ແລະ ສິດເສລີທາງ ອິນເຕີແນັດ. ກໍຈະບໍ່ມີຫຍັງທີ່ເປັນໜ້າກ່າວເຖິງ, ຖ້າຫາກວ່າ ນີ້ແມ່ນວຽກງານພາຍໃນຂອງສະເພາະ ອົງການນັກຂ່າວບໍ່ມີພົມແດນນີ້ເອງ ເພາະການມອບລາງວັນໃຫ້ແກ່ສ່ວນບຸກຄົນໃດ, ເຖິງແມ່ນວ່າຈະເໝາະສົມຫຼືບໍ່ກໍຕາມ, ແຕ່ມັນກໍແມ່ນສິດຂອງບໍ່ວ່າອົງການໃດໆ. ແຕ່ຄວາມອັບອາຍນັ້ນແມ່ນຢູ່ບ່ອນວ່າ ອົງການນັກຂ່າວບໍ່ມີພົມແດນໄດ້ ເສກສັນປັ້ນແຕ່ງບິດເບືອນຄວາມຈິງກ່ຽວກັບສິດເສລີພາບທາງສື່ມວນຊົນຂອງຫວຽດນາມຢ່າງເປີດແປນເມື່ອເອີ້ນຫວຽດນາມວ່າ ແມ່ນ “ສັດຕູຂອງອິນເຕີແນັດ” ແລະ ໄດ້ຈັດຫວຽດນາມຢືນອັນດັບ 172/179 ໃນຕາຕະລາງດັດຊະນີກ່ຽວກັບສິດເສລີພາບທາງສື່ມວນຊົນໂລກຂອງອົງການນັກຂ່າວບໍ່ມີພົມແດນ. ນອກຈາກນັ້ນອົງການນີ້ຍັງຖືວ່າ ມີຫົວໜ່ວຍສະໜອງການບໍລິການອິນເຕີແນັດຫຼາຍຫົວໜ່ວຍຢູ່ຫວຽດນາມໄດ້ຊ່ວຍລັດຖະບານຄວບຄຸມອິນເຕີແນັດ.
ເມື່ອໄດ້ຍົກອອກຂໍ້ສະຫຼຸບນີ້, ແນ່ນອນວ່າອົງການນັກຂ່າວບໍ່ມີພົມແດນໄດ້ຕັ້ງໃຈຫຼົງລືມສະພາບຄວາມເປັນຈິງທີ່ວ່າ ນັບແຕ່ປີ 1997, ຂະນະທີ່ຫວຽດນາມເລີ່ມສຳຜັດກັບເຕັກໂນໂລຢີທີ່ທັນສະໄໝນີ້, ມາຮອດປະຈຸບັນ, ການພັດທະນາຢ່າງກ້າວກະໂດດຂັ້ນຂອງອິນເຕີແນັດ ບໍ່ພຽງແຕ່ສະແດງໃຫ້ເຫັນຜ່ານຕົວເລກກ່ຽວກັບລະດັບການເຕີບໂຕ, ປະເພດການບໍລິການ, ຈຳນວນຄົນນຳໃຊ້ອິນເຕີແນັດເທົ່ານັ້ນ, ຫາກຍັງສະແດງອອກຜ່ານເລື່ອງປະຊາຊົນສາມາດເປີດນຳໃຊ້ທາງ ອິນເຕີແນັດຢູ່ທຸກບ່ອນ ແລະ ໃນທຸກເວລາ. ຄວາມຈິງນີ້ໄດ້ສະແດງໃຫ້ເຫັນຄວາມເອົາໃຈໃສ່ ແລະ ກົນໄກເປີດກ້ວາງຂອງພັກ ແລະ ລັດຫວຽດນາມເພື່ອສ້າງເງື່ອນໄຂສະດວກໃຫ້ແກ່ອິນເຕີແນັດພັດທະນາ. ວິທະຍຸກະຈາຍສຽງຫວຽດນາມໄດ້ເຄີຍຄັດສະເໜີຄຳເຫັນຂອງທ່ານ ຝ້າມກວັກເຫຍີດ ຜູ້ອຳນວຍການບໍລິສັດຊອບແວ ເຫຍີດເກືອງ ຊຶ່ງຖືວ່າ ນັບແຕ່ເມື່ອຫວຽດນາມໄດ້ເຊື່ອມຕໍ່ເຄືອຂ່າຍ ອິນເຕີແນັດທົ່ວໂລກມາຮອດປະຈຸບັນ, ປະຊາຊົນຫວຽດນາມບໍ່ປະສົບກັບຄວາມຫຍຸ້ງຍາກ, ສິ່ງກີດຂວາງແຕ່ຢ່າງໃດເມື່ອນຳໃຊ້ເຄືອຂ່າຍ ອິນເຕີແນັດ. ທ່ານ ຝ້າມກວັກເຫຍີດ ເນັ້ນໜັກວ່າ :
“ ຫວຽດນາມແມ່ນປະເທດໜຶ່ງທີ່ມີການພັດທະນາເຕັກໂນໂລຢີຂໍ້ມຸນຂ່າວສານຢ່າງແຂງແຮງທີ່ສຸດ, ໃນນັ້ນ, ເຄືອຂ່າຍອິນເຕີແນັດ ໄດ້ລົງຮອດບັນດາໝູ່ບ້ານເຂດບ້ານນາແລ້ວ. ສິ່ງນີ້ໄດ້ຮັບການຢັ້ງຢືນຈາກບັນດາປະເທດໃນໂລກ. ພວກເຮົາສາມາດສຳຜັດກັບທຸກໆຂ່າວຄາວທາງເຄືອຂ່າຍ ອິນເຕີແນັດ ທີ່ພວກເຮົາຕ້ອງການ. ເພາະສະນັ້ນ ເມື່ອເວົ້າວ່າ ອິນເຕີແນັດ ຖືກຈຳກັດແມ່ນບໍ່ຖືກຕ້ອງ ”
ຖ້າວ່າມັນຖືກກັບອົງການນັກຂ່າວບໍ່ມີພົມແດນທີ່ເວົ້າວ່າ “ ຫວຽດ ນາມ ແມ່ນສັດຕູຂອງອິນເຕີແນັດ” , ແນ່ນອນວ່າ ໃນກ່ວາ 16 ປີທີ່ຜ່ານມາ, ຈະບໍ່ອາດມີ ຜູ້ນຳໃຊ້ອິນເຕີແນັດເປັນຈຳນວນ 27 ລ້ານຄົນ, ຊຶ່ງກວມເອົາເກືອບ 31% ຈຳນວນປະຊາກອນຂອງຫວຽດນາມໃນປະຈຸບັນ. ແລະ ຖ້າວ່າມັນຖືກກັບອົງການນັກຂ່າວບໍ່ມີພົມແດນເວົ້າວ່າ “ ມີຫົວໜ່ວຍສະໜອງການບໍລິການອິນເຕີແນັດຫຼາຍຫົວໜ່ວຍຢູ່ຫວຽດນາມໄດ້ຊ່ວຍລັດຖະບານຄວບຄຸມ ອິນເຕີແນັດ” ນັ້ນ, ແນ່ນອນວ່າ ບັນດາຜູ້ຄົນຊາວຕ່າງປະເທດພວມດຳລົງຊີວິດ ແລະ ເຮັດວຽກຫຼືເຂົ້າມາທ່ອງທ່ຽວຢູ່ຫວຽດນາມ ຕ້ອງໄດ້ພົບພໍ້ກັບກໍລະນີດັ່ງກ່າວແລ້ວ. ແຕ່ຄວາມຈິງ ແມ່ນແຕກຕ່າງກັນຫຼາຍກັບບັນດາຄຳຕູ່ຫາທີ່ໄດ້ກ່າວມາຂ້າງເທິງຂອງ ອົງການນັກຂ່າວບໍ່ມີພົມແດນ. ນາງ Turino ຊາວກູບາ ຊຶ່ງແມ່ນຜູ້ໄດ້ດຳລົງຊີວິດ ແລະ ເຮັດວຽກຢູ່ຫວຽດນາມເປັນເວລາຫຼາຍປີ ໃຫ້ຮູ້ວ່າ :
“ ນັບແຕ່ເວລາຫາກໍມາຫວຽດນາມມາຮອດປະຈຸບັນ, ຂ້າພະເຈົ້າບໍ່ປະສົບກັບຄວາມຫຍຸ້ງຍາກແຕ່ຢ່າງໃດເມື່ອນຳໃຊ້ການບໍລິການ ອິນເຕີແນັດ ຢູ່ຫວຽດນາມ, ຂ້າພະເຈົ້າຍັງຕິດຕໍ່ພົວພັນທາງ ອິນເຕີແນັດກັບຍາດຕິພີ່ນ້ອງຢູ່ບ້ານ. ຂ້າພະເຈົ້າຄິດວ່າ ທຸກໆປະເທດ ກໍລ້ວນແຕ່ມີບັນດາຂໍ້ກຳນົດຕ່າງຫາກໃນການກໍ່ສ້າງ ແລະ ພັດທະນາ ອິນເຕີແນັດ ຕາມຄວາມມຸ່ງຫວັງ ແລະ ຜົນປະໂຫຍດຂອງປະເທດນັ້ນ ”
ບໍ່ແມ່ນເລື່ອງບັງເອີນທີ່ຫວຽດນາມໄດ້ກາຍເປັນປະເທດທີ່ມີລະດັບການເຕີບໂຕ ອິນເຕີແນັດ ໄວກ່ວາໝູ່ໃນພາກພື້ນ ແລະ ນອນໃນຈຳນວນບັນດາປະເທດທີ່ມີລະດັບການເຕີບໂຕສູງກ່ວາໝູ່ໃນໂລກ, ຊຶ່ງແຕກຕ່າງກັນຫຼາຍກັບບັນດາຄຳຕູ່ຫາຂອງ ອົງການນັກຂ່າວບໍ່ມີພົມແດນ. ສິ່ງທີ່ເປັນຂໍ້ກຸນແຈຂອງການພັດທະນາຢ່າງກະໂດດຂັ້ນນັ້ນ, ແມ່ນຄວາມເອົາໃຈໃສ່ເປັນພິເສດຂອງພັກ ແລະ ລັດຫວຽດນາມທີ່ມີຕໍ່ຂົງເຂດເຕັກໂນໂລຢີຂໍ້ມຸນຂ່າວສານເວົ້າລວມ ແລະ ອິນເຕີແນັດ ເວົ້າສະເພາະ. ແຕ່ກໍເຊັ່ນດຽວກັນກັບຫຼາຍປະເທດອື່ນໆ, ຫວຽດນາມມີບັນດາຂໍ້ກຳນົດໃນການນຳໃຊ້ ອິນເຕີແນັດ ເພື່ອບໍ່ສົ່ງຜົນສະທ້ອນເຖິງຮີດຄອງປະເພນີ, ຄວາມສະຫງົບແຫ່ງຊາດ.... ເພາະສະນັ້ນ, ອົງການນັກຂ່າວບໍ່ມີ ພົມແດນໄດ້ຫຼົງຜິດເມື່ອຖືວ່າ ຫວຽດນາມໄດ້ຄວບຄຸມ ອິນເຕີແນັດ ຄືດັ່ງບົດລາຍງານໂດຍ ອົງການນັກຂ່າວບໍ່ມີພົມແດນຍົກອອກມາເມື່ອວັນທີ 12/3/2013.
ອົງການນັກຂ່າວບໍ່ມີພົມແດນຍັງຂາດພາວະວິໄສເມື່ອມອບອັນທີ່ເອີ້ນວ່າ “ ລາງວັນພົນລະເມືອງ ເຄືອຂ່າຍອິນເຕີແນັດປີ 2013 ” ໃຫ້ແກ່ Blogger ຮີງງອກເຈີນ ຊຶ່ງແມ່ນຊາວຫວຽດນາມ. ໃນບົດປາໄສເມື່ອໄດ້ຮັບລາງວັນນີ້, ຮີງງອກເຈີນ ໄດ້ຫຼົງລືມວ່າ ຍ້ອນການພັດທະນາຢ່າງວອ່ງໄວຂອງ ອິນເຕີແນັດ ຢູ່ຫວຽດນາມນັ້ນ, ປະຊາຊົນຈຶ່ງສາມາດພົວພັນແລກປ່ຽນ, ສະແດງທັດສະນະຕໍ່ທຸກໆບັນຫາຂອງປະເທດຊາດ ແລະ ສາກົນຢ່າງມີປະຊາທິປະໄຕ ແລະ ເສລີຜ່ານເຄືອຂ່າຍ ອິນເຕີແນັດ. ເປັນທີ່ຈະແຈ້ງແລ້ວວ່າ , ອົງການນັກຂ່າວບໍ່ມີພົມແດນໄດ້ມອບລາງວັນໃຫ້ແກ່ສ່ວນບຸກຄົນຢ່າງບໍ່ເໝາະສົມ, ຮັບໃຊ້ບັນດາເຈດຈຳນົງທີ່ບໍ່ພາວະວິໄສຂອງອົງການນີ້.