ການນຳບັນດາປະເທດສະມາຊິກ SCO ທີ່ເຂົ້າຮ່ວມກອງປະຊຸມ
( ພາບ: Internet)
|
ໃນລະຫວ່າງວັນທີ 6-7/6, ຢູ່ປະເທດຈີນ ໄດ້ດຳເນີນກອງປະຊຸມສຸດຍອດອົງການຮ່ວມມືຊຽງໄຮ່ (SCO) ຄັ້ງທີ 12 ໂດຍມີການເຂົ້າຮ່ວມຂອງປະມຸກລັດ 6 ປະເທດສະມາຊິກພ້ອມກັບບັນດາການນຳປະເທດສັງເກດການ, ບັນດາຄູ່ເຈລະຈາ. ບັນດາເນື້ອໃນຮ່ວມມືຍຸດທະສາດຂອງ SCO ກໍ່ຄືບັນດາມາດຕະການເປີດກ້ວາງຜົນສະທ້ອນຂອງ SCO ໄດ້ຖືກນຳມາປຶກສາຫາລືທີ່ກອງປະຊຸມ ຊື່ງອາດຈະເປີດແງ່ຫວັງໃໝ່ ຂະນະທີ່ອົງການນີ້ກ້າວເຂົ້າສູ່ທົດສະວັດທີ 2 ຂອງວິວັດທະນາການແຫ່ງການພັດທະນາ.
ປະຈຸບັນ, SCO ມີສະມາຊິກສົມບູນ 6 ປະເທດ, ລວມມີ: ລັດເຊຍ, ຈີນ ແລະ 4 ປະເທດອາຊີກາງຄື: ກາຊັກສະຖານ, ກຽດກິສະຖານ, ຕາຢີກີສະຖານ ແລະ ອູເຊີເບກີສະຖານ. ນອກຈາກນັ້ນແລ້ວ, ທີ່ກອງປະຊຸມຄັ້ງນີ້, ບັນດາປະເທດອິນເດຍ, ອີຣານ, ໂມງກົນ ແລະ ປາກີສະຖານກໍໄດ້ເຂົ້າຮ່ວມດ້ວຍຖານະເປັນປະເທດສັງເກດການ. ເບລາຣຸດ ແລະ ສີລັງກາ ແມ່ນບັນດາປະເທດຄູ່ເຈລະຈາ. ທີ່ກອງປະຊຸມ, ການນຳບັນດາປະເທດສະມາຊິກ SCO ໄດ້ເຫັນດີເປັນເອກະສັນ ໂດຍຖືວ່າ, SCO ໄດ້ສວມບົດບາດຫຼັກແຫຼ່ງໃນການຊຸກຍູ້ການຮ່ວມມື, ຮ່ວມສຳພັນຕໍ່ສູ້ກັບບັນດາໄພອັນຕະລາຍ ແລະ ການທ້າທາຍ ກໍ່ຄືຮັກສາຄວາມສະຫງົບປອດໄພ ແລະ ສະຖຽນລະພາບໃນພາກພື້ນ. ເພື່ອພິສູດໃຫ້ສິ່ງດັ່ງກ່າວ, ທ່ານ Muratbek Imanalyev ເລຂາທິການໃຫ່ຍ SCO ໃຫ້ຮູ້ວ່າ: ໃນລາຍການເຮັດວຽກທີ່ໜາແໜ້ນ, ກອງປະຊຸມສະຫງວນບຸລິມະສິດໃຫ້ແກ່ເນື້ອໃນຕໍ່ສູ້ຕ້ານກໍ່ການຮ້າຍ, ການແຍກຕົວ ແລະ ຕ້ານພວກຫົວຮຸນແຮງ ດ້ວຍການພິຈາລະນາ ຮັບຮອງເອົາໂຄງການຕ້ານກໍ່ການຮ້າຍ, ການແຍກຕົວ ແລະ ຕ້ານພວກຫົວຮຸນແຮງ ໄລຍະ 2013-2015. ສິ່ງດັ່ງກ່າວກໍ່ກົງກັບເນື້ອໃນຈິດໃຈ ຊື່ງປະທານປະເທດຈີນ ຫູຈີນເທົ່າ ໄດ້ກ່າວໃນບົດປາໄສ ກ່ອນໄຂກອງປະຊຸມທີ່ວ່າ: ເພື່ອຮັບມືກັບບັນດາການທ້າທາຍດ້ານ ປ້ອງກັນຄວາມສະຫງົບ, ບັນດາສະມາຊິກອົງການຮ່ວມມືຊຽງໄຮ່ ຄວນສືບຕໍ່ເພີ່ມທະວີຄວາມສາມາດຕ້ານຄືນບັນດາໄພນາບຂູ່ ແລະ ໄພອັນຕະລາຍ, ຄວບຄຸມບັນດາບັນຫາໃນພາກພື້ນດ້ວຍຕົນເອງ ແລະ ສວມບົດບາດໃຫ່ຍກ່ວາໃນການສ້າງສັນຕິພາບຢູ່ອາບການີສະຖານ ຄືນໃໝ່. ທ່ານປະທານປະເທດຈີນ ຫູຈີນເທົ່າ ໃຫ້ຮູ້ວ່າ: ອົງການຮ່ວມມືຊຽງໄຮ່ ຈະສ້າງຕັ້ງລະບົບ 1 ທີ່ໄດ້ຮັບການປັບປຸງກ່ຽວກັບການຮ່ວມມືດ້ານການປ້ອງກັນຄວາມສະຫງົບລວມ ເພື່ອຮັບປະກັນຄວາມສະຫງົບປອດໄພລວມ ແລະ ຜົນປະໂຫຍດແຫ່ງການພັດທະນາຂອງບັນດາປະເທດສະມາຊິກ. ບັນດາປະເທດຂຶ້ນກັບອົງການຮ່ວມມືຊຽງໄຮ່ ກໍຈະພິຈາລະນາ ຍົກອອກບັນດານະໂຍບາຍອັນຍາວນານ ເພື່ອຮັກສາສັນຕິພາບ, ການພັດທະນາ ແລະ ການຮ່ວມມືໃຫ້ສອດຄ່ອງກັບສະພາບການໃໝ່.
ນອກຈາກນັ້ນ, ການເປີດກ້ວາງ SCO ກໍແມ່ນແງ່ຫວັງທີ່ຈຳເປັນຂອງອົງການນີ້. ຍ້ອນເຫດນີ້ເອງ, ເລື່ອງບັນດາປະເທດສະມາຊິກ SCO ຕົກລົງຮັບເອົາ ອາບການິດສະຖານເປັນປະເທດສັງເກດການໄດ້ຮັບການຊົມເຊີຍຈາກ ລັດເຊຍ ແລະ ຈີນ. ຕາມບັນດານັກສັງເກດການແລ້ວ, ສາຍພົວພັນກັບ ອາບການິດສະຖານ ຈະນຳມາເຊິ່ງກາລະໂອກາດເປີດ ກ້ວາງຜົນສະທ້ອນອອກສູ່ພາຍນອກພາກພື້ນອາຊີກາງ, ໂດຍສະເພາະ ແມ່ນພາຍຫຼັງທີ່ ອາເມລິກາ ແລະ NATO ຈະຖອນທະຫານອອກຈາກປະເທດນີ້ໃນປີ 2014.
ໃນຂອບເຂດກອງປະຊຸມສຸດຍອດ SCO, ໄປຄຽງຄູ່ກັບການຮ່ວມມືດ້ານການປ້ອງກັນຄວາມສະຫງົບ, ການຮ່ວມມືດ້ານເສດຖະກິດລະຫວ່າງ ບັນດາປະເທດສະມາຊິກ ແມ່ນ 1 ໃນບັນດາບຸລິມາສິດອັນດັບໜຶ່ງຂອງອົງການນີ້. ຕາມທ່ານປະທານປະເທດຈີນ ຫູຈິນເທົາແລ້ວ, ການຂົນສົ່ງແມ່ນຂົງເຂດໜຶ່ງທີ່ອົງການຮ່ວມມືຊຽງໄຮ່ຄວນຮ່ວມມືເພື່ອພັດທະນາ, ໃນນັ້ນທາງອົງການພວມພິຈາລະນາສັນຍາສະບັບໜຶ່ງກ່ຽວກັບການຊ່ວຍການສັນຈອນໄປມາລະຫວ່າງຊາດມີຄວາມສະດວກສະບາຍກ່ວາເກົ່າ. ສ່ວນປະທານາທິບໍດີລັດເຊຍ PuTin ໄດ້ຮຽກຮ້ອງບັນດາປະເທດສະມາຊິກ SCO ຄວນເອົາໃຈໃສ່ຕໍ່ການຮ່ວມມື, ກ່ອນອື່ນໝົດແມ່ນໃນຂົງເຂດພະລັງງານ, ຄົມມະນາຄົມ ແລະພື້ນຖານໂຄງລ່າງ, ກະສີກຳ, ການນຳໃຊ້ເຕັກໂນໂລຢີສູງ, ພິເສດແມ່ນຂົງເຂດຖະແຫຼງຂ່າວສື່ສານ. ຄວາມສາມາດບົ່ມຊ້ອນອີກຢ່າງໜຶ່ງໃນການເພີ່ມທະວີການຮ່ວມມືໃນຂອບເຂດອົງການຮ່ວມມືຊຽງໄຮ່ ນັ້ນກໍແມ່ນການພັດທະນາການພົວພັນໂດຍກົງລະຫວ່າງບັນດາວິສາຫະກິດ ແລະ ກຸ່ມບໍລິສັດຂອງບັນດາປະເທດສະມາຊິກ . ບັນດາຄຳຮຽກຮ້ອງນີ້ສອດຄອງກັບທ່າອຽງພັດທະນາປະຈຸບັນຂອງບັນດາປະເທດສະມາຊິກ SCO ຂະນະທີ່ການຮ່ວມມືເສດຖະກິດໃນພາກພື້ນໄດ້ພີ່ມທະວີຢ່າງວ່ອງໄວນັບແຕ່ເວລາ 6 ປະເທດສະມາຊິກ SCO ເຊັນສັນຍາເພີ່ມທະວີການພົວພັນດ້ານການຄ້າ. ຕາມການສະຖີຕິແລ້ວ, ຍອດວົງເງິນການຄ້າຂອງ ບັນດາປະເທດສະມາຊິກ SCOໄດ້ບັນລຸເກືອບ 4700 ຕື້ USD ຄິດສະເລຍເພີ່ມຂຶ້ນ 25% ຕໍ່ປີ. ຍອດມູນຄ່າ GDP ຂອງ 6 ປະເທດສະມາຊິກ SCO ໃນປີ 2011 ບັນລຸກ່ວາ 9300 ຕື້ USD ໂດຍບໍ່ຫົວຊາຕໍ່ຜົນສະທ້ອນຈາກວິກິດການເສດຖະກິດທົ່ວໂລກ. ປະຈຸບັນເລື່ອງສ້າງຕັ້ງທະນາຄານພັດທະນາ SCO ພວມໄດ້ຮັບການຄົ້ນຄ້ວາຈາກບັນດາປະເທດ.
ໂດຍໄດ້ຮັບການສ້າງຕັ້ງນັບແຕ່ປີ 2001, ພາຍຫຼັງການພັດທະນາເປັນເວລາ 10 ປີ, ອົງການຮ່ວມມືຊຽງໄຮ່ພວມຄ່ອຍໆຢັ້ງຢືນບົດບາດໃນບັນດາບັນຫາຂອງພາກພື້ນ ແລະພວມນັບມື້ນັບມຸ່ງໄປສູ່ການຮ່ວມມືຢ່າງ
ຮອບດ້ານລະຫວ່າງບັນດາປະເທດສະມາຊິກ.