(vovworld)-ພາຍຫລັງໄລຍະຍາວທີ່ລໍຖ້າ ສຸດທ້າຍທ່ານປະທານາທິບໍດີ ອາເມລິກາ Barack Obama ກໍໄດ້ລາຍງານແຜນການອັດປະຕູຄຸກທະຫານ Guantanamo, ໃນວັນທີ 23/2, ນີ້ແມ່ນຫນຶ່ງໃນບັນດາແຜນການສຸດທ້າຍ ຊື່ງ ທ່ານ Barack Omaba ຢາກສຳເລັດກ່ອນທີ່ສິ້ນສຸດອາຍຸການປະທານາທິບໍດີ ໃນເດືອນ 1/2017. ເຖິງວ່າ ເຈົ້າຂອງທຳນຽບຂາວໄດ້ ຕີລາຄາແຜນການນີ້ແມ່ນສິ່ງທີ່ຖືກຕ້ອງສຳລັບປະເທດ ອາເມລິກາ ແຕ່ການຜັນຂະຫຍາຍແຜນການດັ່ງກ່າວຈະບໍ່ງ່າຍດາຍແຕ່ຢ່າງໃດ ເມື່ອຖືກບັນດາສະມາຊິກສະພາແຫ່ງຊາດທີ່ຂຶ້ນກັບພັກສາທາລະນະ ຄັດຄ້ານຢ່າງແຮງ.
ຄຸກ Guantanamo
|
ຄຸກ Guantanamo ໄດ້ຮັບການສ້າງຕັ້ງເມື່ອປີ 2002 ຢູ່ຖານທີ່ໝັ້ນທະຫານເຮືອ ອາເມລິກາ ທາງທິດຕາເວັນອອກສ່ຽງໃຕ້ ກູບາ ດ້ວຍບົດບາດຫນ້າທີ່ຕົ້ນຕໍແມ່ນ ກັກຂັງບັນດາຜູ້ຖືກສົງໃສໄດ້ດຳເນີນກໍ່ການຮ້າຍ. ເວລາຈຸດສຸມ, ຄຸກແຫ່ງນີ້ກັກຂັງນັກໂທດກວ່າ 800 ຄົນ. ປະຈຸບັນ ຍັງມີ ນັກໂທດ 91 ຄົນ ຊື່ງແມ່ນບັນດາຜູ້ຖືກສົງໃສເຂົ້າຮ່ວມສົງຄາມສັກສິດໃຫ້ແກ່ບັນດາອົງການກໍ່ການຮ້າຍ. ຄຸກແຫ່ງນີ້ມີຊື່ສຽງມາແຕ່ດົນນານແລ້ວ ຍ້ອນເງື່ອນໄຂກັກຂັງເຄັ່ງຄັດ ແລະ ຂັ້ນຕອນດ້ານກົດໝາຍແມ່ນຂາດຄວາມໂປ່ງໃສ. ບັນດາກໍລະນີທາລຸນ ແລະ ທໍລະມານນັກໂທດຢູ່ທີ່ນີ້ໄດ້ເຮັດໃຫ້ພາບພົດປະເທດອາເມລິກາ ທີ່ຍາມໃດກໍມີຄວາມເອກອ້າງທະນົງໃຈກ່ຽວກັບ "ບັນດາມາດຖານເສລີພາບ, ສິດທິມະນຸດ” ຖືກຊົ່ວຮ້າຍລົງ. ປະທານາທິບໍດີ ອາເມລິກາ Barak Obama ໄດ້ເນັ້ນຫນັກຢ່າງແຮງເຖິງຄວາມສຳຄັນຂອງການອັດປະຕູຄຸກ Guantanamo ເມື່ອທ່ານຮັບດຳລົງຕຳແຫນ່ງເມື່ອປີ 2009 ແຕ່ມາຮອດປະຈຸບັນ ຍັງບໍ່ທັນປະຕິບັດໄດ້.
ອັດປະຕູຄຸກ Guantanamo ແມ່ນການໃຫ້ບຸລິມະສິດປ້ອງກັນຄວາມສະຫງົບແຫ່ງຊາດ
ເມື່ອລາຍງານແຜນການອັດປະຕູຄຸກ Guantanamo, ທ່ານປະທານາທິບໍດີ ອາເມລິກາ B. Obama ຊີ້ແຈ້ງວ່າ: ນີ້ແມ່ນຈຸດເວລາເພື່ອອັດປະຕູຄຸກແຫ່ງຫນຶ່ງທີ່ໄປຝືນກັບຜົນປະໂຫຍດ ແລະ ຄຸນຄ່າຂອງປະເທດອາເມລິກາ. ເລື່ອງເປີດປະຕູຄຸກໃນຫລາຍປີຜ່ານມາສະແດງໃຫ້ເຫັນວ່າ ຄຸກ Guantanamo ບໍ່ເພີ່ມທະວີການປ້ອງກັນຄວາມສະຫງົບແຫ່ງຊາດຂອງອາເມລິກາ, ກົງກັນຂ້າມຍັງເຮັດໃຫ້ຊຸດໂຊມ. ທ່ານປະທານາທິບໍດີ ອາເມລິກາ B. Obama ຍັງສ້າງຄວາມອຸ່ນອຽນໃຈໃຫ້ຊາວ ອາເມລິກາ ວ່າ: ບັນດາພົນທະຫານຕໍ່ສູ້ເພື່ອສາສະຫນາອາດຈະສືບຕໍ່ຖືກກັກຂັງຢ່າງປອດໄພຢູ່ ອາເມລິກາ ແລະ ເນັ້ນຫນັກວ່າ ທ່ານບໍ່ຢາກປະໃຫ້ບັນຫາກ່ຽວກັບຄຸກ Guantanamo ໃຫ້ປະທານາທິບໍດີທ່ານໃດ ຮັບເອົາ ແລະ ແກ້ໄຂ. ແຜນການຂອງທ່ານປະທານາທິບໍດີ ອາເມລິກາ B. Obama ກໍສະເຫນີສະຖານທີ່ 13 ແຫ່ງທີ່ກັກຂັງນັກໂທດແຕ່ 30-60 ຄົນໃນບັນດາຄຸກທີ່ຮັບປະກັນຄວາມປອດໄພທີ່ເຄັ່ງຄັດກວ່າໝູ່ ຢູ່ ອາເມລິກາ ແຕ່ເຖິງຢ່າງໃດກໍຕາມ ທຳນຽບຂາວ ພັດບໍ່ປະກາດຂໍ້ມູນຂ່າວຢ່າງຈະແຈ້ງກ່ຽວກັບບັນດາຄຸກແທນທີ່ຄຸກ Guantanamo ໃນດິນແດນ ອາເມລິກາ ດ້ວຍເຫດຜົນຫລີກລ້ຽງບໍ່ວ່າການຄັດຄ້ານຢ່າງແຮງໃດໃນປີເລືອກຕັ້ງປະທານາທິບໍດີ.
ທຳນຽບ 5 ແຈ ຄາດຄະເນວ່າ ລາຍຈ່າຍຂົນສົ່ງນັກໂທດ ແລະ ອັດປະຕູຄຸກ Guantanamo ແມ່ນປະມານ 290 -475 ລ້ານ USD. ບ້ວງເງິນນີ້ຈະໄດ້ຮັບການທົດແທນໃນສອງສາມປີ ເພາະວ່າ ເລື່ອງອັດປະຕູຄຸກ Guantanamo ຈະຊ່ວຍ ອາເມລິກາ ປະຢັດເງິນໄດ້ 85 ລ້ານ USD/ປີ.
ການຄັດຄ້ານຢ່າງແຮງຈາກ ພັກສາທາລະນະ
ພັກສາທາລະນະ ໄດ້ຄັດຄ້ານເລື່ອງອັດປະຕູຄຸກ Guantanamo ແລະ ສິ່ງດັ່ງກ່າວອາດຈະສ້າງບັນດາການທ້າທາຍດ້ານກົດໝາຍເພື່ອສະກັດກັ້ນການກະທຳນີ້. ສະມາຊິກສະພາສູງ Mitch McConnell, ການນຳ ພັກສາທາລະນະ ຢູ່ ສະພາສູງ ໃຫ້ຮູ້ວ່າ: ແຜນການນີ້ ລວມມີ ເລື່ອງຂົນສົ່ງບັນດາພວກກໍ່ການຮ້າຍທີ່ອັນຕະລາຍເຖິງຄ້າຍກັກຂັງຢູ່ປະເທດ ອາເມລິກາ ສະນັ້ນ ປະທານາທິບໍດີ ຄວນຮູ້ຈັກເຖິງບັນດາຄວາມຄັດຄ້ານກ່ຽວກັບຂໍ້ສະເຫນີນີ້ພາຍໃນສະພາແຫ່ງຊາດ. ປະທານສະພາຕ່ຳ Paul Ryan ຢືນຢັນວ່າ: ສະພາແຫ່ງຊາດ ໄດ້ເຄີຍຖະແຫລງຢ່າງຈະແຈ້ງວ່າ ຍົກຍ້າຍນັກໂທດກໍ່ການຮ້າຍເຖິງດິນແດນອາເມລິກາ ແມ່ນຜິດກົດໝາຍ. ທ່ານ B. Obama ຍັງບໍ່ທັນເກ້ຍກ່ອມຊາວ ອາເມລິກາ ໄດ້ວ່າ ເລື່ອງກັກຂັງບັນດານັກໂທດໃນຄຸກດັ່ງກ່າວຢູ່ ອາເມລິກາ ແມ່ນແຜນການດີ ຫລື ປອດໄພ. ທ່ານ Michael Mc Caul, ປະທານຄະນະກຳມະການປ້ອງກັນຄວາມສະຫງົບພາຍໃນປະເທດ, ສະພາຕ່ຳ ຖືວ່າ ສິ່ງທີ່ຍາກເຊື່ອໃຈ ນັ້ນແມ່ນ ປະທານາທິບໍດີ ພັດເອົາໃຈໃສ່ເຖິງການຍົກຍ້າຍ ແລະ ປ່ອຍຕົວນັກໂທດກໍ່ການຮ້າຍ ແທນທີ່ກັກຂັງບັນດານັກໂທດໃຫມ່. ໃນຂະນະນັ້ນ, ມີຜູ້ສະໝັກຮັບເລືອກຕັ້ງປະທານາທິບໍດີ 2 ຄົນ ນັ້ນແມ່ນທ່ານ Marco Rubio ແລະ Ted Cruz ຖືວ່າ ບໍ່ພຽງແຕ່ບໍ່ໄດ້ອັດປະຕູຄຸກດັ່ງກ່າວເທົ່ານັ້ນ ຫາກຍັງຕ້ອງເປີດກວ້າງຮາກຖານກັກຂັງອີກດ້ວຍ.
ການຄັດຄ້ານຂອງບັນດາສະມາຊິກສະພາແຫ່ງຊາດ ໂດຍອີງໃສ່ຄວາມຈິງວ່າ ພາຍໃຕ້ອາຍຸການຂອງປະທານາທິບໍດີ George W. Bush, ປະມານ 20% ໃນຍອດຈຳນວນນັກໂທດ 532 ຄົນ ຢູ່ຮາກຖານນີ້ ໄດ້ມີການກະທຳຜິດຄືນໃຫມ່ພາຍຫລັງຖືກປ່ອຍຕົວ. ປະຈຸບັນ ອັດຕານີ້ແມ່ນປະມານ 5%.
ປີ 2008, ທ່ານ B. Obama ເຄີຍເອີ້ນຄຸກ Guantanamo ແມ່ນສິ່ງທີ່ໂສກເສົ້າໃນປະຫວັດສາດປະເທດ ອາເມລິກາ. ໄລຍະເວລາເປັນປະທານາທິບໍດີ B. Obama ຍັງອີກບໍ່ພໍເທົ່າໃດເດືອນ, ການນຳ ອາເມລິກາ ປາດຖະຫນາວ່າ Capitol ຈະດຳເນີນວາລະອະພິປາຍຢ່າງຍຸຕິທຳກ່ຽວກັບແຜນການນີ້. ຖ້າຫາກສິ່ງນີ້ບໍ່ປະກົດຜົນເປັນຈິງ, ທ່ານປະທານາທິບໍດີ ອາເມລິກາ B. Obama ຈະຕ້ອງນຳໃຊ້ອຳນາດບໍລິຫານໃນຖານະປະທານາທິບໍດີ ເພື່ອອັດປະຕູຄຸກ Guantanamo ບໍ່ໃຫ້ໄປຝືນກັບບັນດາຜົນປະໂຫຍດ, ຄຸນຄ່າຂອງປະເທດອາເມລິກາ.