ໃນການລົງປະຊາມະຕິກ່ຽວກັບການປະຕິຮູບລັດຖະທຳມະນູນຈະມາເຖິງ, ຜູ້ມີສິດເລືອກຕັ້ງອີຕາລີ ຈະປ່ອນບັດສະໜັບສະໜູນ ຫຼື ຄັດຄ້ານເລື່ອງຫຼຸດສິດອຳນາດຂອງສະພາສູງລົງ, ເພີ່ມສິດອຳນາດໃຫ້ອຳນາດການປົກຄອງສູນກາງຕື່ມອີກ. ຕາມຂໍ້ສະເໜີປະຕິຮູບລັດຖະທຳມະນູນຂອງທ່ານນາຍົກລັດຖະມົນຕີ Matteo Renzi ແລ້ວ, ຈຳນວນສະມາຊິກສະພາສູງຈະຖືກຫຼຸດຈາກ 315 ລົງເຫຼືອພຽງ 100 ທ່ານ. ສະພາສູງພຽງແຕ່ຮັບຜິດຊອບກ່ຽວກັບການປັບປຸງລັດຖະທຳມະນູນ ແລະ ບັນດາກົດໝາຍທີ່ເຄີຍສົ່ງຜົນກະທົບເຖິງ 20 ເຂດຂອງອີຕາລີ ເທົ່ານັ້ນ. ສະພາຕ່ຳອີຕາລີ ມີໜ້າທີ່ດຳເນີນບັນດາການປ່ອນບັດໄວ້ວາງໃຈ ແລະ ຮັບຮອງເອົາບັນດາຮ່າງກົດໝາຍ. ທີ 2 ແມ່ນ, ປະຊາຊົນອີຕາລີ ຕ້ອງຕັດສິນກ່ຽວກັບເລື່ອງຄວນຫຼຸດຜ່ອນສິດອຳນາດຂອງບັນດາອຳນາດການປົກຄອງທ້ອງຖິ່ນ ເພື່ອເພີ່ມສິດອຳນາດໃຫ້ອຳນາດການປົກຄອງສູນກາງຫຼືບໍ່ ເພື່ອແນໃສ່ເພີ່ມທະວີຄວາມໝັ້ນຄົງດ້ານການເມືອງຢູ່ອີຕາລີ, ເຊິ່ງແມ່ນປະເທດທີ່ມີກົງຈັກອຳນາດການປົກຄອງເຂດເຖິງ 63 ແຫ່ງນັບແຕ່ປີ 1945 ເປັນຕົ້ນມາ.
ສາຍເຫດຂອງການລົງປະຊາມະຕິ.
ທ່ານນາຍົກລັດຖະມົນຕີ Matteo Renzi ໄດ້ເອີ້ນການປະຕິຮູບລັດຖະທຳມະນູນແມ່ນແມ່ຂອງທຸກໆການປະຕິຮູບ ແລະ ບັນດາການປ່ຽນແປງທີ່ມີລັກສະນະບາດລ້ຽວ, ຕາມນັ້ນແລ້ວ, ຈະວາງທິດທາງໃໝ່ໃຫ້ອີຕາລີ ໃນຫຼາຍທົດສະວັດທີ່ຈະມາເຖິງ. ທ່ານ Renzi ຢືນຢັນວ່າ, ການປະຕິຮູບລັດຖະທຳມະນູນແມ່ນສິ່ງທີ່ຈຳເປັນ ເພື່ອແນໃສ່ເຮັດໃຫ້ອີຕາລີ ກາຍເປັນປະເທດທັນສະໄໝ ແລະ ມີປະສິດທິຜົນກວ່າ, ເໝາະສົມກັບສະຫະພາບເອີລົບ ກວ່າ ແລະ ປະເທດນີ້ຈະໄດ້ຮັບການປະກອບດີກວ່າ ເພື່ອແນໃສ່ປະເຊີນໜ້າກັບບັນດາສິ່ງທ້າທາຍໃນໂລກພວມຫັນເປັນໂລກາພິວັດຢ່າງວ່ອງໄວ.
ສາຍເຫດທີ່ທ່ານນາຍົກລັດຖະມົນຕີ Renzi ຕັດສິນໃຈຈັດຕັ້ງການປະຕິຮູບລັດຖະທຳມະນູນໃນປະຈຸບັນ ຍ້ອນ ສະພາສູງ ແລະ ສະພາຕ່ຳຢູ່ອີຕາລີ ພວມມີສິດອຳນາດທຽບເທົ່າກັນ ສະນັ້ນວຽກງານສ້າງກົດໝາຍເກືອບຄືວ່າ ບໍ່ສາມາດຍົກອອກບັນດາລັດຖະນະໂຍບາຍຢ່າງທັນການໄດ້. ສິ່ງດັ່ງກ່າວໄດ້ເປັນການກີດຂວາງວິວັດການດຳເນີນບັນດາການປະຕິຮູບໃຫຍ່ ແລະ ເຂັ້ມແຂງນັບທັງທາງດ້ານເສດຖະກິດ ແລະ ດ້ານການເມືອງຂອງລັດຖະບານອີຕາລີ ຫຼາຍທີ່ສຸດ. ຖ້າຫາກລັດຖະທຳມະນູນອີຕາລີ ໄດ້ຮັບການປ່ຽນແປງ, ທັດສະນະຂອງສະພາສູງ ຈະມີຄຸນຄ່າຕ່ຳກວ່າສະພາຕ່ຳ. ສິ່ງດັ່ງກ່າວພ້ອມກັບກົດໝາຍວ່າດ້ວຍການເລືອກຕັ້ງໃໝ່ (ກຳນົດພັກກຳອຳນາດມີຈຳນວນທີ່ນັ່ງສ່ວນຫຼາຍໃນສະພາແຫ່ງຊາດ ຈະບໍ່ຕ້ອງຮ່ວມສຳພັນກັບບັນດາພັກອື່ນໆ) ຈະສ້າງໄມ້ງັດເພື່ອໃຫ້ທ່ານນາຍົກລັດຖະມົນຕີ Matteo Renzi ສາມາດປະຕິບັດໂຄງການປະຕິຮູບເສດຖະກິດເຊິ່ງທ່ານສະໜັບສະໜູນ. ໃນຂະນະນັ້ນ, ບັນດານັກເສດຖະກິດວິທະຍາ ກໍຢືນຢັນວ່າ ອີຕາລີ ຕ້ອງປ່ຽນແປງລັດຖະທຳມະນູນເພື່ອຊຸກຍູ້ການເຕີບໂຕດ້ານເສດຖະກິດ.
ບາດກ້າວສ່ຽງໄພໃນຄວາມເໝາະສົມຂອງທ່ານນາຍົກລັດຖະມົນຕີ Matteo Renzi
ດ້ວຍຄວາມຕັດສິນໃຈປະຕິຮູບເສດຖະກິດ, ການເມືອງ, ທ່ານນາຍົກລັດຖະມົນຕີ Matteo Renzi ໄດ້ຈັດວາງອະນາຄົດດ້ານການເມືອງຂອງຕົນເຂົ້າໃນການລົງປະຊາມະຕິໃນວັນທີ 04/12, ນັບແຕ່ຫົວທີ, ທ່ານໄດ້ໃຫ້ຄຳໝັ້ນສັນຍາຈະລາອອກຈາກຕຳແໜ່ງຖ້າຫາກປະຊາຊົນປ່ອນບັດຄັດຄ້ານ. ເຖິງຢ່າງໃດກໍ່ຕາມ, ຍ້ອນເລື່ອງດັ່ງກ່າວນີ້ ຝ່າຍຄ້ານການປະຕິຮູບ ຈຶ່ງສວຍໃຊ້ສິ່ງດັ່ງກ່າວເພື່ອບັງຄັບໃຫ້ທ່ານລາອອກຈາກຕຳແໜ່ງຖ້າຫາກທ່ານຖືກປະລາໄຊ. ພາຍໃນພັກປະຊາທິປະໄຕເອງ (PD) ຂອງທ່ານນາຍົກລັດຖະມົນຕີ Matteo Renzi ກໍພວມຖືກແບ່ງແຍກຢ່າງເລິກເຊິ່ງ ເມື່ອການປ່ອນບັດໃກ້ຈະດຳເນີນ. ສິ່ງທີ່ເປັນໜ້າສົນໃຈນັ້ນແມ່ນ, ການຢັ່ງຫາງສຽງປະມານ 40 ຄັ້ງທີ່ປະກາດກ່ອນວັນທີ 18/11 ໄດ້ຊີ້ໃຫ້ເຫັນວ່າ, ຝ່າຍຄັດຄ້ານການປະຕິຮູບ ພວມມີຄະແນນຫຼາຍກວ່າຕໍ່ຝ່າຍຂອງທ່ານນາຍົກລັດຖະມົນຕີ Matteo Renzi. ວັນທີ 27/11, ມີປະຊາຊົນນັບໝື່ນຄົນທີ່ຂຶ້ນກັບບັນດາຝ່າຍຄັດຄ້ານການປະຕິຮູບລັດຖະທຳມະນູນຢູ່ອີຕາລີ ກໍໄດ້ລົງຖະໜົນແຫ່ຂະບວນປະທ້ວງ, ຮຽກຮ້ອງໃຫ້ປ່ອນບັດ “ຄັດຄ້ານ” ໃນການລົງປະຊາມະຕິ.
ບັນດາການຜັນແປທີ່ເກີດຂຶ້ນກ່ອນການລົງປະຊາມະຕິແມ່ນສິ່ງທີ່ບໍ່ມີຜົນປະໂຫຍດຕໍ່ອະນາຄົດດ້ານການເມືອງຂອງທ່ານນາຍົກລັດຖະມົນຕີ Matteo Renzi ຢ່າງຈະແຈ້ງ. ຖ້າຫາກຖືກປະລາໄຊ, ທ່ານ Renzi ຍັງຈະສືບຕໍ່ນຳພາພັກ PD, ເຖິງວ່າທ່ານຈະລາອອກຈາກຕຳແໜ່ງເປັນນາຍົກລັດຖະມົນຕີອີຕາລີ ກໍຕາມ, ແຕ່ເສດຖະກິດຂອງອີຕາລີ ຈະເຄື່ອນເໜັງຕາມທິດຊົ່ວຮ້າຍລົງ. ທະນາຄານ 8 ແຫ່ງຂອງອີຕາລີ ອາດຈະຖືກລົ້ມລະລາຍໄປຕາມ. ປະຈຸບັນ, ຍອດໜີ້ເສຍຂອງລະບົບທະນາຄານອີຕາລີ ພວມຢູ່ໃນລະດັບສູງ, ປະມານ 400 ຕື້ USD (ຕາມກອງທຶນເງິນຕາສາກົນ) ແລະ ບໍ່ວ່າໝາກຜົນການລົງປະຊາມະຕິໃດທີ່ກໍຄວາມຂາດສະຖຽນລະພາບໃຫ້ພື້ນຖານດ້ານການເມືອງຂອງອີຕາລີ ກໍລ້ວນແຕ່ພາໄປເຖິງສະພາບປັ່ນປ່ວນໃນຕະຫຼາດການເງິນປະເທດນີ້.
ໃນຂະນະນັ້ນ, ສະຫະພາບເອີລົບ ກໍຕິດຕາມການປ່ອນບັດຢູ່ປະເທດມີພື້ນຖານເສດຖະກິດໃຫຍ່ອັນດັບ 3 ຂອງພາກພື້ນນຳໃຊ້ສະກຸນເງິນເອີໂລລວມ (Eurozone) ຢ່າງໃກ້ຊິດ, ຍ້ອນວ່າ, ຖ້າຫາກທ່ານນາຍົກລັດຖະມົນຕີ Matteo Renzi ຖືກປະລາໄຊ, ພັກຝ່າຍຂວາ “ຂະບວນການ 5 ດາວ” ໂດຍອະດີດນັກຕະຫຼົກ Bepe Grillo ນຳໜ້າ (ພັກຝ່າຍຄ້ານຕົ້ນຕໍໃນສະພາແຫ່ງຊາດ ແລະ ແມ່ນກຳລັງເດັດດ່ຽວຄັດຄ້ານການປະຕິຮູບລັດຖະທຳມະນູນ) ຈະເພີ່ມອິດທິພົນຊື່ສຽງຢ່າງແຮງ. ສິ່ງທີ່ໜ້າສົນໃຈນັ້ນແມ່ນ ຂະບວນການ 5 ດາວ ນີ້ມີແຜນນະໂຍບາຍສະໜັບສະໜູນອີຕາລີ ອອກຈາກ EU.
ດ້ວຍການລົງປະຊາມະຕິກ່ຽວກັບການປະຕິຮູບລັດຖະທຳມະນູນໃນວັນທີ 04/12 ຈະມາເຖິງ, ປະເທດອີຕາລີ ພວມປະເຊີນໜ້າກັບສິ່ງທ້າທາຍຄວາມຫຍຸ້ງຍາກ. ຫາງສຽງພວມຕິດຕາມບັນດາການຜັນແປໂດຍບັງເອີນໃນຈຸດເວລາສຸດທ້າຍບົນເວທີການເມືອງຂອງປະເທດນີ້.