ໃນສະພາບທີ່ສະຫະພາບເອີລົບ (ອີຢູ) ພວມຊອກຫາທັດສະນະລວມໃຫ້ແກ່ວິກິດການຊາວອົບພະຍົບ, ມາດຕະການແກ້ໄຂດີທີ່ສຸດໃນປະຈຸບັນ ແມ່ນຕ້ອງເປັນເອກະພາບນຳກັນໃນການກະທຳ, ແຕ່ທະວີບນີ້ຍັງບໍ່ທັນຊອກຫາທັດສະນະລວມໄດ້. ໃນຂະນະນັ້ນ, ບັນຫາຊາວອົບພະຍົບຍັງຄົງສືບຕໍ່ແມ່ນຫົວຂໍ້ດ້ານການເມືອງທີ່ຮ້ອນເຮັ່ງສຳລັບບາງປະເທດເອີລົບ, ພິເສດແມ່ນຢູ່ເຢຍລະມັນ. ວັນທີ 04/09, ທ່ານປະທານສະພາເອີລົບ Donald Tusk ໃຫ້ຮູ້ວ່າ, ເອີິລົບ ນັບມື້ນັບຫຍັບເຂົ້າໃກ້ກັບບັນດາກຳນົດກ່ຽວກັບຄວາມສາມາດຮັບເອົາຊາວອົບພະຍົບກວ່າ.
ສິ່ງກີດຂວາງທາງດ້ານການເມືອງ
ເຫດການເລີ່ມຕົ້ນດ້ວຍເລື່ອງຊາວອົບພະຍົບເປັນຈຳນວນຫຼວງຫຼາຍຈາກ ຊີຣີ ໄປເຖິງສະຖານນີລົດໄຟຢູ່ໃຈກາງນະຄອນຫຼວງ Budapest ຂອງຮຸງກາຣີ ເມື່ອທ້າຍເດືອນ 08/2015 ແລະ ຮຽກຮ້ອງໃຫ້ເຂົ້າເຢຍລະມັນ ແລະ ໂອຕາລິດ. ໃນເບື້ອງຕົ້ນ, ອຳນາດການປົກຄອງຍັງກີດຂວາງ ແຕ່ສຸດທ້າຍເຂົາເຈົ້າກໍ່ “ຕ້ອງຍອມ” ຕໍ່ໜ້າກຳລັງດັ່ນຂອງກະແສຊາວອົບພະຍົບຂະໜາດໃຫຍ່ທີ່ບໍ່ເຄີຍມີມາກ່ອນ. ໃນສະພາບການນັ້ນ, ທ່ານນາງນາຍົກລັດຖະມົນຕີເຢຍລະມັນ Angela Merkel ຖະແຫຼງວ່າ, ພ້ອມແລ້ວທີ່ຈະຕ້ອນຮັບບັນດາຊາວອົບພະຍົບນີ້, ສິ່ງດັ່ງກ່າວໄດ້ກະຕຸກຊຸກຍູ້ໃຫ້ຊາວອົບພະຍົບຈາກອາຟະລິກາເໜືອ ແລະ ເຂດຕາເວັນອອກກາງ, ພິເສດແມ່ນຈາກຊີຣີ ເຂົ້າເຢຍລະມັນ ແລະ ເອີລົບຢ່າງເປັນທາງການ. ໄລ່ຮອດທ້າຍປີ 2015, ມີຊາວອົບພະຍົບ 1,1 ລ້ານຄົນໄດ້ເຂົ້າເຢຍລະມັນ, ນັ້ນແມ່ນຍັງບໍ່ທັນຄິດໄລ່ເຖິງຈຳນວນຊາວອົບພະຍົບບໍ່ຈົດທະບຽນ, ລື່ນກາຍຕົວເລກ 800.000 ຄົນເຊິ່ງອຳນາດການປົກຄອງໄດ້ຄາດຄະເນກ່ອນນັ້ນ. ໃນ 6 ເດືອນຕົ້ນປີ 2016, ມີຊາວອົບພະຍົບກວ່າ 200.000 ຄົນໄດ້ລີ້ໄພຢູ່ເຢຍລະມັນ. ຕາມທ່ານລັດຖະມົນຕີກະຊວງພາຍໃນເຢຍລະມັນ Thomas de Maiziere ແລ້ວ, ຈຳນວນຊາວອົບພະຍົບໄດ້ຫຼຸດລົງໃນ 6 ເດືອນຕົ້ນປີ 2016, ເປັນຕົ້ນແມ່ນຍ້ອນເສັ້ນທາງໄປຜ່ານເຂດ Balkan ຖືກກີດຂວາງໄວ້ ແລະ ຂໍ້ຕົກລົງກ່ຽວກັບຊາວອົບພະຍົບລະຫວ່າງສະຫະພາບເອີລົບ ແລະ ຕວກກີ ໄດ້ມີຜົນສັກສິດ. ແຕ່ວ່າທ່ານລັດຖະມົນຕີຊວງພາຍໃນເຢຍລະມັນ ໃຫ້ຮູ້ວ່າ, ທ່ານບໍ່ສາມາດຮັບປະກັນໄດ້ວ່າ ຂໍ້ຕົກລົງລະຫວ່າງຕວກກີ - ອີຢູ ຈະຮັກສາໄວ້ເປັນຢ່າງດີ ໃນຊຸມເດືອນຈະມາເຖິງ.
ບັນຫາເຂົ້າເມືອງຈະບໍ່ເປັນສິ່ງທີ່ຮ້າຍແຮງສຳລັບທ່ານນາງນາຍົກລັດຖະມົນຕີເຢຍລະມັນ Angela Merkel ຖ້າຫາກບໍ່ເກີດບັນດາເຫດກໍ່ຄວາມວຸ້ນວາຍ ແລະ ເຫດການກໍ່ການຮ້າຍຢູ່ເຢຍລະມັນ ເຊິ່ງຕົວການພັດແມ່ນຊາວອົບພະຍົບ. ອິດທິພົນຊື່ສຽງຂອງທ່ານນາງນາຍົກລັດຖະມົນຕີເຢຍລະມັນ ຖືກຫຼຸດລົງຢ່າງແຮງ. ສິ່ງທີ່ສະແດງໃຫ້ເຫັນໄໝ່ສຸດແມ່ນ ພັກພັນທະມິດປະຊາທິປະໄຕສາສະໜາຄຼິດ (CDU) ຂອງທ່ານນາງນາຍົກລັດຖະມົນຕີ Angela Merkel ພຽງຖືກຈັດອັນດັບທີ 3 ໃນໝາກຜົນແຫ່ງການເລືອກຕັ້ງຂອງລັດຖະສະພາລັດ Mecklenburg-Vorpommern (ໃນວັນທີ 04/09), ເຊິ່ງເຄີຍຖືກຖືວ່າແມ່ນລັດຂອງທ່ານນາງ Merkel. ສິ່ງທີ່ໜ້າເອົາໃຈໃສ່ແມ່ນ, ພັກການເລືອກເຟັ້ນເພື່ອປະເທດເຢຍລະມັນ (AfD) ຕາມທິດລັດທິຊົນຊາດ ແລະ ຕ້ານຊາວອົບພະຍົບ, ເປັນຄັ້ງທຳອິດໄດ້ລື່ນກາຍ CDU ໃນການເລືອກຕັ້ງຂັ້ນເຂດ, ດ້ວຍບັດເລືອກຕັ້ງ 21,9%. ທ່ານນາງນາຍົກລັດຖະມົນຕີ Angela Merkel ພວມປະສົບກັບຄວາມຫຍຸ້ງຍາກຢ່າງແທ້ຈິງ ຍ້ອນນະໂຍບາຍສຳລັບຊາວອົບພະຍົບຂອງຕົນ, ອັດຕາສະໜັບສະໜູນນະໂຍບາຍຂອງທ່ານນາງ ບັນລຸພຽງເຫຼືອ 34% ເທົ່ານັ້ນ. ນະໂຍບາຍຕ້ອນຮັບຊາວອົບພະຍົບບໍ່ພຽງແຕ່ກໍ່ຄວາມແຕກແຫງພາຍໃນສັງຄົມເຢຍລະມັນ ເທົ່ານັ້ນ, ຫາກຍັງມີໄພສົ່ງຜົນກະທົບບໍ່ດີເຖິງ CDU ແລະ ທີ່ຕັ້ງຂອງທ່ານນາງນາຍົກລັດຖະມົນຕີ Angela Merkel ໃນການເລືອກຕັ້ງສະພາແຫ່ງຊາດປີ 2017 ອີກດ້ວຍ.
ຄວາມຫຍຸ້ງຍາກໃນການສ້າງຖິ່ນຖານຄົງທີ່ຄືນໃໝ່
1 ປີກ່ອນນີ້, ໃນເດືອນ 09/2015, ສະຫະພາບເອີລົບ (ອີຢູ) ໄດ້ຮັບຮອງເອົາແຜນການທີ່ເຕັມໄປດ້ວຍຄວາມຫວັງໃນການສ້າງຖິ່ນຖານຄົງທີ່ຄືນໃໝ່ໃຫ້ຊາວອົບພະຍົບ 160.000 ຄົນ ຢູ່ອີຕາລີ ແລະ ເກຼັກ ໃນໄລຍະ 2 ປີ. ເຖິງຢ່າງໃດກໍ່ຕາມ, ໄລ່ມາຮອດປະຈຸບັນ, ຍັງບໍ່ທັນຮອດ 3% ຈຳນວນຊາວອົບພະຍົບຕາມແຜນການຂອງອີຢູ ຊອກຫາໄດ້ບັນດາປະເທດອື່ນໃນສະພາບເອີລົບ ຕ້ອນຮັບ. ວັນທີ 05/09, ຄະນະກຳມະການເອີລົບ (EC) ໄດ້ກະຕຸກຊຸກຍູ້ລັດຖະບານບັນດາປະເທດສະມາຊິກ ເພີ່ມທະວີຄວາມມານະພະຍາຍາມ ໃນການຜັນຂະຫຍາຍແຜນການສ້າງຖິ່ນຖານຄົງທີ່ຄືນໃໝ່ໃຫ້ຊາວອົບພະຍົບ. ເຖິງຢ່າງໃດກໍ່ຕາມ, ໂອຕາລິດ, ຮຸງກາຣີ ແລະ ໂປໂລຍ ບໍ່ທັນຮັບຊາວອົບພະຍົບຄົນໃດໆ. ຄຳໝັ້ນສັນຍາຂອງບັນດາປະເທດສະມາຊິກອີຢູ ໃນການໜູນຊ່ວຍເກຼັກ ຄວບຄຸ້ມເຂດຊາຍແດນ ແລະ ແກ້ໄຂຄວາມຮຽກຮ້ອງຂໍ້ລິ້ໄພ ກໍ່ຍັງບໍ່ທັນໄດ້ຮັບການປະຕິບັດຢ່າງຄົບຖ້ວນເທື່ອ. ໃນບົດໄຈ້ແຍກທີ່ລົງໃນແວັບໄຊ euobserver.com, ນັກຊ່ຽວຊານ Nikolij Nielsen ໃຫ້ຂໍ້ສັງເກດວ່າ, ຄວາມມານະພະຍາຍາມຂອງເອີລົບ ໃນການສ້າງເຂດຕັ້ງຖິ່ນຖານຄົງທີ່ຄືນໃໝ່ໃຫ້ບັນດາຊາວອົບພະຍົບ ຍັງບໍ່ທັນນຳມາເຊິ່ງໝາກຜົນຄືດັ່ງຄວາມມຸ້ງຫວັງ. ເລື່ອງຕ້ອນຮັບ ແລະ ຈຳນວນຊາວອົບພະຍົບໄດ້ຮັບການຕ້ອນຮັບຍັງຄົງແມ່ນຫົວຂໍ້ສະດຸ້ງໄວ. ຮຸງກາຣີ ໄດ້ເລີ່ມຜັນຂະຫຍາຍການຄັດຄ້ານຊາວອົບພະຍົບ ກ່ອນລົງປະຊາມະຕິໃນວັນທີ 02/10 ຈະມາເຖິງ, ກ່ຽວກັບເລື່ອງຄັດຄ້ານແຜນການສ້າງເຂດຖິ່ນຖານຄົງທີ່ຄືນໃໝ່ໃຫ້ຊາວອົບພະຍົບຂອງອີຢູ ຫຼືບໍ່. ໃນການເລືອກຕັ້ງຂັ້ນທ້ອງຖິ່ນວັນທີ 04/09, ພັກຕາມທ່າອ່ຽງຕ້ານຊາວອົບພະຍົບ “ການເລືອກເຟັ້ນອື່ນໃຫ້ປະເທດເຢຍລະມັນ” ພັນທະມິດປະຊາທິປະໄຕຕ້ານສາສະໜາຄຼິດ ໄດ້ຊະນະພັກ CDU ຂອງທ່ານນາງນາຍົກລັດຖະມົນຕີ Angela Merkel. ທີ່ໂອຕາລິດ, ຜູ້ສະໝັກຮັບເລືອກຕັ້ງພັກຂວາຈັດ ອາດສາມາດກາຍເປັນຜູ້ນຳປະເທດ ເມື່ອທ່ານ Norbert Hofer ຂອງ ພັກ FPO, ສືບຕໍ່ນຳໜ້າໃນບັນດາການຢັ່ງຫາງສຽງ ກ່ອນການເລືອກຕັ້ງປະທານາທິບໍດີຮອບທີ 2 ໃນວັນທີ 02/10 ຈະມາເຖິງ.
ພາຍຫຼັງ 1 ປີທີ່ເປີດປະຕູຕ້ອນຮັບຊາວອົບພະຍົບ, ຫຼາຍປະເທດເອີລົບ ພວມຊອກຫາວິທີແກ້ໄຂສິ່ງສົບສົນທີ່ເກີດຂຶ້ນ. ໄດ້ມີຫຼາຍມາດຕະການແກ້ໄຂ ແລະ ນະໂຍບາຍ ເຊິ່ງໄດ້ຮັບຖືວ່າແມ່ນສ້າງບາດກ້າວບຸກທະລຸເພື່ອແກ້ໄຂບັນຫານີ້, ແຕ່ວ່າ ເບິ່ງຄືວ່າຍັງບໍ່ທັນບັນລຸປະສິດທິຜົນ ແລະ ບັນດາປະເທດເອີລົບຍັງຕ້ອງປະເຊີນໜ້າກັບຄວາມຫຍຸ້ງຍາກຫຼາຍຢ່າງ, ນັບແຕ່ທາງດ້ານການເມືອງ ຕະຫຼອດຮອດເສດຖະກິດ - ສັງຄົມໃນໄລຍະຍາວ.