(vovworld) - ຕໍ່ຫນ້າສະພາບປະເທດ ອີຢີບ ມີໄພຈະຕົກເຂົ້າສູ່ວິກິດການຄັ້ງໃຫມ່ທີ່ຮ້າຍແຮງ, ວັນທີ 29/11, ປະທານາທິບໍດີ ອີຢີບ Mohamed Morsi ຕ້ອງຢັ້ງຢືນວ່າຖະແຫລງລັດຖະທຳມະນູນ ຊຶ່ງທ່ານເອງປະກາດໃຊ້ໃນອາທິດກ່ອນ, ໃນນັ້ນ ສະຫງວນບຸລິມະສິດສ່ວນຫລາຍໃຫ້ແກ່ປະທານາທິບໍດີ ຈະໝົດຜົນສັກສິດ ພາຍຫລັງ ທີ່ອີຢີບ ມີລັດຖະທຳມະນູນສະບັບໃຫມ່. ຄຳຢັ້ງຢືນດັ່ງກ່າວແມ່ນການກະທຳຜ່ອນສັ້ນຜ່ອນຍາວຫລ້າສຸດຂອງທ່ານ Morsi ຕໍ່ຫນ້າຄວາມຄັດຄ້ານຢ່າງແຮງຈາກຫາງສຽງພາຍໃນປະເທດກ່ຽວກັບຄຳຖະແຫລງລັດຖະທຳມະນູນ, ເຖິງຢ່າງໃດກໍຕາມ, ການກະທຳຂອງທ່ານ ປະທານາທິບໍດີ ອີຢີບ Mohamed Morsi ບໍ່ພຽງພໍເພ່ືອເຮັດໃຫ້ຄວາມຂັດແຍ່ງດ້ານການເມືອງຢູ່ ອີຢີບ ຫລຸດຜ່ອນລົງ.
ທຸກສິ່ງທຸກຢ່າງແມ່ນເລີ່ມຕົ້ນແຕ່ວັນທີ 22/11 ເມື່ອ ປະທານາທິບໍດີ ອີຢີບ Mohamed Morsi ປະກາດຄຳຖະແຫລງລັດຖະທຳມະນູນ, ໃນນັ້ນໄດ້ກຳນົດ ບັນດາອົງການຕຸລາການບໍ່ມີສິດຢັບຢັ້ງ, ຍົກເລິກ ຫລືປັບປຸງບໍ່ວ່າຂໍ້ມາດຕາໃດຂອງກົດໝາຍ, ກໍຄືຄຳຖະແຫລງ ຫລື ດຳລັດສະບັບໃດໂດຍປະທານາທິບໍດີ ອີຢີບ Mohamed Morsi ປະກາດໃຊ້ນັບແຕ່ເມື່ອທ່ານສາບານຕົວຮັບຕຳແຫນ່ງໃນວັນທີ 30/6 ຜ່ານມາຈົນເຖິງເວລາລັດຖະທຳມະນູນສະບັບໃຫມ່ໄດ້ຮັບການຮັບຮອງເອົາ ແລະ ສະພາແຫ່ງຊາດອາຍຸການໃຫມ່ໄດ້ຮັບການເລືອກຕັ້ງ. ຕາມວົງການນັກໄຈ້ແຍກແລ້ວ, ຂໍ້ຕົກລົງດັ່ງກ່າວໄດ້ຈຳກັດສິດສ່ວນຫລາຍຂອງອົງການຕຸລາການ, ແມ່ນການແຊກແຊງຂອງອົງການອຳນາດບໍລິຫານເຂົ້າໃນອົງການຕຸລາການ. ຄຳຖະແຫລງຂອງ ປະທານາທິບໍດີ ອີຢີບ Mohamed Morsi ກໍລະເມີດກົດໝາຍວ່າດ້ວຍການຈັດຕັ້ງອົງການຕຸລາການ, ຕາມນັ້ນແລ້ວ, ປະທານາທິບໍດີ ບໍ່ໄດ້ແຊກແຊງເຂົ້າວຽກງານຂອງອົງການຕຸລາການ. ນັ້ນແມ່ນບໍ່ທັນເວົ້າເຖິງເລື່ອງຖະແຫລງລັດຖະທຳມະນູນໄດ້ປະກາດແກ່ຍາວໄລຍະເວລາຮຽບຮຽງສຳເລັດລັດຖະທຳມະນູນ ຈາກ 6 ເດືອນຂຶ້ນເຖິງ 8 ເດືອນ, ນັບແຕ່ມື້ສ້າງຕັ້ງສະພາສ້າງລັດຖະທຳມະນູນ. ພາຍຫລັງປະກາດໃຊ້ຖະແຫລງລັດຖະທຳມະນູນ, ປະທານາທິບໍດີ ອີຢີບ Mohamed Morsi ໄດ້ຄັດເຂ່ຍຫົວຫນ້າໄອຍະການ Abdel Meguid Madmud ແລະ ແຕ່ງຕັ້ງຄົນໃຫມ່. ປະທານາທິບໍດີ ອີຢີບ Mohamed Morsi ກໍປະກາດໃຊ້ “ກົດໝາຍວ່າດ້ວຍການປົກປັກຮັກສາການປະຕິວັດເມື່ອວັນທີ 25/1/2011”, ຕາມນັ້ນແລ້ວແມ່ນສືບຕໍ່ການສືບສວນບັນດາເຫດການເຂັ່ນຂ້າ ແລະ ກົນອຸບາຍເຂັ່ນຂ້າບັນດາຜູ້ແຫ່ຂະບວນປະທ້ວງໃນການລຸກຮືຂຶ້ນໂຄ່ນລົ້ມລະບອບຂອງປະທານາທິບໍດີ Mubarack ເມື່ອປີກາຍນີ້.
ປະທານາທິບໍດີ ອີຢີບ Mohamed Morsi
ພາບ:thanhnien.com.vn
|
ການກະທຳຂອງທ່ານ Morsi ໄດ້ກໍ່ຄວາມບໍ່ລົງລອຍກັນໃນວົງການການເມືອງ ອີຢີບ ເມື່ອເຂົາເຈົ້າຖືວ່າ: ປະທານາທິບໍດີ ມີເຈດຈຳນົງຄອບງຳສິດອຳນາດ. ບັນດາກຳລັງຝ່າຍຄ້ານ, ໃນນັ້ນ ມີສະຫະສະມາຄົມຜູ້ພິພາກສາ, ກ່າວຫາວ່າຄຳຖະແຫລງຂອງ ປະທານາທິບໍດີ ອີຢີບ Mohamed Morsi ເພື່ອແນໃສ່ປົກປັກຮັກສາບັນດາດຳລັດຂອງທ່ານຕໍ່ຫນ້າຄຳຕັດສິນຂອງສານ ນັ້ນແມ່ນການລັດຖະປະຫານລັດຖະທຳມະນູນ ຕ້ານຄືນບັນດາຂໍ້ກຳນົດຂອງອຳນາດນິຕິບັນຍັດ ແລະ ລັກສະນະເອກະລາຂອງຕຸລາການ. ທ່ານ Mohamed ElBaradei ອະດີດຜູ້ອຳນວຍການອົງການພະລັງງານປະລະມານູສາກົນ (IAEA) ໄດ້ກ່າວເຕືອນວ່າ: ເລື່ອງ ປະທານາທິບໍດີ ຄອບງຳສິດອຳນາດອາດຈະກໍ່ຜົນຮ້າຍຢ່ອນຫລັງຢ່າງຮ້າຍແຮງ. ວົງການຜູ້ພິພາກສາ ແລະ ສື່ມວນຊົນ ອີຢີບ ໄດ້ຮຽກຮ້ອງໃຫ້ການຢຸດງານໃນທົ່ວປະເທດ ເພື່ອຄັດຄ້ານທ່ານ Morsi, ການຜັນແປ່ດັ່ງກ່າວແມ່ນຄ້າຍຄືເຫດການທີ່ເກີດຂຶ້ນໃນການລັດຖະປະຫານໂຄ່ນລົ້ມອະດີດປະທານາທິບໍດີ Hosni Mubarak . ຕາມສະໂມສອນຜູ້ພິພາກສາ ແລ້ວ, ມີ 99% ຈຳນວນສານ ແລະ ອົງການດຳເນີນຄະດີ ອີຢີບ ໄດ້ຢຸດງານເພື່ອຕ້ານດຳລັດຂອງປະທານາທິບໍດີ. ໃນຂະນະນັ້ນ, ກະແສການແຫ່ຂະບວນປະທ້ວງໄດ້ເພີ່ມຂຶ້ນສູງຢູ່ ອີຢີບ ໂດຍຮຽກຮ້ອງໃຫ້ຄະນະລັດຖະບານຕ້ອງລາອອກຈາກຕຳແຫນ່ງ. ບັນດາຜູ້ແຫ່ຂະບວນຖະແຫລງວ່າ ຈະຢູ່ Tahris ຈົນເຖິງຕາບໃດປະທານາທິບໍດີ ຍົກເລິກຄຳຖະແຫລງລັດຖະທຳມະນູນ. ໃນຂົງເຂດເສດຖະກິດ, ຕະຫລາດຫລັກຊັບ ອີຢີບ ກໍຖືກເສຍຫາຍຢ່າງຫນັກຫນ່ວງເມື່ອຖືກເສຍຈຳນວນເງິນເກືອບ 4,8 ຕື້ USDໃນວັນທີ 25/11, ຊື່ງແມ່ນລະດັບເສຍຫາຍຫລາຍສຸດນັບແຕ່ເມື່ອຕະຫລາດນີ້ເປີດປະຕູຄືນໃຫມ່ພາຍຫລັງລະບອບປະທານາທິບໍດີ Hosni Mubarak ຖືກໂຄ່ນລົ້ມໃນເດືອນ 2/2011.
ການແຫ່ຂະບວນປະທ້ວງຄັດຄ້ານປະທານາທິບໍດີ ອີຢີບ Mohamed Morsi
ພາບ:internet
|
ຕໍ່ຫນ້າໄພຂາດສະຖຽນລະພາບນັບມື້ນັບປີນຂັ້ນໄດ, ວັນທີ 29/11 ປະທານາທິບໍດີ ອີຢີບ Mohamed Morsi ໄດ້ມີບົດປາໄສທາງໂທລະພາບເພື່ອອະທິບາຍສາຍເຫດທີ່ປະກາດໃຊ້ຄຳຖະແຫລງ ພ້ອມທັງຮຽກຮ້ອງຄວາມເປັນເອກະພາບແຫ່ງຊາດ. ໃນຂະນະນັ້ນ, ວັນທີ 28/11 ສະພາສ້າງລັດຖະທຳມະນູນປະເທດນີ້ ໄດ້ສຳເລັດບັນດາການປຶກສາຫາລືກ່ຽວກັບແຜນຮ່າງລັດຖະທຳມະນູນ. ທ່ານເລຂາທິການໃຫຍ່ ສະພາສ້າງລັດຖະທຳມະນູນ Amr Darrag ໃຫ້ຮູ້ວ່າ: ສະພາຈະປ່ອນບັດກ່ຽວກັບຮ່າງລັດຖະທຳມະນູນສຸດທ້າຍໃນວັນທີ 29/11 ແລະ ຈະຍື່ນສະເຫນີຮ່າງທີ່ໄດ້ຮັບການຮັບຮອງເອົາຕໍ່ ປະທານາທິບໍດີ Mahamed Morsi. ຕາມທ່ານ Darrag ແລ້ວ,ມາດຕະການຫນຶ່ງດຽວໃຫ້ແກ່ວິກິດການປະຈຸບັນ ຢູ່ ອີຢີບ ແມ່ນສ້າງສຳເລັດລັດຖະທຳມະນູນສະບັບໃຫມ່ໃນເວລາໄວທີ່ສຸດ. ເຖິງຢ່າງໃດກໍຕາມ, ນີ້ແມ່ນວຽກງານບໍ່ງ່າຍດາຍ ແລະ ຊາວອີຢີບ ຍັງຄົງລໍຖ້າເພື່ອໃຫ້ອຳນາດການປົກຄອງມີຄວາມເຂັ້ມແຂງຢ່າງພຽງພໍ ແລະ ເຄື່ອນໄຫວຕາມລັດຖະທຳມະນູນຂອງ ອີຢີບ.