ອີຢີບ ພາຍຫລັງ 1 ປີແຫ່ງການກຳອຳນາດຂອງປະທານາທິບໍດີ Mohamed Morsi

ວັນສຸກ ທີ 28 ມິຖຸນາ ຄ.ສ. 2013 | 15:29:20

(vovworld)- ວັນທີ 30/6 ຈະມາເຖິງ ຈະເປັນຂີດໝາຍ 1 ປີຂຶ້ນກຳອຳນາດຂອງທ່ານປະທານາທິບໍດີ ອີຢີບ Mohamed Morsi. ກົງກັບຂ້າມກັບຖະແຫລງການທີ່ຫນ້າປະເອີບໃຈໃນມື້ຮັບດຳລົງຕຳແຫນ່ງກ່ຽວກັບການກໍ່ສ້າງອີຢີບເປັນພື້ນຖານ

ປະຊາທິປະໄຕຢ່າງແທ້ຈິງ, ແຕ່ບັດນີ້,ປະທານາທິບໍດີ Mohamed Morsi ພວມປະເຊີນຫນ້າກັບຄວາມສ່ຽງອາດຖະຖືກອອກຈາກຕຳແຫນ່ງຍ້ອນກຳລັງດັນຈາກກຸ່ມຄົນບໍ່ຫນ້ອຍທີ່ກ່ອນນີ້ 1 ປີໄດ້ຖືວ່າ ໝາກຜົນການເລືອກຕັ້ງປະທານາທິບໍດີຕ້ອງໄດ້ຮັບຄວາມເຄົາລົບ.

ກ່ອນນີ້ 1 ປີ, ເມື່ອຫາກໍ່ຂຶ້ນກຳອຳນາດ, ປະທານາທິບໍດີ Mohamed Morsi ບໍ່ຄິດວ່າ ຕຳແຫນ່ງຂອງທ່ານຖືກກະທົບ ເມື່ອທ່ານຫາກໍຂຶ້ນກຳອຳນາດໃນ 1/4 ໄລຍະທາງຂອງອາຍຸການ 4 ປີທີ່ດຳລົງຕຳແຫນ່ງເປັນປະທານາທິບໍດີ. ຖ້າສັງເກດໃນທຸກດ້ານ, ຈາກການເມືອງຕະຫລອດຮອດເສດຖະກິດ, ສັງຄົມ, ຊາວ ອີຢີບ ລ້ວນແຕ່ບໍ່ພຶງພໍໃຈຕໍ່ການບໍລິຫານຂອງປະທານາທິບໍດີ Mohamed Morsi. ເຂົາເຈົ້າຖືວ່າ ໃນຕະຫລອດ 1 ປີ ຜ່ານມາ, ຢູ່ ອີຢີບ ບໍ່ທັນມີການປ່ຽນແປງອັນຕັ້ງຫນ້າ. ພື້ນຖານເສດຖະກິດ ອີຢີບ ຍັງຖືກວິກິດການອັນຫນັກຫນ່ວງ, ລາຄາເພີ່ມຂຶ້ນທົບສອງເທົ່າເມື່ອທຽບໃສ່ປີກາຍ. ຕົວເລກຂອງກະຊວງການເງິນ ອີຢີບ ປະກາດເມື່ອວັນທີ 20/6 ສະແດງໃຫ້ເຫັນວ່າ: ການຂາດດຸນງົບປະມານໃນ 11 ເດືອນ ຜ່ານມາ (ແຕ່ເດືອນ 7/2012 ຮອດເດືອນ 5/2013) ເພີ່ມຂຶ້ນເກືອບ 30 ຕື້ USD, ເທົ່າກັບ 11,8% ຍອດຜະລິດຕະພັນພາຍໃນ GDP ແລະ ເພີ່ມຂຶ້ນຫລາຍພໍສົມຄວນເມື່ອທຽບໃສ່ລະດັບຂາດດຸນເກືອບ 20 ຕື້ USD ເມື່ອທຽບໃສ່ໄລຍະດຽວກັນຂອງປີກາຍ. ບ້ວງຫນີ້ຕ່າງປະເທດຂອງອີຢີບກໍເພີ່ມຂຶ້ນ 15,5% ຂຶ້ນເຖິງ ກວ່າ 38 ຕື້ USD. ອັດຕາສ່ວນຜູ້ ວ່າງງານເພີ່ມຂຶ້ນ 13%.

ໃນວົງການການເມືອງ, ປະທານາທິບໍດີ Mohamed Morsi ສືບຕໍ່ມານະພະຍາຍາມຄວບຄຸມສິດອຳນາດດ້ວຍການກະທຳໃຫມ່ສຸດ ແມ່ນລົງນາມໃນລັດຖະດຳລັດແຕ່ງຕັ້ງບັນດາສະມາຊິກໃກ້ຊິດຂອງຕົນເປັນເຈົ້າແຂວງຄົນໃຫມ່. ດ້ວຍການແຕ່ງຕັ້ງດັ່ງກ່າວ, ປະຈຸບັນ ກຳລັງອ້າຍນ້ອງອິດສະລາມພວມຄວບຄຸມ 10 ໃນຈຳນວນ 27 ແຂວງ, ນະຄອນໃນທົ່ວປະເທດ, ໃນນັ້ນ ມີບັນດາທ້ອງຖິ່ນໄດ້ຮັບຖືວ່າແມ່ນ“ກຳແພງໝັ້ນຄົງ”ຂອງຝ່າຍຄ້ານ.

ວິກິດການກ່ຽວກັບເສດຖະກິດ ພ້ອມກັບການປັບປຸງສິດອຳນາດໄດ້ເຮັດໃຫ້ຈຳນວນ ຊາວອີຢີບບໍ່ພໍໃຈຕໍ່ລະບອບໄດ້ເພີ່ມຂຶ້ນສູງ ແລະ ອັດຕາສ່ວນຜູ້ສະຫນັບສະຫນູນປະທານາທິບໍດີ Mohamed Morsi ຫລຸດລົງຢ່າງແຮງ. ໝາກຜົນການຢັ່ງຫາງສຽງໂດຍສະຖາບັນຄົ້ນຄ້ວາ Zogby(ZRS) ປະກາດເມື່ອວັນທີ 17/6 ໃຫ້ເຫັນວ່າ: ອັດຕາສ່ວນຜູ້ສະຫນັບສະຫນູນປະທານາທິບໍດີ Mohamed Morsi ຍັງເຫລືອພຽງ 28%. ຕົວເລກດັ່ງກ່າວຕຳ່ກວ່າຫລາຍເມື່ອທຽບໃສ່ 57% ຂອງ ປີກ່ອນນີ້.

ອີຢີບ ພາຍຫລັງ 1 ປີແຫ່ງການກຳອຳນາດຂອງປະທານາທິບໍດີ Mohamed Morsi - ảnh 1

ຊາວອີຢີບແຫ່ຂະບວນປະທ້ວງ
ພາບ:Reuters.

ຄວາມບໍ່ພໍໃຈຕໍ່ລະບອບຂອງປະຊາຊົນ ອີຢີບ ໄດ້ຫັນມາເປັນບັນດາການແຫ່ຂະບວນປະທ້ວງ ຊື່ງຕາມການສະຖິຕິຂອງສູນພັດທະນາສາກົນ ແລ້ວ, ຈຳນວນການແຫ່ຂະບວນປະທ້ວງຢູ່ ອີຢີບ ພາຍຫລັງ 1 ປີກຳອຳນາດຂອງປະທານາທິບໍດີ Mohamed Morsi ໄດ້ທຳລາຍສະຖິຕິ, ດ້ວຍຍອດຈຳນວນ 9.427 ຄັ້ງ. ຕົວເລກນີ້ສູງກວ່າ 7 ເທົ່າເມື່ອທຽບໃສ່ສະໄຫມອະດີດປະທານາທິບໍດີ Hosni Mubarak, ຜູ້ຖືກໂຄ່ນລົ້ມເມື່ອຕົ້ນປີ 2011. ຕາມວົງການນັກສັງເກດການແລ້ວ, ຄວາມເຄ່ັງຕຶງອາດຈະຮ້າຍແຮງກວ່າເມື່ອວັນທີ 30/6 ຝ່າຍຄ້ານໄດ້ປຸກລະດົມການແຫ່ຂະບວນປະທ້ວງດ້ວຍຂອບຂະຫນາດໃຫຍ່ຫລາຍຄັ້ງໃນທົ່ວປະເທດ ເພື່ອຮຽກຮ້ອງທ່ານ Morsi ລາອອກຈາກຕຳແຫນ່ງ ແລະ ຈັດຕັ້ງການເລືອກຕັ້ງປະທານາທິບໍດີກ່ອນກຳນົດເວລາ. ຄວາມສ່ຽງດັ່ງກ່າວສະແດງໃຫ້ເຫັນຜ່ານເລື່ອງ ກຸ່ມຝ່າຍຄ້ານ Tamarod ເກັບກຳໄດ້ 15 ລ້ານລາຍເຊັນໂດຍຮຽກຮ້ອງການພົ້ນຕຳແຫນ່ງປະທານາທິບໍດີ Morsi, ຊື່ງແມ່ນຕົວເລກຫລາຍກວ່າຈຳນວນ 2 ລ້ານຄົນທີ່ໄດ້ປ່ອນບັດໃຫ້ທ່ານໃນການ ເລືອກຕັ້ງຮອບທີ 2 ຂອງການເລືອກຕັ້ງປະທານາທິບໍດີກ່ອນນີ້.

ໃນຄວາມມານະພະຍາຍາມເພື່ອຫລຸດຜ່ອນຄວາມເຄັ່ງຕຶງ, ກ່າວຄຳເຫັນທາງໂທລະພາບເມື່ອວັນທີ 26/6, ປະທານາທິບໍດີ Mohamed Morsi ໝັ້ນໝາຍຈະດຳເນີນການປະຕິຮູບ ແລະ ຮຽກຮ້ອງການໂອ້ລົມສົນທະນາແຫ່ງຊາດ. ທ່ານກ່າວເຕືອນ ວ່າ: ການແບ່ງແຍກດ້ານການເມືອງພວມຢູ່ໃນລະດັບອາດຈະນາບຂູ່ເຖິງພື້ນຖານປະຊາທິປະໄຕ, ກໍ່ຄວາມຂາດສະຖຽນລະພາບ ແລະ ສົ່ງຜົນສະທ້ອນເຖິງການພັດທະນາຂອງປະເທດຊາດ. ເຖິງຢ່າງໃດກໍຕາມ, ສູນທອນພົດຂອງທ່ານບໍ່ເຮັດໃຫ້ການແບ່ງແຍກຢູ່ປະເທດອາຟລີກາເຫນືອນີ້ຫລຸດລົງ. ສິ່ງທີ່ພິສູດໃຫ້ເຫັນນັ້ນແມ່ນ ຫລັງຈາກນັ້ນມື້ຫນຶ່ງ, ຝ່າຍຄ້ານ ແລະ ບັນດາກຳລັງປະຕິວັດອີຢີບ ໄດ້ປະກາດແຜນການໄລຍະຂ້າມຜ່ານໃນກໍລະນີປະທານາທິບໍດີ Mohamed Morsi ຂໍລາອອກຈາກຕຳແຫນ່ງ. ແຜນການດັ່ງກ່າວລວມມີ ການຍຸບເລີກ ສະພາ Shoura (ສະພາສູງ ອີຢີບ) , ຊື່ງແມ່ນອົງການໂດຍຝ່າຍຄ້ານອິດສະລາມຄວບຄຸມ ແລະ ກຳສິດນິຕິບັນຍັດ ນັບແຕ່ເມື່ອສະພາແຫ່ງຊາດຖືກຍຸບເລີກໃນເດືອນ 6/2012, ຢຸດຕິລັດຖະທຳມະນູນປະຈຸບັນ ແລະ ດຳເນີນການຮຽບຮຽງລັດຖະທຳມະນູນສະບັບໃຫມ່. ແລະກໍຕາມແຜນການນີ້, ນາຍົກລັດຖະມົນຕີ ເອກະລາດ ຈະໄດ້ຮັບການເລືອກຕັ້ງເພື່ອໃຫ້ນຳພາລັດຖະບານໃຫມ່ ດ້ວຍຫນ້າທີ່ຜັນຂະຫຍາຍແຜນການເສດຖະກິດຢ່າງຮີບດ່ວນ ເພື່ອກູ້ເອົາພື້ນຖານເສດຖະກິດຂອງ ອີຢີບ ທີ່ພວມຕົກເຂົ້າສຸ່ສະພາບວິກິດການ ແລະ ປະຕິບັດບັນດານະໂຍບາຍຍຸຕິທຳສັງຄົມ.

ເປັນທີ່ຈະແຈ້ງແລ້ວວ່າ, ຂີດໝາຍ 1 ປີ ພາຍຫລັງເຂົ້າດຳລົງຕຳແຫນ່ງຂອງປະທານາທິບໍດີ Mohamed Morsi ດ້ວຍຫລາຍເຫດການທີ່ເປັນຫນ້າໂສກເສົ້າ ແລະ ເຮັດໃຫ້ລັດຖະບານອີຢີບ ຕົກເຂົ້າສຸ່ສະພາບຫຍຸ້ງຍາກ. ກົງກັນຂ້າມຄວາມປິຕິຊົມຊື່ນຂອງປະຊາຊົນອີຢີບກ່ອນນີ້ 1 ປີ, ປະຈຸບັນ ອີຢີບ ພວມສືບຕໍ່ຊອກຫາມາດຕະການເພື່ອແກ້ໄຂສະພາບຂາດສະຖຽນລະພາບດັ່ງກ່າວ.