ທ່ານ Adly Mansour ປະທານາທິບໍດີຊົ່ວຄາວຂອງອີຢິບ
(ພາບ: Al-Arabiya)
|
ພາຍຫຼັງພິທີສະເຫຼີມສະຫຼອງ 1 ປີແຫ່ງວັນຂຶ້ນກຳອຳນາດພຽງ 3 ວັນ, ປະທານາທິບໍດີອີຢິບ Mohamed Morsi, ປະທານາທິບໍດີຄົນທຳອິດຂອງປະເທດນີ້ ໄດ້ຖືກກອງທັບໂຄນລົ້ມ. ສະພາບການນີ້ເປັນໜ້າຕົກສະເງີ້ ເພາະວ່າການຜັນແປຢ່າງວ່ອງໄວຂອງມັນ ອາດຈະຍູ້ປະເທດອາຟະລິກາເໜືອນີ້ ຕົກເຂົ້າສູ່ສົງຄາມກາງເມືອງ ແລະ ການປະທະກັນລະຫວ່າງຝ່າຍຕ່າງໆ.
ໃນຂະນະທີ່ບັນດານັກໄຈ້ແຍກຍັງພວມສັນນິຖານກ່ຽວກັບສະພາບວິກິດການການເມືອງຢູ່ອີຢິບນັ້ນ, ວັນທີ 3/7, ຜູ້ນຳໜ້າກຳລັງປະກອບອາວຸດອີຢິບ ທ່ານ Abdel Fattah al-Sisi ໄດ້ອອກຖະແຫຼງການໂຈະການປະຕິບັດລັດຖະທຳມະນູນ ແລະ ແຕ່ງຕັ້ງປະທານສານລັດຖະທຳມະນູນສູງສຸດ ທ່ານ Adli Mansour ເປັນຜູ້ນຳຊົ່ວຄາວຂອງປະເທດນີ້. ປະທານສານຜູ້ນີ້ຈະສາບານຕົວເຂົ້າດຳລົງຕຳແໜ່ງ
ປະທານາທິບໍດີຊົ່ວຄາວໃນວັນທີ 4/7. ນາຍພົນ al-Sisi ຍັງຮຽກຮ້ອງໃຫ້ດຳເນີນການເລືອກຕັ້ງປະທານາທິບໍດີ ແລະ ສະພາແຫ່ງຊາດກ່ອນກຳນົດ, ສ້າງຕັ້ງຄະນະຄະນະກຳມະການປັບປຸງລັດຖະທຳມະນູນ ແລະ ຄະນະກຳມະການໄກ່ເກ່ຍປອງດອງຊາດ. ຕາມທ່ານ al-Sisi ແລ້ວ, ລັດຖະບານທີ່ເຂັ້ມແຂງ ແລະ ມີກຳລັງຄວາມສາມາດ ແມ່ນອາດຈະໄດ້ຮັບການສ້າງຕັ້ງດ້ວຍຖານະຢ່າງຄົບຖ້ວນ. ພ້ອມກັບການປົດຕຳແໜ່ງປະທານາທິບໍດີ, ກຳລັງປ້ອງກັນຄວາມສະຫງົບອີຢິບ ໄດ້ອອກຄຳສັ່ງຈັບຕົວ 300 ຄົນສັງກັດຂະບວນການອ້າຍນ້ອງອິດສະລາມ. ສະຖານີໂທລະພາບຂອງອົງການນີ້ໄດ້ຖືກຢຸດການເຄື່ອນໄຫວ ແລະ ບັນດາຜູ້ຄຸ້ມຄອງຖຶກຈັບກຸມ. ໃນຂະນະນັ້ນ, ຕາມສື່ມວນຊົນທ້ອງຖິ່ນ, ປະທານາທິບໍດີຜູ້ຖືກໂຄນລົ້ມ ທ່ານ Mohamed Morsi ກໍໄດ້ຖືກພາຕົວໄປຍັງສຳນັກງານອົງການສືບລາຊະການລັບກອງທັບ.
ສະພາບການໄດ້ເກີດຂຶ້ນຢ່າງວ່ອງໄວຂະນະທີ່ກ່ອນໜ້ານັ້ນ, ວັນທີ 1/7, ກອງທັບອີຢິບໄດ້ອອກຄຳຂາດໂດຍກ່າວເຕືອນວ່າ ຈະແຊກແຊງ ແລະ ນຳສະເໜີເສັ້ນທາງການເມືອງສະເພາະໃຫ້ແກ່ປະເທດຊາດຖ້າຫາກບັນດາກຳລັງການເມືອງຢູ່ພາຍໃນປະເທດບໍ່ສາມາດຕອງສະໜອງບັນດາຄວາມຮຽກຮ້ອງຕ້ອງການຂອງປະຊາຊົນໃນຮອບເວລາ 48 ຊົ່ວໂມງ. ແຕ່ປະທານາທິບໍດີ Mohamed Morsi ປະຕິເສດກາລະໂອກາດຊຶ່ງກອງທັບໄດ້ມອບໃຫ້ຕົນເອງ, ພ້ອມກັນນັ້ນ ກຳລັງອິດສະລາມໄດ້ປຸກລະດົມຂະບວນການຄັດຄ້ານໃນທົ່ວປະເທດ ແນໃສ່ສະໜັບສະໜູນລັກສະນະຖືກຕ້ອງລັດຖະທຳມະນູນຂອງຕຳແໜ່ງປະທານາທິບໍດີ.
ຄືດັ່ງຄວາມວິຕົກກັງວົນຂອງບັນດານັກໄຈ້ແຍກ, ໃນຂະນະທີ່ບັນດາການທາບທາມກ່ຽວກັບການສ້າງຕັ້ງລັດຖະບານໃໝ່ຢູ່ປະເທດນີ້ໄດ້ເລີ່ມດຳເນີນນັ້ນ, ການປະທະກັນໄດ້ປະກົດຂຶ້ນ. ອົງການອ້າຍນ້ອງອິດສະລາມໄດ້ອອກຖະແຫຼງການຊຶ່ງພັນລະນາເຖິງເລື່ອງກອງທັບປົດຕຳແໜ່ງປະທານາທິບໍດີ Mohamed Morsi ແມ່ນການກະທຳທໍລະຍົດການປະຕິວັດ ແລະ ຊາວອີຢິບນັບລ້ານຄົນທີ່ມີຄວາມເຊື່ອໝັ້ນຕໍ່ປະຊາທິປະໄຕ. ໃນຂະນະນັ້ນ, ບັນດາຜູ້ສະໜັບສະໜູນ ແລະ ຄັດຄ້ານ ປະທານາທິບໍດີ Mohamed Morsi ໄດ້ເກີດການປະທະກັນຢູ່ນະຄອນ Alexandria. ຕາມເຈົ້າໜ້າທີ່ປ້ອງກັນຄວາມສະຫງົບທ່ານໜຶ່ງແລ້ວ, ໄດ້ມີຜູ້ເສຍຊີວິດ ແລະ ຮັບບາດເຈັບເມື່ອເກີດການປະທະກັນກັບກອງທັບ ແລະ ຕຳຫຼວດ. ຖ້າຫາກສະພາບການນີ້ສືບຕໍ່ປີນຂັ້ນໄດ ກໍຈະພາໃຫ້ເສັ້ນທາງສ້າງຕັ້ງອຳນາດການປົກຄອງໃໝ່ໂດຍກອງທັບວາງອອກ ຍາກທີ່ຈະສຳເລັດ.
ການຜັນແປໃໝ່ບົນເວທີ່ການເມືອງອີຢິບ ໄດ້ເຮັດໃຫ້ຝ່າຍຕາເວັນຕົກມີຄວາມວິຕົກກັງວົນ. ຢູ່ເອີລົບ, ຜູ້ຕາງໜ້າຂັ້ນສູງຂອງສະຫະພາບເອີລົບ, ຮັບຜິດຊອບການພົວພັນຕ່າງປະເທດ ທ່ານນາງ Catherine Ashton ໄດ້ຮຽກຮ້ອງບັນດາຝ່າຍຢູ່ອີຢິບກັບຄືນສູ່ວິວັດທະນາການປະຊາທິປະໄຕ, ດຳເນີນການເລືອກຕັ້ງ ປະທານາທິບໍດີ ແລະ ສະພາແຫ່ງຊາດຢ່່າງເສລີ, ຍຸດຕິທຳ. ລັດຖະມົນຕີການຕ່າງປະເທດອັງກິດ William Hague ໄດ້ກະຕຸກຊຸກຍູ້ບັນດາຝ່າຍຈົ່ງລະງັບໃຈ, ຫຼີກລ້ຽງການໃຊ້ຄວາມຮຸນແຮງ. ທ່ານຄັດຄ້ານການແຊກແຊງທາງທະຫານແນໃສ່ປ່ຽນແປງລະບອບ ແຕ່ບໍ່ເອີ້ນເຫດການຢູ່ກາຍໂຣ ແມ່ນກໍ່ລັດຖະປະຫານ. ໃນຖະແຫຼງການສະບັບໜຶ່ງຖືກອອກອາກາດຈາກທຳນຽບຂາວ, ປະທານາທິບໍດີ ອາເມລິກາ Barak Obama ໄດ້ຮຽກຮ້ອງກອງທັບອີຢິບຈົ່ງມອບໂອນສິດອຳນາດໃຫ້ແກ່ລັດຖະບານພົນລະເຮືອນຢ່າງວ່ອງໄວ. ແຕ່ອາເມລິກາປະຕິເສດການຕຳໜິການກະທຳຂອງກອງທັບອີຢິບ ແລະ ອອກຄຳສັ່ງຍົກຍ້າຍແບບບັງຄັບສຳລັບພາລະກອນສະຖານທູດຂອງປະເທດນີ້ປະຈຳກາຍໂຮ. ປະທານາທິບໍດີອາເມລິກາ Barak Obama ຍັງຮຽກຮ້ອງໃຫ້ກົງຈັກບໍລິຫານຂອງຕົນພິຈາລະນາການໜູນຊ່ວຍຂອງອາເມລິກາໃຫ້ແກ່ລັດຖະບານອີຢິບ. ກົງກັນຂ້າມກັບຄວາມວິຕົກກັງວົນຂອງຝ່າຍຕາເວັນຕົກ, ໃນປະຕິກິລີຍາທີ່ຫຼ້າສຸດ, ວັນທີ 3/7, ບັນດາປະເທດເຂດອ່າວເປີເຊຍ ໄດ້ຊົມເຊີຍເລື່ອງກອງທັບອີຢິບໂຄນລົ້ມ ປະທານາທິບໍດີ Mohamed Morsi. ກະສັດ ອາຣາເບຍ ຊາອຸດິ Abdullah ໄດ້ສ່ົງສານອວຍພອນໄປຍັງທ່ານ Adli Mansour ຊຶ່ງໄດ້ຮັບແຕ່ງຕັ້ງເປັນການນຳຊົ່ວຄາວຂອງປະເທດນີ້. ສະຫະລັດອາຮັບເອັມມີເລັດ ກໍໄດ້ຊົມເຊີຍກຳລັງປະກອບອາວຸດ ອີຢິບ ກໍຄືບັນດາການປ່ຽນແປງຢູ່ແຫ່ງນີ້.
ສະພາບການຢູ່ອີຢິບໃນຊຸມວັນທີ່ຈະມາເຖິງ ແນ່ນອນວ່າ ຈະມີການຫັນປ່ຽນຫຼາຍຢ່າງ. ຊາວອີຢິບກ່ວາ 80 ລ້ານຄົນ ທີ່ເຄີຍຕ້ອງປະເຊີນໜ້າກັບພື້ນຖານເສດຖະກິດທີ່ຊັກຊ້າໃນປະຈຸບັນ, ພັດສືບຕໍ່ດຳລົງຊີວິດໃນສະພາບການເມືອງທີ່ຂາດສະຖຽນລະພາບ. ເບິ່ງຄືວ່າ ການຫຼຸດພົ້ນອອກຈາກສົງຄາມກາງເມືອງ ແລະ ການປະທະກັນລະຫວ່າງຝ່າຍຕ່າງໆຢູ່ອີຢິບຍັງຄົງແມ່ນສິ່ງທີ່ເຫີນຫ່າງຢູ່.