ບັນດານັກການທູດແຖວໜ້າຂອງສະຫະພາບ ເອີລົບ (ອີຢູ) ຫາກໍ່ເຫັນດີເປັນເອກະສັນຕໍ່ກຳນົດເວລາໃຫ້ຄຳສັ່ງລົງໂທດ ລັດເຊຍ ຕື່ມອີກ 6 ເດືອນ ເພື່ອສືບຕໍ່ກໍ່ຄວາມດັນຕໍ່ມົດສະກູ ກ່ຽວກັບການປະທະກັນຢູ່ພາກຕາເວັນອອກ ຢູແກຼນ. ເຖິງວ່າຄຳສັ່ງລົງໂທດດັ່ງກ່າວຕ້ອງໄດ້ຮັບການຮັບຮອງເອົາຈາກການນຳບັນດາປະເທດສະມາຊິກ ອີຢູໃນກອງປະຊຸມຂອງກຸ່ມເຊິ່ງຈະດຳເນີນໃນ 2 – 3 ວັນຈະມາເຖິງ ກໍ່ຕາມ ແຕ່, ໃນຕະຫຼອດວິວັດການປຶກສາຫາລືກ່ຽວກັບເນື້ອໃນ ເຊິ່ງກຳເນີນກ່ອນນີ້, ຄວາມບໍ່ລົງລອຍກັນຕໍ່ເລື່ອງຕໍ່ກຳນົດເວລາແກ່ຄຳສັ່ງລົງໂທດລັດເຊຍນັບມື້ນັບຈະແຈ້ງກ່ວາ.
(ພາບປະກອບ)
ໃນກອງປະຊຸມເມື່ອວັນທີ 21/6, ເອກອັກຄະລັດຖະທູດທີ່ມາຈາກ 28 ປະເທດສະມາຊິກ ອີຢູ ໄດ້ເຫັນດີເຫັນພ້ອມກ່ຽວກັບເລື່ອງແກ່ຍາວຄຳສັ່ງລົງໂທດ ລັດເຊຍ ຮອດວັນທີ 31/1/2017 ດ້ວຍສາຍເຫດບໍ່ມີຄວາມຄືບໜ້າໃດໆໃນວິວັດການແກ້ໄຂການປະທະກັນຢູ່ ຢູແກຼນ.
ຂໍ້ຕົກລົງແກ່ຍາວຄຳສັ່ງລົງໂທດໄດ້ຍົກອອກມາພາຍຫຼັງ ລັດເຊຍ ຈັດຕັ້ງເວທີປາໄສເສດຖະກິດສາກົນຢູ່ນະຄອນ St. Peterburg (16 – 18/6). ທີ່ເວທີປາໄສເສດຖະກິດໄດ້ຮັບຖືວ່າແມ່ນເວທີປາໄສ Davos ຂະໜາດນ້ອຍ, ທ່ານປະທານາທິບໍດີ ລັດເຊຍ Vladimir Putin ມີບັນດາຄຳເຫັນທີ່ມີລັກສະນະເຢືອກເຢັນກັບ ອີຢູ. ພິເສດ, ທ່ານເວົ້າວ່າພ້ອມແລ້ວທີຈະຍົກເລີກບັນດາມາດຕະການໂຕ້ຕອບ ອີຢູ ກ່ອນ, ດ້ວຍເງື່ອນໄຂອົງການນີ້ປະຕິບັດສິ່ງທີ່ກົງກັນຂ້າມ.
ຄວາມບໍ່ລົງລອຍກັນພາຍໃນກຸ່ມສະແດງອອກຢ່າງຈະແຈ້ງ
ການຕັດສິນຕໍ່ກຳນົດເວລາສຳລັບບັນດາຄຳສັ່ງລົງໂທດ ລັດເຊຍ ໂດຍ ອີຢູ ຍົກອອກມາໃນສະພາບການທີ່ນັບມື້ນັບມີຫຼາຍປະເທດສະມາຊິກໃນກຸ່ມກະຕຸກຊຸກຍູ້ພັນທະມິດນີ້ປັບປຸງການພົວພັນກັບມົດສະກູ. ຊຳ້ບໍ່ໜຳ, ນັບມື້ນັບມີນັກການເມືອງ ອີຢູ ຫລາຍຄົນໄດ້ເຊື່ອມຕໍ່ການພົວພັນກັບ ລັດເຊຍ ຄືນໃໝ່ ພາຍຫຼັງຄວາມເຄັ່ງຕຶງ ຍ້ອນຄວາມບໍ່ລົງລອຍກັນກ່ຽວຂ້ອງເຖິງວິກິດການຢູ່ ຢູແກຼນ ທີ່ແກ່ຍາວໄລຍະໜຶ່ງ. ອີຕາລີ, ເກັຼກ ແລະ ຮູງ ກາຣີ ໄດ້ຕັ້ງຄຳຖາມວ່າ ຈຳເປັນຈະຕ້ອງແກ່ຍາວຄຳສັ່ງລົງໂທດຫຼືບໍ່? ຫວ່າງແລ້ວນີ້, ທ່ານນາຍົກລັດຖະມົນຕີ ອີຕາລີ Matteo Renzi ໄດ້ຮຽກຮ້ອງໃຫ້ປຶກສາຫາລືກ່ຽວກັບປະສິດທິຜົນຂອງບັນດາມາດຕະການຂວຳ້ບາດດ້ານເສດຖະກິດກ່ອນທີ່ຕໍ່ກຳນົດເວລາໃຫ້ຄຳສັ່ງລົງໂທດ ລັດເຊຍ. ທ່ານ Paolo Grimoldi, ເລຂາພັກສຳພັນທະມິດ ອີຕາລີ ເໜືອ, ສະມາຊິກສະພາແຫ່ງຊາດ ໄດ້ຢັ້ງຢືນວ່າ ບັນດາມາດຕະການລົງໂທດທີ່ເລັ່ງໃສ່ ລັດເຊຍ ຂອງ ອີຢູ ໄດ້ກໍ່ຜົນເສຍຫາຍໃຫ້ແກ່ພື້ນຖານເສດຖະກິດ ອີຕາລີ ເຖິງ 3,7 ຕື້ເອີໂຣ ຍ້ອນບໍ່ສົ່ງອອກສິນຄ້າໄປຍັງລັດເຊຍໄດ້. ທ່ານລັດຖະມົນຕີການຕ່າງປະເທດ ເຢຍລະມັນ Frank – Walter Steinmeier ຖືວ່າ: ອີຢູ ຄວນຍົກເລີກ ບັນດາມາດຕະການລົງໂທດທີ່ເລັ່ງໃສ່ລັດເຊຍ ເທື່ອລະກ້າວ. ໃນຕົ້ນເດືອນ 6 ນີ້, ສະພາແຫ່ງຊາດ ຝຣັ່ງ ໄດ້ຮັບຮອງເອົາມະຕິບໍ່ບັງຄັບ, ທີ່ຮຽກຮ້ອງໃຫ້ລັດຖະບານ ໂຍະຍານບັນດາມາດຕະການລົງໂທດ ລັດເຊຍ ເທື່ອລະກ້າວ. ທ່ານ Thierry Mariani, ເຊິ່ງແມ່ນສະມາຊິກຂອງພັກສາທາລະນະ, ໃຫ້ຮູ້ວ່າ: ເຂົາເຈົ້າໄດ້ສະເໜີໃຫ້ຍົກເລີກບັນດມາດຕະການລົງໂທດສຳລັບ ລັດເຊຍ ຍ້ອນວ່າ ວຽກງານດັ່ງກ່າວບໍ່ມີປະສິດທິຜົນແຕ່ຢ່າງໃດ, ພ້ອມທັງ ກໍ່ຄວາມເສຍຫາຍບໍ່ແມ່ນໜ້ອຍເຖິງພື້ນຖານເສດຖະກິດຂອງຝຣັ່ງ.
ໃນຂະນະນັ້ນ, ທ່ານລັດຖະມົນຕີການຕ່າງປະເທດ Slovakia Miroslav Laychek ຍອມຮັບວ່າພວມມີ “ຄວາມຕ້ອງການປຶກສາຫາລືດ້ານການເມືອງ” ເພື່ອຍົກເລີກບັນດາມາດຕະການລົງໂທດຕ້ານ ສະຫະພັນລັດເຊຍ. ທ່ານນາງ Nadezhda Savchenko, ສະມາຊິກຄະນະປະຕິບັດງານ ຢູແກຼນ ໃນລັດຖະສະພາ ເອີລົບ ໄດ້ສະໜັບສະໜູນການຍົກເລີກບັນດາມາດຕະການລົງໂທດດ້ານເສດຖະກິດຕ້ານ ລັດເຊຍ ເທື່ອລະກ້າວ. ທ່ານນາງຖືວ່າ, ມາດຕະການລົງໂທດດ້ານເສດຖະກິດຄວນຍົກເລີກ ຕາມການເວລາ ແລະ ເທື່ອລະກ້າວ.
ຕາມວົງການນັກໄຈ້ແຍກແລ້ວ, ສາຍເຫດທີ່ນັບມື້ນັບມີສະມາຊິກ ອີຢູ ຫລາຍປະເທດ ຮຽກຮ້ອງໃຫ້ຍົກເລີກຄຳສັ່ງລົງໂທດ ລັດເຊຍ ຍ້ອນວ່າ ນອກຈາກສ້າງຄວາມເສຍ ກັບດ້ານເສດຖະກິດແລ້ວ, ວຽກງານທີ່ ອີຢູ ຕ້ອງສຸມໃສ່ໃນປະຈຸບັນແມ່ນຕ້ອງແກ້ໄຂວິກິດການຊາວອົບພະຍົບ.
ບັນດາເຈົ້າໜ້າທີ່ຂັ້ນສູງເອລົບ
(ພາບປະກອບ)
ແຕ່ເຖິງຢ່າງໃດກໍ່ຕາມ, ຢູ່ບັນດາປະເທດ Baltic ແລະ ໂປໂລຍ ທັດສະນະຄັດຄ້ານການຍົກເລີກຄຳສັ່ງລົງໂທດ ລັດເຊຍ ຍັງແຂງແຮງຢູ່. ໂດຍມີທັດສະນະດຽວກັນ, ທ່ານລັດຖະມົນຕີການຕ່າງປະເທດ ອັງກິດ Philip Hammond ຢັ້ງຢືນວ່າ: ບໍ່ສາມາດປຶກສາຫາລືກ່ຽວກັບເລືອງຍົກເລີກຄຳສັ່ງລົງໂທດ ກັບ ລັດເຊຍ, ກ່ອນທີ່ສັນຕິພາບຈະໄດ້ຮັບການສ້າງຕັ້ງຢູ່ ພາກຕາເວັນອອກ ຢູແກຼນ ໄດ້.
ສະພາບຕົວຈິງໄດ້ສະແດງໃຫ້ເຫັນວ່າ: ເອີລົບພວມມີຄວາມບໍ່ລົງລອຍກັນຢ່າງເລິກເຊິ່ງກ່ຽວກັບວິທີການແກ້ໄຂບັນຫາລັດເຊຍ. ທ່ານລັດຖະມົນຕີການຕ່າງປະເທດ ເຢຍລະມັນ Frank – Walter Steinmeier ຍອມຮັບທັດສະນະລວມກ່ຽວກັບການເພີ່ມທະວີຄຳສັ່ງລົງໂທດຕ້ານ ລັດເຊຍ ແມ່ນປະສົບກັບຄວາມຫຍຸ້ງຍາກກ່ວາເມື່ອທຽບໃສ່ກ່ອນນີ້ໜຶ່ງປີ. ຊ້ຳບໍ່ໜຳ, ໜັງສືພິມ Le Monde (ຂອງຝຣັ່ງ) ໄດ້ວິຈານວ່າ ເລື່ອງ ອີຢູ ຕໍ່ກຳນົດເວລາຄຳສັ່ງລົງໂທດ ລັດເຊຍ ບໍ່ແມ່ນວ່າຍ້ອນເຂົ້າເຈົ້າແນວນັ້ນ ຫາກບໍ່ທັນຮອດຈຸດເວລາເທົ່ານັ້ນ, ພິເສດ, ແມ່ນເລື່ອງຮັກສາກຽດໃຫ້ “ຄວາມສາມັກຄີຂອງບັນດາປະເທດ ອີຢູ”.
ຄວາມເສຍຫາຍໃຫ້ທັງ 2 ຝ່າຍ
ອີຢູ ໄດ້ເລີ່ມຈັດວາງຄຳສັ່ງລົງໂທດດ້ານເສດຖະກິດສຳລັບ ລັດເຊຍ ເມື່ອເດືອນ 7/2014. ຮອດເດືອນ 9/2014, ຄຳສັ່ງລົງໂທດໄດ້ຮັດແໜ້ນກ່ວາ, ເມື່ອເລັ່ງໃສ່ບັນດາທະນາຄານ, ບັນດາກຸ່ມບໍລິສັດພະລັງງານ ແລະ ອາວຸດຂອງລັດເຊຍ. ປະຈຸບັນ, ອີຢູ ພວມແມ່ນຄູ່ຮ່ວມມືດ້ານການຄ້າແຖວໜ້າຂອງ ລັດເຊຍ, ກວມເກືອບ 45% ຍອດວົງເງິນການຄ້າຂອງປະເທດນີ້ໃນປີ 2015. ປະຈຸບັນ, ລັດເຊຍ ແມ່ນຄູ່ຮ່ວມມືດ້ານການຄ້າໃຫຍ່ທີ 4 ຂອງ ອີຢູ ຖັດຈາກ ອາເມລິກາ, ຈີນ ແລະ ສະວິດ, ພ້ອມທັງຮັກສາບົດບາດແມ່ນໜຶ່ງໃນບັນດາປະເທດສະໜອງເຊື້ອເພີງດທຳມະຊາດ ແລະ ນຳ້ມັນບໍ່ ໃຫຍ່ທີ່ສຸດຂອງ ເອີລົບ. ແຕ່ເຖິງຢ່າງໃດກໍ່ຕາມ, ໃນປີ 2015, ວົງເງິນການຄ້າ 2 ສົ້ນລະຫວ່າງ ລັດເຊຍ ແລະ ອີຢູ ຖືກຫລຸດລົງຢ່າງແຮງ ຈາກເກືອບ 420 ຕື້ USD ໃນປີ 2013 ລົງເຫຼືອພຽງກ່ວາ 230 ຕື້ USD ຍ້ອນບັນດາຜົນກະທົບຈາກຄຳສັ່ງລົງໂທດ.
ເລື່ອງໃຫ້ສັດຕະຍາບັນຕໍ່ຂໍ້ຕົກລົງຕໍ່ກຳນົດເວລາແກ່ບັນດາຄຳສັ່ງລົງໂທດ ລັດເຊຍ ອາດຈະ ດຳເນີນໃນວັນທີ 24/6 ຫຼື ຢູ່ກອງປະຊຸມບັນດາການນຳ ອີຢູ ເຊິ່ງຈະດຳເນີນຢູ່ ບຣຸກແຊນ, ປະເທດແບນຊິກ ໃນວັນທີ 28 – 29/6/2016. ເຖິງວ່າຈະຊ້າ ຫຼື ໄວຂໍ້ຕົກລົງນີ້ກໍ່ຈະໄດ້ຮັບການຮັບຮອງເອົາຢ່າງເປັນທາງການ ແຕ່ເປັນທີ່ຈະແຈ້ງແລ້ວວ່າພາຍຫຼັງ 2 ປີ ທີ່ຈັດວາງຄຳສັ່ງລົງໂທດນັ້ນ, ສິ່ງທີ່ ເອີລົບ ຮັບຮູ້ໄດ້ແມ່ນຄວາມເສຍຫາຍຈາກການແບ່ງແຍກນັບມື້ນັບສູງ. ພັນທະມິດດັ່ງກ່າວບໍ່ພຽງຖືກເສຍຫາຍດ້ານເສດຖະກິດ ຍ້ອນນະໂຍບາຍມັນກໍ່ຂຶ້ນເທ່ົານັ້ນ ຫາກຍັງຕ້ອງ ຮັກສາຄວາມສາມັກຄີພາຍໃນກຸ່ມ ເມື່ອຮັບມືກັບ ລັດເຊຍອີກດ້ວຍ.