(vovworld)- ໃນຊຸມມື້ຜ່ານມາ, ອາເມລິກາ ແລະ ສະຫະພາບ ເອີລົບ (EU) ໄດ້ຍົກເລີກບັນດາຄຳສັ່ງລົງໂທດດ້ານເສດຖະກິດຕ້ານອີຣານ ພາຍຫລັງ ອົງການພະລັງງານປະລະມານູສາກົນ (IAEA) ຖະແຫລງວ່າ ເຕເຮຣານ ໄດ້ເຄົາລົບບັນດາມາດຕາໃນຂໍ້ຕົກລົງນິວເຄຼຍທີ່ບັນລຸໄດ້ເມື່ອທ້າຍເດືອນ 7/2015 ລະຫວ່າງ ອີຣານ ແລະ ກຸ່ມ P5+1 ເພື່ອຈຳກັດໂຄງການນິວເຄຼຍຂອງປະເທດນີ້. ອີຣານ ກໍພວມມີບັນດາບາດກ້າວເຊື່ອມໂຍງຢ່າງແຮງກັບໂລກ ເພື່ອຍາດແຍ່ງກາລະໂອກາດຮ່ວມມືທີ່ເຕັມໄປດ້ວຍຄວາມສາມາດບົ່ມຊ້ອນ.
ປະທານາທິບໍດີ ອີຣານ Hassan Rouhani
ພາບ:nld.com.vn
|
ອາດຈະຢືນຢັນໄດ້ວ່າ ບັນດາຜົນປະໂຫຍດທີ່ໄດ້ຮັບຈາກຂໍ້ຕົກລົງນິວເຄຼຍ ປະຫວັດສາດ ແມ່ນຈະແຈ້ງທີ່ສຸດ. ບໍ່ພຽງແຕ່ໄດ້ຮັບອະນຸຍາດສົ່ງອອກນ້ຳມັນດິບອອກຈາກຕະຫລາດໂລກ, ຊື່ງແມ່ນຂົງເຂດນຳມາເຊິ່ງແຫລ່ງລາຍຮັບເງິນຕາຕ່າງປະເທດຕົ້ນຕໍເທົ່ານັ້ນ ຫາກເຕເຮຣານ ຍັງໄດ້ຮັບອະນຸຍາດສຳຜັດກັບບ້ວງເງິນ 100 ຕື້ USD ທີ່ຖືກປິດລ້ອມໃນໄລຍະຖືກຈັດວາງຄຳສັ່ງຂວ້ຳບາດອີກດ້ວຍ. ຈຳນວນເງິນດັ່ງກ່າວແມ່ນມີຄວາມໝາຍທີ່ສຸດ ສຳລັບປະເທດຖືກຕົກຢູ່ໂດດດ່ຽວໃນໄລຍະນັບສີບໆປີຄື ອີຣານໃນວິວັດການອັບເດັດບັນດາເຕັກໂນໂລຊີທັນສະໄຫມ, ກ້າວຫນ້າໃນໂລກ ເຮັດແນວໃດໃຫ້ເໝາະສົມກັບຄວາມສາມາດດ້ານເສດຖະກິດຂອງຕົນ. ບັນດາຂົງເຂດຄື ທະນາຄານ, ໂອນເງິນ, ປະກັນໄພ, ການຄ້າ, ການຂົນສົ່ງ ແລະ ການຊື້ຂາຍເຕັກໂນໂລຊີຈະມີກາລະໂອກາດພັດທະນາຢ່າງແຮງ ເມື່ອໄດ້ສຳຜັດກັບແຫລ່ງເງິນລົງທຶນຈາກຕ່າງປະເທດ.
ບັນດາບາດກ້າວເຊື່ອມໂຍງຢ່າງຕັ້ງຫນ້າ
ໄລຍະປະຈຸບັນ ແມ່ນເໝາະສົມເພື່ອໃຫ້ອີຣານ ຮ່ວມມືກັບບັນດາປະເທດອື່ນ ແລະ ເຕເຮຣານ ຈະກຳໄດ້ກາລະໂອກາດນີ້ ເພື່ອສ້າງສາປະເທດຊາດ. ອີຣານ ວາງຄາດໝາຍບັນລຸການເຕີບໂຕແຕ່ລະປີໃຫ້ໄດ້ 8% ກໍຄືດຶງດູດການລົງທຶນຕ່າງປະເທດໃນແຕ່ລະປີແຕ່ 30-50 ຕື້ USD. ຄຳກ່າວປາໄສດັ່ງກ່າວຂອງປະທານາທິບໍດີ ອີຣານ Hassan Rouhani ຍົກອອກໃນອາທິດຜ່ານມາ ໄດ້ຢືນຢັນຄວາມຕັດສິນໃຈຂອງ ອີຣານ ກຳແຫນ້ນບັນດາກາລະໂອກາດຈາກຂໍ້ຕົກລົງ ນິວເຄຼຍ ປະຫວັດສາດ, ແກ້ໄຂບັນດາບັນຫາເສດຖະກິດ, ເປີດຊ່ອງທາງໃຫ້ຄວາມກ້າວຫນ້າ ແລະ ພັດທະນາ.
ໃນບາດກ້າວຕັ້ງຫນ້າທຳອິດ, ວັນທີ 14/2, ມີນ້ຳມັນດິບ 4 ລ້ານຖັງ ຂອງອີຣານ ໄດ້ສົ່ງອອກໄປຍັງ ເອີລົບ ແລະ ນີ້ແມ່ນຖ້ຽວສິນຄ້າທຳອິດ ຊື່ງ ເຕເຮຣານ ສົ່ງອອກໄປຍັງ ເອີລົບ ຊື່ງເຄີຍແມ່ນຕະຫລາດນ້ຳມັນເດີມຂອງ ອີຣານ ໃນຫລາຍປີຜ່ານມາ. ຈຳນວນນ້ຳມັນດັ່ງກ່າວແມ່ນຂາຍໃຫ້ 3 ປະເທດ ຄື: ຝລັ່ງ, ລັດເຊຍ ແລະ ແອດສະປາຍ. ອີຣານ ໃຫ້ຮູ້ວ່າ ປະເທດນີ້ ວາງຄາດໝາຍນັບແຕ່ນີ້ຮອດທ້າຍເດືອນ 3/2016 ແຕ່ລະມື້ ສົ່ງອອກນ້ຳມັນໃຫ້ໄດ້ 1,5 ລ້ານຖັງ. ຕາມແຜນການ ແຕ່ລະມື້ ເຕເຮຣານ ຈະສົ່ງອອກນ້ຳມັນດິບ 300.000 ຖັງໄປຍັງເອີລົບ ແລະ ກ້າວໄປເຖິງ ຈະຂາຍນ້ຳມັນໃຫ້ບັນດາຄູ່ຮ່ວມມື ອາຊີ ດ້ວຍຈຳນວນປະມານ 200.000 ຖັງ/ມື້ ໃນຊຸມເດືອນຈະມາເຖິງ.
ໃນຂົງເຂດທ່ອງທ່ຽວ, ຫວ່າງແລ້ວນີ້ ອີຣານ ກໍວາງອອກແຜນການ ເພື່ອເພີ່ມລາຍຮັບຂອງຂະແຫນງທ່ອງທ່ຽວໃຫ້ຂຶ້ນເຖິງ 25-30 ຕື້ USD ດ້ວຍການດຶງດູດນັກທ່ອງທ່ຽວ 20 ລ້ານເທື່ອຄົນໃນແຕ່ລະປີ. ເພື່ອປະຕິບັດແຜນການດັ່ງກ່າວ, ອີຣານ ຜັນຂະຫຍາຍການອອກວິຊາ 30 ວັນ ໃຫ້ນັກທ່ອງທ່ຽວຂອງ 180 ປະເທດ. ຕາມນັ້ນແລ້ວ, ຫວ່າງແລ້ວນີ້ ລັດຖະບານອີຣານ ໄດ້ຮັບຮອງເອົາຮ່າງກົດໝາຍສະບັບໃຫມ່, ຕໍ່ກຳນົດເວລາອອກວິຊາ ຢູ່ ບັນດາສະຫນາມບິນ ອີຣານ ໃຫ້ຂຶ້ນເຖິງ 30 ວັນ ສຳລັບນັກທ່ອງທ່ຽວຕ່າງປະເທດ. ກ່ອນນັ້ນ ນັກທ່ອງທ່ຽວ ພຽງໄດ້ຮັບວິຊາໃນເວລາ 14 ວັນ ແລະ ບໍ່ໄດ້ຮັບອະນຸຍາດຕໍ່ກຳນົດເວລາ. ອີຣານ ກໍຕໍ່ກຳນົດເວລາພັກອາໄສໃຫ້ພົນລະເມືອງ 7 ປະເທດ ຊື່ງລວມມີ: ຕວກກີ, ລີບານ, ອາແຊກໄບຢານ, ກລູຊີ, ໂບໂລວີ,
ອີຢີບ ແລະ ຊີຣີ ເພື່ອປະຕິບັດແຜນການຊຸກຍູ້ການທ່ອງທ່ຽວ. ຕາມນັ້ນແລ້ວ ພົນລະເມືອງບັນດາປະເທດນີ້ສາມາດມາຢ້ຽມຢາມ ແລະ ຢູ່ ອີຣານໃນເວລາ ແຕ່ 15 – 90 ວັນ ໂດຍບໍ່ຕ້ອງການຂໍວິຊາ. ຄຽງຄູ່ກັນນັ້ນ ອີຣານ ກໍປະກາດແຜນການຊື້ເຮືອບິນໃຫມ່ 400-500 ລຳ ດ້ວຍຍອດມູນຄ່າປະມານ 20 ຕື້ USD ໃນຫນຶ່ງທົດສະວັດຈະມາເຖິງ.
ເປີດກວ້າງການພົວພັນດ້ານການຄ້າ
ດ້ວຍການຍົກເລີກບັນດມາດຕະການລົງໂທດ, ອີຣານ ປາດຖະຫນາຈະດຶງດູດເງິນລົງທຶນຂອງຕ່າງປະເທດໃນແຕ່ລະປີ 50 ຕື້ USD. ຕາມບັນດານັກໄຈ້ແຍກແລ້ວ, ອີຣານ ມີຄວາມສາມາດບົ່ມຊ້ອນດ້ານເສດຖະກິດຫລາຍຢ່າງ ຫາກບໍ່ພຽງແຕ່ນ້ຳມັນເທົ່ານັ້ນ. ໃນສະພາບເສດຖະກິດຈີນ ພວມເຕີບໂຕຢ່າງຊັກຊ້າ ແລະ ມີຕະຫລາດໃຫມ່ຫລາຍແຫ່ງຫາກໍ່ພົ້ນເດັ່ນຂຶ້ນ ກໍພວມປະສົບກັບຄວາມຫຍຸ້ງຍາກ, ຄວາມສາມາດບົ່ມຊ້ອນແຫ່ງການດຳເນີນທຸລະກິດຢູ່ ອີຣານ ນັບມື້ນັບດຶງດູດບັນດາບໍລິສັດ ເອີລົບ ແລະ ອາເມລິກາ. ດ້ວຍພົນລະເມືອງ 80 ລ້ານຄົນ, ໃນນັ້ນ ປະມານ 60% ມີອາຍຸຕຳ່ກວ່າ 30 ປີ ແລະ ມີລະດັບຄວາມຮູ້ສູງພໍສົມຄວນ, ປະຊາຊົນຊັ້ນກາງຢູ່ ອີຣານໄດ້ຮັບຖືວ່າ ຈະຕອບສະຫນອງໄດ້ບັນດາຄວາມຕ້ອງການປະເພດສິນຄ້າຈຳນວນຫນຶ່ງຂອງຄູ່ຮ່ວມມືຝ່າຍຕາເວັນຕົກ.
ບັນດາບໍລິສັດຕ່າງປະເທດ ພວມກຽມພ້ອມ ຊອກຫາບັນດາກາລະໂອກາດດຳເນີນທຸລະກິດຢູ່ປະເທດອິດສະລາມນີ້. ມີວິສາຫະກິດຫລາຍແຫ່ງຂອງບັນດາພື້ນຖານເສດຖະກິດພັດທະນາຄື: ເຢຍລະມັນ, ສະວິດ, ອັງກິດ, ແອດສະປາຍ, ຝລັ່ງ ແລະ ບັນດາພື້ນຖານເສດຖະກິດພວມພັດທະນາລ້ວນແຕ່ມີການຫັນປ່ຽນຢ່າງຕັ້ງຫນ້າ ມີລັກສະນະເປີດຊ່ອງທາງໃຫ້ກິດຈະການຂຸດຄົ້ນກາລະໂອກາດຈາກຕະຫລາດ ອີຣານ. ພຽງໃນໄລຍະສັ້ນ ນັບແຕ່ພາຍຫລັງຍົກເລີກຄຳສັ່ງລົງໂທດທີ່ໄດ້ປະກາດແລ້ວ, ການຢ້ຽມຢາມທາງການທູດລະຫວ່າງບັນດາການນຳອີຣານ ກັບບັນດາປະເທດອື່ນກໍໄດ້ດຳເນີນໄປຢ່າງລຽນຕິດ. ຕໍ່ຈາກນັ້ນ ປະທານາທິບໍດີ ອີຣານ Hassan Rowhani ໄດ້ໄປຢ້ຽມຢາມ ເອີລົບ. ໃນການຢ້ຽມຢາມຄັ້ງນີ້ ມີຂໍ້ຕົກລົງດ້ານເສດຖະກິດຫລາຍສະບັບໄດ້ຮັບການລົງນາມ, ເປີດຊ່ອງທາງໃຫ້ວິສາຫະກິດຫລາຍແຫ່ງຜັນຂະຫຍາຍບັນດາການເຄື່ອນໄຫວລົງທຶນ.
ດ້ວຍບັນດາບາດກ້າວເຊື່ອມໂຍງຢ່າງຕັ້ງຫນ້າ, ອີຣານ ໄດ້ ແລະ ພວມເປີດກວ້າງປະຕູໃຫ້ບັນດານັກລົງທຶນຕ່າງປະເທດ. ພາຍຫລັງຫລາຍປີທີ່ຖືກຕົກຢູ່ໂດດດ່ຽວກ່ຽວກັບດ້ານເສດຖະກິດ ຍ້ອນບັນດາຄຳສັ່ງລົງໂທດ, ອີຣານ ໄດ້ພິສູດໃຫ້ເຫັນການເຊື່ອມໂຍງຄືນໃຫມ່ແລ້ວ ດ້ວຍບັນດາຄວາມສາມາດບົ່ມຊ້ອນອັນໄດ້ດຶງດູດບັນດາຄູ່ຮ່ວມມື ເຊິ່ງເຄີຍສູ້ຢັນກັນດ້ານການເມືອງ.