ກອງປະຊຸມສຸດຍອດຄັ້ງທີ່ 16 ຂະບວນການບໍ່ຮ່ວມກຸ່ມ NAM ໄດ້ຖືກໄຂຂຶ້ນຢ່າງເປັນທາງການຢູ່ ເຕເຮຣານ ປະເທດ ອີຣານ ( ພາບ: internet)
|
ວັນທີ 30/8 ກອງປະຊຸມສຸດຍອດຄັ້ງທີ່ 16 ຂະບວນການບໍ່ຮ່ວມກຸ່ມຫຼື NAM ດ້ວຍຫົວຂໍ້ “ ຮັກສາສັນຕິພາບໂດຍຜ່ານການບໍລິຫານລວມທົ່ວໂລກ ” ໄດ້ຖືກໄຂຂຶ້ນຢ່າງເປັນທາງການຢູ່ ເຕເຮຣານ ປະເທດ ອີຣານ, ຊຶ່ງມີການເຂົ້າຮ່ວມຂອງທ່ານເລຂາທິການໃຫຍ່ ສ.ປ.ຊ Ban ki Moon ພ້ອມກັບຜູ້ຕາງໜ້າຂອງກ່ວາ 100 ປະເທດ ແລະ ເຂດແຄ້ວນ. ກອງປະຊຸມໄດ້ຢືນຢັນບົດບາດ, ສຽງເວົ້າທີ່ສຳຄັນຂອງອົງການນີ້ໃນໂລກປະຈຸບັນ. ໂດຍແມ່ນປະເທດເຈົ້າພາບຈັດ ກອງປະຊຸມ, ພ້ອມທັງຈະຮັບຕຳແໜ່ງເປັນປະທານ NAM ຈາກອີຢິບໃນເວລາ 3 ປີທີ່ຈະມາເຖິງ ( 2012 – 2015 ) . ສຳລັບອີຣານແລ້ວ, ນີ້ແມ່ນໜ້າທີ່ອັນໜັກໜ່ວງ, ແຕ່ກໍແມ່ນກາລະໂອກາດໃນສະພາວະທີ່ວິກິດການນິວເຄຼຍຂອງປະເທດນີ້ພວມຖືກຕົກເຂົ້າສູ່ສະພາບບໍ່ມີທາງອອກ.
ກ່ອນທີ່ດຳເນີນ ກອງປະຊຸມສຸດຍອດນັ້ນ, ກອງປະຊຸມຂັ້ນນັກວິຊາການຂັ້ນສູງຂອງ NAM ແລະ ກອງປະຊຸມຂັ້ນລັດຖະມົນຕີທີ່ຈັດຂຶ້ນໃນວັນທີ 28 ແລະ 29/8 ໄດ້ອັງລົງດ້ວຍບັນດາໝາກຜົນທີ່ສຳຄັນຍື່ນສະເໜີຕໍ່ ກອງປະຊຸມຂັ້ນສູງ. ຕາມນັ້ນແລ້ວ, ບັນດາຜູ້ແທນໄດ້ຢືນຢັນຄວາມຕັດສິນໃຈເດີນຕາມສັນຕິພາບ, ຄວາມຍຸດຕິທຳ ແລະ ເຄົາລົບກົດໝາຍ. ຕາມທ່ານ Mohammad Mahdi Akhounzadeh ຮອງລັດຖະມົນຕີການຕ່າງປະເທດອີຣານ, ຫົວໜ້າຄະນະເລຂາ ກອງປະຊຸມແລ້ວ, ຜູ້ຕາງໜ້າບັນດາປະເທດ ແລະ ເຂດແຄ້ວນໄດ້ບັນລຸຄວາມເປັນເອກະພາບກັນໃນການປະຕິເສດ “ ການຢຶກຄອງ ” ດ້ວຍທຸກໆຮູບການໃນໂລກ, ລົບລ້າງອາວຸດນິວເຄຼຍ ແລະ ຮຽກຮ້ອງໃຫ້ທຸກໆປະເທດໃນໂລກຈົ່ງຕັ້ງໜ້າເຂົ້າຮ່ວມບັ້ນຄັດຄ້ານອາວຸດເຄມີທຸກປະເພດ. ນອກຈາກນັ້ນ, ບັນດາລັດຖະມົນຕີຍັງປຶກສາຫາລືບັນດາຂໍ້ສະເໜີກ່າວປະນາມບັນດາຄຳສັ່ງລົງໂທດພຽງລຳພັງຝ່າຍດຽວໂດຍຝ່າຍຕາເວັນຕົກໄດ້ຈັດວາງຕໍ່ ອີຣານ ແລະ ບາງປະເທດອື່ນ, ພ້ອມກັນນັ້ນກໍຮຽກຮ້ອງ NAM ຈົ່ງມີສຽງເວົ້າທີ່ແຂງແຮງກ່ວາໃນສະພາຄວາມໝັ້ນຄົງ ສ.ປ.ຊ, ຮຽກຮ້ອງໃຫ້ສ້າງຕັ້ງລັດ ປາແລດສະຕິນໂດຍອີງບົນເສັ້ນຊາຍແດນປີ 1967.
ທີ່ ກອງປະຊຸມສຸດຍອດຄັ້ງນີ້, ທ່ານເລຂາທິການໃຫຍ່ ສ.ປ.ຊ Ban ki Moon ໄດ້ຮຽກຮ້ອງ ອີຣານຈົ່ງປະຕິບັດບັນດາການກະທຳທີ່ຮີບດ່ວນຊຶ່ງກ່ຽວຂ້ອງເຖິງໂຄງການນິວເຄຼຍ, ຍົກໃຫ້ເຫັນບັນດາຄວາມວິຕົກກັງວົນຂອງປະຊາຄົມໂລກທີ່ກ່ຽວຂ້ອງເຖິງລັດທິກໍ່ການຮ້າຍ ແລະວິກິດການ ຊີຣີ ແລະ ເນັ້ນໜັກວ່າ ການຮ່ວມມື ແລະ ຄວາມຄືບໜ້າໃນບັນດາບັນຫາດັ່ງກ່າວແມ່ນຄວາມຕ້ອງການໂດຍຈຳເປັນທີ່ມີຕໍ່ສັນຕິພາບ, ສະຖຽນລະພາບຢູ່ ອີຣານກໍຄືໃນພາກພື້ນ.
ເປັນທີ່ຈະແຈ້ງແລ້ວວ່າ, ຈາກກອງປະຊຸມ, ຫາງສຽງຖືວ່າ ອຳນາດການປົກຄອງຂອງປະທານາທິບໍດີ ອີຣານ Mahmoud Ahmadinejad ໄດ້ມີການກະກຽມຢ່າງລະອຽດ. ໂດຍຖືກຈັດຂຶ້ນໃນສະພາບຖືກກຳລັງດັນ, ການປິດລ້ອມຂວຳບາດຂອງອາເມລິກາ ແລະບັນດາປະເທດຝ່່າຍຕາເວັນຕົກຈາກວິກິດການນິວເຄຼຍນັ້ນ, ແຕ່ ອີຣານໄດ້ຮູ້ຈັກນຳໃຊ້ເວທີປາໄສນີ້ເປັນກາລະໂອກາດເພື່ອໃຫ້ ຕົນເອງຍົກສູງທີ່ຕັ້ງບົດບາດທາງດ້ານການທູດ, ຜ່ານນັ້ນ ຈະຍາດແຍ່ງການສະໜັບສະໜູນຂອງບັນດາປະເທດອື່ນໃນທ່າມກາງຄວາມທະເຍີທະຍານ ພັດທະນາພະລັງງານນິວເຄຼຍເພື່ອຈຸດປະສົງສັນຕິພາບ. ບໍ່ແມ່ນເລື່ອງບັງເອີນ ທີ່ກ່ອນດຳເນີນກອງປະຊຸມ, ອຳນາດການປົກຄອງຂອງປະທານາທິບໍດີ ອີຣານ Mahmoud Ahmadinejad ໄດ້ຢືນຢັນຄືນວ່າ ບັນດາມາດຕະການລົງໂທດພຽງຝ່າຍດຽວຂອງຝ່າຍຕາເວັນຕົກປະຈຸບັນ ລ້ວນແຕ່ໄປຝືນກັບກົດບັດ ສ.ປ.ຊ. ອີຣານຍັງສະແດງຄວາມກຽມພ້ອມເຊື້ອເຊີນຜູ້ຕາງໜ້າບັນດາປະເທດສະມາຊິກ NAM ມາຢ້ຽມຢາມເຂດການທະຫານ Parchin ຢູ່ທາງທິດຕາເວັນອອກສ່ຽງໃຕ້ຂອງປະເທດນີ້, ຊຶ່ງເປັນແຫ່ງທີ່ອົງການພະລັງງານປະລະມານູສາກົນ IAEA ລະແວງສົງໄສ ອີຣານພວມປະຕິບັດການທົດລອງນິວເຄຼຍ.
ເລື່ອງ ອີຣານ ຈັດກອງປະຊຸມສາກົນດ້ວຍຂອບຂະໜາດໃຫຍ່ ໄດ້ມຸ່ງໄປສູ່ຫຼາຍເປົ້າໝາຍ. ກ່ອນອື່ນໝົດ ອີຣານໄດ້ຮັບການສະໜັບສະໜູນຢ່າງແຂງແຮງ, ສ້າງສາຍສຳພັນທະມິດທີ່ສຳຄັນກັບຫຼາຍປະເທດ ຂະນະທີ່ ວິກິດການນິວເຄຼຍຂອງປະເທດນີ້ກັບຝ່າຍຕາເວັນຕົກຍັງຄົງຢູ່ໃນທ່າ “ ຢຸດສະງັກ ” . ນັ້ນແມ່ນເລື່ອງ ທ່ານເລຂາທິການໃຫຍ່ ສ.ປ.ຊ Ban ki Moon ໄດ້ປະກົດຕົວຢູ່ປະເທດນີ້. ນອກຈາກນັ້ນ ມີເຫດການປະຫວັດສາດເນື່ອງໃນໂອກາດຈັດ ກອງປະຊຸມນີ້, ແມ່ນເລື່ອງ ກາຍໂຣ - ເຕເຣຣານ ຟື້ນຟູການພົວພັນທາງການທູດພາຍຫຼັງຖືກຕັດຕອນເປັນ 3 ທົດສະວັດ. ເລື່ອງເຊື້ອເຊີນປະທານາທິບໍດີ ອີຢິບມາເຂົ້າຮ່ວມ ກອງປະຊຸມ NAM ກໍເປັນການສະແດງໃຫ້ເຫັນການປ່ຽນແປງໃນນະໂຍບາຍການທູດຂອງ ອີຣານທີ່ມີຕໍ່ ອີຢິບ. ກົງກັນຂ້າມ, ເລື່ອງ ປະທານາທິບໍດີຄົນໃໝ່ຂອງອີຢິບ ທ່ານ Mohmamed Morsi ຮັບຄຳເຊີນເຂົ້າຮ່ວມກອງປະຊຸມ ກໍສະແດງໃຫ້ເຫັນຄວາມສາມາດເກັ້ຍກອມຂອງ ອີຣານໃນການຮ້ຽງຮ້ອງໃຫ້ມີປະເທດພັນທະມິດຕື່ມອີກເພື່ອແກ້ໄຂໄພນາບຂູ່ຕໍ່ຄວາມສະຫງົບຂອງພາກພື້ນ. ທີ່ພິທີໄຂກອງປະຊຸມຂັ້ນລັດຖະມົນຕີ ຂອງ NAM, ທ່ານຮອງລັດຖະມົນຕີການຕ່າງປະເທດອີຢິບ Ramzy Ezz El Din ໄດ້ສະແດງຄວາມເຊື່ອໝັ້ນວ່າ ອີຣານໃນຖານະເປັນປະທານຂະບວນການດັ່ງກ່າວໃນ 3 ປີທີ່ຈະມາເຖິງ, ຈະສາມາດປະຕິບັດບັນດາຈຸດໝາຍຕົ້ນຕໍຊຶ່ງ NAM ໄດ້ວາງອອກຢ່າງສຳເລັດຜົນ, ໃນນັ້ນມີການໃຫ້ບຸລິມາສິດປະຕິຮູບໂຄງປະກອບບັນດາລະບອບທົ່ວໂລກເພື່ອຕອບສະໜອງຜົນປະໂຫຍດຂອງບັນດາປະເທດພາຄີທັງໝົດ. ແຕ່ສິ່ງນີ້ໄດ້ເຮັດໃຫ້ຫຼາຍປະເທດຝ່າຍຕາເວັນຕົກບໍ່ພໍໃຈ. ກ່ອນການຢ້ຽມຢາມຂອງ ທ່ານເລຂາທິການໃຫຍ່ ສ.ປ.ຊ Ban ki Moon, ອາເມລິກາ, ການາດາ ແລະ ອິດສະລາແອນ ໄດ້ຮຽກຮ້ອງໃຫ້ຜູ້ນຳອົງການ ສ.ປ.ຊ ບໍ່ຄວນເຂົ້າຮ່ວມ ກອງປະຊຸມສຸດຍອດ NAM ແລະ ຖືວ່າ ນີ້ຈະແມ່ນຄວາມຜິດພາດຢ່າງໜັກ . ການຫຍັບມໍ່ເຂົ້າກັນ ລະຫວ່າງ ອີຢິບ ແລະ ອີຣານໄດ້ເຮັດໃຫ້ ວໍຊິງຕັນ ແລະ ແທນອາວີບ ຕີລາຄາວ່າ ແມ່ນ “ ສັນຍານຜິດປົກກະຕິ ”
ກອງປະຊຸມສຸດຍອດຖືກດຳເນີນຮອດວັນທີ 31/8 ຈຶ່ງອັດລົງ. ດ້ວຍທຸກສິ່ງທຸກຢ່າງ ທີ່ ໄດ້ກະທຳ , ອີຣານ ໄດ້ຮັບຜົນສຳເລັດໃດໜຶ່ງ. ຫາງສຽງພວມລໍຄອຍວ່າ ໃນຖານະຕຳແໜ່ງໃໝ່ ດ້ວຍບັນດາສິ່ງທ້າທາຍຢ່າງໜັກໜ່ວງໃນສະຖານະການໂລກປະຈຸບັນນັ້ນ, ອີຣານຈະສາມາດຊອກຫາທິດກ້າວເດີນທີ່ເໝາະສົມໃຫ້ແກ່ຕົນເອງໄດ້ຫຼືບໍ່ ? ຊຶ່ງກ່ອນອື່ນໝົດແມ່ນສະພາບບໍ່ມີທາງອອກໃນ ວິກິດການນິວເຄຼຍລະຫວ່າງປະເທດນີ້ ກັບຝ່າຍຕາເວັນຕົກ.