(vovworld) - ວັນທີ 8/8, ທຸງອາຊຽນ ປິວສະບັດຄຽງຂ້າງທຸງຊາດຂອງບັນດາປະເທດສະມາຊິກ ອາຊຽນ ຢູ່ ນະຄອນຫລວງ 10 ປະເທດສະມາຊິກ, ອົງການທູຕານຸທູດຂອງບັນດາປະເທດສະມາຊິກອາຊຽນ ໃນທົ່ວໂລກ, ເພື່ອຂຳ່ນັບຊົມເຊີຍເຫດການສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ຄົບຮອບ 45 ປີ. ການປະກົດຂຶ້ນຂອງສັນຍາລັກດັ່ງກ່າວຂອງ ອາຊຽນ ເປັນການລະດົມກຳລັງໃຈຢ່າງແຂງແຮງໃຫ້ແກ່ຄວາມຕັດສິນໃຈ ແລະ ຄວາມເອກອ້າງທະນົງໃຈກ່ຽວກັບປະຊາຄົມ ອາຊຽນ: ຮ່ວມມື, ເຂັ້ມແຂງ ແລະ ມີ ທີ່ຕັ້ງບົດບາດນັບມື້ນັບສູງໃນເວທີສາກົນ.
ມຸ່ງໄປເຖິງປະຊາຄົມ ອາຊຽນ ໃນປີ 2015
ພາບປະກອບ
|
ຈາກອົງກາານຈັດຕັ້ງການເມືອງຫນຶ່ງຊຶ່ງລວມມີ: 5 ປະເທດສະມາຊິກໃນຊຸມມື້ທຳອິດແຫ່ງການສ້າງຕັ້ງ, ປະຈຸບັນ ອາຊຽນ ໄດ້ກາຍເປັນອົງການເອກະພາບດ້ວຍຫລາຍຮູບຫລາຍແບບ ໂດຍມີການເຂົ້າຮ່ວມຂອງ 10 ປະເທດສະມາຊິກໃນພາກພື້ນ. ການຮ່ວມສຳພັນຢ່າງກວ້າງຂວາງຂອງບັນດາປະເທດທີ່ມີລະດັບການພັດທະນາ ແລະ ລະບອບການເມືອງແຕກຕ່າງກັນເພື່ອພ້ອມກັນສ້າງເປັນກຳລັງແຮງສັງລວມ, ສູ້ຊົນ ເພື່ອຈຸດໝາຍຄວາມຈະເລີນຮຸ່ງເຮືອງ ແລະ ວັດທະນາຖາວອນລວມ ນີ້ແມ່ນຫນຶ່ງໃນບັນດາຜົນງານອັນພົ້ນເດັ່ນທີ່ສຸດຂອງອາຊຽນ ໃນຕະຫລອດໄລຍະທາງ 45 ປີ ແຫ່ງການພັດທະນາ.
ດ້ວຍຄວາມເປັນເອກະພາບຂອງ 10 ປະເທດສະມາຊິກ, ຄວາມແຕກຕ່າງກັນກ່ຽວກັບທັດສະນະຂອງບັນດາປະເທດ ອາຊີຕາເວັນອອກສຽງໃຕ້ ໃນໄລຍະກ່ອນນີ້ໄດ້ຮັບການປ່ຽນແທນດ້ວຍການພົວພັນໃຫມ່: ມິດຕະພາບ, ຄວາມໄວ້ເນື້ອເຊື່ອໃຈ, ຄວາມສາມັກຄີ ແລະ ພ້ອມກັນມຸ່ງໄປເຖິງອະນາຄົດ. ບົນຈິດໃຈບໍ່ແຊກແຊງເຂົ້າວຽກງານພາຍໃນຂອງກັນ ແລະ ບົນຫລັກການອອກຂໍ້ຕົກລົງດ້ວຍຄວາມເຫັນດີເຫັນພ້ອມ, ແຜນນະໂຍບາຍເພີ່ມຜົນປະໂຫຍດພື້ນຖານລວມຂອງ ອາຊຽນ ໄດ້ເຮັດໃຫ້ ອາຊີຕາເວັນອອກສຽງໃຕ້ ໄດ້ຮັບຖືວ່າແມ່ນພາກພື້ນສັນຕິພາບ, ຄວາມເປີດອົກເປີດໃຈ, ໄມຕິຈິດ ແລະ ຂະຫຍັນຂັນເຄື່ອນທີ່ສຸດຢູ່ໃນໂລກໃນຊຸມປີຜ່ານມາ. ໂດຍປະຕິບັດຕາມຈຸດໝາຍແກ້ໄຂຄວາມບໍ່ລົງລອຍກັນຜ່ານການເຈລະຈາ ແລະ ໄກ່ເກຍປອງດອງ, ອາຊີຕາເວັນອອກສຽງໃຕ້ ບໍ່ມີການປະທະກັນດ້ວຍອາວຸດ ແລະ ການໃຊ້ຄວາມຮຸນແຮງຄັ້ງໃຫຍ່, ປະກອບສ່ວນຫລາຍພໍສົມຄວນເຂົ້າໃນສະຖຽນລະພາບຂອງ ອາຊີ - ປາຊີຟີກ ແລະ ຢູ່ໃນໂລກ.
ການນຳ ອາຊຽນ ເພີ່ມທະວີການຮ່ວມມືພາຍໃນກຸ່ມ
ພາບ:baodatviet.vn
|
ບໍ່ພຽງແຕ່ເຊີດຊູການສະຫນິດຕິດພັນພາຍໃນກຸ່ມຜ່ານການໂອ້ລົມສົນທະນາ ລະຫວ່າງການນຳບັນດາປະເທດສະມາຊິກ ອາຊຽນ ແລະ ເອກະສານ ສົນທິສັນຍາ ຫລາຍສະບັບທີ່ໄດ້ຮັບການລົງນາມ, ອາຊຽນ ຍັງເປັນເຈົ້າການ, ມີຫົວຄິດປະດິດສ້າງ ແລະ ຕັ້ງຫນ້າຊຸກຍູ້ການຮ່ວມມືກັບບັນດາກົນໄກພິເສດຄື: ອາຊຽນ + 1, ອາຊຽນ + 3, ARF ( ເວທີປາໄສຄວາມໝັ້ນຄົງ ອາຊີຕາເວັນອອກສຽງໃຕ້), ADMM+ (ກອງປະຊຸມລັດຖະມົນຕີກະຊວງປ້ອງກັນປະເທດ ອາຊຽນ ເປີດກວ້າງ) ແລະ ກອງປະຊຸມຂັ້ນສຸດຍອດ ອາຊຽນ (EAS) … ເພື່ອສ້າງຄວາມໄວ້ເນື້ອເຊື່ອໃຈຮັບມືກັບສິ່ງທ້າທາຍຈາກກໍກາຍຮ້າຍ ແລະ ອາດຊະຍາກຳຂ້າມຊາດ ຢ່າງມີປະສິດທິຜົນ ເພື່ອຈຸດໝາຍຮັກສາສັນຕິພາບ ແລະ ຄວາມໝັ້ນຄົງໃຫ້ແກ່ແຕ່ລະປະເທດ ແລະ ທັງພາກພື້ນ. ທ່ານ Pham Quang Vinh ລັດຖະມົນຕີຊ່ວຍວ່າການກະຊວງການຕ່າງປະເທດ ຫວຽດນາມ ໄດ້ຢືນຢັນວ່າ:
“ສັນຕິພາບຄວາມໝັ້ນຄົງ, ສະຖຽນລະພາບ ແລະ ການຮ່ວມມືພັດທະນາແມ່ນຈຸດໝາຍຕົ້ນຕໍຂອງ ອາຊຽນ. ອາຊຽນ ເປັນເຈົ້າການໃນການສ້າງ ແລະ ແບ່ງປັນບັນດາມາດຕະຖານການປະພຶດໃນພາກພື້ນ, ເພື່ອຕາມນັ້ນ ບໍ່ພຽງແຕ່ສະເພາະ ອາຊຽນ ເທົ່ານັ້ນ ຫາກບັນດາປະເທດເຂົ້າຮ່ວມການຮ່ວມມືກັບ ອາຊຽນ ກໍຕ້ອງປະຕິບັດຕາມບັນດາມາດຕະຖານນັ້ນ. ໃນນັ້ນ ຕ້ອງເວົ້າເຖິງສົນທິສັນຍາໄມຕິຈິດ ແລະ ການຮ່ວມມື, ຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ, ພາກພື້ນບໍ່ແຜ່ຂະຫຍາຍອາວຸດນິວເຄຼຍ. ອາຊຽນ ກໍເສີມຂະຫຍາຍບົດບາດເປັນເຈົ້າການໃນການສ້າງບັນດາເວທີປາໄສຫລາຍຝ່າຍກ່ຽວກັບການໂອ້ລົມສົນທະນາດ້ານການເມືອງ, ຄວາມໝັ້ນຄົງ ກໍຄືສ້າງຄວາມໄວ້ເນື້ອເຊື່ອໃຈ, ແຜນນະໂຍບາຍແກ້ໄຂບັນຫາພິພາດ, ຄວາມແຕກຕ່າງກັນລະຫວ່າງບັນດາຝ່າຍໂດຍສັນຕິວິທີບົນພື້ນຖານກົດໝາຍສາກົນ.”
ພ້ອມກັບຂໍ້ກຳນົດແນະນຳການປະຕິບັດຖະແຫລງການຂອງບັນດາຝ່າຍກ່ຽວຂ້ອງກ່ຽວກັບການປະພຶດຢູ່ທະເລຕາເວັນອອກ (DOC), ຫວ່າງແລ້ວນີ້ ເລື່ອງອາຊຽນ ໄດ້ເປັນເອກະພາບຮັບຮອງເອົາຫລັກການ 6 ຂໍ້ ກ່ຽວກັບທະເລຕາເວັນອອກໄດ້ຮັບຖືວ່າແມ່ນຈຸດເລີ່ມຕົ້ນທີ່ດີງາມ, ຫລຸດຜ່ອນຄວາມເຄັ່ງຕືງລະຫວ່າງບັນດາຝ່າຍທີ່ກ່ຽວຂ້ອງເຖິງເສັ້ນທາງເດີນທະເລສາກົນຈຸດສຸມຢູ່ພາກພື້ນ ແລະ ໃນໂລກ. ເຖິງວ່າ ຍັງມີຫລາຍວຽກຈະຕ້ອງປະຕິບັດ ແຕ່ດ້ວຍຄວາມເປັນເອກະພາບ ແລະ ບັນດານະໂຍບາຍຄ່ອງແຄ້ວ ແຕ່ຂ້ຽວຂາດ, ປະຊາຊົນ ອາຊີຕາເວັນອອກສຽງໃຕ້ ມີຄວາມເຊື່ອໝັ້ນວ່າ ບາດກ້າວສຳຄັນທີ່ຫາກໍ່ບັນລຸໄດ້ຈະພາໄປເຖິງເລື່ອງລົງນາມໃນຂໍ້ກຳນົດການປະພຶດຢູ່ທະເລຕາເວັນອອກ (COC) ເພື່ອນຳມາເຊິ່ງສັນຕິພາບ, ອະທິປະໄຕ ແລະ ຄວາມໝັ້ນຄົງທາງທະເລຢູ່ທະເລຕາເວັນອອກ ບົນພື້ນຖານກົດໝາຍສາກົນ.
ຄວາມສະຫນິດຕິດພັນນັບມື້ນັບແຫນ້ນແຟ້ນ ກໍສະແດງໃຫ້ເຫັນຢ່າງຈະແຈ້ງໃນການຮ່ວມມືດ້ານເສດຖະກິດ ອາຊຽນ ຜ່ານຄວາມມານະພະຍາຍາມຮັດແຄບຊ່ອງຫວ່າງການພັດທະນາລະຫວ່າງບັນດາປະເທດ ເພື່ອມຸ່ງໄປເຖິງປະຊາຄົມເສດຖະກິດລວມວັດທະນາຖາວອນ ແລະ ເຂັ້ມແຂງ. ມີປັດໄຈຫນຶ່ງອີກທີ່ປະກອບສ່ວນສ້າງເປັນຜົນສຳເລັດຂອງອາຊຽນ ນັ້ນແມ່ນຄວາມສະຫນິດຕິດພັນ, ຄວາມເຫັນດີເຫັນພ້ອມ ແລະ ຈິດໃຈການຮ່ວມມື. ທ່ານ Le Cong Phung ປະທານສະມາຄົມມິດຕະພາບ ຫວຽດນາມ - ອາຊຽນ ຖືວ່າ:
“ຄວາມສະຫນິດຕິດພັນລະຫວ່າງ ອາຊຽນ ບໍ່ພຽງແຕ່ທາງດ້ານເສດຖະກິດ, ການເມືອງ ເທົ່ານັ້ນ ຫາກ ຄວາມເຫັນດີເຫັນພ້ອມ, ການປະສົມກົມກຽວດ້ານວັດທະນະທຳ, ແບບແຜນການດຳລົງຊີວິດ, ການປະພຶດໃນມະຫາຄອບຄົວ ອາຊຽນ ນຳກັນອີກດ້ວຍ. ເຮັດແນວໃດເພື່ອເພີ່ມທະວີຄວາມເຂົ້າອົກເຂົ້າໃຈລະຫວ່າງປະຊາຊົນບັນດາປະເທດ ອາຊຽນ, ເຮັດແນວໃດເພື່ອໃຫ້ມີຄວາມເຫັນດີເຫັນພ້ອມໃນການສ້າງປະຊາຄົມ ອາຊຽນ ໃນທຸກຂົງເຂດ: ການເມືອງ, ເສດຖະກິດ, ວັດທະນະທຳ ແລະ ຊີວິດປະຈຳວັນຂອງປະຊາຊົນ, ເພື່ອຮ່ວມແຮງຮ່ວມໃຈເຮັດໃຫ້ ອາຊຽນ ກາຍເປັນອົງການທີ່ເຂັ້ມແຂງ, ມີ ທີ່ຕັ້ງບົດບາດນັບມື້ນັບສຳຄັນຢູ່ພາກພື້ນກໍຄືໃນເວທີສາກົນ.”
ພາຍຫລັງ 45 ປີ ແຫ່ງການສ້າງຕັ້ງ, ອາຊຽນ ພວມກາຍເປັນອົງການຮ່ວມມືສຳເລັດຜົນຂອງບັນດາປະເທດພວມພັດທະນາຕາມຮູບແບບສະເໝີພາບລະຫວ່າງບັນດາປະຊາຊາດ. ໂດຍເສີມຂະຫຍາຍທ່າໄດ້ປຽບດ້ານພູມີປະເທດ - ການເມືອງ ແລະ ການປະພຶດໃນບັນດາສາຍພົວພັນພາຍໃນກຸ່ມກໍຄືບັນດາປະເທດໃນທົ່ວໂລກ, ອາຊຽນ ໄດ້ ແລະ ພວມກາຍເປັນອົງການທີ່ສຳຄັນ, ແມ່ນຄູ່ເຈລະຈາດ້ານການເມືອງ, ຄວາມໝັ້ນຄົງ, ເສດຖະກິດສຳຄັນຢູ່ແລວເສດຖະກິດ ອາຊີ ປາຊີຟີກ ແລະ ນັບມື້ນັບສະແດງໃຫ້ເຫັນ ທີ່ຕັ້ງບົດບາດສຳຄັນໃນເວທີການເມືອງຂອງໂລກ.