(vovworld)- ວັມທີ 8/8, ສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ມີອາຍຸ 46 ປີເຕັມ. ນີ້ແມ່ນເຫດການທີ່ມີຄວາມໝາຍພິເສດສຳລັບ 10 ປະເທດພາຄິ, ໃນນັ້ນມີຫວຽດນາມ. ໃນ 46 ປີຜ່ານມາ, ອາຊຽນ ໄດ້ ແລະ ພວມມີບັນດາບາດກ້າວພັດທະນາຢ່າງແຮງໃນວິວັດການສ້າງເປັນປະຊາຄົມໜຶ່ງດຽວ ເພື່ອແນໃສ່ຢັ້ງຢືນແມ່ນໜຶ່ງໃນບັນດາອົງການຈັດຕັ້ງສາກົນຂອງພາກພື້ນທີ່ປະສົບຜົນສຳເລັດ, ປະກອບ ສ່ວນຮັບປະກັນສະພາບແວດລ້ອມແຫ່ງສັນຕິພາບ, ຄວາມສະຫງົບປອດໄພສ້າງຄວາມສະດວກໃຫ້ແກ່ການພັດທະນາຢູ່ໃນພາກພື້ນອາຊີ-ປາຊີຝິກ ແລະ ເປີດກ້ວາງຜົນສະທ້ອນໃນຂອບເຂດທົ່ວໂລກ.
ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ 46
(ພາບ:baoninhbinh.org.vn)
ອາຊຽນ ໄດ້ຮັບການສ້າງຕັ້ງຂຶ້ນເມື່ອວັນທີ 8/8/1967 ຢູ່ບາງກອກ ປະເທດໄທ, ຈາກອົງການທີ່ມີພຽງ 5 ປະເທດສະມາຊິກກໍ່ຕັ້ງໃນພາກພື້ນທີ່ເຄີຍເກີດສົງຄາມ, ການປະທະກັນອັນດຸເດືອດ ແລະ ທຸກຍາກ, ຫຼ້າຫຼັງນັ້ນ, ປະຈຸບັນໄດ້ເຕົ້າໂຮມທັງ 10 ປະເທດອາຊີຕາເວັນອອກສ່ຽງໃຕ້, ແລະ ມີການປ່ຽນແປງອັນເປັນພື້ນຖານກ່ຽວກັບທາດແທ້ຂອງສະຫະສະມາຄົມ ກໍ່ຄືສະພາບການຂອງພາກພື້ນ. ອາຊຽນ-10 ໄດ້ສ້າງໃຫ້ມີກຳລັງແຮງ, ຄວາມເຫັນດີເຫັນພ້ອມເພື່ອສ້າງການພົວພັນໃໝ່ບົນພື້ນຖານມິດຕະພາບ, ຄວາມເຂົ້າອົກເຂົ້າໃຈ ແລະ ໄວ້ເນື້ອເຊື່ອໃຈຊື່ງກັນ ແລະ ກັນ, ຊ່ວຍໃຫ້ອົງການນີ້ມີບັນດາບາດກ້າວບຸກທະລຸດ້ານເສດຖະກິດ ແລະ ການເມືອງ.
ຜົນງານໃຫ່ຍທີ່ສຸດຂອງອາຊຽນ ໃນ 46 ປີຜ່ານມາ ແມ່ນໄດ້ຮັບຮອງເອົາກົດບັດອາຊຽນ, ເປັນພື້ນຖານເພື່ອໃຫ້ອາຊຽນ ປະຕິບັດຄຳໝັ້ນສັນຍາສ້າງຕັ້ງປະຊາຄົມອາຊຽນ ອີງບົນ 3 ເສົາຄ້ຳຕົ້ນຕໍຄື: ຄວາມໝັ້ນຄົງ, ການເມືອງ, ເສດຖະກິດ ແລະ ວັດທະນະທຳໃນປີ 2015. ທ່ານເລເລືອງມິງ, ເລຂາທິການໃຫ່ຍອາຊຽນ ຢືນຢັນວ່າ:
“ຍັງມີເວລາບໍ່ຮອດ 2 ປີເທົ່ານັ້ນທີ່ອາຊຽນ ຕ້ອງປະຕິບັດຈຸດໝາຍສ້າງປະຊາຄົມອາຊຽນ ໃນປີ 2015 ໃຫ້ສຳເລັດ. ສະນັ້ນ, ອາຊຽນ ຕັດສິນໃຈເພີ່ມທະວີກຳລັງພາຍໃນ, ພະຍາຍາມສ້າງຕັ້ງປະຊາຄົມໃນປີ 2015 ອີງບົນ 3 ເສົາຄ້ຳ. ບັນດາມາດຕະການຈະຖືກຜັນຂະຫຍາຍຢ່າງຄົບຊຸດ. ປະຈຸບັນ,, ອາຊຽນ ໄດ້ກະກຽມວຽກງານສ້າງທິດທາງໃນໄລຍະຫຼັງປີ 2015, ສ້າງບັນດາກົນໄກຜັນຂະຫຍາຍ ເພື່ອຮັບປະກັນໃຫ້ອາຊຽນ ສືບຕໍ່ພັດທະນາ, ເຊື່ອມຕົວຢ່າງເລິກເຊິ່ງກ່ວາ, ຮອບດ້ານກ່ວາ”
ທະເລຕາເວັນອອກແມ່ນຄວາມສົນໃຈລວມຂອງພາກພື້ນ
(ພາບ:m.vietnamnet.vn)
ອາຊຽນ ສາມາດບັນລຸຈຸດໝາຍຂອງຕົນຖືກຕ້ອງຕາມການກຳນົດເວລາໄດ້ວາງອອກ ບົນພື້ນຖານທີ່ມີຢູ່ແລ້ວ. ທີ່ກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 46 ຈັດຂຶ້ນຢູ່ບຣູໄນ ມີສານທີ່ວ່າ ອາຊຽນແມ່ນອົງການໜຶ່ງດຽວ ໄດ້ຍົກອອກມາ ຊື່ງແມ່ນສານກະທັດລັດ ແລະ ບໍ່ເຄີຍມີມາໃນປະຫວັດສາດແຫ່ງການຈັດກອງປະຊຸມປະຈຳປີລັດຖະມົນຕີການຕ່າງປະເທດອາຊຽນ 46 ຄັ້ງ ແລະ ຖະແຫຼງການຮ່ວມກໍ່ໄດ້ຮັບການຮອບຮອງເອົາຈາກບັນດາທ່ານລັດຖະມົນຕີການຕ່າງປະເທດໂດຍໄວທີ່ກອງປະຊຸມຄັ້ງນີ້. ໃນນັ້ນ, ອາຊຽນ ບັນລຸໄດ້ຄວາມເຫັນດີເຫັນພ້ອມກ່ຽວກັບບັນດາບັນຫາຮ່ວມມື ແລະ ພັດທະນາຂອງພາກພື້ນ. ພິເສດ, ບັນຫາທີ່ຖືກຖືວ່າສຳຄັນທີ່ສຸດໃນອາຊຽນ ແມ່ນບັນລຸໄດ້ທັດສະນະລວມກ່ຽວກັບການແກ້ໄຂບັນດາການພິພາດກັນບົນທະເລຕາເວັນອອກ. ເມື່ອແບ່ງປັນກັບນັກຂ່າວຢູ່ນອກກອງປະຊຸມນີ້ຢູ່ບຣູໄນ, ທ່ານຟ້າມບິງມິງ, ລັດຖະມົນຕີການຕ່າງປະເທດຫວຽດນາມ ຢືນຢັນວ່າ:
“ບັນຫາທະເລຕາເວັນອອກແມ່ນຄວາມສົນໃຈລວມຂອງບັນດາປະເທດໃນພາກພື້ນ. ນີ້ແມ່ນສິ່ງໄດ້ຮັບຄວາມເປັນເອກະພາບສູງໃນອາຊຽນ ແລະ ອາຊຽນ ຖືເປັນສຳຄັນວຽກງານຕ້ອງແກ້ໄຂບັນດາບັນຫາທະເລຕາເວັນອອກໂດຍສັນຕິວິທີ, ລະງັບໃຈບໍ່ນຳໃຊ້ກຳລັງອາວຸດ, ນາບຂູ່ການນຳໃຊ້ກຳລັງອາວຸດ ແລະ ປະຕິບັດຖືກຕ້ອງບັນດາຂໍ້ມາດຕາຂອງກົດໝາຍສາກົນ, ໃນນັ້ນ, ມີສົນທິສັນຍາກ່ຽວກັບກົດໝາຍທະເລຂອງ ສປຊ ປີ 1982, ຖະແຫຼງການ DOC ລະຫວ່າງອາຊຽນ ແລະ ຈີນ“.
ນ້ຳໃຈສາມັກຄີ, ຄວາມເຫັນດີເຫັນພ້ອມຂອງອາຊຽນ, ພິເສດແມ່ນໃນການແກ້ໄຂບັນດາບັນຫາສະດຸ້ງໄວ້ໄດ້ມີການຫັນປ່ຽນຢ່າງຈະແຈ້ງ. ຄວາມເຫັນດີເຫັນພ້ອມຂອງອາຊຽນ ໃນຫຼາຍບັນຫາບຸລິມະສິດ ໄດ້ສ້າງພະລັງແຮງໃໝ່ ໃນທຸກປະເທດສະມາຊິກອາຊຽນ ບົນເສັ້ນທາງມຸ້ງໄປເຖິງຈຸດໝາຍສ້າງປະຊາຄົມອາຊຽນ. ທ່ານ Marty Natelegawa ລັດຖະມົນຕີການຕ່າງປະເທດ ອິນໂດເນເຊຍ ເນັ້ນໜັກວ່າ:
“ແຕ່ປີກາຍມາຮອດປີນີ້ ໄດ້ມີການຫັນປ່ຽນໃນອາຊຽນ ໃນການແກ້ໄຂບັນຫາທະເລຕາເວັນອອກ. ຂ້າພະເຈົ້າຖືວ່າ, ພວກເຮົາບັນລຸໄດ້ຄວາມເຫັນດີເປັນເອກະສັນສູງກ່ຽວກັບບັນດາຈຸດໝາຍພື້ນຖານຂອງຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ. ນີ້ແມ່ນເອກະສານສ້າງຂອບເຂດນິຕິກຳສຳຄັນ ອີງຕາມຂໍ້ກຳນົດກົດໝາຍ ເພື່ອດັດສົມການກະທຳຂອງຝ່າຍຕ່າງໆຢູ່ທະເລຕາເວັນອອກ“
ໃນໄລຍະຕໍ່ໄປ, ອາຊຽນ ຈະຕ້ອງປະເຊີນໜ້າກັບສິ່ງທ້າທາຍຫຼາຍຢ່າງ. ແຕ່ການຮັບມືກັບສິ່ງທ້າທາຍກໍ່ແມ່ນໂອກາດເພື່ອໃຫ້ອາຊຽນ ສ້າງອົງການຂອງຕົນເປັນສົມບູນແບບ. ອາຊຽນ ພວມມານະພະຍາຍາມ ຖືຜົນປະໂຫຍດລວມຂອງກຸ່ມ ນອກເໜືອກ່ວາຜົນປະໂຫຍດຂອງແຕ່ລະປະເທດ. ດ້ວຍພື້ນຖານບັນດາໝາກຜົນອັນດີງາມໃນ 46 ປີຜ່ານມາ, ແນ່ນອນວ່າ, ອາຊຽນ ຈະສືບຕໍ່ພັດທະນາ, ນຳມາເລິ່ງຊີວິດແຫ່ງສັນຕິພາບ, ຄວາມ ອີ່ມໜຳສຳລານ ແລະ ຈະເລີນຮຸ່ງເຮືອງໃຫ້ແກ່ ປຊຊ ທຸກຄົນໃນພາກພື້ນ./.