(vovworld) - ທ້າຍອາທິດຜ່ານມາ, ອີກເທື່ອໜຶ່ງ, ທ່ານປະທານາທິບໍດີ ອາບການິດສະຖານ Hamid Karzai ໄດ້ຖະແຫຼງວ່າ ກຳລັງປ້ອງກັນຄວາມສະຫງົບປະເທດ ອາຊີ ໃຕ້ນີ້ ອາດສາມາດຮັບປະກັນຄວາມສະຫງົບ ເຊິ່ງບໍ່ຕ້ອງໄດ້ຮັບການຊ່ວຍເຫຼືອຂອງກຳລັງສາກົນ. ຖະແຫຼງການດັ່ງກ່າວໄດ້ລົບລ້າງຄວາມຫວັງຂອງວົງການເຈົ້າໜ້າທີ່ ອາເມລິກາ ກ່ຽວກັບເລື່ອງ ປະທານາທິບໍດີ ຜູ້ໃກ້ຈະສິ້ນສຸດອາຍຸການ ອາບການິດສະຖານ ຈະເຊັນສັນຍາປ້ອງກັນຄວາມສະຫງົບ 2 ຝ່າຍກັບ ອາເມລິກາ. ວົງການຜູ້ສັງເກດການຖືວ່າ: ເລື່ອງໂຈະການເຊັນສັນຍາປ້ອງກັນຄວາມສະຫງົບ 2 ຝ່າຍ (BSA) ຂອງປະທານາທິບໍດີ ອາບການິດສະຖານ ໄດ້ເຮັດໃຫ້ ອາການິດສະຖານ ປະສົບກັບການທ້າທາຍໃໝ່ຫຼາຍຢ່າງໃນໄລຍະຈະມາເຖິງ..
ປະທານາທິບໍດີ Hamid Karzai
(ພາບ: ອິນເຕີແນດ)
ໃນບົດກ່າວປາໄສສຸດທ້າຍຕໍ່ໜ້າສະພາແຫ່ງຊາດເມື່ອວັນທີ 15/3, ທ່ານປະທານາທິບໍດີ Karzai ຊີ້ແຈ້ງວ່າ: ບັນດາພົນທະຫານ ອາເມລິກາ ອາດສາມາດເດີນທາງອອກຈາກປະເທດນີ້ໃນທ້າຍປີນີ້ ຍ້ອນ ປະຈຸບັນທະຫານຂອງທ່ານສາມາດປົກປັກຮັກສາຜືນແຜ່ນດິນຂອງຕົນໄດ້ 93%, ແລະພ້ອມແລ້ວທີ່ຈະຮັບໜ້າທີ່ປ້ອງກັນຄວາມສະຫງົບຢ່າງສົມບູນ. ທ່ານຢືນຢັນຫຼັກໝັ້ນຂອງຕົນຄືນໃໝ່ວ່າ ຈະບໍ່ເຊັນສັນຍາປ້ອງກັນຄວາມສະຫງົບ 2 ຝ່າຍ (BSA) ກັບ ອາເມລິກາ ເຊິ່ງຕາມນັ້ນ ຈະອະນຸຍາດໃຫ້ທະຫານ ອາເມລິກາ ຈຳນວນໜຶ່ງ ຢູ່ ອາບການິດສະຖານ ພາຍຫຼັງການຖອກທະຫານຄັ້ງສຸດທ້າຍ, ເວັ້ນເສຍແຕ່ສັນຕິພາບໄດ້ຮັບການສ້າງຕັ້ງໃນທັນທີ. ການນຳຜູ້ນີ້ຢັ້ງຢືນວ່າ: ກຳລັງປ້ອງກັນຄວາມສະຫງົບ ອາບການິສະຖານ ມີຄວາມສາມາດຢ່າງພຽງພໍ ເພື່ອປົກປັກຮັກສາປະເທດຊາດ ຫາກບໍ່ຕ້ອງໄດ້ຮັບການຊ່ວຍເຫຼືອຈາກກຳລັງສາກົນອີກ.
ກ່ອນໜ້ານັ້ນ, ກາບູນ ແລະ ວໍຊິງຕັນ ໄດ້ເສຍເວລາຫຼາຍເດືອນ ເພື່ອເຈລະຈາກ່ຽວກັບ BSA, ດ້ວຍຈຸດໝາຍອະນຸຍາດໃຫ້ຮັກສາພົນທະຫານອາເມລິກາ ປະມານ 10.000 – 12.000 ຄົນຢູ່ອາບການິສະຖານ ເຖິງຫຼັງປີ 2014. ໃນສັນຍາສະບັບນີ້, ທຳນຽບ 5 ແຈຍັງປາຖະໜາວ່າ, ພາຍຫຼັງປີ 2014, ທະຫານອາເມລິກາ ຍັງຄົງຮັກສາສິດຄຸ້ມຄອງ ແລະ ນຳໃຊ້ຖານທີ່ໝັ້ນກອງທັບອາກາດ Bagram ຢູ່ທິດເໜືອ ກາບູນ ແລະ ມີສິດຮ່ວມນຳໃຊ້ຖານທີ່ໝັ້ນອື່ນ 8 ແຫ່ງໃນທົ່ວປະເທດ ອາບການິສະຖານ.
ຮັບປະກັນສິດຜົນປະໂຫຍດແຫ່ງຊາດ
ປະທານາທິບໍດີ Hamid Karzai ໃຫ້ຮູ້ວ່າ, ທ່ານໄດ້ປະຕິເສດລົງນາມໃນ BSA ກັບອາເມລິກາ, ເພາະວ່າ BSA ໄດ້ສະຫງວນສິດພິເສດຈຳນວນໜຶ່ງໃຫ້ທະຫານອາເມລິກາ ຄືສິດໄດ້ດຳເນີນການບຸກໂຈມຕີບັນດາເປົ້າໝາຍກໍ່ການຮ້າຍ ແລະ ກວດຄົ້ນບັນດາໂບດ, ເຮືອນຊານຂອງປະຊາຊົນຢ່າງເສລີ. ນອກນັ້ນ, ຕາມວົງການນັກສັງເກດການແລ້ວ, ທ່ານ Karzai ບໍ່ລົງນາມໃນເອກະສານດັ່ງກ່າວຍ້ອນ ເສຍຫວັງຕໍ່ການພົວພັນກັບອາເມລິກາໃນ 2 ອາຍຸການຜ່ານມາ. ປະທານາທິບໍດີ Hamid Karzai ໄດ້ຕຳໜິຕິຕຽນອາເມລິກາ ແລະ NATO, ເມື່ອຖືວ່າບັນດາການເຄື່ອນໄຫວດ້ານການທະຫານຂອງອາເມລິກາ ແລະ NATO ໄດ້ເຮັດໃຫ້ອາບການິສະຖານ ຕົກຢູ່ໃນສະພາບຂາດສະຖຽນລະພາບ ແລະ ບໍ່ຮັບປະກັນຄວາມສະຫງົບປອດໄພໃຫ້ແກ່ປະເທດນີ້. ໂດຍແມ່ນຖານທີ່ໝັ້ນເພື່ອໃຫ້ອາເມລິກາ ແລະ ພັນທະມິດດຳເນີນການເຄື່ອນໄຫວຕ້ານກໍ່ການຮ້າຍໃນທົ່ວພາກພື້ນອາຊີກາງ ແລະ ໃຕ້, ດັ່ງນັ້ນໄລຍະຜ່ານມາ, ອາບການິສະຖານ ໄດ້ກາຍເປັນເປົ້າໝາຍຂອງການບຸກໂຈມຕີໂຕ້ຕອບຂອງບັນດາກຳລັງ ຕາລີບານ ແລະ ອານເກດາ. ປະເທດນີ້ ໄດ້ຮຽກຮ້ອງອາເມລິກາ ປົກປ້ອງປະຊາຊົນຕໍ່ໜ້າການບຸກໂຈມຕີຂອງຕາລີບານ ແຕ່ພັດຖືກອາເມລິກາປະຕິເສດ.
ຄວາມກົດດັນທາງດ້ານເສດຖະກິດ ແລະ ຄວາມປອດໄພ
ພາຍຫຼັງສົງຄາມເປັນເວລາ 12 ປີ, ເຖິງວ່າ ປະທານາທິບໍດີ Hamid Karzai ຢືນຢັນວ່າ. ປະຈຸບັນ, ກອງທັບຂອງທ່ານພວມປົກປັກຮັກສາຜືນແຜ່ນດິນ 93% ແລ້ວກໍ່ຕາມ, ແຕ່ສິ່ງດັ່ງກ່າວບໍ່ໝາຍຄວາມວ່າ ກຳລັງປ້ອງກັນຄວາມສະຫງົບຂອງປະເທດນີ້ໄດ້ຮັບການປັບປຸງ. ຫາງສຽງຍັງຄົງສົງໃສຕໍ່ຄວາມສາມາດຮັບປະກັນຄວາມປອດໄພຂອງອາບການິສະຖານ, ເຖິງວ່າອາເມລິກາ ຕ້ອງເສຍເວລາຫຼາຍປີເພື່ອບຳລຸງສ້າງກຳລັງປ້ອງກັນຄວາມສະຫງົບຂອງປະເທດນີ້. ຍ້ອນເຫດນັ້ນ, ນັບແຕ່ທ້າຍປີ 2013, ປະທານາທິບໍດີ Hamid Karzai ໄດ້ໄປຢ້ຽມຢາມອິນເດຍ ດ້ວຍຄວາມປາຖະໜາຢາກໄດ້ຮັບການຊ່ວຍເຫຼືອດ້ານການທະຫານຈາກອຳນາດການປົກຄອງນິວເດລີ. ທ່ານ Karzai ກໍ່ເຫັນດີລົງນາມໃນສົນທິສັນຍາຮ່ວມມື ແລະ ການພົວພັນມິດຕະພາບ ໄລຍະຍາວກັບອີຣານ ໃນຫຼາຍຂົງເຂດຮ່ວມມືຄື: ການເມືອງ, ການປ້ອງກັນຄວາມສະຫງົບ, ເສດຖະກິດ ແລະ ຮັກສາສະຖຽນລະພາບໃນພາກພື້ນ.
ນອກຈາກຜົນປະໂຫຍດທາງດ້ານການເມືອງແລ້ວ, ຂໍ້ຕົກລົງປະຕິເສດເຊັນ BSA ຂອງທ່ານປະທານາທິບໍດີ Karzai ກໍ່ສົ່ງຜົນສະທ້ອນບໍ່ໜ້ອຍ ເຖິງການຊ່ວຍເຫຼືອຫຼ້າທີ່ອາເມລິກາ ສະຫງວນໃຫ້ແກ່ ອາບການິດສະຖານ. ນັກສ້າງກົດໝາຍ Haji Mirdad Khan Nijrabi ເຄີຍໃຫ້ຮູ້ວ່າ: ອາເມລິກາ ໄດ້ສະເໜີອຸປະຖຳໃຫ້ແກ່ ອາບການິດສະຖານ ຈຳນວນເງິນ 4,1 ຕື້ USD ເພື່ອສ້າງບັນດາກຳລັງປ້ອງກັນຄວາມສະຫງົບ ແລະ 4 ຕື້ USD ໃຫ້ບັນດາຮາກຖານພົນລະເຮືອນ. ດັ່ງນັ້ນ, ເມື່ອ ອາບການິດສະຖານ ປະຕິເສດເຊັນ BSA ນັ້ນໝາຍຄວາມວ່າ ອາດຈະບໍ່ໄດ້ຮັບອຸປະຖຳ. ສິ່ງດັ່ງກ່າວໄດ້ກໍ່ຄວາມຫຍຸ້ງຍາກຢ່າງໃຫຍ່ຫຼວງໃນສະພາບເສດຖະກິດຂອງ ອາບການິດສະຖານບໍ່ມີຄວາມປະເອີບໃຈ. ຍິ່ງກ່ວານັ້ນ, ເລື່ອງໂຈະການເຊັນສັນຍາຍັງສົ່ງຜົນສະທ້ອນເຖິງຈິດຕະຂອງບັນດານັກລົງທຶນ ເມື່ອເຂົາເຈົ້າວິຕົກວັງວົນວ່າສະພາບຄວາມສະຫງົບຢູ່ ອາບການິດສະຖານ ອາດຈະສົ່ງຜົນສະທ້ອນເຖິງເຂົາເຈົ້າ ຖ້າຫາກບໍ່ມີການໜູນຊ່ວຍຂອງກຳລັງສາກົນ.
ບໍ່ເຊັນ BSA ກັບ ອາເມລິກາ ໝາຍຄວາມວ່າ ປະທານາທິບໍດີ Hamid Kazai ຈະມອບໜ້າທີ່ຮັບຜິດຊອບໃຫ້ຜູ້ສືບຕຳແໜ່ງພາຍຫຼັງການເລືອກຕັ້ງປະທານາທິບໍດີ ໃນວັນທີ 5/4. ວົງການຜູ້ສັງເກດການສາກົນກໍ່ຖືວ່າ: ອາເມລິກາ ບໍ່ພຽງແຕ່ຢາກຮັກສາຈຳນວນທະຫານຢູ່ ອາບການິດສະຖານ ເທົ່ານັ້ນ, ຫາກຍັງ ຢາກໃຫ້ທະຫານອາເມລິກາມີໜ້າ ແລະ ມີຜົນສະທ້ອນຢູ່ພາກພື້ນຍຸດທະສາດ ອາຊີ ໃຕ້ທີ່ສຳຄັນນີ້ອີກດ້ວຍ./.