(vovworld) - ຮອບເຈລະຈາໂດຍສາກົນເປັນຄົນກາງໄກ່ເກ່ຍລະຫວ່າງ ຊີຣີ ແລະ ຝ່າຍຄ້ານຄາດຄະເນວ່າຈະດຳເນີນໃນວັນທີ 25/1, ຢູ່ ເຊີແນວ, ປະເທດ ສະວິດ, ແຕ່ພັດຖືກໂຈະໄວ້ເຖິງວັນທີ 29/1 ຍ້ອນວ່າຝ່າຍຕ່າງໆບໍ່ທັນເຫັນດີເປັນເອກະພາບຕໍ່ບາງບັນຫາ. ເຖິງຢ່າງໃດກໍ່ຕາມ,ກ່ອນການເຈລະຈາ, ຄວາມບໍ່ລົງລອຍກັນລະຫວ່າງບັນດາຝ່າຍທີ່ກ່ຽວຂ້ອງເກືອບຄືວ່າໄດ້ຫຼຸດລົງສ່ວນໃດສ່ວນໜຶ່ງ ແລະ ສິ່ງດັ່ງກ່າວໄດ້ສ້າງຄວາມຫວັງວ່າເສິກກາງເມືອງທີ່ແກ່ຍາວມາເປັນເວລາເກືອບ 5 ປີຜ່ານມາຢູ່ ຊີຣີຈະຖືກຢຸດຕິລົງ.
ກ່ອນທີ່ຈັດຕັ້ງການເຈລະຈາສັນຕິພາບ, ທະຫານລັດຖະບານ ຊີຣີຍາດທ່າໄດ້ປຽບຢ່າງຫຼວງຫຼາຍ ໃນສະພາບທີ່ການເຈລະຈາຊອກຫາສັນຕິພາບໃຫ້ແກ່ ຊີຣີ ໂດຍສະຫະປະຊາຊາດອຸປະຖຳ ໃກ້ຈະດຳເນີນຢູ່ ເຊີແນວ, ປະເທດ ສະວິດນັ້ນ, ກອງທັບລັດຖະບານ ຊີຣີ ພ້ອມກັບທະຫານລາດທ້ອງຖີ່ນ ຍາດໄດ້ສິດຄວບຄຸມເທດສະບານ ຣາບີອາ ພາຍຫຼັງການສູ້ຮົບຢ່າງດຸເດືອດກັບພວກລຸກຮື້ຂຶ້ນ. ນີ້ແມ່ນໄຊຊະນະທີ່ມີຄວາມໝາຍຍຸດທະສາດຂອງກຳລັງສະໜັບສະໜູນປະທານາທິບໍດີ Basharal – Assad ໃນເວລາບໍ່ທັນຮອດ 2 ສັບປະດາ, ພາຍຫຼັງຢຶດຄອງເທດສະບານ ຊານມາ ຈາກກຳລັງທະຫານແຕກທັບເມື່ອວັນທີ 12/1. ຕາມວົງການນັກໄຈ້ແຍກ ຣາບີອາ ທີ່ນອນຢູ່ທາງ 4 ແຍກສອງສາຍ ທາງຂົນສົ່ງຕົ້ນຕໍໃນພາກພື້ນແລ້ວ, ດ້ວຍການຄວບຄຸມເສັ້ນທາງນີ້, ກອງທັບ ຊີຣີ ສາມາດສະກັດກັ້ນຂະບວນການລຸກຣື້ຂຶ້ນ ມຸ່ງໄປສູ່ທາງທິດໃຕ້, ຈາກນັ້ນ ກອງທັບຈະນຳໃຊ້ ຣາບີອາ ຄືດັ່ງ“ແປ້ນຢັນ“ ເພື່ອດຳເນີນບັ້ນຮົບທາງໜ້າດິນ, ທີ່ບຸກໂຈມຕີໃສ່ເທດສະບານພວມຖືກທະຫານລຸກຮື້ຂຶ້ນຢຶດຄອງຈາກທິດຕາເວັນອອກແຂວງ Idlib.
ການເຈລະຈາກ່ຽວກັບສັນຕິພາບຢູ່ ຊີຣີ ຖືກຈັດຕັ້ງຢູ່ເຊີແນວ, ປະເທດສະວິດ (ພາບ: Reuters) |
ໃນຂະນະນັ້ນ, ບົດລາຍງານຂອງວິທະຍຸສັງເກດສິດທິມະນຸດ ຊີຣີ ທີ່ມີສຳນັກງານຢູ່ ອັງກິດໃຫ້ຮູ້ວ່າ, ໄຊຊະນະນີ້ຂອງທະຫານລັດຖະບານ ຊີຣີ ແມ່ນມີການໜູນຊ່ວຍຈາກການບຸກໂຈມຕີທາງອາກາດຂອງຍົນລັດເຊຍ. ນັບແຕ່ວັນທີ 30/9/2015, ລັດເຊຍເລີ່ມດຳເນີນການບຸກໂຈມຕີທາງອາກາດໃສ່ບັນດາຖານທີ່ໝັ້ນຂອງກຳລັງກໍ່ການຮ້າຍຢູ່ ຊີຣີ ຕາມຄວາມຮຽກຮ້ອງຂອງອຳນາດການປົກຄອງປະທານາທິບໍດີ ຊີຣີ Bashar Al-Assad. ຕາມກະຊວງປ້ອງກັນປະເທດລັດເຊຍ, ນັບແຕ່ນັ້ນມາຮອດປະຈຸບັນ, ຍົນຂອງລັດເຊຍໄດ້ປະຕິບັດເຖິງ 5.600 ຖ້ຽວບິນ ເພື່ອຖີ້ມລະເບີດ ແລະ ຍິງລູກສອນໄຟເກືອບ 100 ລູກ ຈາກກຳ່ປັ່ນສູ້ຮົບໃສ່ບັນດາເປົ້າໝາຍກໍ່ການຮ້າຍຢູ່ ຊີຣີ. ການເຂົ້າຮ່ວມຂອງລັດເຊຍ ໄດ້ເຮັດໃຫ້ທ່າຮົບປີ້ນຂວ້ຳ, ຊ່ວຍໃຫ້ກອງທັບ ຊີຣີ ຍາດໄດ້ທ່າໄດ້ປຽບພໍສົມຄວນໃນພູມີປະເທດຕົວຈິງ, ໃນນັ້ນມີ ລາຕາເກຍ, ຜ່ານນັ້ນຍົກສູງທີ່ຕັ້ງຂອງປະທານາທິບໍດີ Assad ຂຶ້ນ.
ຄວາມບໍ່ລົງລອຍກັນຍັງຄົງຕົວຢູ່
ຕາມແຜນການແລ້ວ, ການເຈລະຈາສັນຕິພາບ ຊີຣີ ຈະຈັດຕັ້ງໃນວັນທີ 25/1, ແຕ່ພັດຖືກໂຈະໄວ້ ຍ້ອນຝ່າຍຕ່າງໆຍັງບໍ່ທັນເຫັນດີເປັນເອກະພາບ ຕໍ່ເລື່ອງຜູ້ໃດຈະເປັນຕົວແທນໃຫ້ບັນດາຄະນະຜູ້ແທນຝ່າຍຄ້ານ. ຕາມທັດສະນະຂອງເຢຍລະມັນ, ການເຈລະຈາລວມມີທະຫານແຕກທັບ ອິດສະລາມ ເຂົ້າຮ່ວມ, ແຕ່ວ່າພາກສ່ວນນີ້ບໍ່ແມ່ນ “ພວກກໍ່ການຮ້າຍຫົວຮຸນແຮງ“ເທື່ອ. ໃນຂະນະນັ້ນ, ຄະນະກຳມະການເຈລະຈາຂັ້ນສູງຂອງພັນທະມິດໂດຍ ຊາອຸດີ ອາຣາເບຍ ນຳໜ້າ, ໃຫ້ຮູ້ວ່າ ໄດ້ສົ່ງບັນຊີລາຍຊື່ຜູ້ແທນ 3 ຄົນເຂົ້າຮ່ວມການເຈລະຈາ. ແຕ່ບັນຊີລາຍຊື່ນີ້ພັດຖືກຕຳໜິຕິຕຽນຢ່າງແຮງ, ເພາະໄດ້ຈັດໃຫ້ Mohamed Alloush, ຜູ້ນຳຂອງກຸ່ມລຸກຮື້ຂຶ້ນ ກອງທັບອິດສະລາມເປັນຫົວໜ້າຄະນະ. ລັດຖະບານ ຊີຣີ ເຄີຍຖືວ່າ, ກອງທັບອິດສະລາມ ແລະ ກຸ່ມປະກອບອາວຸດອື່ນອີກຈຳນວນໜຶ່ງ ແມ່ນ “ກຳລັງກໍ່ການຮ້າຍ“, ເຊິ່ງແມ່ນກຳລັງທີ່ເຂົາເຈົ້າບໍ່ເຈລະຈາຢ່າງເດັດຂາດ. ຄຽງຄູ່ກັນນັ້ນ, ລັດຖະບານ ຊີຣີ ຍັງຮຽກຮ້ອງເປີດກວ້າງພາກສ່ວນຕົວແທນຂອງຝ່າຍຄ້ານ ໃຫ້ບັນດາກຸ່ມປະກອບອາວຸດຊາວ ເກີດ. ຝ່າຍລັດເຊຍກໍ່ອອກສຽງປະຕິເສດຂໍ້ສະເໜີຂອງ ຊາອຸດີ ອາຣາເບຍ ແລະ ຮຽກຮ້ອງການເຈລະຈາ ຕ້ອງມີການເຂົ້າຮ່ວມຂອງອະດີດ ຮອງນາຍົກລັດຖະມົນຕີ ຊີຣີ Qadri Jamil ກໍ່ຄືການນຳກຳລັງຊາວ ເກີດຢູ່ ຊີຣີ.
ຄວາມຫວັງໄດ້ປະກົດຂຶ້ນ
ມາຮອດປະຈຸບັນ, ຄວາມປະນິປະນອມເກືອບຄືວ່າບັນລຸໄດ້, ຕາມນັ້ນແລ້ວ, ຄະນະຜູ້ແທນສອງຝ່າຍທີ່ຄັດຄ້ານກັນ ສາມາດເຂົ້າຮ່ວມກອງປະຊຸມສັນຕິພາບຢູ່ ເຊີແນວ, ປະເທດ ສະວິດໄດ້, ທ່ານລັດຖະມົນຕີວ່າການກະຊວງການຕ່າງປະເທດ ອາເມລິກາ John Kerry ຢືນຢັນວ່າ, ມາຮອດປະຈຸບັນ, ບັນດາຝ່າຍໄດ້ມີຄວາມເຫັນດີເປັນເອກະພາບສູງຕໍ່ເລື່ອງພາຍຫຼັງສຳເລັດການເຈລະຈາສັນຕິພາບຢູ່ ຊີຣີຮອບທຳອິດ, ກຸ່ມໜູນຊ່ວຍສາກົນ ຊີຣີໄດ້ຮັບການຮຽກໂຮມ ເພາະວ່າບໍ່ມີໃຜຢາກໃຫ້ວິວັດທະນາການນີ້ຖືກຕັດຕອນ. ເຖິງຢ່າງໃດກໍ່ຕາມ, ທ່ານ Kerry ກໍ່ຍອມຮັບວ່າບັນດາການທ້າທາຍຍັງຢູ່ທາງໜ້າຢູ່. ເລື່ອງຊອກຫາວິທີແກ້ໄຂບັນຫາ ຊີຣີ ບໍ່ແມ່ນງ່າຍດາຍ ແລະ ຕ້ອງການມີເວລາຫຼາຍ.
ຍັງມີບັນຫາອື່ນອີກຖືກຖືວ່າມີຜົນສະທ້ອນບໍ່ໜ້ອຍ ເຖິງວິວັດທະນາການສັນຕິພາບຢູ່ ຊີຣີ, ນັ້ນແມ່ນອານາຄົດຂອງປະທານາທິບໍດີ Assad. ນີ້ບໍ່ແມ່ນບັນຫາໃໝ່ ແຕ່ສືບຕໍ່ແມ່ນບັນຫາທີ່ກໍ່ຄວາມໂຕ້ຖຽງກັນ ລະຫວ່າງລັດເຊຍ ແລະ ອາເມລິກາ. ໃນຂະນະທີ່ການຜັນແປຢູ່ສະໜາມຮົບເປັນການຢືນຢັນຢ່າງແຮງເຖິງຫຼັກໝັ້ນຂອງ ມົດສະກູ ກ່ຽວກັບອະນາຄົດດ້ານການເມືອງຂອງທ່ານ Assad ນັ້ນ, ອາເມລິກາຍັງຄົງສືບຕໍ່ຮັກສາທັດສະນະວ່າສົງຄາມຢູ່ ຊີຣີ ບໍ່ສາມາດສິ້ນສຸດໄດ້, ຍ້ອນວ່າທ່ານ Assad ບໍ່ຕ່າງຫຍັງກັບແມ່ເຫຼັກທີ່ດຶງດູດການກໍ່ການຮ້າຍ, ການໃຊ້ຄວາມຮຸນແຮງ ແລະ ບັນດາທະຫານຕໍ່ສູ້ເພື່ອສາສະໜາ ຈະສືບຕໍ່ສູ້ຮົບຖ້າຫາກວ່າທ່ານ Assad ຍັງຄົງຮັກສາຕຳແໜ່ງໄວ້. ເຖິງຢ່າງໃດກໍ່ຕາມ, ໃນຄວາມມານະພະຍາຍາມເພື່ອຊອກຫາຄວາມປະນິປະນອມ, ອາເມລິກາບໍ່ຍົກອອກຄຳຮຽກຮ້ອງບັງຄັບໃຫ້ລຶບຊື່ທ່ານ Assad ຄືດັ່ງເງື່ອນໄຂລ່ວງໜ້າຂອງວິວັດການຫັນປ່ຽນດ້ານການເມືອງຢູ່ ຊີຣີອີກ.
ການຜັນແປເຫຼົ່ານັ້ນ ໄດ້ຮັບຖືວ່າແມ່ນຄວາມຫວັງທີ່ດີ, ພ້ອມກັບບັນດາຄວາມມານະພະຍາຍາມຢ່າງບໍ່ຢຸດຢັ້ງຂອງປະຊາຄົມໂລກໃນການແກ້ໄຂການປະທະກັນຢູ່ ຊີຣີ, ຊາວ ຊີຣີ ພວມລໍຖ້າ “ແສງອະລຸນຂອງສັນຕິພາບ“ ຢູ່ໃນປະເທດທີ່ຖືກຖືວ່າ “ຖືກຈົມໃນເງົາມືດຂອງສົງຄາມ ໃນຕະຫຼອດ 5 ປີທີ່ຜ່ານມາ.“