ທ່ານລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ ຫງວຽນມິນກວາງ
|
(vovworld)- ກົດໝາຍວ່າດ້ວຍທີ່ດິນສະບັບປັບປຸງປີ 2013 ເລີ່ມມີຜົນສັກສິດ ນັບແຕ່ວັນທີ 1/7 ເປັນຕົ້ນໄປ. ການປະຕິບັດກົດໝາຍສະບັບນີ້ມີຄວາມໝາຍສຳຄັນ, ຕອບສະໜອງຄວາມຮຽກຮ້ອງຕ້ອງການໃນການພັດທະນາເສດຖະກິດສັງຄົມ, ຮັບປະກັນການຄຸ້ມຄອງທີ່ດິນຢ່າງແໜ້ນແຟ້ນ, ມີປະສິດທິຜົນ, ກະຈ່າງແຈ້ງ ແລະ ມີປະຊາທິປະໄຕ. ເພາະສະນັ້ນ, ການກະກຽມເພື່ອຜັນຂະຫຍາຍກົດໝາຍສະບັບນີ້ມີປະສິດທິຜົນໄດ້ຮັບການປະຕິບັດຢ່າງຄົບຊຸດ ແລະ ຕັ້ງໜ້າຈາກບັນດາທ້ອງຖິ່ນ, ຂະແໜງການ, ຂັ້ນຕ່າງໆໃນໄລຍະທີ່ຜ່ານມາ.
ຕົ້ນປີ 2014, ທ່ານນາຍົກລັດຖະມົນຕີຫວຽດນາມໄດ້ອອກຄຳສັ່ງກ່ຽວກັບການຜັນຂະຫຍາຍປະຕິບັດ ກົດໝາຍວ່າດ້ວຍທີ່ດິນ, ໃນນັ້ນ, ຮຽກຮ້ອງໃຫ້ຮີບເຮັ່ງກະກຽມບັນດາເງື່ອນໄຂເພື່ອປະຕິບັດກົດໝາຍ, ຈັດຕັ້ງປະຕິບັດກົດໝາຍວ່າດ້ວຍທີ່ດິນເປັນຢ່າງດີ, ສ້າງການຫັນປ່ຽນຢ່າງຈະແຈ້ງກ່ຽວກັບການຄຸ້ມຄອງ ແລະ ນຳໃຊ້ທີ່ດິນ. ໂດຍຖັດຈາກ ຄຳສັ່ງຂອງນາຍົກລັດຖະມົນຕີ, ບັນດາແຂວງ, ນະຄອນໄດ້ໄດ້ສ້າງແຜນການ, ຜັນຂະຫຍາຍປະຕິບັດ ກົດໝາຍວ່າດ້ວຍທີ່ດິນສະບັບປັບປຸງ, ຈັດຕັ້ງກອງປະຊຸມຝຶກອົບຮົມ, ເຜີຍແຜ່ກົດໝາຍວ່າດ້ວຍທີ່ດິນປີ 2013 ໃຫ້ແກ່ບັນດາພະນັກງານ, ການນຳເມືອງ, ຕາແສງທີ່ກ່ຽວຂ້ອງເຖິງການຄຸ້ມຄອງລັດກ່ຽວກັບທີ່ດິນ.
ເອົາໃຈໃສ່ປະກາດໃຊ້ເອກະສານນິຕິກຳ, ເຜີຍແຜ່ກົດໝາຍໃຫ້ແກ່ປະຊາຊົນ
ໃນຕະຫຼອດໄລຍະທີ່ຜ່ານມາ, ບັນດາກະຊວງ, ຂະແໜງການໄດ້ກວດກາລະບົບຈົດໝາຍລະຫວ່າງຂະແໜງ, ເອກະສານນິຕິກຳທີ່ຂຶ້ນກັບຂົງເຂດຂອງກະຊວງ, ຂະແໜງຕົນຄຸ້ມຄອງເພື່ອປັບປຸງເພີ່ມເຕີມ, ຫຼືຍື່ນສະເໜີຕໍ່ອົງການມີສິດອຳນາດປັບປຸງເພີ່ມເຕີມໃຫ້ສອດຄ່ອງກັບບັນດາຂໍ້ກຳນົດຂອງກົດໝາຍວ່າດ້ວຍທີ່ດິນ ແລະ ດຳລັດຕ່າງໆ ທີ່ແນະນຳການປະຕິບັດກົດໝາຍໂດຍລະອຽດ. ພ້ອມກັນນັ້ນ, ບັນດາອົງການສື່ມວນຊົນຍູ້ແຮງການໂຄສະນາເຜີຍແຜ່ກົດໝາຍກ່ຽວກັບທີ່ດິນໃຫ້ແກ່ປະຊາຊົນ. ເມື່ອຕີລາຄາໂດຍສັງເຂບກ່ຽວກັບວິວັດການນີ້, ທ່ານລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ຫງວຽນມິນກວາງ ໃຫ້ຮູ້ວ່າ :
“ ໃນໄລະທີ່ຜ່ານມາ, ກະຊວງຊັບພະຍາກອນ ແລະ ສິ່ງແວດລ້ອມໄດ້ຍື່ນສະເໜີລັດຖະບານຄຳສັ່ງຮຽກຮ້ອງບັນດາກະຊວງ, ຂະແໜງການ, ທ້ອງຖິ່ນຕ່າງໆ ຜັນຂະຫຍາຍປະຕິບັດ ກົດໝາຍ. ທີ 2, ພວກຂ້າພະເຈົ້າໄດ້ສົມທົບກັບບັນດາອົງການສື່ມວນຊົນປະຕິບັດວຽກງານ ໂຄສະນາເຜີຍແຜ່ກົດໝາຍເປັນຢ່າງດີເພື່ອໃຫ້ປະຊາຊົນ ແລະ ວິສາຫະກິດເຂົ້າໃຈ ແລະ ປະຕິບັດກົດໝາຍນີ້ໃຫ້ດີ ພ້ອມທັງສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງ ສ້າງບັນດາເອກະສານນະແນຳການປະຕິບັດກົດໝາຍ. ປະຈຸບັນ, ລັດຖະບານໄດ້ປະກາດໃຊ້ດຳລັດ 5 ສະບັບ. ກ່ຽວກັບຈົດໝາຍລະຫວ່າງຂະແໜງ, ກະຊວງຊັບພະຍາກອນ ແລະ ສິ່ງແວດລ້ອມໄດ້ຮຽບຮຽງຈົດໝາຍລະຫວ່າງຂະແໜງ 10 ສະບັບໃຫ້ສຳເລັດໂດຍພື້ນຖານແລ້ວ ແລະ ຈະປະກາດໃຊ້ໃນໄລຍະທີ່ຈະມາເຖິງ”
ສ້າງການຫັນປ່ຽນຢ່າງຈະແຈ້ງກ່ຽວກັບການຄຸ້ມຄອງ ແລະ ນຳໃຊ້ທີ່ດິນ
ການຈັດຕັ້ງປະຕິບັດກົດໝາຍວ່າດ້ວຍທີ່ດິນແມ່ນວິວັດການໜຶ່ງ ແລະ ຕ້ອງໄດ້ຮັບການຜັນຂະຫຍາຍຢ່າງຮອບດ້ານ, ຄົບຊຸດ. ລັດຖະບານໄດ້ວາງຈຸດໝາຍສະເພາະໜ້າໃນ 2 ປິ 2014-2015 ແມ່ນຕ້ອງສ້າງການຫັນປ່ຽນຢ່າງຈະແຈ້ງໃນທຸກດ້ານ. ບົນຈິດໃຈດັ່ງກ່າວ, ແມ່ນອົງການເສນາທິການຊ່ວຍລັດຖະບານກ່ຽວກັບການຄຸ້ມຄອງທີ່ດິນ, ກະຊວງຊັບພະຍາກອນ ແລະ ສິ່ງແວດລ້ອມຈັດຕັ້ງປະຕິບັດແຜນກຳນົດສັງລວມ, ແຜນການນຳໃຊ້ທີ່ດິນລະດັບຊາດຊຶ່ງໄດ້ຮັບການຮັບຮອງເອົາຈາກສະພາແຫ່ງຊາດ. ຄະນະກຳມະການປະຊາຊົນ ບັນດາແຂວງ, ນະຄອນໄດ້ປະກາດຢ່າງເປີດເຜີຍ ແລະ ຈັດຕັ້ງປະຕິບັດແຜນກຳນົດສັງລວມ, ແຜນການນຳໃຊ້ທີ່ດິນລະດັບແຂວງຊຶ່ງໄດ້ຮັບການອະນຸມັດ; ຊີ້ນຳແກ້ໄຂສະພາບການມອບດິນ, ໃຫ້ເຊົ່າທີ່ດິນຕາມລຳພັງໃຈ, ຄວບຄຸມຢ່າງແໜ້ນແຟ້ນການຫັນປ່ຽນຈຸດປະສົງນຳໃຊ້ທີ່ດິນປູກເຂົ້າ, ດິນປ່ານຳໃຊ້ເພື່ອຈຸດປະສົງພິເສດ, ດິນປ່າປ້ອງກັນໄປສູ່ການນຳໃຊ້ເພື່ອຈຸດປະສົງອື່ນໆ, ມີຮູບການມອບດິນ, ໃຫ້ເຊົ່າທີ່ດິນໃຫ້ສອດຄ່ອງກັບຂໍ້ກຳນົດຂອງກົດໝາຍວ່າດ້ວຍທີ່ດິນ. ເພື່ອຫຼີກລ້ຽງສະພາບນຳໃຊ້ທີ່ດິນແບບບໍ່ມີປະສິດທິຜົນ, ທ່ານລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ຫງວຽນມິນກວາງ ໃຫ້ຮູ້ວ່າ :
“ ນາຍົກລັດຖະມົນຕີຫວຽດນາມໄດ້ອອກຄຳສັ່ງກະຕຸກຊຸກຍູ້ດຳເນີນການກວດກາ, ຖອນທີ່ດິນຄືນ ແລະ ແກ້ໄຂສຳລັບບັນດາໂຄງການທີ່ນຳເຂົ້າເຄື່ອນໄຫວຢ່າງຊັກຊ້າ, ໝາກຜົນມີຢູ່ວ່າ ທົ່ວປະເທດໄດ້ແກ້ໄຂ, ຖອນທີ່ດິນຄືນໃນເນື້ອທີ່ເກືອບ 20.000 ແຮັກຕາ. ແຕ່ໝາກຜົນດັ່ງກ່າວຍັງຖືກຈຳກັດຢູ່ ເພາະເນື້ອທີ່ດິນຕ້ອງການຖອນຄືນຍ້ອນຄວາມຊັກຊ້າໃນການປະຕິບັດ. ເພື່ອແກ້ໄຂສະພາບດັ່ງກ່າວ, ກົດໝາຍວ່າດ້ວຍທີ່ດິນສະບັບປັບປຸງຄັ້ງນີ້ ມີລະບອບກຳນົດຢ່າງເຄັ່ງຄັດ ເຮັດໃຫ້ບັນດານັກລົງທຶນໃນວິວັດການພິຈາລະນາເຊົ່າທີ່ດິນຕອ້ງມອບເງິນເປັນຈຳນວນເທົ່າທຽມກັບຄ່າເຊົ່າທີ່ດິນໃນກຳນົດເວລານັ້ນ ແລະ ຖ້າຫາກໝົດກຳນົດ 24 ເດືອນ ເຊິ່ງບັນດານັກລົງທຶນຍັງບໍ່ສາມາດນຳເນື້ອທີ່ດິນເຂົ້ານຳໃຊ້ນັ້ນ, ລັດຈະຖອນເນື້ອທີ່ດິນນັ້ນຄືນ. ໄລຍະທີ່ຈະມາເຖິງ, ກະຊວງຊັບພະຍາກອນ ແລະ ສິ່ງແວດລ້ອມຈະເພີ່ມທະວີວຽກງານກວດກາເພື່ອຫຼີກລ້ຽງການລະເມີດກົດໝາຍ”
ໄປຄຽງຄູ່ກັບບັນດາວຽກງານດັ່ງກ່າວ, ການກຳນົດລາຄາທີ່ດິນ ກໍໄດ້ຮັບຄວາມເອົາໃຈໃສ່ຈາກບັນດາກະຊວງ, ຂະແໜງການ, ທ້ອງຖິ່ນຕ່າງໆ. ຕາມນັ້ນນັ້ນແລ້ວ, ກະຊວງຊັບພະຍາກອນ ແລະ ສິ່ງແວດລ້ອມ ສົມທົບກັບບັນດາກະຊວງ, ຂະແໜງການ, ຄະນະກຳມະການປະຊາຊົນບັນດາແຂວງ, ນະຄອນ ດຳເນີນການສ້າງສາລະບານລາຄາທີ່ດິນເພື່ອຍື່ນສະເໜີລັດຖະບານ; ຊີ້ນຳ, ແນະນຳ, ກວດກາການສ້າງສາລະບານລາຄາທີ່ດິນ ແລະ ກຳນົດລາຄາທີ່ດິນ ໂດຍລະອຽດຢູ່ທ້ອງຖິ່ນ; ຄົ້ນຄ້ວາ, ທົດລອງສ້າງແຜນທີ່ລາຄາທີ່ດິນ ແລະ ສ້າງຖານຂໍ້ມູນກ່ຽວກັບລາຄາທີ່ດິນ.
ກົດໝາຍວ່າດ້ວຍທີ່ດິນສະບັບປັບປຸງປີ 2013 ມີຄວາມສຳຄັນພິເສດໃນການຄຸ້ມຄອງ ແລະ ນຳໃຊ້ທີ່ດິນ ກໍຄືໃນການພັດທະນາເສດຖະກິດສັງຄົມ. ເລື່ອງບັນດາກະຊວງ, ຂະແໜງການ, ທ້ອງຖິ່ນຕ່າງໆກະກຽມທຸກເງື່ອນໄຂທີ່ດີ ເພື່ອປະຕິບັດກົດໝາຍ ຈະຊ່ວຍໃຫ້ກົດໝາຍເຂົ້າສູ່ຊີວິດຕົວຈິງໂດຍໄວ, ຮັບປະກັນການຄຸ້ມຄອງທີ່ດິນຢ່າງແໜ້ນແຟ້ນ ແລະ ມີປະສິດທິຜົນ.